Asina Tantu Sufrimentu

“PAKICO tin tur e teribel sufrimentu individual i colectivo aki . . . ? Dios supuestamente ta e personificacion di propósito i tog tin asina tantu cos cu no tin sentido den e mundu aki, asina tantu sufrimentu pornada i picá sin sentido. Acaso e Dios aki ta loke Nietzsche a acus’é di ta: un dictador, impostor, estafador, ehecutor?”—On Being a Christian, di Hans Küng.

Bo por mira cu e teólogo católico Hans Küng ta simplemente presentando un problema cu ta confundí hopi hende—pakico un Dios amoroso i todopoderoso ta permití asina tantu sufrimentu? Bo no a yega di tende hende haci un pregunta asina? Cualkier hende cu compasion ta sinti pena pa loke Küng ta describí como “un fluho interminabel di sanger, sodó i lágrima, dolor, tristesa i miedu, soledad i morto.” E ta, de facto, mas manera un yobida pisá, un diluvio di horor i angustia cu a ruiná bida di miyones di hende atrabes di historia.—Job 14:1.

Yená cu “Afan i Cosnan Perhudicial”

Pensa riba e sufrimentu cu ta resultá for di guera, e dolor cu no solamente e víctimanan ta sinti, sino tambe esnan cu ta keda atras na pena, tal como e mayornan i parientenan di muchanan cu ta víctima i otronan cu a ser maltratá brutalmente. Recientemente Crus Corá a bisa cu “atrabes dje último 10 añanan, 1,5 miyon mucha a ser matá den conflictonan armá.” Na Ruanda den 1994, Crus Corá ta informá cu “cientos di miles di homber, muher i mucha a ser matá brutalmente i sistemáticamente.”

Tampoco nos mester pasa por haltu dje dolor causá dor di pedofilnan perverso. Un mama na pena, cu a bisa cu su yu homber a cometé suicidio despues cu un trahador di un instituto pa cuido di mucha a abusá sexualmente di dje, a declará: “E homber cu a abusá di mi yu . . . a destruí e i un cantidad di otro mucha homber den e manera di mas sistemático i perverso imaginabel.” I kico dje pesadia di dolor cu víctimanan ta sinti na man di asesinonan cruel cu ta cometé seri di matansa, manera esnan cu a ser gará na Inglatera, kendenan a “secuestrá, violá sexualmente, torturá i mata pa 25 aña largu sin haña castigu”? Atrabes di historia ta parce cu no tabatin límite n’e dolor i sufrimentu cu homber i muher a causa na otro.—Eclesiástes 4:1-3.

Agregá na esaki e sufrimentu causá pa enfermedad emocional i físico i e dolor teribel di pena cu ta destrosá famianan ora sernan kerí muri den un manera prematuro. Tambe tin e angustia cu víctimanan di hamber of otro asina yamá desasternan natural ta sinti. Poco hende lo cuestioná e declaracion di Moises cu nos 70 of 80 añanan ta yená cu “afan i cosnan perhudicial.”—Salmo 90:10.

Parti dje Propósito di Dios?

Por ta asina, manera algun persona a pretendé, cu e sufrimentu incesante aki ta parti di un of otro propósito incomprensibel di Dios? Ta necesario pa nos sufri awor pa apreciá bida ‘den e siguiente mundu’? Ta berdad, manera filósofo frances Teilhard de Chardin a kere, cu e “sufrimentu cu ta mata i descomponé, ta necesario p’e ser humano afin cu e por biba i bira spiritu”? (The Religion of Teilhard de Chardin; letternan cursivo ta di nos.) Siguramente cu no!

Un diseñador atento lo crea deliberadamente un ambiente mortífero i despues pretendé di ta compasivo ora e rescatá hende for di su efectonan? Apénas! Pakico un Dios amoroso lo haci un cos asina? Pues, pakico Dios ta permití sufrimentu? Sufrimentu lo caba un dia? E siguiente artículo lo trata e preguntanan aki.

[Rekonosementu pa Potrèt na página 3]

WHO photo by P. Almasy