Bio-Etica i Operacion sin Sanger

DEN añanan recien tabatin progreso sin precedente den e campo di medicina. Sin embargo, miéntras cu algun adelanto a resolvé problemanan médico, nan a crea problemanan ético.

Dokternan tin cu considerá dilemanan manera: Mester stop tratamentu médico agresivo tin biaha pa un pashent por muri cu dignidad? Un dokter mester pone decision di un pashent un banda si e haña cu esei ta mihó p’e pashent? Con cuido di salú mester ser distribuí na un manera hustu ora tratamentu costoso no ta disponibel pa tur hende?

Pa por haña claridad riba cuestionnan complicá asina, a concentrá nan den e disiplina médico yamá bio-ética. Meta dje specialidad aki ta pa yuda dokter i científiconan trata cu e implicacionnan ético di investigacion biológico i adelantonan médico. Ya cu hopi dje decisionnan mas difícil ta surgi den hospitalnan, hopi hospital a establecé comiténan bio-ético. Generalmente e miembronan dje comité—incluyendo dokter i abogadonan—ta asistí na seminarionan riba bio-ética, unda problemanan ético den medicina ta ser analisá.

Algun pregunta cu frecuentemente sa presentá den seminarionan asina ta: Te na ki grado dokternan mester respetá e creencianan di Testigonan di Jehova cu, na promé lugá pa motibunan religioso, ta nenga di aceptá transfusion di sanger? Un dokter mester duna un pashent transfusion contra e pashent su boluntad si esei ta parce médicamente “consehabel”? Lo ta ético pa haci esei sin cu e pashent sa, como si fuera ‘si wowo no mira, curason no ta haci due’?

Pa trata cuestionnan asina di un manera apropiado, dokternan mester tin un comprendimentu obhetivo dje punto di bista dje Testigonan. Di nan parti, Testigonan di Jehova ta ansioso pa splica nan posicion na dokternan, realisando cu comprendimentu mutuo por sirbi pa evitá confrontacion.

Un Intercambio di Punto di Bista

Profesor Diego Gracia, un autoridad prominente den bio-ética na Spaña, tabata kier pa su klas tene un diálogo asina. “Ta solamente corecto pa boso [Testigonan di Jehova] haña un oportunidad pa expresá boso preocupacionnan . . . en bista dje dificultadnan cu boso tabatin en coneccion cu transfusion di sanger,” e profesor a bisa.

Asina, dia 5 di juni, 1996, tres representante di Testigonan di Jehova a ser invitá n’e Universidad Complutense na Madrid, Spaña, pa splica nan punto di bista. Rond di 40 dokter i otro profesionalnan tabata presente.

Despues cu e Testigonan a duna un presentacion breve, tabatin oportunidad di haci pregunta. Tur esnan presente tabata di acuerdo cu un pashent adulto mester tin e derecho di nenga un tratamentu médico particular. Tambe e klas tabata di opinion cu nunca no mester duna un transfusion sin cu e pashent ricibí un splicacion di loke esei ta enbolbé anto e consentí cu e tratamentu. Sin embargo, algun aspecto dje posicion dje Testigonan a preocupá nan.

Un pregunta a toca placa. Tin biaha operacion sin sanger ta enbolbé ekipo special, manera operacion di laser, i tambe remedinan costoso, manera eritropoyetin, cu ta ser usá pa stimulá produccion di cel corá di sanger. Un dokter a puntra su mes si dor di nenga un opcion ménos costoso (sanger homólogo), e Testigonan tal bes ta spera pa servicionan di salú público duna nan privilegionan special.

Aunke el a reconocé cu placa ta en berdad un factor cu dokternan tin cu considerá, un representante Testigo a referí na estudionan publicá cu ta analisá e gastunan scondí di transfusion di sanger homólogo. Esakinan ta incluí e costo di trata complicacionnan relacioná cu transfusion, i tambe e pérdida di entrada cu ta resultá for di complicacionnan asina. El a cita un estudio extenso for di Merca cu a indicá cu e unidad promedio di sanger, aunke inicialmente e ta costa solamente $250, en realidad a producí gastunan di mas cu $1.300—mas cu cincu biaha e suma original. P’esei, el a mustra, ora tene cuenta cu tur factor, operacion sin sanger ta mas económico. Ademas, hopi di e asina yamá extra costo di operacion sin sanger ta ekipo cu por ser usá atrobe.

Un otro pregunta den mente di vários dokter tabata relacioná cu presion di parti di esnan den e congregacion. Nan a puntra nan mes, kico lo pasa si un Testigo vacilá i aceptá un transfusion di sanger? Lo e ser excluí dor dje comunidad di Testigonan?

E contesta lo dependé riba con e situacion tabata en berdad, pasobra desobedencia n’e ley di Dios siguramente ta un asuntu serio, algu p’e ancianonan dje congregacion examiná. E Testigonan lo kier yuda cualkier persona cu a pasa den e experencia traumático di un operacion peligroso i cu a aceptá un transfusion. No cabe duda cu un Testigo asina lo sinti su mes masha malu i preocupá tocante su relacion cu Dios. Un persona asina lo tin mester di yudansa i comprension. Siendo cu e wes’i lomba di cristianismo ta amor, e ancianonan lo kier, mescos cu den tur caso hudicial, moderá firmesa cu misericordia.—Mateo 9:12, 13; Juan 7:24.

“Boso lo no reevaluá boso posicion ético pronto?” un profesor den bio-ética, cu tabata di bishita for di Merca, a puntra. “Otro religionnan a haci esei den añanan recien.”

A contest’é cu e posicion dje Testigonan pa cu e santidad di sanger ta un creencia basá riba doctrina mas bien cu un punto di bista ético cu mester wordu evaluá periódicamente. E mandamentu claro di Bijbel no ta laga espacio pa comprometé. (Echonan 15:28, 29) Violacion di un ley divino asina lo ta mes inaceptabel pa un Testigo cu dispensá idolatria of fornicacion.

Testigonan di Jehova ta apreciá masha tantu e bon boluntad di dokternan—manera esnan presente n’e seminario di bio-ética na Madrid—pa respetá nan decision di busca tratamentu alternativo cu ta cuadra cu nan conviccionnan basá riba Bijbel. Sin duda, bio-ética lo hunga un papel importante den mehorá e relacion di dokter-pashent i fomentá mayor respet pa e deseonan dje pashent.

Manera un famoso dokter spañó a yega di bisa, dokternan mester corda semper cu nan ta “traha cu ekipo imperfecto i medionan falibel.” P’esei nan mester tin e “conviccion cu semper mester extendé amor caminda conocimentu no por alcansá.”