Jehova e Dios Bibu i Berdadero

FARAO di Egipto a papia na moda desafiante i cu menosprecio ora el a puntra: “Ken ta Jehova?” (Éxodo 5:2) Manera e artículo anterior a mustra, tal actitud a trece plaga i morto riba e egipcionan, incluyendo un graf di awa pa fárao i su forsa militar.

Den Egipto di antigua, Jehova Dios a proba su supremacia riba dios falsu. Pero tin hopi mas pa siña tocante dje. Cua ta algun rasgo di su personalidad? I kico e ta exigí di nos?

Su Nomber i Fama

Ora Moises a duna fárao di Egipto e exigencianan, e no a bisa: ‘Señor ta bisa tal i tal.’ Fárao i e otro egipcionan a pensa di nan hopi diosnan falsu como señornan. No, Moises a usa e nomber divino, Jehova. E mes a tend’é ser pronunciá for di laira ora e tabata n’e mata kimando den e tera di Madian. E relato inspirá ta bisa:

“Dios a pasa na papia cu Moises i bis’é: ‘Ami ta Jehova. . . . Ami, asta ami, a tende e kehamentu dje yunan di Israel, kendenan e egipcionan ta sclabisando, i mi ta corda di mi pacto. P’esei bisa n’e yunan di Israel, “Ami ta Jehova, i siguramente lo mi saca boso for di bou dje carganan dje egipcionan i libra boso for di sclabitud na nan, i berdaderamente lo mi reclamá boso cu un brasa sacá i cu huicionan grandi. I siguramente lo mi tuma boso como un pueblo, i di berdad lo mi resultá di ta Dios pa boso; i boso lo sa siguramente cu ami ta Jehova boso Dios cu ta sacando boso for di bou dje carganan di Egipto. I siguramente lo mi introducí boso den e tera [di Canan] pa cua mi a hisa mi man den huramentu pa duna na [boso antepasadonan,] Abraham, Isaac i Jacob; i di berdad lo mi dun’é na boso como algu pa poseé. Ami ta Jehova.”’”—Éxodo 6:1-8.

Esei ta net loke Jehova a haci. El a libra e israelitanan for di sclabitud na Egipto i a permití nan ocupá e tera di Canan. Manera el a primintí, Dios a causa pa tur esaki tuma lugá. Ki apropiado! Su nomber, Jehova, ta nificá “E ta Causa di Ser.” Bijbel ta referí na Jehova cu títulonan manera “Dios,” “Señor Soberano,” “Creador,” “Tata,” “e Todopoderoso” i “e Haltísimo.” Tog, su nomber Jehova ta identifik’é como e Dios berdadero kende progresivamente ta trece su gran propósitonan na cumplimentu.—Isaías 42:8.

Si nos mester a lesa Bijbel den su idiomanan original, nos lo a haña e nomber di Dios miles di biaha. Na hebreo e ta ser representá dor di cuater consonante Yod He Waw He (יהוה), yamá e Tetragramaton, lesá di banda drechi pa robes. Esnan cu tabata papia hebreo a yena e zonidonan vocal, pero hende awe no sa cu siguridad kico eseinan tabata. Aunke algun ta faborecé e spelling Yahweh, e forma Jehova ta comun i ta identificá nos Creador adecuadamente.

Uso dje nomber Jehova tambe ta distinguí Dios for di esun yamá “mi Señor” na Salmo 110:1, unda un traduccion ta bisa: “E SEÑOR [hebreo, יהוה] a bisa na mi Señor, Sintá bo na mi man drechi, te ora mi haci bo enemigunan bo banki di pia.” (King James Version) Reconociendo e pasashi dje nomber di Dios aki den e texto hebreo, e Traducción del Nuevo Mundo ta bisa: “E expresion di Jehova na mi Señor ta: ‘Sinta na mi man drechi te ora mi pone bo enemigunan como banki pa bo pianan.’” E palabranan ei di Jehova Dios ta referí proféticamente na Jesucristo, kende e escritor a yama “mi Señor.”

Jehova a traha un nomber pa su mes den dia di fárao. Mediante Moises, Dios a bisa e gobernante curason duru ei: “N’e ocasion aki mi ta mandando tur mi golpinan contra bo curason i riba bo sirbidornan i bo pueblo, afin pa bo sa cu no tin ningun manera mi den tur e tera. Pasobra ya mi por a alargá mi man pa mi heridá bo i bo pueblo cu pest i pa eliminá bo for dje tera. Pero, en realidad, p’e motibu aki mi a mantené bo na existencia, afin di mustrá bo mi poder i pa mi nomber ser declará den tur e tera.”—Éxodo 9:14-16.

Tocante e éxodo di Israel for di Egipto i e tumbamentu di cierto rey cananeo, e muher Rahab di Jérico a bisa dos spion hebreo: “Mi sa cu Jehova siguramente lo duna boso [israelita] e tera, i cu e teror di boso a cai riba nos, i cu tur e habitantenan dje tera a bira desanimá pa causa di boso. Pasobra nos a tende con Jehova a seca e awanan di Laman Corá for di dilanti boso ora boso a sali for di Egipto, i loke boso a haci cu e dos reynan dje amoreonan kendenan tabata n’e otro banda di Jordan, esta Sehon i Og, kendenan boso a dedicá na destruccion. Ora nos a yega na tende esei, anto nos curasonnan a cuminsá dirti, i no a lanta ainda spiritu den ningun pa causa di boso, pasobra Jehova boso Dios ta Dios den cielu ariba i riba tera abou.” (Hosué 2:9-11) Sí, Jehova su fama a plama.

Jehova i Su Cualidadnan

E salmista e expresá e deseo sincero aki: “Pa hende por sa cu abo, kende su nomber ta Jehova, abo so ta e Haltísimo riba tur e tera.” (Salmo 83:18) Siendo cu e soberania di Jehova ta universal, e siguidornan persiguí di Jesus por a resa: “Señor Soberano, abo ta Esun cu a traha cielu i tera i laman i tur cos den nan.” (Echo 4:24) I ta ki un consuelo pa sa cu Jehova ta e “Tendedó di oracion”!—Salmo 65:2.

Jehova su atributo principal ta amor. En berdad, “Dios ta amor”—e personificacion mes dje cualidad aki. (1 Juan 4:8) Ademas, “cuné tin sabiduria i poder.” Jehova ta omni-sapiente i omni-potente, pero e nunca ta abusá di su poder. (Job 12:13; 37:23) Nos por ta sigur tambe cu Jehova semper lo trata di un manera hustu cu nos, pasobra “husticia i huicio ta e lugá establecí di su trono.” (Salmo 97:2) Si nos faya pero ta repentí, nos por saca consuelo den e conocimentu cu Jehova ta “un Dios misericordioso i bondadoso, tardá pa rabia i abundante den bondad-amoroso i berdad.” (Éxodo 34:6) Nada straño cu nos por tin goso den sirbi Jehova!—Salmo 100:1-5.

E Rey Celestial Incomparabel

Jesucristo, Yu di Jehova, a bisa: “Dios ta un Spiritu.” (Juan 4:24) P’esei, Jehova ta invisibel pa wowo humano. En realidad, Jehova a bisa Moises: “Bo no por mira mi cara, pasobra ningun homber por mirá mi i tog biba.” (Éxodo 33:20) E Rey celestial aki ta asina glorioso cu hende lo no ta capas pa soportá e experencia di mir’é.

Aunke Jehova ta invisibel pa nos wowo, tin abundancia di testimonio di su existencia como Dios Todopoderoso. En berdad, “su cualidadnan invisibel ta ser mirá claramente for di creacion di mundu padilanti, pasobra nan ta ser percibí pa medio dje cosnan creá, asta su poder eterno i Divinidad.” (Romano 1:20) E tera—cu su yerba, palu, fruta, berdura i flor—ta duna testimonio di Jehova su Divinidad. Distinto di dios-ídolo sin balor, Jehova ta duna awaceru i temporadanan fructífero. (Echo 14:16, 17) Wak e streanan den e cielu djanochi. Ki un evidencia magnífico di Jehova su Divinidad i abilidad organisacional!

Tambe Jehova a organisá su criaturanan spiritual santu i inteligente den cielu. Como un organisacion armonioso, nan ta cumpli cu e boluntad di Dios, manera e salmista ta bisa: “Bendicioná Jehova, O boso angelnan di dje, poderoso den potencia, cu ta cumpli cu su palabra, dor di scucha n’e bos di su palabra. Bendicioná Jehova, boso tur ehércitonan di dje, boso ministernan di dje, cu ta haci su boluntad.” (Salmo 103:20, 21) Tambe Jehova a organisá su pueblo riba tera. E nacion di Israel tabata bon organisá, mescos cu e promé siguidornan dje Yu di Dios tambe tabata. Di igual manera awe, Jehova tin un organisacion mundial di Testigonan celoso cu ta proclamá e bon nobo di cu su Reino ta cerca.—Mateo 24:14.

Jehova Ta e Dios Bibu i Berdadero

Jehova su Divinidad a ser demostrá den asina tantu manera! El a humiyá e diosnan falsu di Egipto i a introducí e israelitanan sano i salbo den e Tera Primintí. E creacion ta duna evidencia abundante di Jehova su Divinidad. I simplemente no tin comparacion entre e i e diosnan-ídolo sin balor di religion falsu.

Profeta Jeremías a mustra e gran contraste entre Jehova, e Dios bibu i e ídolonan sin bida cu hende a traha. Tal contraste ta bon expresá den Jeremías capítulo 10. Entre otro cosnan, Jeremías a skirbi: “Jehova en berdad ta Dios. E ta e Dios bibu i e Rey pa tempu indefiní.” (Jeremías 10:10) Jehova, e Dios bibu i berdadero, a crea tur cos. El a libra e israelitanan deprimí cu a perde vigor den sclabitud na Egipto. Nada ta imposibel p’e.

Jehova, “e Rey di eternidad,” lo contestá e oracion: “Nos Tata cu ta na cielu, laga bo nomber sea santificá. Laga bo reino bini. Laga bo boluntad sosodé, mescos cu den cielu, tambe riba tera.” (1 Timoteo 1:17; Mateo 6:9, 10) E Reino mesiánico celestial, cu ya caba ta den man di Jesucristo, pronto lo tuma accion contra e malbado i lo destruí tur enemigu di Jehova. (Daniel 7:13, 14) Tal Reino lo introducí un mundu nobo di bendicion sin fin pa humanidad obediente.—2 Pedro 3:13.

Tin hopi mas pa siña tocante Jehova i su propósitonan. Pakico no haci’é bo determinacion pa gana tal conocimentu i actua na armonia cuné? Si bo haci esaki, lo bo tin e privilegio pa disfrutá di bida eterno den un paradijs terenal bou di gobernacion di Reino. Lo bo biba ora tristesa, doló i asta morto a pasa pa historia i e conocimentu di Jehova ta yena e tera. (Isaías 11:9; Revelacion 21:1-4) Esei por ta bo futuro, si bo busca, haña i actua na armonia cu e contestanan basá riba Bijbel n’e pregunta, “Ken ta Jehova?”

[Rekonosementu di plachi na página 7]

Pictorial Archive (Near Eastern History) Est.