Numbernan

2 Yehova a bisa Moises i Áròn: 2 “E israelitanan mester establesé nan kampamentu kaminda nan grupo ku ta konsistí di tres tribu ta asigná; kada hòmber mester establesé su kampamentu banda di e señal ku ta identifiká su famianan parti di tata.* Nan mester establesé nan kampamentu rònt di e tènt di reunion, i nan tèntnan mester ta kara pa e tènt di reunion.

3 Na banda ost, kaminda solo ta sali, e grupo di tres tribu ku e tribu di Huda ta na kabes di dje* mester establesé nan kampamentu na e lugá ku nan a ser asigná na dje.* Kabesante di e desendientenan di Huda ta Násòn, yu hòmber di Amínadab. 4 Den su ehérsito tin 74.600 hòmber registrá. 5 E tribu di Ísakar mester establesé su kampamentu banda di e tribu di Huda. Kabesante di e desendientenan di Ísakar ta Netanel, yu hòmber di Zuar. 6 Den su ehérsito tin 54.400 hòmber registrá. 7 Na otro banda di e tribu di Huda lo tin e tribu di Zébulòn. Kabesante di e desendientenan di Zébulòn ta Éliab, yu hòmber di Helòn. 8 Den su ehérsito tin 57.400 hòmber registrá.

9 Den e ehérsito ku e tribu di Huda lo dirigí, tin 186.400 hòmber registrá. Ora e pueblo ta sigui ku su biahe, e ehérsito akí mester sali promé.

10 Na banda zùit, e grupo di tres tribu ku e tribu di Ruben ta na kabes di dje* mester establesé nan kampamentu na e lugá ku nan a ser asigná na dje. Kabesante di e desendientenan di Ruben ta Elisur, yu hòmber di Sedeur. 11 Den su ehérsito tin 46.500 hòmber registrá. 12 E tribu di Símeòn mester establesé su kampamentu banda di e tribu di Ruben. Kabesante di e desendientenan di Símeòn ta Selumiel, yu hòmber di Zurisadai. 13 Den su ehérsito tin 59.300 hòmber registrá. 14 Na otro banda di e tribu di Ruben lo tin e tribu di Gad. Kabesante di e desendientenan di Gad ta Eliasaf, yu hòmber di Réuèl.* 15 Den su ehérsito tin 45.650 hòmber registrá.

16 Den e ehérsito ku e tribu di Ruben lo dirigí, tin 151.450 hòmber registrá. Ora e pueblo ta sigui ku su biahe, e ehérsito akí ta esun di dos ku mester sali.

17 Ora ta tempu pa move e tènt di reunion, e kampamentu di e levitanan mester ta meimei di e otro kampamentunan.

E tribunan mester biaha den mesun órden ku nan ta establesé nan kampamentu; kada tribu mester keda na su lugá i huntu ku su grupo ku ta konsistí di tres tribu.

18 Na banda wèst, e grupo di tres tribu ku e tribu di Efraím ta na kabes di dje* mester establesé nan kampamentu na e lugá ku nan a ser asigná na dje. Kabesante di e desendientenan di Efraím ta Elisama, yu hòmber di Amihud. 19 Den su ehérsito tin 40.500 hòmber registrá. 20 E tribu di Mánases mester establesé su kampamentu banda di e tribu di Efraím. Kabesante di e desendientenan di Mánases ta Gamaliel, yu hòmber di Pedasur. 21 Den su ehérsito tin 32.200 hòmber registrá. 22 Na otro banda di e tribu di Efraím lo tin e tribu di Bènyamin. Kabesante di e desendientenan di Bènyamin ta Abidan, yu hòmber di Gideoni. 23 Den su ehérsito tin 35.400 hòmber registrá.

24 Den e ehérsito ku e tribu di Efraím lo dirigí, tin 108.100 hòmber registrá. Ora e pueblo ta sigui ku su biahe, e ehérsito akí ta esun di tres ku mester sali.

25 Na banda nort, e grupo di tres tribu ku e tribu di Dan ta na kabes di dje* mester establesé nan kampamentu na e lugá ku nan a ser asigná na dje. Kabesante di e desendientenan di Dan ta Ahiézer, yu hòmber di Amisadai. 26 Den su ehérsito tin 62.700 hòmber registrá. 27 E tribu di Áser mester establesé su kampamentu banda di e tribu di Dan. Kabesante di e desendientenan di Áser ta Pagiel, yu hòmber di Ókran. 28 Den su ehérsito tin 41.500 hòmber registrá. 29 Na otro banda di e tribu di Dan lo tin e tribu di Nèftali. Kabesante di e desendientenan di Nèftali ta Ahira, yu hòmber di Énan. 30 Den su ehérsito tin 53.400 hòmber registrá.

31 Den e ehérsito ku e tribu di Dan lo dirigí, tin 157.600 hòmber registrá. Ora e pueblo ta sigui ku su biahe, e ehérsito akí mester ta e último ku ta sali, sí, e último grupo ku ta konsistí di tres tribu.”

32 Eseinan tabata e israelitanan registrá segun nan famianan parti di tata. Na tur, e kantidat di hende hòmber den e kampamentunan ku a ser registrá pa forma parti di e ehérsito tabata 603.550. 33 Pero manera Yehova a ordená Moises, nan no a registrá e levitanan huntu ku e otro israelitanan. 34 E israelitanan a hasi tur loke Yehova a bisa Moises. Nan tabata establesé nan kampamentu segun e gruponan ku tabata konsistí di tres tribu, i segun mesun órden, nan tabata desharmá e kampamentu pa sigui ku nan biahe. Nan tabata agrupá segun nan famia i segun nan famianan parti di tata.