Refinamentu di Normanan Moral—Sirbidónan di Dios Ta Reflehá Su Santidat

1. Kiko Ezekiel a mira ku ta impreshoná nos?

UN 2.500 aña pasá profeta Ezekiel a haña un vishon di un tèmpel. Kiko presis Ezekiel a mira? Imaginá bo na su lugá: Bo ta yega na un tèmpel briante i masha grandi mes i einan tin un angel poderoso pará pa mustra bo e lugá mahestuoso akí! Bo ta subi e shete tretnan di e trapi ku ta hiba na un di e tres portanan. Esta impreshonante paden di e porta ta! E entrada, òf pasio, ta kasi 30 meter haltu. Unabes paden, bo ta mira ku tin vários kamber di guardia. E pilánan tin un diseño elegante di palma.—Eze. 40:1-4, 10, 14, 16, 22; 41:20.

2. (a) Kiko e tèmpel di e vishon di Ezekiel ta representá? (Wak tambe e nota.) (b) Kiko nos por siña for di e rasgonan di e entrada di e tèmpel?

² Esei ta e tèmpel spiritual i profétiko ku Ezekiel a mira. Su deskripshon di e tèmpel ei ta asina detayá ku e relato ta yena kapítulo 40 te ku 48 di e buki ku ta karga su nòmber. E tèmpel akí ta representá Yehova su areglo pa adorashon puru. Kada un di su rasgonan tin un nifikashon pa e adorashon ku nos ta rindi na dje den e último dianan akí.a Kiko e portanan haltísimo akí ta nifiká? Nan ta rekordá nos ku hende ku drenta Yehova su areglo pa adorashon puru mester biba segun e normanan haltu i rekto di Dios. Asta e palmanan grabá riba muraya ta enfatisá algu similar, ya ku den Beibel, palma tin biaha ta representá rektitut. (Sal. 92:12) I kiko e kambernan di guardia ta indiká? Wèl, no ta permití hende ku no ta respetá e normanan divino drenta e kaminda bunita akí di adorashon puru ku ta hiba na bida eterno.—Eze. 44:9.

3. Dikon Kristu mester refiná su siguidónan kontinuamente?

³ Kon e vishon akí di Ezekiel a kumpli? Manera nos a mira den Kapítulo 2 di e buki akí, Yehova via Kristu a laga su pueblo pasa den un proseso spesial di refinamentu ku a tuma lugá di 1914 pa kuminsamentu di 1919. Akaso despues di esei e refinamentu a stòp? Niun ora so! Durante di e último 100 añanan, Kristu a sigui promové Yehova su normanan santu di kondukta. Pues, kontinuamente e mester refiná su siguidónan. Dikon? Pasobra el a rekohé su siguidónan for di e mundu moralmente degradá akí, i Satanas ta purba nònstòp di hala nan bèk den e lodo di inmoralidat ei. (Lesa 2 Pedro 2:20-22.) Laga nos analisá tres área den kua Kristu a refiná kristiannan berdadero progresivamente. Promé nos lo konsiderá algun refinamentu ku tabatin di normanan moral, despues un provishon masha importante pa tene e kongregashon limpi i, por último, e areglo di famia.

4, 5. Ki táktika Satanas tin hopi tempu ta usa, i ku ki resultado?

⁴ E sirbidónan di Yehova semper tabata masha interesá den kondukta moral rekto. Pues, nan a aseptá i apliká instrukshonnan mas i mas kla riba e tópiko ei. Ban wak algun ehèmpel.

⁵ Inmoralidat seksual. Yehova su propósito ta pa relashon seksual entre parehanan kasá ta algu limpi i bunita. Pero ta Satanas su djèm pa kue e regalo presioso ei, sak’é for di matrimonio, tros’é, kambi’é den algu sushi, anto kaba us’é pa hinka e sirbidónan di Yehova den tentashon pa nan pèrdè Dios su aprobashon. Den tempu di Balam, Satanas a usa e táktika akí, i esei a hiba na resultado trágiko pa e pueblo di Dios. Anto den e último dianan akí, e ta us’é mas ku nunka.—Num. 25:1-3, 9; Rev. 2:14.

6. Ki huramentu a sali publiká den E Toren di Vigilansia, kon nan tabata us’é i dikon despues di tempu nan a stòp di us’é? (Wak tambe e nota.)

⁶ Pa kontrarestá e esfuersonan di Satanas, E Toren di Vigilansia di 15 di yüni 1908 a publiká un huramentu ku e rumannan mester a hasi i ku a inkluí e promesa akí: “Tur ora i tur kaminda den privá, lo mi komportá mi ku personanan di e sekso opuesto presis manera lo mi a komportá mi ku nan den públiko.”b Aunke e rumannan no tabata obligá di hasi e huramentu ei, hopi di nan a hasié i a laga publiká nan nòmber den E Toren di Vigilansia. Añanan despues, e organisashon a realisá korektamente ku e huramentu akí—maske e tabata útil pa hopi ruman den su tempu—a para bira simplemente un rito; pues e rumannan a stòp di us’é. Pero nan a keda sostené sí e prinsipionan moral haltu ku e huramentu ei a representá.

7. Ki problema E Toren di Vigilansia a trata na 1935, i ki norma esei a reafirmá?

⁷ Pero e atakenan di Satanas a bira mas intenso. E Toren di Vigilansia di 1 di mart 1935 a trata frankamente un problema kresiente den e pueblo di Dios. Aparentemente, algun ruman tabata pensa ku komo ku nan tabata partisipá den sirbishi, nan no tabatin nodi di tene nan mes na e normanan moral di Yehova den nan bida privá. E Toren di Vigilansia a bisa bon kla: “Un hende mester kòrda ku djis partisipá den e predikashon no ta e úniko kos ku e tin ku kumpli kuné. Testigunan di Yehova ta representante di Yehova, i nan tin e obligashon di representá Yehova i su Reino na un manera digno.” Kaba e artíkulo a duna konseho franko tokante matrimonio i moralidat seksual i asina a yuda e pueblo di Dios “hui di fornikashon.”—1 Kor. 6:18.

8. Dikon E Toren di Vigilansia a enfatisá bes tras bes e pleno nifikashon di e palabra griego pa fornikashon òf inmoralidat seksual?

⁸ Den dékadanan mas resien, E Toren di Vigilansia a enfatisá bes tras bes e definishon korekto di e palabra ku e Skritura Griego ta usa pa fornikashon, òf inmoralidat seksual: pornéia. Su nifikashon no ta limitá na e akto di relashon seksual. Mas bien, pornéia ta enserá un variedat amplio di aktonan inmoral. Por lo general, pornéia ta inkluí tur e aktonan degradá ku sa tuma lugá den kasnan di prostitushon. Esei a protehá e siguidónan di Kristu di e plaga di relashon seksual apnormal i inaseptabel ku a poderá di asina tantu hende den e mundu djawe.—Lesa Efesionan 4:17-19.

9, 10. (a) Ki kuestion moral E Toren di Vigilansia a trata na 1935? (b) Ki punto di bista balansá Beibel ta siña nos tokante uso di alkohòl?

⁹ Mal uso di alkohòl. E edishon di 1 di mart 1935 di E Toren di Vigilansia a trata un otro kuestion moral: “Nos a ripará tambe ku algun ruman ta partisipá den sirbishi di vèlt i kumpli ku otro tareanan den e organisashon bou di influensia di [alkohòl]. Bou di ki kondishon e Skritura ta aprobá uso di biña? Lo ta apropiá pa bebe asina tantu biña te ku e ta afektá bo sirbishi den e organisashon di Señor?”

¹⁰ Komo kontesta, e artíkulo a analisá e punto di bista balansá di bibida alkohóliko ku nos ta haña den e Palabra di Dios. Beibel no ta kondená uso moderá di biña ni di otro bibida alkohóliko. Loke sí e ta kondená fuertemente ta buracheria. (Sal. 104:14, 15; 1 Kor. 6:9, 10) Kiko di e asuntu di partisipá den sirbishi sagrado bou di influensia di alkohòl? Wèl, pa basta tempu e publikashonnan a bini ta rekordá e sirbidónan di Dios di e relato tokante e yunan di Aron ku Dios a mata pasobra nan a ofresé kandela ilegítimo riba e altar di Dios. E relato bíbliko ta revelá kiko probablemente a pone e hòmbernan ei hasi algu asina inapropiá, ya ku djis despues ku esei a sosodé, Dios a duna un lei ku a prohibí tur saserdote di bebe alkohòl ora nan tabata kumpli ku nan tareanan sagrado. (Lev. 10:1, 2, 8-11) Awe, Kristu su siguidónan ta apliká e prinsipio ku tin tras di e suseso ei, i p’esei nan ta tene masha kuidou pa nan no ta bou di influensia di alkohòl ora nan ta partisipá den sirbishi sagrado.

11. Dikon e komprondementu mas kla ku e pueblo di Dios a haña tokante alkoholismo tabata un bendishon pa nan?

¹¹ Den dékadanan mas resien, Kristu a bendishoná su siguidónan ku un komprondementu mas kla di alkoholismo, esta, di e kondishon den kua un hende ta adikto na alkohòl i ta persistí den hasi mal uso di dje. E kuminda spiritual na ora ku nos ta haña a yuda hopi ruman trata e kondishon ei na e manera apropiá i haña gara bèk riba nan bida. Es mas, esei a yuda hopi ruman haña un punto di bista balansá di alkohòl i asina evitá henter e problema di alkoholismo. Niun ruman no mester laga mal uso di alkohòl kita nan di nan dignidat, di nan famia i, mas ku tur kos, di nan privilegio di partisipá den e adorashon puru di Yehova.

12. Kon e sirbidónan di Kristu a konsiderá uso di tabaku asta promé ku e último dianan a kuminsá?

¹² Uso di tabako. E sirbidónan di Kristu a kuminsá deskurashá uso di tabako asta promé ku e último dianan a kuminsá. Basta aña pasá, un ruman hòmber di edat ku yama Charles Capen a konta di su promé enkuentro ku Charles Taze Russell na final di siglo 19. Ruman Capen tabatin 13 aña, i e tabata huntu ku su tres ruman hòmbernan riba trapi di e Kas di Beibel na Allegheny, Pennsylvania. Nèt Ruman Russell a kana pasa, i el a puntra nan: “Ta huma boso ta huma? Mi ta sinti holó di tabako.” Nan a sigur’é ku nan no tabata huma. No tabatin duda kiko tabata su punto di bista di humamentu. Den E Toren di Vigilansia di 1 di ougùstùs 1895, Ruman Russell a komentá riba 2 Korintionan 7:1 i a bisa ku e no por mira kon uso di tabako den kualke forma por ta pa e gloria di Dios òf pa e benefisio di un kristian. El a bisa tambe: “Nos no por imaginá nos nos Señor ta hole stinki di tabako òf ta pone nada impuru den su boka.”

13. Ki refinamentu di nos normanan moral a tuma lugá na 1973?

¹³ Na 1935, E Toren di Vigilansia a yama tabako “yerba sushi” i a bisa ku ken ku skohe pa kou tabako òf hum’é lo no por a keda komo miembro di e famia di Bètel ni komo representante di e organisashon di Dios den e trabou di pionero òf komo superintendente biahero. Na 1973 tabatin un refinamentu mas di nos normanan moral. E Toren di Vigilansia di 1 di yüni a splika ku niun Testigu di Yehova lo por a keda den un posishon aprobá den e kongregashon tanten ku e tabatin e kustumber di usa tabako; un kustumber mortal, impuru i ku ta reflehá falta di amor pa próhimo. Rumannan ku no kier a stòp di usa tabako mester a ser ekspulsá.c Esei tabata un otro paso importante ku Kristu a tuma pa refiná su siguidónan.

14. Kiko ta Dios su norma tokante sanger, i kon e kustumber di transfushon di sanger a bira algu komun?

¹⁴ Mal uso di sanger. Den tempu di Noe, Dios a deklará ku hende no tin mag di kome sanger. Dios a reafirmá esei den e Lei ku el a duna e nashon di Israel, i na kristiannan tambe el a duna e instrukshon pa nan ‘apstené nan mes di sanger.’ (Echo. 15:20, 29; Gén. 9:4; Lev. 7:26) Ma Satanas a haña un manera pa pone hopi hende den nos tempu desobedesé e norma di Dios akí. For di den siglo 19, dòkternan a kuminsá eksperimentá ku transfushon di sanger, pero ta despues ku nan a deskubrí ku tin vários tipo di sanger, e práktika ei a plama mas tantu. Na 1937, nan a kuminsá kolektá sanger i ward’é den banko di sanger. Anto Segundo Guera Mundial a kaba di duna un empuhe grandi na e práktika di transfushon. No a tarda mashá ku transfushon di sanger a bira algu komun rònt mundu.

15, 16. (a) Ki posishon Testigunan di Yehova a tuma tokante transfushon di sanger? (b) Ki apoyo Kristu a perkurá pa su siguidónan relashoná ku transfushon di sanger i tratamentu médiko sin sanger, i ku ki resultado?

¹⁵ For di 1944, E Toren di Vigilansia a indiká ku, bon mirá, hañamentu di un transfushon di sanger ta un otro manera di kome sanger. E siguiente aña, nan a klarifiká e punto di bista ei i a para mas firme tras di dje. Na 1951, e rumannan a publiká un lista di pregunta i kontesta pa yuda e pueblo di Dios trata ku profeshonalnan médiko. Rònt mundu, Kristu su siguidónan fiel a tuma un posishon firme, i ku kurashi nan a enfrentá hopi biaha despresio, hostilidat i asta persekushon. Pero Kristu a sigui guia su organisashon pa perkurá e apoyo nesesario. Nan a publiká foyeto- i artíkulonan detayá i bon investigá.

¹⁶ Na 1979, algun ansiano a kuminsá bishitá hospitalnan pa asina yuda dòkternan komprondé nos posishon mas mihó, pa splika nan kiko ta e motibunan bíbliko pa esei i pa informá nan di otro alternativanan ku tabatin pa sanger. Na 1980, ansianonan di 39 stat na Merka a haña entrenamentu spesialisá den e trabou akí. Ku tempu, e Kuerpo Gobernante a duna aprobashon pa forma Komiténan di Kontakto ku Hospital rònt mundu. Ki resultado tur e esfuersonan akí tabatin? Awe, míles di profeshonal médiko—entre nan dòkter, siruhano i anestesiólogo—ta kooperá ku pashèntnan ku ta Testigu di Yehova i ta respetá nos desishon di haña tratamentu médiko sin sanger. Mas i mas hospital ta ofresé tratamentu médiko sin sanger, i algun di nan asta ta konsiderá esei e mihó kalidat di kuido médiko. Ta masha emoshonante pa pensa riba tur e maneranan ku Hesus a protehá su siguidónan di e intentonan di Satanas pa hasi nan impuru!—Lesa Efesionan 5:25-27.

17. Kon nos por demostrá ku nos ta apresiá e manera ku Kristu ta refiná su siguidónan?

¹⁷ Pero ta bon pa nos puntra nos mes: ‘Mi ta apresiá e manera ku Kristu ta refiná su siguidónan? Mi ta balorá e manera ku e ta entrená nos pa pega na e normanan moral haltu di Yehova?’ Si ta asina, laga nos keda kòrda ku Satanas semper ta en buska di maneranan pa alehá nos for di Yehova ku Hesus dor di kaba pokopoko ku nos rèspèt pa Dios su normanan moral. Pa kontrarestá e influensia ei, e organisashon di Yehova tur ora bai ta perkurá spièrtamentu- i rekordatorionan bondadoso tokante e inmoralidat ku mundu ta fomentá. Pues, laga nos keda alerta i habrí pa tal konseho útil i tambe kla pa obedes’é.—Pro. 19:20.

18. E vishon di Ezekiel ta duna nos ki rekordatorio bon kla relashoná ku hende ku deliberadamente ta bai kontra e normanan di Dios?

¹⁸ Un di dos área di refinamentu di normanan moral ta enserá e medidanan ku a tuma pa tene e kongregashon limpi. Lamentablemente, no ta tur hende ku a aseptá Yehova su normanan di kondukta i ku a dediká nan mes na Dios ta pega fielmente na nan desishon. Ku tempu, e aktitut di algun di nan ta kambia i deliberadamente nan ta bai kontra e normanan ei. Kiko mester hasi ku hende asina? Nos por haña un indikashon di kiko mester hasi den Ezekiel su vishon di e tèmpel spiritual ku nos a konsiderá na kuminsamentu di e kapítulo akí. Kòrda riba e portanan haltu. Den kada pasio tabatin kambernan di guardia. E guardianan tabata protehá e tèmpel, evidentemente pa stroba hende “insirkunsidá di kurason” di drenta. (Eze. 44:9) Esei ta un rekordatorio bon kla ku adorashon puru ta un privilegio ku solamente esnan ku ta hasi esfuerso pa biba segun Yehova su normanan puru di kondukta ta haña. Asina tambe awe, no ta tur hende tin e privilegio di asosiá ku rumannan kristian den adorashon.

19, 20. (a) Kon Kristu gradualmente a yuda su siguidónan refiná e manera di atendé ku piká serio? (b) Menshoná tres motibu pakiko ta ekspulsá pekadó ku no a arepentí.

¹⁹ For di 1892, E Toren di Vigilansia a bisa ku ta “nos deber di ekspulsá e kristiannan ei ku, sea direktamente òf indirektamente, ta nenga ku Kristu a entregá su mes komo un reskate . . . pa tur hende.” (Lesa 2 Huan 10.) Na 1904, e buki E Kreashon Nobo a rekonosé ku hende ku ta persistí den mal kondukta por daña e moral di e kongregashon. E tempu ei, henter e kongregashon tabata partisipá den un “tribunal di iglesia” pa analisá kasonan di piká serio. Sinembargo, esei a sosodé masha poko biaha. Na 1944, E Toren di Vigilansia a splika ku ta solamente ruman hòmbernan responsabel mester a atendé e asuntunan ei. Na 1952 a publiká den E Toren di Vigilansia un prosedura basá riba Beibel pa atendé kasonan hudisial. E artíkulo a enfatisá un motibu prinsipal pakiko ta ekspulsá personanan ku no a arepentí: pa tene e kongregashon limpi.

²⁰ Den e dékadanan ku a sigui, Kristu a yuda su organisashon klarifiká i refiná e manera di atendé kasonan di piká serio. Ansianonan kristian ta ser entrená kuidadosamente pa nan por atendé asuntunan hudisial na Yehova su manera, esta, ku e debido balansa di hustisia i miserikòrdia. Awe, nos ta mira klaramente por lo ménos tres motibu pa tuma e paso di ekspulsá un pekadó ku no a arepentí for di e kongregashon: (1) pa tene Yehova su nòmber liber di reproche, (2) pa protehá e kongregashon di e efektonan impuru di piká serio i (3) pa motivá e pekadó pa arepentí si ta posibel.

21. Kon e areglo di ekspulshon a resultá di ta un bendishon pa e pueblo di Dios?

²¹ Bo ta mira kon e areglo di ekspulshon a resultá di ta un bendishon pa e siguidónan di Kristu djawe? Den Israel di antigwedat, hopi biaha hende ku tabata hasi malu tabatin un mal influensia riba e nashon, i tin biaha nan kantidat asta a surpasá esnan ku tabata stima Yehova i a trata di hasi loke ta korekto. Pues, hopi biaha e nashon a trese reproche riba e nòmber di Yehova i a pèrdè su aprobashon. (Yer. 7:23-28) Pero awe, Yehova no ta trata ku un nashon spesífiko, sino ku hende hòmber i hende muhé for di vários nashon ku a skohe pa sirbié i sigui su instrukshonnan. Komo ku pekadónan sin heful ta ser ekspulsá for di entre nos, nan no ta haña chèns di bira, na moda di papia, un arma ku Satanas por usa pa kousa mas daño na e kongregashon i na e posishon limpi ku e kongregashon tin. Al kontrario, nan influensia ta keda limitá na un mínimo. Asina, komo grupo, nos tin sigur ku nos ta keda ku e aprobashon di Yehova. No lubidá ku Yehova a primintí: “Ningun arma ku wòrdu formá kontra bo lo no prosperá.” (Isa. 54:17) Kiko di nos? Nos ta apoyá e ansianonan ku tin e responsabilidat pisá di atendé kasonan hudisial?

22, 23. (a) Dikon nos ta gradisidu na nos rumannan ku a biba na prinsipio di siglo 20? (b) Pero kiko a indiká ku e rumannan tabatin mester di un punto di bista mas balansá relashoná ku famia?

²² Un di tres área den kua e siguidónan di Kristu a benefisiá di refinamentu kontinuo tin di haber ku matrimonio i bida di famia. Nos punto di bista di bida di famia a ser refiná durante di añanan? Sí. Por ehèmpel, ora nos lesa e historia di e sirbidónan di Dios den e promé parti di siglo 20, nos ta keda masha impreshoná i asta asombrá pa nan spiritu di sakrifisio propio. Nos ta sumamente gradisidu pa e manera ku nan a pone sirbishi sagrado riba tur otro kos den bida. Pero, na mes momento, nos por mira klaramente ku e rumannan mester tabata un poko mas balansá. Kon asina?

²³ Wèl, tabata masha normal pa ruman hòmbernan aseptá asignashon di sirbishi, òf di e trabou biahero, ku a hiba nan leu for di kas pa lunanan largu. Tabatin biaha ku nos publikashonnan a deskurashá e rumannan di kasa usando palabranan mas fuerte ku loke e Skritura ta rekerí. Di otro banda, tabatin relativamente tiki informashon tokante kon pa fortifiká un matrimonio. Ainda e situashonnan ei ta reina entre e siguidónan di Kristu? Nò!

24. Kon Kristu a yuda su pueblo fiel haña un punto di bista mas balansá di matrimonio i di bida di famia?

²⁴ Awe, un kristian no mester aseptá asignashonnan teokrátiko ku lo strob’é di kumpli ku su obligashonnan di famia. (Lesa 1 Timoteo 5:8.) Ademas, Kristu a sòru pa su siguidónan fiel riba tera risibí un suministro konstante di konseho bíbliko útil i balansá tokante matrimonio i bida di famia. (Efe. 3:14, 15) Na 1978 a sali e buki Logrando felicidad den bida di famía. Un 18 aña despues a sali e buki E Secreto pa Felicidad den Famia. Ademas, E Toren di Vigilansia a presentá kantidat di artíkulo diseñá pa yuda parehanan kasá apliká e prinsipionan di Beibel den nan relashon.

25-27. Kon e nesesidatnan di mucha di vários edat a haña mayor atenshon atraves di añanan?

²⁵ I kiko di e hóbennan? Atraves di añanan, nan nesesidatnan a haña mas i mas atenshon. Pa hopi tempu e organisashon di Yehova a perkurá bon kos pa muchanan di vários edat. Pero loke un tempu tabata djis algun pipita di kos a para bira un fluho konstante di publikashon. Por ehèmpel, di 1919 pa 1921 a sali den E Époka di Oro e seri “Estudio di Beibel pa Hóbennan.” Despues di esei a sali e foyeto ABC di E Époka di Oro na 1920 i e buki Yunan na 1941. Den dékada di 1970, e esklabo fiel a perkurá e bukinan Skuchando e Gran Maestro, Bo hubentud—sacando mayor probecho foi dje i Mi Buki di Relato Bíbliko. Na 1982, a kuminsá publiká e seri “Hóbennan Sa Puntra” den Spièrta! i esei a hiba na e buki Loke hovenan sa puntra—Contesta práctica, publiká na 1989.

²⁶ Awe, nos tin dos tomo aktualisá di e buki Hóbennan Sa Puntra, miéntras ku e seri ta sigui riba nos website, jw.org. Tambe nos tin e buki Siña for di e Gran Maestro. Nos website tin kantidat di kos pa hóbennan, entre nan, karchi di personahenan bíbliko, aktividatnan di estudio di Beibel tantu pa mucha chikitu komo pa esnan mas grandi, pùzel, vidio i kòmeks di relatonan bíbliko i tambe lèsnan di Beibel pa mucha bou di 3 aña.d Ta bisto ku for di e dia ku Kristu a brasa e muchanan den e promé siglo te awe, su punto di bista di hóbennan a keda meskos. (Mar. 10:13-16) E ke pa e hóbennan entre nos sinti nan stimá i bon alimentá spiritualmente.

²⁷ Ademas, Hesus no ke pa niun hende hasi daño na mucha. Segun ku e mundu degradá akí ta sak mas hundu den inmoralidat i tur tipo di sushedat, kasonan di abusu seksual di mucha ta oumentando bárbaramente. Kiko Hesus a hasi pa protehá mucha? Wèl, e esklabo fiel a publiká informashon kla i franko pa yuda mayornan pa nan por protehá nan yunan di e práktika baho akí.e

28. (a) Kiko ta ser ferwagt di nos si nos ke partisipá den adorashon puru, manera Ezekiel su vishon di e tèmpel ta ilustrá? (b) Kiko abo ta determiná pa hasi?

²⁸ Ta masha emoshonante pa mira kon Kristu a sigui refiná su siguidónan! El a entrená nan pa respetá e normanan moral haltu di Yehova, pa biba segun e normanan ei i pa benefisiá di nan. Pensa atrobe riba e tèmpel ku Ezekiel a mira den vishon. Bo ta kòrda su entrada i pasio haltu? Ta bèrdat ku e tèmpel ei no ta un lugá literal, sino un lugá spiritual. No opstante, abo ta mir’é komo algu real? Nos no ta drenta den dje djis pasobra nos ta bai Salòn di Reino, ta habri Beibel òf ta yama na porta di e hendenan den sirbishi. Eseinan ta kosnan ku hende ta mira. Asta un hende hipókrita por hasi e kosnan akí sin nunka drenta e tèmpel di Yehova. Pero si nos ta hasi e kosnan ei i a la bes ta biba segun e normanan haltu di Yehova i ta partisipá den adorashon puru ku e aktitut korekto, nos a drenta e lugá di mas sagrado i ta sirbi den dje, esta, den Yehova Dios su areglo pa adorashon puru. Laga nos semper apresiá e privilegio presioso ei. Laga nos sigui hasi nos bèst tambe pa reflehá e santidat di Yehova dor di tene na su normanan hustu!