3 Huan

1 Esaki ta un karta di ami, e ansiano,* na nos kerido ruman Gayo, ku di bèrdat mi ta stima.

2 Ruman stimá, mi ta pidi den orashon pa tur kos sigui bai bon ku bo i pa bo sigui gosa di bon salú, sí, manera ta bayendo ku bo kaba. 3 Pasobra mi a keda masha kontentu ora e rumannan a bini i a duna testimonio di bo fieldat na e bèrdat, segun ku bo ta sigui kana den e bèrdat. 4 No tin nada ku ta hasi mi mas kontentu* ku esaki: di tende ku mi yunan ta sigui kana den e bèrdat.

5 Ruman stimá, bo ta demostrá bo fieldat den tur loke ku bo ta hasi pa e rumannan, maske bo no konosé nan. 6 Nan a duna testimonio dilanti di e kongregashon di bo amor. Sea asina bon di yuda nan, na un manera ku ta digno pa sirbidó di Dios, ku loke nan tin mester pa sigui nan biahe. 7 Pasobra ta pa motibu di e nòmber di Dios nan a sali bai prediká, sin tuma nada for di hende di e nashonnan.* 8 P’esei nos tin e obligashon di mustra hospitalidat na personanan asina, pa nos por bira kompañero di trabou den e bèrdat.

9 Mi a skirbi e kongregashon un karta, ma Diótrefes, ku gusta ta na promé lugá den nan, no ta aseptá nada di nos ku rèspèt. 10 P’esei, si mi bini, lo mi hala atenshon na loke e ta hasi; entre otro, e ta blo kana papia malu di nos. Anto komo ku e no a keda satisfecho ku esei so, e ta nenga di risibí e rumannan ku rèspèt, i esnan ku sí ke risibí nan, e ta purba di stroba i di saka for di kongregashon.

11 Ruman stimá, no imitá loke ta malu, sino loke ta bon. Esun ku ta hasi bon ta bini di Dios. Esun ku ta hasi malu no a siña konosé Dios. 12 Tur e rumannan ta papia bon di Demetrio, i e bèrdat mes ta konfirmá esaki. De echo, nos tambe ta duna testimonio di dje, i bo sa ku e testimonio ku nos ta duna ta bèrdat.

13 Mi tin hopi kos di konta bo, pero mi no ke pone nan den un karta. 14 Mi ta spera di mira bo pronto, i nos lo papia kara kara.

Pas sea ku bo.

E amigunan* ta manda kumindamentu. Kumindá e amigunan pa mi, kada un na nan nòmber.