Un Ceru cu Ta “Move”

DEN e parti west di Irlanda, e ceru Croagh Patrick cu su forma único di papureshi [katuchi] ta resaltá for dje cerunan rond di dje. Tur aña, riba e último diadomingo di juli, e top dje ceru ta parce di ta moviendo ora cu e gran cantidad di 30.000 hende, di tur edad, ta subi te n’e cumbre (765 m) riba un biahe peregrino anual.

Riba e dia aki, peregrinonan ta subi i baha riba un caminda cu ta smal, yen di baranca i, den algun lugá, peligroso, En realidad, e último parti dje subida (mas of ménos 300 m) ta extremadamente steil i ta consistí casi henteramente di barancanan los, haciendo asina e subimentu peligroso i tambe agotador.

Algun lo haci e subimentu aki pia abou i algun asta lo completá algun parti di dje riba nan rudia. Den tempunan pasá, e biahe peregrino a cuminsá den e scuridad di anochi.

Pakico Croagh Patrick ta un experencia asina importante pa asina tantu hende?

Establecí Hopi Tempu pasá Como un Lugá di Biahe Peregrino

Den e promé parti di siglo cincu E.C., e Iglesia Católico Romano a manda Patrick como un obispu misionero na Irlanda. Su meta principal tabata di combertí e irlandesnan na cristianismo, i durante su añanan di predicá i traha meimei dje pueblo, Patrick a ser acreditá di a pone e fundeshi p’e Iglesia Católico ei.

Su obra a hib’é na un cantidad di lugánan den henter e pais. Un di nan tabata e parti west di Irlanda, unda, segun algun fuente, el a pasa 40 dia i anochi riba e top di un ceru cu a yega di ser yamá mescos cuné—Croagh Patrick (nificando “Ceritu di Patrick”). Ei el a yuna i a haci oracion p’e éxito di su mision.

Atrabes di añanan hopi leyenda a desaroyá en cuanto su hazañanan. Esun di mas famoso ta cu miéntras e tabata riba e ceru ei, Patrick a saca tur colebra for di Irlanda.

Tradicion ta bisa cu el a edificá un misa chikitu riba e cumbre. Aunke for di hopi tempu e edificio ei no t’ei mas, e fundeshi original ainda ta existí, i e sitio como tambe e ceru tabata un lugá di biahenan peregrino atrabes di añanan.

Rasgonan dje Biahe Peregrino

Pa un persona di edad avansá of cu no ta custumbrá di subi ceru, ta un logro riba su mes pa djis completá e subida trabahoso di 5 km i baha sano i salbo.

Na puntonan stratégico cant’i caminda, ekiponan di emergencia ta para cla pa trata cu diferente clase di lesion.

Tin tres lugá, of stacion, riba e caminda unda e peregrinonan ta efectuá vários práctica di penitencia. Esakinan ta ser splicá ampliamente riba un borchi na cuminsamentu dje subida.—Mira cuadro.

Pakico Nan Ta Subi?

Pakico asina tantu hende ta haci e biahe peregrino difícil aki? Pakico algun hende ta bai na tal extremonan ora nan haci e subimentu?

Wel, algun ta pensa cu dor di resa durante e biahe peregrino, ta mas probabel cu nan peticionnan pa beneficio personal lo ser tendí. Otronan ta haci’é pa busca pordon pa algun malu cu nan a haci. Pa otronan, esaki ta un manera pa expresá gratitud. Sin duda, hopi ta bai p’e aspecto festivo di dje. Un autoridad a remarcá cu e tabata ‘un expresion dje spiritu di cooperacion i amor di comunidad.’ Tambe el a bisa cu subiendo Croagh Patrick “tabata nan manera di sigui den e pasonan di St. Patrick [San Patricio] i di reconocé e debe cu nan tabatin cuné den e sentido di cu gracias na dje nan tin e fe cristian.” El a agregá cu, mas importante cu tur cos, e subimentu ta “un forma di penitencia, pasobra e esfuerso físico enbolbí ta un berdadero práctica di penitencia. E subimentu poco poco te n’e top tabata un acto prolongá di penitencia.”

Un homber a declará orguyosamente cu el a subi 25 biaha! El a bisa cu el a haci esei, “pa haci un poco penitencia!” Un otro homber simplemente a splica, “Sin dolor, no tin beneficio!”

Aunke no ta esencial, hopi ta subi e ceru pia abou. Pakico nan ta haci esei? Promé, nan ta considerá e suela como “santu” i p’esei nan ta kita nan sapatu. Di dos, e ta conforme cu nan meta di ‘haci un poco penitencia.’ Esaki tambe ta splica pakico algun asta ta efectuá e prácticanan di penitencia n’e stacionnan riba nan rudia.

Conmoví pa Apreciá e Creador

Pero kico si un hende no a compartí e sintimentunan religioso di peregrinonan cu ta subi riba un dia special? Cu bon condicionnan di weer i un par di bon sapatu, por subi e ceru riba cualkier dia. Nos no a subi riba un dia cu e masa moviente di peregrino tabata subiendo. Durante nos pausanan frecuente pa descansá, nos tabata por a reflehá riba e subimentu mes i e efecto cu e tabatin riba asina tantu hende. Imaginando miles di peregrino haciendo e subimentu difícil aki i ehecutando e vários prácticanan di penitencia, nos a ser impulsá pa puntra nos mes, ‘Ta esaki ta loke Dios ta rekerí? E ritualnan di subi ceru of cana rond di cierto monumentonan recitando oracionnan repetidamente realmente ta hala un hende mas cerca di Dios?’ Kico di Jesus su conseho en cuanto oracionnan repetitivo na Mateo 6:6, 7?

Claro, nos no a subi e ceru pa haña un experencia religioso. Tog, nos a sinti nos mas cerca di nos Creador, pasobra nos por a apreciá su creacion, cerunan tur caminda siendo un parti dje maraviyanan dje tera. For dje cumbre nos por a disfrutá di un bista inobstaculisá dje bunita paisahe, asta mirando e costa dje Océano Atlántico. E islanan chikitu resplandeciendo den e bahia bou di nos na un banda, a forma un contraste bibu cu e region montañoso bashí i cu puntanan skerpi n’e otro banda.

Nos a pensa riba e tres stacionnan. E palabranan di Jesus mes a bin na mente, ora el a bisa su berdadero siguidornan: “Ora di haci oracion, no bisa e mésun cosnan bes tras bes, mescos cu e hendenan dje nacionnan ta haci, pasobra nan ta kere cu nan lo ser tendí debí na nan uso di hopi palabra.”—Mateo 6:7.

Nos a realisá cu e ceru a bira parti di un tradicion cu a mara miles di hende den ritual trabahoso. Nos a considerá con esei tabata en contraste cu e libertad di cua apostel Juan a papia ora el a bisa: “Nos ta warda [Dios] su mandamentunan; i tog su mandamentunan no ta un carga pisá.”—1 Juan 5:3.

Nos a disfrutá di nos paseo, incluyendo e subimentu di Croagh Patrick. El a conmové nos pa mira cu anticipacion n’e tempu ora henter humanidad lo ta librá di tradicionnan no-bíblico i por adorá e amoroso Creador dje tera “cu spiritu i cu berdad.”—Juan 4:24.

[Kuadro na página 27]

Rasgonan Principal dje Biahe Peregrino

Cada peregrino cu subi e ceru riba Dia di St. Patrick of dentro di ocho dia, of riba cualkier dia durante e lunanan di juni, juli, augustus i september, I CU HACI ORACION DEN OF CERCA DJE KAPEL na fabor di e Papa, por haña pordon completo dje castigu temporal pa picá, cu e condicion di bai Confesion i e Santa Comunion riba e Cumbre of dentro di un siman.

E STACIONNAN TRADICIONAL

Tin tres “stacion” (1) Na pia dje papureshi [katuchi] of Leacht Benain, (2) Riba e cumbre, (3) Roilig Muire, un distancia mas abou n’e lado dje ceru den direccion dje pueblo di Lecanvey.

1° Stacion - LEACHT BENAIN

E peregrino ta cana siete biaha rond dje monton di piedra resando 7 Nos Tata, 7 Ave Maria i un Credo

2° Stacion - E CUMBRE

(a) E peregrino ta hinca rudia i ta resa 7 Nos Tata, 7 Ave Maria i un Credo

(b) E peregrino ta resa cerca dje Kapel na fabor dje Papa

(c) E peregrino ta cana 15 biaha rond dje Kapel resando 15 Nos Tata, 15 Ave Maria i un Credo

(d) E peregrino ta cana 7 biaha rond di Leaba Phadraig [Patrick Su Cama] resando 7 Nos Tata, 7 Ave Maria i un Credo

3° Stacion - ROILIG MUIRE

E peregrino ta cana 7 biaha rond di cada monton di piedra resando 7 Nos Tata, 7 Ave Maria i un Credo na cada un [tin tres monton] i finalmente ta pasa rond di henter e curá di Roilig Muire 7 biaha, resando.