Lamulirani Mkwiyo Wanu!

“KATSWIRI wa matenda a misala wapeza kuti anthu okwiya, aukali ngothekera kumwalira asanafike zaka 50 kuposa anthu amene ngabata ndipo okhulupirira.” Inasimba motero The New York Times ya pa January 17, 1989. Dr. Redford B. Williams, profesa wa pa Duke University Medical Center mu Durham, North Carolina, “anazika zopeza zake pa maphunziro angapo.” “Mitima yokhulupirira imakhala kwa nthaŵi yaitali, iye anatero, chifukwa chakuti njochinjirizidwa ku zosakaza za dongosolo la mitsempha yochita chisoni,” inasimba motero Times.

Mkwiyo ungakweze liŵiro la mwazi, kupangitsa mavuto a kapumidwe, ndipo uli ndi ziyambukiro zina zoipa. Kulunda kungasokoneze dongosolo la kuganiza, ndipo zotulukapo zake kaŵirikaŵiri zimakhala nyengo ya kuchita tondovi kwa maganizo. Choipitsitsanso, chiri mmene mkwiyo umayambukirira munthuyo pa thanzi lake lauzimu. Nzosadabwitsa kuti Baibulo likuti: “Mtima wabwino ndi moyo wa thupi.” (Miyambo 14:30) Inde, kulamulira mkwiyo wanu nkochilikiza umoyo. Komabe onani zifukwa zina zochitira tero.

Londolani Njira Yanzeru

Munthu aliyense woganiza bwino amafuna kuchita mwanzeru. Njira imodzi yochitira ichi ndiyo kusonyeza kudziletsa. Mogwirizana ndi ichi, Miyambo 29:11 ikuti: ‘Chitsiru chivumbulutsa mkwiyo wake wonse; koma wanzeru auletsa nautontholetsa.’

M’Baibulo liwu lakuti “mkwiyo” kaŵirikaŵiri limalozera ku mkhalidwe wofala umene umasonkhezera munthu kulondola njira inayake. ‘Chitsiru’ chimavumbulutsa mkwiyo wake wonse, chifukwa sichitha kuulamulira. Iye amalola mkwiyo wake kutuluka osalingalira za zotulukapo zake. Mkwiyo wa chitsiru poyamba ungampangitse kukhala ndi nkhope yokwiya. Kenaka mkwiyo wake ungatuluke m’kalankhulidwe ndi kachitidwe kachiwawa kamene kali kopusa.

Komabe, mkwiyo wa munthu wanzeru umakhala ‘woletsedwa ndi wotontholetsedwa.’ Iye amaulamulira ndipo amapenda mosamalitsa chimene chingachitike ngati atulutsa mkwiyo wake. Ngakhale ngati ali ndi chifukwa chabwino chokwiyira, iye amazindikira kuti kuchita kanthu mofulumira ali ndi maganizo aukaliwo kungavulaze kwabasi. Chotero, amasonyeza kudziletsa ndikuleka kusonyeza mkwiyo wosasamala, wosadziletsa. Iye amayang’ana kwa Yehova kaamba ka thandizo, mwinamwake kupereka pemphero lofulumira, lakachetechete. Patapita nthaŵi, kaamba ka ubwino wa onse oloŵetsedwamo, munthu wanzeru amakhala wokhozabe kuletsa mkwiyo wake ndi kulingalira mogwirizana ndi Malemba ndi chifuno cha Mulungu. Kuwonjezerapo, munthu wanzeruyo amazindikira kuti sayenera kusunga mkwiyo chifukwa chakuti kutero kungamlimbitse m’kachitidwe kopanda nzeru ndi kutsogolera ku chimo.

Munthu wanzeru amagwiritsiranso ntchito uphungu wa mtumwi Paulo uwu: ‘Kwiyani, koma musachimwe; dzuwa lisalowe muli chikwiyire, ndiponso musampatse malo Mdyerekezi.’ (Aefeso 4:26, 27) Ngati inu mwakwiya molungamitsika, musasunge mkhalidwe wokwiyawo, kulola dzuwa kulowa mudakali chikwiyire. Chifukwa ninji? Chifukwa chakuti mwakutero mukampatsa mpata Satana Mdyerekezi kukugwiritsirani ntchito, mwinamwake kukupangitsani kuchita chinachake choipadi ndi kukumana ndi kupanda chiyanjo cha Mulungu. (Salmo 37:8, 9) M’malo mwake, lamulirani mkwiyo wanu ndipo chitanipo kanthu mofulumira kuti muthetse mavuto amene angakhale anadzutsa mkwiyo wanuwo.​—Mateyu 18:15-17.

Khalani Wofatsa Mtima

Mwambi wina ukuti: ‘Wopanda chikamwakamwa apambana kudziwa; ndipo wofatsa mtima ali wanzeru.’ (Miyambo 17:27) Munthu amene ali ndi chidziŵitso cha Mawu a Mulungu ‘alibe chikamwakamwa’ ndipo samalola mawu ake kutuluka mwaufulu, mwamphamvu, makamaka pamene wakwiyitsidwa. Pozindikira unansi wake ndi Yehova ndi malo ake oyenera m’gulu la Mulungu, iye sadzalola mkwiyo kumpambana. M’malo mwake, ‘wofatsa mtima’ amakalamira kukhala wofatsa ndi wolinganizika m’maganizo. Pokhala ndi mtima woterowo, nanunso mungakhoze kulamulira mikhalidwe imene ingachititse munthu wopusa kuchimwa.

Mogwirizana ndi izi, tikuŵerenga kuti: “Wosakwiya msanga apambana kumvetsa; koma wansontho akuza utsiru.” (Miyambo 14:29) Kukhala wansontho pamene maganizo anu akwiyitsidwa kungatsogoze ku kachitidwe kopusa. Nkwabwino chotani nanga kulingalira zomwe zingatulukepo ku kulankhula kapena khalidwe losalamulirika loterolo! Apo phuluzi, munthu angachite mwansontho ndikuchita chinthu chopanda nzeru, mwakutero ‘kukuza utsiru.’ Chotero, khalani ‘wosakwiya msanga,’ monga momwe aliri Mulungu, ndipo mudzapeŵa machitidwe ansontho ndi opanda nzeru.​—Eksodo 34:6.

Peŵani Kunyada

Chifukwa cha kunyada, munthu angakhale wosalingalira ena ndipo ngakhale wokwiya msanga. Chotero tikuŵerenga kuti: ‘Mwamuna wamkwiyo aputa makangano; waukali achuluka zolakwa.’ (Miyambo 29:22) Ngati munthu salamulira mkwiyo wake koma ‘akwiya,’ iye angayambitse ‘makangano,’ ngakhale pakati pa mabwenzi. Ndipo munthu ‘waukali achuluka zolakwa.’ Inde, iye angachitedi chimo​—chinachake chimene munthu wanzeru ndiponso waumulungu angafune kupeŵa.

Musaiwale konse kuti Yehova samavomereza kunyada ndi kukwiya. (Miyambo 16:18) Nkwabwino koposa kufuna thandizo la Mulungu kuti mupirire chiyeso ndi kuchita modzichepetsa koposa kugonjera ku mkwiyo kapena ukali monyada.​—Miyambo 29:23.

Chitani Zinthu Modzichepetsa

Ngati mwadzudzulidwa ndi winawake wokhala ndi ulamuliro mufunikira kudzichepetsa. Panthaŵi yoteroyo, nchiyani chimene mungaganize choyamba? Mwinamwake kuyankha mwamsanga, ndi mawu osakonzekera. Koma Baibulo likupereka uphungu wakuti: ‘Ngati mkulu akukwiyira, usasiye malo ako; chifukwa chifatso chipembedza utachimwa kwambiri.’ (Mlaliki 10:4) Kuyankha modzichepetsa nkwabwino koposa chotani nanga! Ndithudi, “mayankhidwe ofatsa abweza mkwiyo.” (Miyambo 15:1) Kuyankha modzichepetsa kumafunikira kudziletsa, koma njira yanzeruyi imachotsa mavuto ndikuchilikiza maunansi amtendere.

Ngati ndinu mnkhole wa chidzudzulo chosayenerera, kukuyembekezeredwa kuti munthu wolamulirayo adzakulolani kulongosola nkhaniyo. Ndithudi, kulongosola kulikonse kuyenera kuchitidwa modzichepetsa ndichiyembekezo chakuti kulingalira kolakwako kuwongoleredwe. Munthu wolamulirayo akafunikira kulamulira mkwiyo wake kotero kuti apereke mpata ku kulongosolako, ndipo ichi chikasonyeza kuti iye ngwanzeru ndiponso wamphamvu.

Kaya Mkristu ngolamulira kapena ayi, iye ayenera kukumbukira kuti ‘wosalamulira mtima wake akunga mudzi wopasuka wopanda linga.’ (Miyambo 25:28) Munthu wosaleza mtima ndipo salamulira mkwiyo wake amakhala wolowereredwa mwamsanga ndi maganizo oipa amene angamsonkhezere kuchita njira zoipa. Yesu Kristu, amene anapereka chitsanzo changwiro, anali ‘wofatsa ndi wodzichepetsa mtima.’ (Mateyu 11:29) Kuwonjezerapo, kufatsa ndiko chipatso cha mzimu woyera wa Mulungu, kumene Akristu ayenera kupempherera.​—Luka 11:13; Agalatiya 5:22, 23.

Kodi Nchifukwa Ninji Muyenera Kulamulira Mkwiyo Wanu?

Timawayamikira mawu ofatsa, komatu kaŵirikaŵiri sitimadziŵa chimene chimayambitsa mkwiyowo. Eya, munthu wopanda malamulo abwino angapambane m’kubisa mkwiyo wake ndi chosankha chake cha kukangana ndi munthu wina pa mlandu weniweni kapena wongopeka! Mwachinyengo, iye angakhale akudikirira kaamba ka nthaŵi yabwino yonena chinachake chopweteka munthu amene amamudayo. Ndithudi, Mkristu sayenera kulola mtima woterowo kuyambika mwa iye, popeza kuti mtumwi Yohane analemba motere: ‘Koma iye wakumuda mbale wake ali mumdima, nayenda mumdima, ndipo sadziwa kumene amukako, pakuti mdima wamdetsa maso ake.’ Yohane ananenanso kuti: ‘Yense wakudana ndi mbale wake ali wakupha munthu; ndipo mudziwa kuti wakupha munthu aliyense alibe moyo wosatha wakukhala mwa iye.’​—1 Yohane 2:11; 3:15.

Ngati kunyada, chinyengo, kapena chikhoterero china chirichonse chosakhala chaumulungu chiri chobisidwa, kubisa koteroko sikumapusitsa Mulungu. Ngakhale kudzinenera kofuula kapena kudziwonetsera kukhala wolungama sikungabise kwa Mulungu chimene chiri mumtima. Miyambo 16:2 ikuti: ‘Njira zonse za munthu ziyera pamaso pake; koma Yehova ayesa mizimu.’ Mulungu sanyengedwa konse.

Pamenepo, kaamba ka ubwino wanu ndi pazifukwa Zamalemba zimene takambitsiranapo, muyenera kukhala ngati Yesu ndi anthu ena anzeru amene apeŵa kunyada ndipo achita zinthu mofatsa. Mwanjira iliyonse, lamulirani mkwiyo wanu!