Flor Ta Mustra Cu Un Persona Ta Interesá Den Bo

DJE CORESPONSAL DI SPIERTA! NA COLOMBIA

Un mucha chikitu fasiná ta coge un boshi di boterbloem den su man gorditu i ta core bai cerca Mami cu su hayasgo precioso. Na un stènd cant’i caminda, un esposo amoroso ta selectá un dozijn di rosa pa su casá, pa mustr’é cuantu e stim’é. Un yu homber apreciativo ta yama e floresteria den becindario pa bestèl dalianan frescu pa alegrá e dia di su mama. Un ama di cas dedicá ta pone un buket di clavel di diferente color ariba den su garoshi di supermercado. Nan lo pone e toke final na su cas decorá cu bon gustu.

FLOR ta conmové e curason di tantu hóben como bieu. Nan ta un manera magnífico pa transmití e sintimentu di cu “Tin un persona interesá den bo.” Un proverbio spañó ta bisa: “Esun cu no ta gradicidu pa un rosa, lo no ta gradicidu pa nada.” (Quien no agradece una rosa, no agradecerá ninguna cosa.)

Benta di flor ta creciendo rápidamente awor manera nunca promé. Den e era aki di transporte aéreo rápido, flor por ser plantá leu dje floresteria, supermercado i stèndnan cant’i caminda, na unda nan ta capta e atencion di esnan cu ta pasa forbij. E revista Time a bisa cu e industria di flor ta “creciendo rápidamente i ta cambiando asta mas rápido: mas i mas dje produccion ta biniendo dje hemisferio sur—principalmente for di Colombia, cu a bira e di dos exportador mas grandi despues di Hulanda.”

Broeikas Cubrí cu Plestik i Lagonan Artificial

Cu mas di 25 aña den e industria, Colombia ta number un na mundu den e exportacion di clavel of anjers, miéntras cu e ta bin na di dos lugá den benta total di flor. Na 1964 un studiante di universidad na California, Merca, a haci un estudio via computer pa determiná cua ta e sitionan cu tin e clima óptimo pa cultivacion di flor henter aña dor. Su conclusion tabata cu e clima i altitud dje sitio leu di laman dje conchi den cua Bogotá ta situá, djis pa nort dje evenar i casi 9.000 pia den Cerunan di Andes, tabatin e condicionnan ideal.

E sabana asombrosamente berde di Santa Fe de Bogotá, caminda 92 porciento di Colombia su floricultura pa exportacion ta situá, ta dorná cu un cantidad di lagonan artificial i broeikas cubrí cu plestik. Paden dje broeikasnan aki cu structura di palu of metal, un clima di primavera cuidadosamente controlá ta cuida miyones di clavel, dalia, rosa, crisant, alstromerias i hopi otro variedad mas, cu pronto lo ser cortá i paketá pa manda Norteamérica, Europa i Asia.

E temperatura ideal pa cultivacion di flor ta entre 18 pa 20 grado Celsius. Den e sabana esei ta e temperatura normal den dia henter aña. Aki, awaceru ta abundá, e tera tin hopi gordura i tin trahadornan manual disponibel cu tin salario abou. Durante anochi, e temperatura por baha te cu cerca dje punto di vries i de bes en cuando ta congelá bira 2 grado Celsius bou di cero. Rookpot, peranan di lus di alto voltahe of sprinkler ta protehá e flornan contra e friu. E peranan di lus ta sirbi tambe pa extendé e oranan di lus di dia, manteniendo asina cierto mata lantá i purando nan crecementu.

Produccion Programá Hopi Tempu Adelantá

Mas cu 120.000 trahador na Colombia ta enbolbí den un fase of otro dje industria di flor. Entre nan tin hopi Testigo di Jehova cu ta biba den comunidadnan plamá riba e sabana. Benito Quintana, un anciano cristian den un dje congregacionnan na Facatativá, ta traha como supervisor di produccion na un kwekerij. E ta splica: “Lunanan di antemano, nos tin cu programá e produccion pa satisfacé e mercado su demandanan di temporada. Ta importá clavelnan materno for di Hulanda of Italia, dalianan materno for di Flórida. Hende muher ta corta e spruitnan chikitu cu cuidou, i ta planta nan den montonnan na rij den un broeikas calor caminda ta muha nan cu un neblina di awa te ora nan saca rais. Dalianan ta tuma 12 dia na 20 te 35 grado Celsius, i dos ora extra di lus durante anochi. Clavelnan ta tuma 23 dia na un temperatura entre 15 pa 25 grado Celsius, sin lus anochi. Despues nos ta transferí e matanan chikitu pa bakinan den un otro broeikas caminda nan ta ser enrikesé cu substancianan nutritivo, nan ta ser fumigá i muhá te ora nan saca flor, seis luna pa clavel i tres luna pa dalia.”

Trabou Duru den Temporada Druk

Ora e tempu pa corta flor yega, hende muher ta esnan cu ta haci e trabou mas mihó, preferiblemente sin handschoen i cu mannan limpi-limpi. Mashin no por husga con hopi e konopinan a habri of con stret e stengelnan ta, factornan cu ta determiná e calidad dje flor.

Judith Corredor, di Facatativá, ta splica: “Hende muher tin e pacenshi i e toke suave i tambe e velocidad i e abilidad cu ta necesario. Ora nos drenta e broeikas mainta trempan,” Judith ta sigui, “hopi bes e sabana ta cubrí cu neblina; por ta masha friu, asta por ta vries. Hopi dje mucha muhernan ta bisti shal. Durante dia ta bira mas calor, tin biaha te cu 32 grado Celsius. E trabou ta duru, specialmente den e temporada druk ora nan ta pura nos i nos mester traha overtime.”

Un Mensahe Colorido i Yen di Fragancia

Despues di corta e flornan, ta hiba nan na un cuarto special caminda tin aire i lus na abundancia. Aki, hende muher ta selectá i ta clasificá nan segun e calidad dje flornan i con stret, diki i largu e stengelnan ta. Despues ta lora e flornan den plestik transparente 25 den cada bòshi, cla pa paketá. Ta scoge solamente e mihónan pa exportacion.

Hende homber ta paketá e flornan den cahanan di golfkarton special cu tin e nomber dje kwekerij riba dje—den un caha ta bai 24 bòshi di clavel. E ruman di Benito, Alehandro Quintana, cu ta traha den e departamento di paketá, ta bisa: “Nos tin cu traha lihé, ya cu flor ta entre e cultivonan cu ta daña mas lihé. Nos compania tin dos pomp cu ta chupa e aire cayente for dje cahanan, 112 caha a la bes, miéntras cu ta forsa aire friu den nan pa dos ora largu, bahando asina e temperatura dje flornan te na un par di grado riba cero. Despues ta seya e buracunan den e cahanan, i ta mantené e flornan den un depósito friu te ora carga nan den trucknan pa transportá nan pa aeropuerto.”

N’e Aeropuerto Internacional El Dorado di Bogotá, e flornan ta pasa dor di inspeccionnan di exportacion i despues ta pone nan den facilidadnan di almacenahe friu pa algun ora, te ora e mercancia ser cargá riba avionnan grandi pa ser transportá pa puntonan di distribucion den exterior. Dentro di djis algun dia, e flornan aki lo habri nan pétalonan den cas, oficina, kambernan di enfermonan i otro caminda, transmitiendo un mensahe colorido i yen di fragancia cu tin un persona interesá.

Un Persona cu di Berdad Ta Interesá

Casi tur caminda cu nos bai riba tera, nos ta haña flor pa nos deleite. Nos ta haña nan haltu ayá den e cerunan n’e rand di camponan yen di sneu i gletsjer, den e mondinan i sabananan, na cantu di corientenan di awa i riunan, abou cantu di laman i asta den desiertonan cayente i secu. Flor a existí hopi tempu promé cu hende a yega na existencia. Botániconan ta sigurá cu ‘matanan di flor ta e base pa tur bida animal i humano. Sin nan, animal ni hende lo por existí.’

Cu perspicacia, Rey Sálomon a declará: ‘Dios a traha tur cos bunita na su tempu.’ (Eclesiástes 3:11) Esaki ta incluí Dios su regalo di flor den tur nan variedad i splendor. Desde tempu inmemorabel nan a conmové e curason di tantu hóben como bieu. Sí, Dios di berdad ta interesá den nos!

[Kuadro na página 25]

Pa Laga Flor Wanta Mas

• Hinca e stengelnan bou di awa, anto corta nan schuin promé cu pone e flornan den vas. Gotanan di awa cu ta pega na e punta dje stengelnan lo prevení aire di drenta i asina blokea awa i substancianan nutritivo di drenta despues.

• Segun e revista GeoMundo, horticulturistanan colombiano a bisa cu un píldora di aspirin, un telep di sucu of un tiki cola agregá n’e awa lo mantené e flornan frescu pa mas tantu tempu. Cambia e awa cada dos pa tres dia, usando awa frescu cu ta na temperatura normal, aunke por usa awa lou pa pone e konopinan habri mas lihé.

• Por rebibá flornan un tiki marchitá dor di hinca e stengelnan den awa cayente pa dies minuut miéntras ta sprengu e pétalonan cu awa friu. Mantené e flornan leu di fuentenan di calor, for di coriente di aire i for di lus directo di solo.