Jehova Ta Razonabel!

“E sabiduría djariba ta . . . razonabel.”​—⁠SANTIAGO 3:⁠17.

CUA clase di Dios bo ta adora? Bo ta kere cu e ta un Dios di husticia inflexibel i estricto, di genio severo i stijf? Dios mester a parce asina pa Johannes Calvijn, e reformador protestante. Calvijn a declara cu Dios tin un “plan eterno i incambiabel” pa cada persona, predestinando cada un pa bida eterna den felicidad of tormento eterno den e candela di fiernu. Imaginábo: si esei ta berdad, nada cu bo por haci, maske ki duro bo ta purba, por cambia e plan eterno i stijf di Dios pa bo i bo futuro. Bo ta haya cu un Dios irrazonabel asina ta atractivo?​—⁠Compara cu Santiago 4:⁠8.

² Ta ki un alivio pa nos pa siña cu e Dios dje Bijbel ta sumamente razonabel! Dios no ta stijf i inflexibel, sino hende tin tal tendencia, mará pa nan mes imperfeccion. Organizacion humano por ta tanto difícil pa manehá como trein di carga. Ora un trein di carga gigantesco ta corre den direccion di un obstáculo riba camina, ta imposibel pe bira, i paramento també ta mashá dificultoso. Algun trein tin tanto peso corriendo padilanti cu mas cu un kilometer ta necesario pa nan para despues di cuminza pone brake! Di igual manera, un barcu supertanker por drif padilanti pa mas cu 8 km despues di paga e motor. Aunque nan ta pone chapaleta na revers, lo e sigi bai padilanti pa 3 km! Pero, awor tuma na cuenta un vehículo hopi mas asombroso cu trein i bapor, un vehículo cu ta representa e organizacion di Dios.

³ Mas cu 2.600 aña pasá, Jehova Dios a duna profeta Ezekiel un vision cu a simboliza Su organizacion celestial di persona spiritual. Esei tabata un garoshi di tamaño inspirador di temor, e “vehículo” di Jehova Dios mes semper bao di su control. Sumamente interesante tabata e manera cu el a move. Wiel gigante tabatin cuater rand i tabata yen di wowo, di manera cu nan por mira na tur parti i por cambia direccion instantáneamente, sin para ni bira. I e vehículo gigantesco no tabatin cu move pisadamente manera supertanker of trein di carga. E por a move cu velocidad di weerlicht, asta haci birada di 90 grado! (Ezekiel 1:​1, 14-28) Jehova ta tanto diferente cu e Dios cu Calvijn a predica como Su garoshi ta diferente cu mashín pisá cu hende ta traha. Jehova ta perfectamente adaptable. Comprendimento di tal aspecto dje personalidad di Jehova por yúdanos keda adaptable i evita e laz di ser irrazonabel.

Jehova Dios​—⁠e Ser mas adaptable den e universo

⁴ E nomber mes di Jehova ta indica adaptabilidad. “Jehova” literalmente kier men “E ta Causa Ser.” Evidentemente esei kier men cu Jehova ta causa su mes di ser Cumplidor di tur promesa di dje. Ora Moisés a puntra Dios cua ta su nomber, Jehova a elabora riba su nificacion segun lo sigiente: “Lo mi resulta di ser loke lo mi resulta di ser.” (Éxodo 3:14) E traduccion di Rotherham ta bisa directamente: “Lo mi ser loke mi kier.” Jehova ta resulta di ser, of ta decidi di ser, loke ta necesario pa cumpli cu su propósito i promesanan husto. P’sei, e tin un lista impresivo di título, tal como Creador, Tata, Señor Soberano, Wardador, Jehova di ehército, Scuchador di oracion, Huez, Gran Instructor, i Recumprador. El a causa su mes di ser tur esei i mas pe cumpli cu su propósito amoroso.​—⁠Isaías 8:13; 30:20; 40:28; 41:14; Salmo 23:1; 65:2; 73:28; 89:26; Huez 11:27; Mira també Apéndice 1J di Traducción del Nuevo Mundo de las Santas Escrituras.

⁵ Pues, esei kier men cu e naturaleza of normanan di Dios ta cambia? No; manera Santiago 1:17 ta bisa, “cuné no tin variacion di biramento di sombra.” Tin un contradiccion ei? Di ningun manera. Por ehempel, cua tata amoroso no ta cambia papel cu e ta hunga pe beneficio dje yiunan? Durante transcurso di un solo dia, tata of mama por ta consehero, koki, ama di cas, maestro, disiplinario, amigo, mecánico, enfermera​—⁠i e lista ta sigi numa. Tata of mama no ta cambia personalidad pa hunga tal papel; nan simplemente ta adaptánan na necesidad dje momento. Asina ta cu Jehova Dios pero na un escala hopi mas grandi. No tin límite di loke e por causa su mes di ser pe beneficio di su creacion. E profundidad di su sabiduría ta tolondrador en berdad!​—⁠Romano 11:⁠33.

Ser razonabel ta un indicacion di sabiduría divino

⁶ Disípel Santiago a usa un palabra interesante pa detaya e sabiduría di e Dios supremamente adaptabel. El a skirbi: “E sabiduría djariba ta . . . razonabel.” (Santiago 3:17) E palabra griego cu el a usa (e·pi·ei·kesʹ) ta difícil pa traduci. Traductor a usa palabra tal como “suave,” “clemente,” “misericordioso,” i “considerá.” E Traducción del Nuevo Mundo ta traducié “razonabel,” cu un nota cu ta indica cu e nificacion literal ta nifica “gracioso.”a E palabra ta comunica e sentido di no insisti riba “pie de la letra,” sin ser indebidamente estricto of severo. Escolástico William Barclay a comenta den su buki na inglés New Testament Words: “E cos básico i fundamental tocante epieikeia ta cu e ta origina cu Dios. Si Dios ta insisti riba su derecho, si Dios ta aplica na nos solamente norma stijf dje ley, unda nos lo tá? Dios ta e ehempel supremo di un persona cu ta epieikēs i cu ta trata cu otro persona cu epieikeia.”

⁷ Considera e tempo ora humanidad a rebela contra e soberanía di Jehova Dios. Lo ta ki fácil pa Dios ehecuta e tres rebelde malagradicido​—⁠Adam, Eva, i Satanás! Cuanto dolor di curazón e por a evita pa su mes! I ken por a debati cu e no tabatin derecho di exigi tal husticia estricto? No obstante, Jehova nunca tin su organizacion semehante di un garoshi celestial stacioná riba un norma di husticia stijf i inadaptabel. P’sei su garoshi no ta pasa irresistiblemente riba e famía humano i tur prospecto pa un futuro feliz pa humanidad. Al contrario, Jehova a guia su garoshi lihé manera weerlicht. Precisamente despues dje rebelion, Jehova Dios a declara su propósito di largu alcance cu ta ofrece misericordia i speranza na tur desendiente di Adam.​—⁠Génesis 3:⁠15.

⁸ Sin embargo, Jehova siendo razonabel no ta indica cu e por compromete principio divino. Religion djawe di cristiandad por kere cu nan ta razonabel ora nan ta ignora inmoralidad simplemente pa cultiva e fabor di miembro gedwal. (Compara cu 2 Timoteo 4:⁠3.) Jehova Dios nunca ta viola su mes ley, ni tampoco no ta compromete su principionan. Mas bien, e ta mustra cu e ta dispuesto pa ser flexible, pa adaptá na circunstancia, di manera cu tal principio por ta aplicá tanto cu husticia como cu misericordia. E semper ta corda pa balanzá su ehercicio di husticia i poder cu su amor i sabiduría razonabel. Láganos considera tres manera cu Jehova ta demonstra cu e ta razonabel.

“Cla pa pordoná”

⁹ David a skirbi: “Pasobra abo, O Jehova, ta bon i cla pa pordoná; i e bondad amoroso pa cu tur esnan cu ta inbocábo ta abundante.” (Salmo 86:⁠5) Ora e Scritura Hebreo tabata traducí na griego e palabra “cla pa pordoná” tabata traducí como e·pi·ei·kesʹ, of “razonabel.” Realmente, kedando cla pa pordoná i mustra misericordia tal bez ta e manera di mas importante pa demonstra cu bo ta razonabel.

¹⁰ David mes tabata sa mashá bon ki razonabel Jehova Dios tabata en respecto esei. Ora David a comete adulterio cu Bat-seba i a haci arreglo pa su esposo ser matá, tanto David como Bat-seba a merece e castigo di morto. (Deuteronomio 22:22; 2 Samuel 11:​2-27) Si huez humano stijf a huzga e caso, nan dos por wel a perde nan bida. Pero Jehova a mustra cu e tabata razonabel (e·pi·ei·kesʹ), locual, segun Vine’s Expository Dictionary of Biblical Words ta bisa cu, “ta expresa e consideracion cu ta pisa ‘humanamente i razonablemente echonan dje caso.’ ” Echo cu a influenciá e decision misericordioso di Jehova probablemente a inclui e arrepentimento sincero dje malechornan i e misericordia cu David mes a demonstra na antes na otro hende. (1 Samuel 24:​4-6; 25:​32-35; 26:​7-11; Mateo 5:7; Santiago 2:13) Sin embargo, na armonía cu detaye cu Jehova Dios a duna di su mes den Éxodo 34:​4-7, tabata razonabel pa Jehova Dios duna David correccion. El a manda profeta Natán cerca David cu un mensahe fuerte, impresionando David cu e echo cu el a despreciá e palabra di Jehova. David a arrepenti i p’sei no a muri pa su picá.​—⁠2 Samuel 12:​1-14.

¹¹ Ehempel di rey Manasés di Hudá ta asta mas notable en cuanto esei, siendo cu Manasés, distinto di David, tabata henteramente perverso pa mashá tempo. Manasés a promove costumber religioso repugnante dje país, incluyendo sacrificio humano. També, por tá cu e tabata responsable pa zagmento di Isaías na pida pida. (Hebreo 11:37) Pa castiga Manasés, Jehova a permiti pe ser hibá preso na Babilonia. Pero, Manasés a arrepentí den prisón i a pidi misericordia. Respondiendo na tal arrepentimento sincero, Jehova a keda “cla pa pordoná”​—⁠asta den tal caso extremo.​—⁠2 Crónica 33:​9-13.

Cambiamento di moda di tratamento ora otro circunstancia ta presenta

¹² Mustrando cu Jehova ta razonabel ta su disposicion pa cambia su moda di tratamento cu el a considera na antes ora otro circunstancia ta presenta. Por ehempel, ora profeta Jonás a pasa door di caya di Nínive di antigua, su mensahe inspirá tabata basta senciyo: E stad fuerte lo ser destruí den 40 dia. Sin embargo, circunstancia a cambia​—⁠dramáticamente! Ninivita a arrepenti.​—⁠Jonás, capítulo 3.

¹³ Ta instructivo pa pone na contraste e manera cu Jehova i Jonás a reacciona na tal cambio di circunstancia. En efecto, Jehova Dios a cambia e camina di su garoshi celestial. Den tal caso el a adapta su mes, birando pordonador di picá en bez di ser “un persona baronil di gera.” (Éxodo 15:⁠3) En cambio, Jonás a keda hopi menos flexible. En bez di keda den paso cu e garoshi di Jehova, el a comporté mas tanto manera trein di carga of supertanker mencioná anteriormente. El a proclama destruccion, pues, destruccion mester bini! Kizás el a kere cu cualkier cambio di camina por bergonzé den bista di ninivita. Pero, cu pacenshi Jehova a siña e profeta obstiná un les memorable pa ser razonabel i mustra misericordia.​—⁠Jonás, capítulo 4.

¹⁴ Jehova a cambia su moda na otro ocasion​—⁠asta tocante asunto relativamente chikito. Por ehempel, ora el a comisiona profeta Ezekiel pa hunga papel den un drama profético, instruccion di Jehova a inclui e mandamento pa Ezekiel cushiná su cuminda riba candela kimando sushi di hende. Esei tabata di mas pe profeta, cu a sclama, “Ai, O Señor Soberano Jehova!” i a roga pa no obligué di haci un cos tanto repugnante pe. Jehova no a hala un banda e sintimento dje profeta como irrazonabel; mas bien, Dios a permiti Ezekiel usa mest di baca, un fuente común di combustible den hopi país te ne dia djawe.​—⁠Ezekiel 4:​12-15.

¹⁵ No ta animador pa considera e humildad di nos Dios Jehova? (Salmo 18:35) E ta hopi mas halto cu nos; sin embargo e ta scucha cu pacenshi na hende imperfecto i aveces asta ta cambia su moda di acuerdo. El a laga Abraham supliqué pa basta tempo tocante e destruccion di Sódoma i Gomorra. (Génesis 18:​23-33) I Dios a laga Moisés opone e propósito di Dios di destrui israelita rebelde i den nan lugar haci Moisés un nacion fuerte. (Éxodo 32:​7-14; Deuteronomio 9:​14, 19; compara cu Amós 7:​1-6.) Asina Dios a pone un ehempel perfecto pa su sirbidornan humano, cu di igual manera por mustra cu nan ta cla pa scucha otro hende ora ta razonabel i posibel pa haci esei.​—⁠Compara cu Santiago 1:⁠19.

Razonabel den ehercicio di autoridad

¹⁶ Bo a yega di ripara cu ora hende ta gana mas autoridad, ta parce cu hopi di nan ta bira menos razonabel? Na contraste, Jehova Dios tin e puesto di mas halto di autoridad den e universo, pero den keda razonabel su ehempel ta máximo. E ta eherce su autoridad di manera razonabel sin hera. Distinto di hopi hende, Jehova no ta insigur tocante su autoridad, p’sei e no ta sintié obligá di wardé cu envidia​—⁠como si e ta permiti otronan un cierto grado di autoridad esei por pone su mes autoridad na peliger. Realmente, ora tabatin un solo ser mas den e universo, Jehova a duné autoridad extensivo. El a haci e Logos su “obrero maestro,” i dje tempo ei padilanti Dios a trece tur cos na existencia pa medio di tal Yiu stimá. (Proverbio 8:​22, 29-31; Juan 1:​1-3, 14; Colosense 1:15-17) Despues, Dios a delega su Yiu “tur autoridad . . . den cielo i riba tera.”​—⁠Mateo 28:18; Juan 5:⁠22.

¹⁷ Di igual manera, Jehova ta confia hopi criatura di dje cu asignacion cu e mes por haci asta mas mihor. Por ehempel, ora el a bisa Abraham, “Mi ta completamente determiná di baha [cerca Sódoma i Gomorra] pa mi mira si nan ta actua henteramente segun e sclamacion cu a yega cerca mi tocante dje,” e no kier men cu e personalmente lo baha cerca dje. Mas bien, Jehova a scoge di delega autoridad i nombra angel pa haya tal informacion pe. El a dúnanan autoridad pa guiá e mision pa busca tal informacion i bolbe cerca dje i informé.​—⁠Génesis 18:​1-3, 20-22.

¹⁸ Na un otro ocasion, ora Jehova a decidi di ehecuta su sentencia riba e malbado rey Acab, El a invita angel na un asamblea celestial pa duna sugerencia en cuanto con pa “gaña” e rey apóstata pa participa den e bataya cu lo termina su bida. Siguramente, Jehova Dios, e Fuente di tur sabiduría, no tabatin mester di yudanza pa propone e mihor camina pa scoge! Sin embargo, el a dignifica e angelnan cu e privilegio di propone solucion i e autoridad pa cumpli cu e proposicion cu el a scoge.​—⁠1 Rey 22:​19-22.

¹⁹ Jehova no ta usa su autoridad pa eherce indebido control riba otronan. Den esei també e ta mustra cu e ta razonabel na moda sin igual. E ta limita cuidadosamente e cantidad di ley cu e ta traha i ta prohibi su sirbidornan di ‘bai mas ayá cu e cosnan skirbí’ trahando nan mes ley cu ta un carga pisá. (1 Corintio 4:6; Echo 15:28; haci contraste cu Mateo 23:⁠4.) Dios nunca ta exigi obedencia irrazonabel di su creacion, pero generalmente ta duna suficiente informacion pa guíanan i ta láganan tuma e decision, dunando nan di conoce e beneficio di obedencia i e consecuencia di desobedencia. (Deuteronomio 30:​19, 20) En bez di forza hende mediante sintimento di culpa, bergüenza, of miedu, Dios kier alcanza curazón; e kier pa hende sirbié a base di berdadero amor en bez di ser forzá. (2 Corintio 9:⁠7) Tur sirbishi asina cu tur e alma ta haci e curazón di Dios alegra, pues, e no ta irrazonablemente “difícil pa complace.”​—⁠1 Pedro 2:18; Proverbio 27:11; compara cu Miqueas 6:⁠8.

²⁰ No ta notable cu Jehova Dios, cu tin mas poder cu tur otro persona den e creacion, nunca ta eherce su poder irrazonablemente, nunca ta usé pa forza of amenazá otronan? Pero, hende, cu ta tanto chikito na comparacion, tin un historia di a domina otro. (Eclesiastés 8:⁠9) Claramente, e facultad di ser razonabel ta un calidad precioso, un calidad cu ta conmovénos pa stima Jehova Dios tanto mas. Esei, en turno, por motivános pa nos mes cultiva tal calidad. Con nos por haci esei? E sigiente artículo ta trata cu e asunto.

[Footnotes]

[Study Questions]

1. Con algun hende ta pinta Dios como irrazonabel, i kico bo ta pensa di tal punto di bista di Dios?

2, 3. (a) Con nos por ilustra e echo cu institucion i organizacion humano ta irrazonabel? (b) Con e vision di Ezekiel dje garoshi celestial di Jehova ta revela Su adaptabilidad?

4. (a) Di ki manera e nomber mes di Jehova ta revela cu e ta un Dios adaptable? (b) Cua ta algun título aplicá na Jehova Dios, i pakico nan ta apropiado?

5. Pakico nos no mag conclui cu e adaptabilidad di Jehova ta indica cu su naturaleza of normanan ta cambia?

6. Kico ta e nificacion literal i indicacion dje palabra griego cu Santiago a usa pa detayá sabiduría divino?

7. Den e hofi di Eden, con Jehova a demonstra cu e ta razonabel?

8. (a) Con e punto di bista equibocá di cristiandad di ser razonabel ta para na contraste cu e berdadero facultad di ser razonabel di Jehova? (b) Pakico nos por bisa cu e facultad di ser razonabel di Jehova no ta indica cu e por compromete principio divino?

9, 10. (a) Kico e calidad di ser “cla pa pordoná” tin cu ber cu e facultad di ser razonabel? (b) Con David a beneficiá dje disposicion di Jehova di ser cla pa pordoná, i pakico?

11. Con Jehova a mustra cu e tabata cla pa pordoná den e caso di Manasés?

12, 13. (a) Den e caso di Nínive, cua cambio di circunstancia a conmové Jehova pa cambia di idea? (b) Di ki manera Jonás a resulta di ser menos razonabel cu Jehova Dios?

14. Pakico Jehova a cambia su proceder en cuanto su profeta Ezekiel?

15. (a) Cua ehempel ta mustra cu Jehova ta keda dispuesto pa scucha i responde na ser humano? (b) Esei por síñanos cua les?

16. Di ki manera Jehova ta diferente cu hopi hende den e manera cu e ta eherce su autoridad?

17, 18. (a) Pakico Jehova a manda angel na Sódoma i Gomorra? (b) Pakico Jehova a pidi sugerencia dje angelnan en cuanto con pa gaña Acab?

19. (a) Pakico Jehova ta limita e cantidad di ley cu e ta traha? (b) Con Jehova ta mustra cu e ta razonabel en cuanto loke e ta spera di nos?

20. Con e facultad di ser razonabel di Jehova ta afectábo?

[Caption on page 10]

Pakico Jehova a pordona e malbado rey Manasés?

[Caption on page 14]

Con bo ta contesta?

◻ Con e nomber di Jehova i e vision di su garoshi celestial ta enfatizá su adaptabilidad?

◻ Kico kier men ser razonabel, i pakico esei ta un indicacion di sabiduría divino?

◻ Di ki manera Jehova a mustra cu e ta “cla pa pordoná”?

◻ Pakico Jehova a decidi di cambia un proceder cu el a propone na cierto ocasion?

◻ Con Jehova ta demonstra cu e ta razonabel den e manera cu e ta eherce autoridad?