Explotacion Sexual di Mucha—Un Problema Mundial
DJE CORESPONSAL DI SPIERTA! NA SUECIA
Sociedad humano ta ser sagudí dor di un forma escandaloso di abusu di mucha cu ta di un alcanse i naturalesa cu no tabata masha conocí te cu algun aña pasá. Pa mira kico lo por haci tocante dje, representantenan di 130 nacion a reuní na Stockholm, Suecia, n’e promé Congreso Mundial Contra Explotacion Sexual Comercial di Mucha. Un coresponsal di Spierta! na Suecia tambe tabata presente.
ORA Magdalen tabatin 14 aña, el a ser tentá pa tuma un trabou como “anfitriona” den un bar na Manila, Filipínas. En realidad, su trabou a enbolbé hiba clientenan masculino na un kamber chikitu i desbistí su curpa pa nan explotacion sexual—un promedio di 15 homber pa anochi i 30 riba diasabra. Tin biaha, ora e tabata bisa cu e no tabata por mas, su manager tabata fors’é p’e sigui. Hopi bes el a terminá su dia di trabou cuat’or di mardugá, sintiendo agotá, deprimí i hopi infelis.
Sareoun tabata un mucha homber di caya huérfano, na Phnom Penh, Cambodia. E tabatin sífilis i tabata conocí como unu cu a ‘sali’ cu stranheronan. El a haña lugá di biba den un pagoda, caminda un ex-mónik mester a ‘soru’ p’e. Sin embargo, e homber aki tabata abusá dje mucha sexualmente i a percurá pa e tin relacion sexual cu stranheronan. Ora Sareoun su lugá di biba den e pagoda a ser bashá abou, el a bai biba cerca su tanta, pero tog a hañ’é obligá ta traha como prostituto riba caya.
Esakinan ta djis dos ehempel dje problema teribel cu a trata cuné den augustus di aña pasá n’e Congreso Mundial Contra Explotacion Sexual Comercial di Mucha. Con plamá e práctica aki ta? Cientos di miles di mucha ta enbolbí—sí, algun hende ta bisa miyones. Un delegado a resumí e problema asina aki: “Muchanan ta ser cumprá i bendí como comodidadnan sexual i económico. Nan ta ser traficá dentro i over di fronteranan manera contrabanda, encarcelá den bordelnan i forsá na someté nan mes na un cantidad grandi di explotador sexual.”
Den su palabranan di apertura, e promé minister di Suecia, Göran Persson, a caracterisá e explotacion aki como “e categoria di crímen mas brutal, mas salbahe i mas repugnante.” Un representante di Nacionnan Uní a bisa cu e “ta un asalto total riba muchanan . . . , ta completamente baho i ta e violacion di derechonan humano mas despreciabel cu por ser imaginá.” Tabatin hopi expresion similar di rabia contra explotacion sexual di mucha for di plataforma durante henter e congreso segun cu su alcanse, naturalesa, causa i efectonan a ser considerá.
“Su alcanse ta pasa fronteranan nacional i su impacto ta pasa di generacion pa generacion,” un fuente a bisa. Un otro a declará: “Algun hende ta calculá cu 1 miyon mucha ta drenta e mercado ilegal multibiyonario di sex tur aña.” Cu ki efecto? “E muchanan su sentido di dignidad, identidad i amor propio ta ser destruí i nan ta perde e capacidad pa confia hende. Nan salú físico i emocional ta na rísico, nan derechonan ta ser violá i nan futuro ta den peliger.”
Algun dje Causanan
Cua ta algun dje causanan dje crecementu explosivo dje problema aki? A ser declará cu algun dje muchanan ta ser “forsá pa drenta prostitucion dor di circunstancianan, como un manera pa sobrebibí riba caya, pa yuda mantené nan famia, of pa paga pa paña i provisionnan. Otronan ta ser seducí dor dje bombardeo di imágennan di hende cu ta disfrutá di biennan económico den e propagandanan.” I otronan ta ser secuestrá i forsá pa drenta prostitucion. E degeneracion rápido di balornan moral na tur parti, como tambe un sentido general di desesperacion, a ser mencioná entre e causanan.
Hopi mucha muher i mucha homber ta haña nan enbolbí den e negoshi di sex pa motibu di abusu den famia—violencia i incesto na cas ta pone cu nan ta sali bai riba caya. Einan, nan tin e rísico di ser abusá dor di pedofil i otronan, asta, ta parce, dor di algun polis. Un informe riba e problema titulá Kids for Hire (Muchanan na Huur) ta conta di Katia di seis aña, na Brazil. Ora un polis a gar’é, el a fors’é cometé actonan indecente cuné anto a menas’é cu lo e mata Katia su famia si e conta su hefe. E siguiente dia el a bin bek cu cincu otro homber, i tur tabata kier p’e duna nan e mésun servicio sexual.
E Ombudsman pa Mucha, un institucion sueco, a conta e delegadonan: “Ora a haci estudionan riba loke ta causa prostitucion di mucha, no tin duda cu turismo [sexual] ta un dje causanan principal.” Un informe a bisa: “E aumento increibel di prostitucion di mucha den e último dies añanan ta ser causá directamente dor dje negoshi di turismo. Prostitucion di mucha ta e atraccion turístico mas nobo cu paisnan den desaroyo ta ofrecé.” “Tournan sexual” for di Europa, Merca, Hapon i otro parti ta crea un gran demanda pa muchanan prostituta den henter mundu. Un aerolinea europeo a usa un comikita di un mucha den un posicion sexualmente explícito pa bende su tournan sexual. Agencianan di biahe ta haci areglo pa tournan sexual pa miles di hende tur aña.
Tambe riba e lista largu di causa tin e promocion internacional dje industria di sex cu mucha via tecnologia nobo. Segun informe, Internet, combiná cu otro tecnologianan di computer vinculá cuné, ta e solo fuente mas grandi di pornografia. Ekiponan barata di video tambe a facilitá e produccion di pornografia di mucha.
Ken Nan Ta?
Hopi dje adultonan cu ta abusá sexualmente di mucha ta pedofil. Un pedofil tin un atraccion sexual perverso pa mucha. Segun e Ombudsman pa Mucha di Suecia, “nan no ta necesariamente hombernan bieu i slòns, bistí cu regenjas of hombernan macho violento. Un pedofil típico ta un homber di edad medio, bon educá, cu hopi bes ta traha cu mucha como maestro, dokter, trahador social of un pastor.”
E grupo di Suecia a trece padilanti e ehempel di Rosario, un mucha muher filipino di 12 aña cu a ser abusá sexualmente dor di un turista sexual, un dokter for di Austria. Su abusu a resultá den Rosario su morto.
Carol Bellamy, directora ehecutivo di UNICEF (Fondo di Nacionnan Uní pa Mucha) na Ginebra, a declará lo siguiente tocante e mucha muher filipino di 12 aña: “Hopi bes ta net e adultonan confiá cu e cuido i proteccion dje muchanan cu ta permití i ta perpetuá e práctica intolerabel aki. Tin maestronan, profesionalnan den e campo di salú, funcionarionan di polis, políticonan i miembronan di clero cu ta usa nan prestigio i autoridad pa explotá muchanan sexualmente.”
Religion Ta Enbolbí
Un delegado dje Iglesia Católico Romano n’e congreso na Stockholm a declará cu explotacion di muchanan ta e “crímen di mas horibel” i un “resultado dje trocementu profundo i kiebro di balornan.” Sin embargo, Iglesia Católico a ser afectá severamente dor di prácticanan asina entre su propio miembronan di clero.
Den e edicion di 16 di augustus, 1993 di Newsweek, un artículo titulá “Pastornan i Abusu” a informá tocante “e pió escándalo di clero den e historia moderno dje Iglesia Católico di Merca.” E artículo a declará: “Aunke tin alegacionnan contra un cantidad calculá di 400 pastor desde 1982, algun hende di iglesia ta extrapolá cu te cu 2.500 pastor a abusá di mucha i tiener. . . . Ademas di placa, e escándalo a causa e iglesia masha bergwensa mes—i a kita algu di su autoridad moral.” Otro religionnan rond mundu ta den e mésun situacion.
Ray Wyre, un consehero riba crímen sexual for di Reino Uní, a conta e congreso di Stockholm di dos mucha homber cu a ser abusá sadísticamente dor di un pastor. Un dje mucha hombernan ta manehando awor un agencia pa víctimanan di abusu di mucha dor di pastornan, i e otro ta un abusador e mes.
Mettanando Bhikkhu, un erudito budista for di Tailandia, a raportá cu “cierto tipo di prácticanan budista ta carga parti dje responsabilidad pa e explotacion sexual comercial di mucha na Tailandia na diferente nivel. Den pueblitonan local na Tailandia, tin biaha móniknan a beneficiá di e placa cu muchanan, cu a ser forsá pa drenta prostitucion, a debolbé n’e comunidad.”
Kico Por Haci?
Dr. Julia O’Connell Davidson, dje Universidad Leicester na Reino Uní, a pidi e congreso pa no aceptá e hustificacion dje explotadornan pa nan comportacion. Abusadornan hopi bes ta enfocá riba e supuesto indecencia i inmoralidad dje mucha, argumentando cu e mucha ta sushi i a bai perdí caba. Otro explotadornan ta usa e argumento trocí i falsu cu nan actonan lo no resultá den ningun daño i cu e mucha a beneficiá.
Un panel cu ta trata cu turismo sexual a recomendá pa combatié mediante educacion den e lesnan di scol. Ademas, informacion contra explotacion sexual di mucha mester alcansá biaheronan atrabes di henter e biahe—promé cu salida, durante e biahe i ora nan yega nan destinacion.
Pa loke ta e tecnologianan nobo di comunicacion, un panel a sugerí cu nacionnan mester haña instruccionnan pa eliminá e material cu ta explotá mucha. A considerá pa establecé un solo agencia internacional pa coordiná e actividad den e campo aki. Un otro panel a recomendá cu mester haci pornografia di mucha generá cu computer i posesion di pornografia di mucha en general delitunan criminal na tur pais, cu castigu imponé pa ley.
Kico mayornan por haci? Un panel cu a trata cu e papel di medionan di comunicacion a sugerí pa mayornan tuma e responsabilidad pa protehá nan yunan. E panel a declará: “Mayornan no solamente por guia muchanan segun cu nan ta desaroyá como usadornan di medionan di comunicacion, sino por percurá informacion i splicacion adicional i un diversidad di fuente di informacion pa balansá e impacto dje medionan di comunicacion i yuda e mucha crece den comprendimentu.”
Un programa di television na Suecia dunando un reportahe tocante e congreso a enfatisá e necesidad pa mayornan mantené mihó bista riba nan yunan i alertá nan pa peligernan. Sin embargo, el a consehá: “No djis spierta muchanan contra ‘hombernan bieu cu mal ehempel,’ pasobra muchanan . . . lo pensa asina cu nan mester tene cuidou cu solamente hombernan bieu i slòns, miéntras cu un persona cu ta cometé crímennan asina por ta masha bon bistí den un uniform of un flus nechi. P’esei, spierta nan contra hende straño cu ta mustra interes mas di loke ta normal den nan.” Naturalmente, muchanan mester ser spiertá tambe contra—i urgí pa raportá na autoridadnan—di cualkier persona cu ta haci avancenan inapropiado na nan, incluyendo hende cu nan conocé.
E Unico Solucion
Loke e congreso na Stockholm no por a sugerí tabata con pa superá e causanan di explotacion sexual di mucha. Esakinan ta incluí e degradacion rápido di balornan moral tur caminda; aumento den egoismo i deseo intenso pa cosnan material; un creciente falta di respet pa leynan trahá pa protehá hende for di inhusticia; un falta di interes aumentante pa e bienestar, dignidad i bida di otronan; kiebro rápido dje areglo di famia; pobresa na tur caminda debí na sobrepoblacion, desempleo, urbanisacion i migracion; aumento den racismo contra stranhero i refugiadonan; produccion i traficacion di droga cu ta sigui aumentá; i punto di bista, práctica i tradicionnan religioso corumpí.
Aunke explotacion sexual di mucha ta escandaloso, tal maldad no ta un sorpresa pa esnan cu ta lesa Bijbel cuidadosamente. Con asina? Pasobra nos ta bibando awor den loke Bijbel ta yama “e último dianan” i, segun e Palabra di Dios, nos tin “tempu crítico, duru pa trata cuné.” (2 Timoteo 3:1-5, 13) Pues, ta un sorpresa anto cu balornan moral a bai di malu pa pió?
Sin embargo, Bijbel ta mustra padilanti na e único solucion pa e problemanan inmenso di mundu—un limpiesa total dor dje Dios Todopoderoso. Pronto lo e manifestá su poder i kita tur esnan riba tera cu no ta biba segun su principio i leynan hustu: “E rectonan ta esnan cu lo biba riba e tera, i esnan sin culpa ta esnan cu lo keda riba dje. En cuanto e malbadonan, nan lo ser cortá for dje tera mes.”—Proverbionan 2:21, 22; 2 Tesalonicensenan 1:6-9.
Entre esnan cu lo ser “cortá” lo tin tur esnan cu ta haci muchanan bira prostituta i hende corupto cu ta malusá muchanan. E Palabra di Dios ta declará: “Ni fornicador . . . ni adúltero . . . ni homber cu ta drumi cu homber [of cu mucha homber] . . . lo heredá e reino di Dios.” (1 Corintionan 6:9, 10) E ta agregá cu “esnan cu ta repugnante den nan sushedad . . . i fornicadornan” lo ser entregá n’e “segundo morto”—destruccion eterno.—Revelacion 21:8.
Dios lo limpia e tera i lo introducí un sistema di cosnan completamente nobo i hustu, “shelu nobo i un tera nobo.” (2 Pedro 3:13) Anto, den e mundu nobo ei cu el a traha, hende corupto i perverso nunca mas lo probechá di esnan inocente. I nunca mas esnan inocente lo mester tin miedu di bira víctima, pasobra “lo no tin ningun hende cu ta haci nan tembla.”—Mikéas 4:4.
[Komentario na página 12]
“E categoria di crímen . . . mas salbahe i mas repugnante.”—Promé minister di Suecia
[Komentario na página 13]
“Tur siman, 10 miyon pa 12 miyon homber ta bishitá prostitutanan yong.”—The Economist, Londen
[Plachi na página 14]
Turismo sexual ta un dje causanan principal di explotacion di mucha den paisnan den desaroyo
[Kuadro na página 13]
Turismo Sexual—Di Con?
(Algun motibu pakico turistanan ta tene relacion sexual cu mucha)
(1) E echo cu ningun hende conocé e turista ta libr’é di tur freno social cu e tin na su tera
(2) Dor cu nan ta comprendé e idioma local masha poco of nada mes, ta fácil pa laga e turistanan kere cu paga pa tene relacion sexual cu un mucha ta algu aceptá of un manera pa yuda muchanan sali for di pobresa
(3) Actitudnan racista ta haci bishitantenan explotá otronan cu nan ta considerá como inferior
(4) Turistanan ta sinti nan ricu ora nan mira cu servicionan sexual ta barata den paisnan den desaroyo
[Kuadro na página 15]
E Alcanse Mundial dje Problema
(E siguiente cifranan ta cálculonan di vários autoridad gubernamental i otro organisacionnan)
Brazil: Por lo ménos 250.000 mucha prostituta
Cánada: Miles di mucha muher tiener ta ser hincá den prostitucion dor di círculonan organisá di chulo
China: Entre 200.000 pa 500.000 mucha prostituta. Den añanan recien a lok rond di 5.000 mucha muher chines over di frontera i a bende nan como prostituta na Myanmar
Colombia: E cantidad di muchanan sexualmente explotá den e cayanan di Bogotá a aumentá cu cincu biaha mas tantu den e último shete añanan
Filipínas: 40.000 mucha enbolbí
India: 400.000 mucha ta hincá den e industria sexual
Merca: Fuentenan oficial ta papia di mas cu 100.000 mucha enbolbí
Mozambique: Agencianan di yudansa a acusá e trupanan di pas di Nacionnan Uní di a explotá muchanan sexualmente
Myanmar: Tur aña ta transportá 10.000 muher i mucha muher p’e bordelnan na Tailandia
Oost Europa: 100.000 mucha riba caya. Hopi ta ser mandá pa bordelnan na West Europa
Sri Lanka: 10.000 mucha entre e edad di 6 pa 14 aña ta esclabo den bordelnan i 5.000 di 10 pa 18 aña ta trahando independientemente den hotelnan turístico
Tailandia: 300.000 mucha enbolbí
Taiwan: 30.000 mucha enbolbí