“E Tempel” i “e Cabesante” Awe

 1, 2. Ki berdad clave ta yuda nos decifrá gran parti dje nificacion di Ezekiel su vision dje tempel?

ALGUN rabi hudiu di antigwedad no tabata completamente satisfecho cu e buki di Ezekiel. Segun e Talmud, algun di nan asta a pensa di saca e buki ei for dje cánon dje Scritura Santu. Particularmente, nan tabatin masha dificultad pa interpretá e vision di tempel, i nan a bisa cu e ta mas ayá di comprendimentu humano. Otro eruditonan di Bijbel tambe a keda confundí cu Ezekiel su vision di Jehova su tempel. Kico di nos?

² For dje tempu cu adoracion puru a ser restorá, Jehova a bendicioná su pueblo cu hopi rayo di perspicacia spiritual, incluyendo e dicernimentu di loke Dios su tempel spiritual ta, esta, Jehova su areglo pa adoracion puru semehante na un tempel.a E berdad clave aki ta yuda nos decifrá gran parti dje nificacion di Ezekiel su vision di tempel. Laga nos considerá e cuater facetanan dje vision aki mas djacerca​—e tempel, e sacerdocio, e cabesante i e tera. Kico esakinan ta nificá awe?

E Tempel i Abo

 3. Kico nos ta siña for dje plafon haltu i e figuranan grabá riba muraya den e pasiyo di entrada dje tempel?

³ Imaginá bo cu nos ta haciendo un bishita n’e tempel dje vision aki. Nos ta subi shete trapi bai ariba na un dje portanan gigantesco. Den e pasiyo dje entrada aki, nos ta hisa cara wak tur asombrá. Su plafon ta mas cu 30 meter riba nos cabes! Esaki ta recordá nos cu e normanan pa drenta Jehova su areglo pa adoracion ta haltu. Rayonan di lus ta pasa dor dje bentananan i ta iluminá e figuranan grabá riba muraya. Nan ta figuranan grabá di palma, locual e Scritura ta usa pa representá rectitud. (Salmo 92:12; Ezekiel 40:​14, 16, 22) E lugá sagrado aki ta pa esnan cu ta moralmente i spiritualmente recto. P’esei, nos tambe kier permanecé recto di manera cu nos adoracion por ta aceptabel pa Jehova.​—Salmo 11:7.

 4. Ken no ta ser permití pa drenta e tempel, i kico esaki ta siña nos?

⁴ Na cada banda dje pasiyo dje entrada, tin tres cuarto di guardia. E guardianan lo laga nos drenta e tempel? Jehova ta bisa Ezekiel cu ningun stranhero cu ta “incircuncidá di curason” no tin mag di drenta. (Ezekiel 40:10; 44:9) Kico esaki ta nificá? E ta nificá cu Dios ta aceptá como adoradó solamente esnan cu ta stima su leynan i ta biba na armonia cu nan. (Jeremías 4:4; Romanonan 2:29) E ta yama esnan dje clase ei bon biní den su tent spiritual, su cas di adoracion. (Salmo 15:​1-5) For dje tempu cu adoracion puru a ser restorá na 1919, Jehova su organisacion terenal a clarificá su leynan moral progresivamente i a sostené nan. Esnan cu nenga di obedecé nan deliberadamente no ta bon biní mas pa asociá cu su pueblo. Awe, e práctica basá riba Bijbel di scomulgá malechornan no-repentí a sirbi pa mantené nos adoracion limpi i puru.​—1 Corintionan 5:13.

 5. (a) Ki similaridad tin entre Ezekiel su vision i Juan su vision registrá na Revelacion 7:​9-15? (b) Den Ezekiel su vision, ken e 12 tribunan cu ta adorá Dios den e patio exterior ta representá?

⁵ E pasiyo dje entrada ta hiba n’e patio exterior, unda e pueblo ta adorá i alabá Jehova. Esaki ta haci nos corda e vision cu apostel Juan a haña dje “multitud grandi” cu ta adorá Jehova “di dia i djanochi den su tempel.” Den tur dos vision tin palma. Den e vision di Ezekiel nan ta decorá muraya dje pasiyonan. Den e vision di Juan e adoradónan tin rama di palma den nan man, loke ta simbolisá nan goso den alabá Jehova i den aclamá Jesus como nan Rey. (Revelacion 7:​9-15) Den e contexto dje vision di Ezekiel, e 12 tribunan di Israel ta representá e “otro carnénan.” (Juan 10:16; compará cu Lucas 22:​28-30.) Abo tambe ta un di esnan cu ta haña goso den alabá Jehova dor di proclamá su Reino?

 6. Kico tabata e propósito dje comedornan den e patio exterior, i riba ki privilegio esaki ta recordá esnan dje otro carnénan?

⁶ Pasando dor dje patio exterior, nos ta mira e 30 comedornan unda e pueblo ta come di nan ofrendanan boluntario. (Ezekiel 40:17) Awe, esnan dje otro carnénan no ta ofrecé sacrificio di animal, pero nan no ta bini man bashí n’e tempel spiritual. (Compará cu Exodo 23:15.) Apostel Pablo a skirbi: “Mediante [Jesus], laga nos semper ofrecé na Dios un sacrificio di alabansa, esta, e fruta di lipnan cu ta haci declaracion público di su nomber. Ademas, no lubidá di haci bon i di compartí cos cu otronan, pasobra sacrificionan asina ta agradá Dios masha tantu.” (Hebreonan 13:​15, 16; Oséas 14:2) Ta un privilegio grandi pa ofrecé Jehova sacrificionan asina.​—Proverbionan 3:9, 27.

 7. Kico e midimentu dje tempel ta garantisá nos di dje?

⁷ Ezekiel ta wak un angel midi e tempel dje vision. (Ezekiel 40:3) Dje mésun manera, un angel a bisa apostel Juan: “Lanta i midi e santuario dje tempel di Dios i e altar i esnan cu ta adorá den dje.” (Revelacion 11:1) Kico e midimentu aki ta nificá? Den ámbos caso esaki a parce di sirbi como un garantia, un señal cu nada no por stop Jehova di cumpli cu su propósitonan relacioná cu adoracion puru. Mescos awe, nos por ta sigur cu nada​—ni sikiera oposicion feros di parti di gobiernunan poderoso​—por stop e restoracion di adoracion puru.

 8. Ken ta drenta e portanan cu ta hiba n’e patio interior, i di kico e portanan aki ta recordá nos?

⁸ Crusando e patio exterior, nos ta mira cu tin tres porta cu ta hiba na e patio interior; e portanan interior ta règt tras dje portanan exterior i ta dje mésun tamaño cu nan. (Ezekiel 40:​6, 20, 23, 24, 27) Sacerdote so mag drenta e patio interior. E portanan interior ta recordá nos riba e echo cu esnan ungí tin cu cumpli cu norma i leynan divino, pero e mésun norma i leynan ta guia tur cristian berdadero. Pero ki trabou e sacerdotenan tin, i kico esei ta nificá awe?

Un Sacerdocio Fiel

9, 10. Con e “sacerdocio real,” cu e clase sacerdotal den Ezekiel su vision a prefigurá, a duna instruccion spiritual?

⁹ Den tempu pre-cristian, e sacerdotenan a haci trabou pisá den e tempel. E trabou di mata e animalnan di sacrificio, ofrecé nan riba altar i sirbi compañeronan sacerdote i e pueblo, tabata un trabou físicamente exigente. Pero nan tabatin mas trabou importante. Jehova a manda relacioná cu e sacerdotenan: “Nan mester instruí mi pueblo en cuanto e diferencia entre un cos santu i un cos profano; i nan mester laga nan conocé e diferencia entre loke ta sushi i loke ta limpi.”​—Ezekiel 44:23; Malakías 2:7.

¹⁰ Bo ta apreciá e trabou duru i sirbishi humilde cu e ungínan como cuerpo, “un sacerdocio real,” ta haciendo na fabor di adoracion puru? (1 Pedro 2:9) Mescos cu e sacerdotenan levítico di antigwedad, nan a hiba delantera den duna instruccion spiritual, yudando hende comprendé kico ta limpi i aceptabel den bista di Dios i kico no. (Mateo 24:45) Instruccionnan asina, cu ta bini via publicacionnan basá riba Bijbel i di reunionnan i congresonan cristian, a yuda miyones di hende bira reconciliá cu Dios.​—2 Corintionan 5:20.

11. (a) Con Ezekiel su vision a enfatisá e importancia di limpiesa di parti dje sacerdotenan? (b) Den e último dianan, con e ungínan a ser hací limpi den un sentido spiritual?

¹¹ Sin embargo, e sacerdotenan mester haci mas cu siña otronan pa ta limpi; nan mes mester ta limpi. P’esei, Ezekiel a mira di antemano con e sacerdocio di Israel lo a bai pasa den un proceso di refinamentu. (Ezekiel 44:​10-16) Mescos tambe, historia ta mustra cu na 1918 Jehova a sinta “como un refinadó” den su tempel spiritual, examinando e clase sacerdotal ungí. (Malakías 3:​1-5) A permití esnan cu a ser considerá spiritualmente limpi of cu a repentí di cualkier idolatria di pasado mantené e privilegio di sirbi den su tempel spiritual. Tog, mescos cu tur otro hende, individuonan ungí por bira contaminá, den sentido spiritual of moral. (Ezekiel 44:​22, 25-27) Nan tabatin cu lucha duru pa permanecé “sin mancha di mundu.”​—Santiago 1:​27; compará cu Marco 7:​20-23.

12. Pakico nos mester apreciá e trabou dje ungínan?

¹² Nos cada un lo por puntra: ‘Mi ta apreciá e ehempel cu e ungínan a pone atrabes di hopi aña di sirbishi fiel? Mi ta imitá nan fe?’ Ta bon pa esnan dje multitud grandi corda cu nan lo no tin e ungínan cu nan aki riba tera pa semper. Jehova a bisa dje sacerdotenan den e vision di Ezekiel: “Boso no mester duna nan ningun posesion [di tera] den Israel: Ami ta nan posesion.” (Ezekiel 44:28) Mescos tambe, e ungínan no tin un lugá eterno riba tera. Nan tin un herencia celestial, i esnan dje multitud grandi ta considerá cu ta un privilegio pa apoyá i animá nan miéntras cu nan ta aki riba tera ainda.​—Mateo 25:​34-40; 1 Pedro 1:​3, 4.

E Cabesante​—Ken E Ta?

13, 14. (a) Pakico e cabesante mester ta dje otro carnénan? (b) Ken e cabesante ta representá?

¹³ Un pregunta interesante ta presentá awor. Ken e cabesante ta representá anto? Ya cu e ta ser mencioná como individuo i tambe como un grupo, nos por asumí cu e ta representá un clase di homber. (Ezekiel 44:3; 45:​8, 9) Pero ken? Sigur no esnan ungí. Den e vision, e ta traha estrechamente cu e sacerdotenan, pero e no ta un di nan. Distinto dje clase sacerdotal, nan a dun’é un herencia den e tera, pues e tin un futuro aki riba tera, no den shelu. (Ezekiel 48:21) Ademas, Ezekiel 46:10 ta bisa: “Pa loke ta e cabesante meimei di nan, ora nan [e tribunan no-sacerdotal] drenta [den e patio exterior dje tempel], e mester drenta; i ora nan sali, e mester sali.” E no ta drenta e patio interior, sino e ta adorá den e patio exterior, i ta drenta i sali for dje tempel huntu cu e pueblo. Indudablemente, e factornan aki ta posicioná e cabesante entre e multitud grandi di otro carnénan.

¹⁴ Ta bisto cu e cabesante tin un puesto di responsabilidad den Dios su pueblo. Den e patio exterior, e ta sinta n’e entrada dje Porta Oost. (Ezekiel 44:​2, 3) Esaki lo por indicá un posicion di supervision, similar na esun dje ancianonan den Israel, cu a sinta n’e porta di stad i a dicta huicio. (Rut 4:​1-12; Proverbionan 22:22) Ken entre e otro carnénan tin puesto di supervision awe? Esei ta e ancianonan cu tin un speransa terenal i cu a ser nombrá pa spiritu santu. (Echonan 20:28) Pues, e clase di cabesante ta den e proceso di ser prepará pa e prospecto di sirbi mas despues den un capacidad di supervision den e mundu nobo.

15. (a) Con e vision di Ezekiel ta tira lus riba e relacion entre ancianonan cu ta dje multitud grandi i e clase sacerdotal ungí? (b) Ki delantera ancianonan ungí a hiba den e organisacion terenal di Dios?

¹⁵ Pero, ki relacion tin awe entre e clase sacerdotal ungí i e ancianonan ei, kende, como parti dje multitud grandi, ta sirbiendo awor den posicionnan di supervision? E vision di Ezekiel ta duna e indicacion cu e ancianonan cu ta miembro dje multitud grandi tin un papel apoyador i subordiná, miéntras cu esnan ungí ta hiba delantera den cosnan spiritual. Con asina? Corda, e sacerdotenan den e vision a haña e responsabilidad di instruí e pueblo den asuntunan spiritual. Tambe ta manda nan pa actua como hues den casonan legal. Ademas, e levitanan a ser asigná n’e “puestonan di supervision” den e portanan dje tempel. (Ezekiel 44:​11, 23, 24) Ta bisto cu e cabesante mester a someté su mes humildemente n’e servicionan spiritual i liderato dje sacerdotenan. Ta na su lugá, anto, cu den e tempu aki e ungínan a hiba delantera den adoracion puru. Por ehempel, ta for di nan ta scoge e miembronan dje Cuerpo Gobernante di Testigonan di Jehova. Pa décadanan caba e fiel ancianonan ungí aki ta entrenando e clase di cabesante, cu ta birando mas i mas grandi, pa prepará miembronan prospectivo dje clase aki p’e dia ora cu lo delegá na nan e pleno midí di autoridad den Dios su futuro mundu nobo.

16. Segun Isaías 32:​1, 2, con tur anciano tin cu actua?

¹⁶ Ki clase di superintendente e miembronan prospectivo aki, cu ta den fila pa haña mas responsabilidad como e clase di cabesante, ta? E profecia hañá na Isaías 32:​1, 2 ta bisa: “Mira! Un rey lo reina pa husticia mes; i en cuanto prins, nan lo goberná como prins pa husticia mes. I cada un mester resultá di ta manera un lugá di sconde for di bientu i un lugá di sconde for dje tempestad di awaceru, manera riu di awa den un tera secu, manera e sombra di un baranca grandi den un tera agotá.” E profecia aki ta hañando su cumplimentu awe segun cu ancianonan cristian​—ungí i otro carné​—ta traha pa protehá e tou di ‘tempestadnan di awaceru’ manera persecucion i desanimacion.

17. Con wardadónan cristian mester mira nan mes, i con e tou mester mira nan?

¹⁷ E palabranan “prins” i “cabesante,” cu na hebreo tin casi e mésun nificacion, no ta ser usá como título pa halsa hende. Mas bien, nan ta describí e responsabilidad cu e hombernan aki ta carga pa cuida Dios su carnénan. Jehova ta duna e spiertamentu serio: “Ta basta cu boso, o cabesantenan di Israel! Kita e violencia i e plundermentu, i haci husticia i rectitud mes.” (Ezekiel 45:9) Ta bon pa tur anciano awe tuma e conseho aki na pechu. (1 Pedro 5:​2, 3) E tou, na su turno, ta reconocé cu Jesus a percurá wardadónan di carné como “donnan den hende.” (Efesionan 4:8) Nan cualificacionnan ta pará den e Palabra inspirá di Dios. (1 Timoteo 3:​1-7; Tito 1:​5-9) P’esei, cristiannan ta sigui e guia dje ancianonan.​—Hebreonan 13:7.

18. Cua ta algun responsabilidad dje clase di cabesante prospectivo awor, i kico lo ta su responsabilidad den futuro?

¹⁸ Den tempu bíblico algun cabesante tabatin hopi autoridad, otronan ménos. Awe, ancianonan dje multitud grandi tin responsabilidadnan cu ta varia masha hopi. Algun ta sirbi den un congregacion; otronan ta sirbi hopi congregacion como superintendente biahero; otronan ta sirbi paisnan completo como miembro di Comité di Sucursal; otronan ta asistí vários comité dje Cuerpo Gobernante directamente. Den e mundu nobo, Jesus lo nombra “prins riba tur e tera” pa hiba delantera meimei di Jehova su adoradónan riba tera. (Salmo 45:16) Sin duda lo e scoge hopi di esakinan for di entre e ancianonan fiel di awe. Pa motibu cu e hombernan aki ta duna prueba di ta fiel awor, lo e scoge pa confia hopi di nan cu privilegionan asta mas grandi den futuro ora e revelá e papel dje clase di cabesante den e mundu nobo.

E Tera dje Pueblo di Dios Awe

19. Kico e tera dje vision di Ezekiel ta representá?

¹⁹ E vision di Ezekiel ta describí e tera restorá di Israel tambe. Kico e aspecto aki dje vision ta representá? Otro profecianan di restoracion a predicí cu e tera di Israel lo ta un paradijs mescos cu Eden. (Ezekiel 36:​34, 35) Awe, nos ta disfrutá di un “tera” restorá, i den un sentido, e tambe ta paradísico. P’esei, hopi biaha nos ta papia di nos paradijs spiritual. E Toren di Vigilancia a definí nos “tera” como “e region di actividad” di Dios su pueblo scogí.b Unda cu un sirbidó di Jehova por ta, e ta den e tera restorá ei, tanten cu e ta haciendo esfuerso pa sostené adoracion berdadero dor di cana den e pasonan di Cristo Jesus.​—1 Pedro 2:21.

20. Ki principio nos por siña for di “e contribucion santu” den e vision di Ezekiel, i con nos lo por aplicá e principio aki?

²⁰ Kico dje pida tereno cu yama “e contribucion santu”? Esaki tabata e contribucion dje pueblo pa apoyá e sacerdocio i e stad. Tambe, “henter e pueblo dje tera” mester a contribuí un pida tereno pa e cabesante. Kico esaki ta nificá awe? Claro cu esei no ta nificá cu e pueblo di Dios mester haña nan cu e carga di un clase di clero pagá. (2 Tesalonicensenan 3:8) Mas bien, e apoyo duná n’e ancianonan awe ta principalmente spiritual. Esei ta encerá yuda cu loke tin pa haci i desplegá un spiritu di cooperacion i sumision. Sin embargo, mescos cu den tempu di Ezekiel, e contribucion aki ta ser hací “na Jehova,” i no na hende.​—Ezekiel 45:​1, 7, 16.

21. Kico nos por siña for dje partimentu dje tera den Ezekiel su vision?

²¹ No ta e cabesante i sacerdotenan so tin un lugá asigná den e tera restorá aki. E division dje tera ta mustra cu cada un dje 12 tribunan tin un herencia sigur. (Ezekiel 47:​13, 22, 23) Di manera cu e multitud grandi no solamente tin un lugá den e paradijs spiritual awe, sino tambe lo ricibí un pida tera ora nan heredá un lugá den e region terenal dje Reino di Dios.

22. (a) Kico e stad den e vision di Ezekiel ta representá? (b) Kico nos por siña for dje echo cu e stad tin porta na tur banda?

²² Finalmente, kico e stad den e vision ta representá? E no ta un stad celestial, ya cu e ta keda meimei di tera “profano” (no-sagrado). (Ezekiel 48:​15-17) P’esei, e mester ta algu terenal. Bon, kico un stad ta? Esei no ta transmití e idea di un grupo di hende cu ta bini huntu pa forma algu structurá i organisá? Sí. P’esei, e stad ta parce di prefigurá e administracion terenal cu ta beneficiá tur esnan cu lo componé e sociedad terenal hustu. Lo e funcioná plenamente den e futuro “tera nobo.” (2 Pedro 3:13) E stad cu su portanan na tur banda, un pa cada tribu, ta un bon ilustracion con accesibel e stad ta. Awe, e pueblo di Dios no ta bou di un administracion secreto of clandestino. Rumannan den puesto di responsabilidad mester ta acercabel; e principionan cu ta guia nan ta bon conocí pa tur hende. E echo cu hende di tur tribu ta cultivá e tera cu ta sostené e stad ta recordá nos cu e otro carnénan ta sostené, asta den un sentido material, e areglonan administrativo p’e pueblo di Dios rond mundu.​—Ezekiel 48:​19, 30-34.

23. Kico nos lo considerá den e siguiente artículo?

²³ Pero, kico dje riu cu ta core for dje santuario dje tempel? Loke esei ta representá awe i tambe pa futuro lo ta e tema dje di tres i último artículo den e seri aki.

[Nota]

Puntonan di Repaso

◻ Kico e tempel den e vision di Ezekiel ta representá?

◻ Ken e sacerdotenan cu ta sirbi n’e tempel ta representá?

◻ Kico ta e clase di cabesante, i kico ta algun di su responsabilidadnan?

◻ Kico ta e tera den e vision di Ezekiel, i den ki sentido e ta ser asigná n’e 12 tribunan?

◻ Kico e stad ta representá?

[Diagram/​Mapa na página 15]

(For fully formatted text, see publication)

E asignacion di tera manera e vision di Ezekiel ta describí

E DIESDOS TRIBUNAN

Laman Grandi

Laman di Galilea

Riu di Jordan

Laman Salu

DAN

ASER

NEFTALI

MANASES

EFRAIM

RUBEN

HUDA

E CABESANTE

BENJAMIN

SIMEON

ISACAR

ZABULON

GAD

[Diagram]

AMPLIACION DJE CONTRIBUCION SANTU

A. “Jehova Mes T’ei” (Jehova-Shammah); B. Tereno productivo dje stad

Porcion dje levitanan

Santuario di Jehova

Porcion dje Sacerdotenan

BAB