Isaías

61 Señor Soberano Yehova a duna mi su spiritu santu,

pasobra Yehova a skohe* mi pa anunsiá bon notisia na hende mansu.

El a manda mi pa mi kura* hende ku tin kurason kibrá,

pa mi anunsiá libertat na katibu

i pa mi habri wowo di hende prezu.

 2 El a manda mi pa mi anunsiá ku e tempu a yega pa Yehova demostrá miserikòrdia* na hende mansu

i pa anunsiá ku e tempu a yega pa nos Dios tuma vengansa riba su enemigunan.

I el a manda mi pa mi konsolá tur hende ku ta yora.

 3 El a manda mi pa kuida e hendenan ku ta yora pa Siòn.

El a manda mi duna nan un korona di flor pa nan pone riba nan kabes en bes di shinishi;

el a manda mi duna nan zeta pa asina nan por ta kontentu en bes di ta tristu

i el a manda mi duna nan un mantel ku nan por bisti pa alabá mi en bes di ta tur desanimá.

I hende lo yama nan palu grandi di hustisia;

sí, nan ta plantashon di Yehova pa e glorifiká su mes.*

 4 Nan lo rekonstruí e ruinanan di hopi tempu pasá.

Nan lo restorá e lugánan ku a keda bandoná den pasado;

nan lo drecha e statnan ku a ser destruí,

sí, e lugánan ku a keda desolá pa hopi tempu.

 5 “Hende estranhero lo bini i kuida boso tounan,

i hende estranhero lo ta boso kunukero, i nan lo kuida boso kunukunan di wendrùif.

 6 Anto hende lo yama boso saserdote di Yehova;

nan lo yama boso sirbidó di Dios.

Boso lo usa rikesa di e nashonnan,

i boso lo ta orguyoso di e rikesanan ku boso haña di nan.*

 7 En bes di bèrgwensa, boso lo haña dòbel bendishon,

i en bes di mi pueblo sinti su mes humiá, nan lo dal gritu di alegria pa motibu di loke nan a risibí.

 8 Ami, Yehova, stima hustisia;

mi ta odia ladronisia i inhustisia.

Mi ta fiel, i lo mi duna nan nan rekompensa,

i lo mi sera un pakto eterno ku nan.

 9 Nan yunan* lo ta konosí entre e nashonnan,

i nan desendientenan lo ta konosí entre e pueblonan.

Tur hende ku mira nan lo rekonosé

ku nan ta e yunan* ku Yehova a bendishoná.”

pasobra el a bisti mi e pañanan di salbashon.

El a lora mi den e mantel* di hustisia.

Mi ta manera un brùidehòm ku ta bisti un tulband*

i manera un brùit ku ta dòrna su mes ku su prendanan.

11 Pues, manera tera ta pone simia sprùit

i un hardin fértil ta pone loke tin sembrá den dje krese,

asina, den bista di tur nashon, Señor Soberano Yehova

lo pone hustisia krese i pone hende alab’é.