Administracion Teocratico den e Era Cristian

“Ta segun su bon gustu . . . pa recogé tur cos huntu atrobe den e Cristo, e cosnan den shelu i e cosnan riba tera.”—EFESIONAN 1:9, 10.

1, 2. (a) Con e recogementu di “e cosan den shelu” a desaroyá, cuminsando na 33 E.C.? (b) Con cristianan ungí a demostrá e spiritu di Moises i Elías desde 1914?

E RECOGEMENTU aki di “e cosnan den shelu” a cuminsá na 33 E.C., ora “e Israel di Dios” a nace. (Galationan 6:16; Isaías 43:10; 1 Pedro 2:9, 10) Despues dje promé siglo E.C., e recogementu a mengua ora cristiannan genuino (cu Jesus a yama “trigu”) a ser tapá dor di “mal yerba” apóstata cu Satanas a sembra. Pero segun cu “e tempu di fin” tabata acercando, e berdadero Israel di Dios a reaparecé i na 1919 a ser nombrá riba tur Jesus su pertenencianan.a—Mateo 13:24-30, 36-43; 24:45-47; Daniel 12:4.

² Durante e promé guera mundial, cristiannan ungí a efectuá obranan poderoso, mescos cu Moises i Elías a haci.b (Revelacion 11:5, 6) Desde 1919 nan ta predicá e bon nobo den un mundu hostil, haciendo esei cu e curashi di Elías. (Mateo 24:9-14) I desde 1922 nan ta proclamá Jehova su huicionan riba humanidad, mescos cu Moises a trece e plaganan di Dios riba Egipto di antigwedad. (Revelacion 15:1; 16:2-17) E resto dje cristiannan ungí aki awe ta e núcleo dje sociedad di mundu nobo di Testigonan di Jehova.

Un Cuerpo Gobernante na Accion

 3. Ki sucesonan ta mustra cu e congregacion cristian di promé tabata bon organisá?

³ For di cuminsamentu dje congregacion cristian, Jesus su siguidónan ungí tabata organisá. Segun cu e cantidad di disipelnan a multiplicá, congregacionnan local a ser establecí i ancianonan a ser nombrá. (Tito 1:5) Despues di 33 E.C., e 12 apostelnan a actua como un cuerpo gobernante central cu autoridad. Como tal, sin temor nan a hiba delantera den e trabou di duna testimonio. (Echonan 4:33, 35, 37; 5:18, 29) Nan a organisá e distribucion di cuminda na esnan den necesidad, i nan a manda Pedro i Juan na Samaria pa sigui yuda esnan cu a mustra interes ei. (Echonan 6:1-6; 8:6-8, 14-17) Barnabas a hiba Pablo cerca nan pa confirmá cu e ex-persiguidó aki awor tabata un siguidó di Jesus. (Echonan 9:27; Galationan 1:18, 19) I despues cu Pedro a predicá na Cornelio i su famia di cas, el a regresá Jerusalem i a splica e apostelnan i otro rumannan di Hudea con spiritu santu a indicá cua tabata e boluntad di Dios den e caso aki.—Echonan 11:1-18.

 4. Ki intento a ser hací pa mata Pedro, pero con su bida a ser salbá?

⁴ Anto e cuerpo gobernante a ser atacá brutalmente. Pedro a ser encarcelá, i tabata únicamente intervencion angelical cu a salba su bida. (Echonan 12:3-11) Awor pa promé biaha, un persona cu no tabata un dje 12 apostelnan a aparecé den un posicion prominente den Jerusalem. Ora Pedro a ser librá for di prizon, el a bisa un grupo reuní den e cas dje mama di Juan Marco: “Informá Santiago [Jesus su mitar ruman] i e rumannan dje cosnan aki.”—Echonan 12:17.

 5. Con e composicion dje cuerpo gobernante a cambia despues dje martirio di Santiago?

⁵ Anteriormente, despues cu Hudas Iscariote, e apostel traicionero, a cometé suicidio, e otronan a mira e necesidad pa duna “su puesto di superintendencia” como un apostel na un persona cu a compañá Jesus durante su ministerio i cu tabata testigo di su morto i resureccion. Sin embargo, ora Santiago, ruman di Juan, a ser ehecutá, ningun persona a reemplas’é como un dje 12. (Echonan 1:20-26; 12:1, 2) Mas bien, e siguiente referencia bíblico n’e cuerpo gobernante ta mustra cu esaki a ser aumentá. Ora a tanta un disputa riba si gentilnan cu a sigui Jesus mester a sometá nan n’e Ley di Moises, e asuntu a ser someté pa decision na “e apostelnan i ancianonan cu tabata den Jerusalem.” (Echonan 15:2, 6, 20, 22, 23; 16:4) Pakico awor evidentemente tabatin “ancianonan” den e cuerpo gobernante? Bijbel no ta bisa, pero tabatin un beneficio obvio. E morto di Santiago i e encarcelacion di Pedro a mustra cu e apostelnan un dia lo por a ser encarcelá of matá. Cu e chens pa cosnan asina sosodé, e presencia di otro ancianonan cualificá, experenciá den proceduranan dje cuerpo gobernante, lo a garantisá e continuidad ordená di supervision.

 6. Con e cuerpo gobernante a sigui funcioná na Jerusalem, asta ora su miembronan original no tabata den e stad ei mas?

⁶ Ora Pablo a bini Jerusalem rond di aña 56 E.C., el a raportá cerca Santiago i, segun Bijbel, “tur e ancianonan tabata presente.” (Echonan 21:18) Pakico no tabatin mencion di apostelnan n’e reunion aki? Atrobe, Bijbel no ta bisa. Pero e historiadó Eusebio mas despues a informá cu algun tempu promé cu 66 E.C., “e resto dje apostelnan, den peliger constante di complotnan pa mata nan, a ser sacá for di Hudea. Pero pa siña nan mensahe, nan a biaha den tur pais den e poder di Cristo.” (Eusebius, Buki III, V, v. 2) Ta cierto cu Eusebio su palabranan no ta parti dje registro inspirá, pero nan ta na armonia sí cu loke e registro ei ta bisa. Por ehempel, pa 62 E.C., Pedro tabata na Babilonia—leu for di Jerusalem. (1 Pedro 5:13) Sin embargo, na 56 E.C., i probablemente te na 66 E.C., un cuerpo gobernante tabata claramente activo na Jerusalem.

Administracion den Tempu Moderno

 7. Compará cu e cuerpo gobernante di e promé siglo, ki diferencia sobresaliente tin den e composicion dje Cuerpo Gobernante awe?

⁷ For di 33 E.C. te n’e tribulacion riba Jerusalem, e cuerpo gobernante tabata consistí evidentemente di cristiannan hudiu. Durante su bishita na 56 E.C., Pablo a haña sa cu hopi cristian hudiu den Jerusalem, apesar cu nan tabatin “e fe di nos Señor Jesucristo,” ainda tabata “celoso p’e Ley [di Moises].”c (Santiago 2:1; Echonan 21:20-25) Kisas tabata difícil p’e hudiunan ei imaginá nan mes un gentil den e cuerpo gobernante. Sin embargo, den e tempu moderno, tabatin un otro cambio den e composicion dje cuerpo aki. Awe, e ta consistí den su totalidad di cristiannan gentil ungí, i Jehova a bendicioná nan supervision ricamente.—Efesionan 2:11-15.

8, 9. Ki desaroyonan a tuma lugá den e Cuerpo Gobernante den tempu moderno?

⁸ Desde e incorporacion di Watch Tower Bible and Tract Society of Pennsylvania na 1884 te 1972, e presidente dje Sociedad a ehercé gran autoridad den Jehova su organisacion, miéntras cu e Cuerpo Gobernante tabata estrechamente asociá cu e Sociedad su hunta di directornan. E bendicionnan cu e organisacion a ricibí durante e añanan ei ta proba cu Jehova a aceptá e areglo ei. Entre 1972 pa 1975, e Cuerpo Gobernante a ser aumentá na 18 miembro. Ora e cuerpo mas grandi aki a ricibí mas autoridad, el a bira un mihó refleho di e areglo dje promé siglo. Algun dje miembronan ta a la bes director di Watch Tower Bible and Tract Society of Pennsylvania.

⁹ Desde 1975 un cantidad di e 18 individuonan aki a finalisá nan curso terenal. Nan a vence e mundu i a bai ‘sinta cu Jesus riba su trono celestial.’ (Revelacion 3:21) Pa e motibu aki i otronan tambe, e Cuerpo Gobernante tin awor dies miembro, incluyendo un cu a ser agregá na 1994. Mayoria tin edad basta avansá. Sin embargo, e rumannan ungí aki ta ricibí excelente apoyo segun cu nan ta cumpli cu nan tareanan pisá. Unda nan ta haña e apoyo aki? Un bistaso riba e desaroyonan moderno entre e pueblo di Dios ta contestá e pregunta ei.

Apoyo pa e Israel di Dios

10. Ken a djoin e ungínan den Jehova su sirbishi den e último dianan aki, i con esaki a ser profetisá?

¹⁰ Leu ayá na 1884 casi tur esnan asociá cu e Israel di Dios tabata cristiannan ungí. Sin embargo, gradualmente un otro grupo a cuminsá aparecé, i na 1935 e grupo aki a ser identificá como e “multitud grandi” di Revelacion capítulo 7. Teniendo un speransa terenal, esakinan ta representá “e cosnan riba tera” cu Jehova ta bai recogé huntu den e Cristo. (Efesionan 1:10) Nan ta representá e “otro carnénan” di Jesus su comparacion dje curánan di carné. (Juan 10:16) Desde 1935, otro carnénan a basha bini den Jehova su organisacion. Nan a “bini bulando mescos cu un rubia, i manera palomba n’e buracunan di nan kouchi.” (Isaías 60:8) Debí n’e aumento den e multitud grand i e reduccion den e clase di ungínan segun cu hopi di nan ta finalisá nan curso terenal den morto, otro carnénan cualificá a bin ta hunga un papel mas grandi den actividadnan cristian. Den ki maneranan?

11. Ki privilegionan, originalmente limitá na cristiannan ungí, a ser duná na otro carnénan?

¹¹ Semper e “nacion santo” di Dios tabatin e obligacion special pa declará e excelencianan di Jehova na tur parti. Pablo a papia di dje como un sacrificio di tempel, i na esnan cu lo ta “un sacerdocio real,” Jesus a duna e comision pa predicá i siña. (Exodo 19:5, 6; 1 Pedro 2:4, 9; Mateo 24:14; 28:19, 20; Hebreonan 13:15, 16) No obstante, e edicion ingles di E Toren di Vigilancia di 1 di augustus, 1932, specíficamente a animá esnan cu Jonadab a prefigurá pa participá den e actividad aki. En berdad, hopi di e otro carnénan ei tabata haciendo esei caba. Awe, e otro carnénan ta haci casi tur e trabou di predicá como un parti prominente dje ‘sirbishi sagrado cu nan ta rindi na Dios di dia i anochi den su tempel.’ (Revelacion 7:15) Di igual manera, den e promé parti dje historia moderno di Jehova su pueblo, e ancianonan di congregacion tabata cristiannan ungí, “streanan” den e man drechi di Jesucristo. (Revelacion 1:16, 20) Pero e edicion ingles di E Toren di Vigilancia di 1 di mei, 1937, a anunciá cu otro carnénan cualificá por tabata sirbidónan di compania (superintendente presidente). Asta si hombernan ungí tabata disponibel, otro carnénan lo por a ser usá si e hombernan ungí no por a carga e responsabilidad aki. Awe, casi tur anciano di congregacion ta dje otro carnénan.

12. Ki precedentenan bíblico tin pa otro carnénan cualificá ricibí responsabilidadnan organisacional pisá?

¹² Ta malu pa duna responsabilidadnan pisá asina n’e otro carnénan? No, e tin precedente histórico. Algun prosélito stranhero (residentenan stranhero) tabatin posicionnan importante den Israel di antigwedad. (2 Samuel 23:37, 39; Jeremías 38:7-9) Despues dje exilio babilónico, netineonan cualificá (sirbidónan no-israelita di tempel) a haña privilegionan di sirbishi di tempel cu anteriormente a pertenecé solamente n’e levitanan. (Esdras 8:15-20; Nehemías 7:60) Ademas, Moises, kende a ser mirá den e vision di transfiguracion huntu cu Jesus, a aceptá e conseho excelente cu e madianita Jetro a ofrecé. Mas despues, el a pidi Hobab, yu di Jetro, pa guia nan dor dje desierto.—Exodo 18:5, 17-24; Númeronan 10:29.

13. Delegando humildemente responsabilidad na otro carnénan cualificá, ken su spiritu excelente e ungínan ta imitando?

¹³ Yegando na fin dje 40 añanan den e desierto, Moises, sabiendo cu lo e no a drenta e Tera Primintí, a pidi den oracion pa Jehova percurá un sucesor. (Númeronan 27:15-17) Jehova a bis’é pa comisioná Hosué dilanti henter e pueblo, i Moises a haci esei, aunke ainda e tabata físicamente fuerte i no a stop di sirbi Israel inmediatamente. (Deuteronomio 3:28; 34:5-7, 9) Cu un spiritu igualmente humilde, e ungínan ta extendiendo caba mas privilegio na hombernan cualificá for di entre e otro carnénan.

14. Ki profecianan ta señalá na mas responsabilidad den e organisacion p’e otro carnénan?

¹⁴ Dunando e otro carnénan mas responsabilidad den e organisacion ta tambe e tópico di profecia. Zacarías a predicí cu e filisteo no-israelita lo ta “manera un sheik den Huda.” (Zacarías 9:6, 7) Sheiknan tabata hefenan di tribu, pues Zacarías tabata bisando cu un ex-enemigu di Israel lo adoptá adoracion berdadero i bira manera un hefe di tribu den e Tera Primintí. Ademas, ora el a dirigí su mes n’e Israel di Dios, Jehova a bisa: “Hendenan straño realmente lo tanta i lo pastoreá baso tounan, i e stranheronan lo ta boso cunukeronan i boso cuidadónan di cunucu di wijndruif. I en cuanto boso, boso lo ser yamá e sacerdotenan di Jehova; lo ser bisá cu boso ta e ministernan di nos Dios.” (Isaías 61:5, 6) “Hendenan straño” i “stranheronan” ta e otro carnénan. Esakinan a ricibí responsabilidadnan pa por carga mas i mas trabou segun cu e resto ungí di edad avansá ta finalisá nan curso terenal i ta bai sirbi den un sentido completo como ‘sacerdotenan celestial di Jehova,’ rondonando Jehova su trono di mahestad como “ministernan di nos Dios.”—1 Corintionan 15:50-57; Revelacion 4:4, 9-11; 5:9, 10.

“E Generacion . . . cu Tin cu Bini”

15. Den e tempu di fin aki, cua grupo di cristian a alcansá “behes,” i cua grupo ta representá “e generacion cu tin cu bini”?

¹⁵ E resto ungí tabata ansioso pa entrená otro carnénan pa carga mas responsabilidad. Salmo 71:18 ta bisa: “Asta te cu behes i cabei blancu, O Dios, no bandoná mi, te ora mi por informá tocante bo brasa na e generacion, na tur esnan cu tin cu bini, tocante bo poder.” Comentando riba e versículo aki, e Toren di Vigilancia na ingles di 15 di december, 1948, a mustra cu e congregacion di cristiannan ungí siguramente a alcansá behes. El a sigui bisando cu e ungínan gososamente “ta mira padilanti den e lus di profecia di Bijbel i ta mira un generacion nobo.” Na ken en particular esaki ta refiriendo? E Toren di Vigilancia a bisa: “Jesus a papa di nan como su ‘otro carnénan.’” ‘E generacion cu tin cu bini’ ta referí na hende cu lo biba bou dje administracion terenal nobo goberná dor dje Reino di shelu.

16. Ki bendicionnan esnan di ‘e generacion cu tin cu bini’ ta anticipá ansiosamente?

¹⁶ Bijbel no ta specificá e tempu ora cu tur cistian ungí lo bandoná nan rumannan dje ‘generacion aki cu tin cu bini’ i pasa pa ser glorificá huntu cu Jesucristo. Pero e ungínan aki ta sigur cu e tempu pa esaki ta acercando. E sucesonan pronosticá den Jesus su gran profecia tocante “e tempu di fin” ta cumpliendo desde 1914, mustrando cu e destruccion dje mundu aki ta cerca. (Daniel 12:4; Mateo 24:3-14; Marco 13:4-20; Lucas 21:7-24) Pronto, Jehova lo introducí un mundu nobo den cua ‘e generacion cu tin cu bini’ lo ‘heredá e reino [e region terenal] prepará pa nan for di fundamentu dje mundu.’ (Mateo 25:34) Yen di emocion nan ta anticipá e restoracion di Paradijs i e resureccion di miyones di morto for di Hádes. (Revelacion 20:13) E ungínan lo t’ei pa yama esnan resucitá aki bon biní? Leu ayá na 1925, e Toren di Vigilancia di 1 di mei a bisa: “No ta na nos pa bisa arbitrariamente kico Dios lo haci of laga di haci. . . . [Pero] nos ta ser hibá n’e conclusion cu e miembronan dje Iglesia [cristiannan ungí] lo ser glorificá promé cu e resureccion di esnan digno di antigwedad [fiel testigonan pre-cristian].” Den un consideracion similar tocante si algun dje ungínan lo ta presente pa yama esnan resucitá bon biní, e Atalaya di 1 di september, 1989, a bisa: “Esaki lo no ta necesario.”d

17. Ki privilegionan maraviyoso e ungínan, como grupo, lo compartí cu Jesucristo, e Rey entronisá?

¹⁷ Ta cierto cu nos no sa kico lo sosodé den e caso di cada cristian ungí. Pero e presencia di Moises i Elías huntu cu Jesus den e vision di transfiguracion ta indicá cu cristiannan ungí resucitá lo mester ta cu Jesus ora e bini den gloria pa “recompensá cada un segun su comportacion” segun su huicio ta ser decretá i ehecutá. Ademas, nos ta corda Jesus su promesa cu cristiannan ungí cu ‘vence’ lo participá cuné den ‘pastoreá e nacionnan cu un bara di heru’ na Armagedon. Ora Jesus bini den gloria, nan lo sinta huntu cuné “husgando e diesdos tribunan di Israel.” Cu Jesus, nan lo ‘aplastá Satanas bou di nan pia.’—Mateo 16:27–17:9; 19:28; Revelacion 2:26, 27; 16:14, 16; Romanonan 16:20; Génesis 3:15; Salmo 2:9; 2 Tesalonicensenan 1:9, 10.

18. (a) Kico ta e situacion pa loke ta ‘e recogementu hutu den e Cristo di e cosnan den shelu’? (b) Kico nos por bisa tocante ‘e recogementu hutu den e Cristo di e cosan riba tera’?

¹⁸ Na armonia cu su administracion di cosnan, Jehova ta moviendo progresivamente “pa recogé tur cos huntu atrobe den e Cristo.” Pa loke ta “e cosnan den shelu,” su propósito ta cerca di ser completá. E unimentu di Jesus cu tur e 144.000 den shelu pa “e casamentu dje Lamchi” ta cerca. P’esei, mas i mas ruman homber maduro dje otro carnénan cu hopi aña di sirbishi, representando “e cosnan riba tera,” a ricibí responsabilidadnan mas pisá pa apoyá nan rumannan ungí. Ki un tempu excitante nos ta biba aden! Ta ki emocionante pa mira Jehova su propósito nove den direccion di su realisacion! (Efesionan 1:9, 10; 3:10-12; Revelacion 14:1; 19:7, 9) I cuantu e otro carnénan ta alegrá pa apoyá nan rumannan ungí segun cu ámbos grupo ta sirbi huntu como “un solo tou” bou di “un solo wardadó” den sumision n’e Rey, Jesucristo, i p’e gloria dje gran Soberano Universal, Jehova Dios—Juan 10:16; Filipensenan 2:9-11.

[Nota]

Bo Por Splica?

◻ Con e organisacion di Dios a move bai padilanti den e promé siglo?

◻ Con e Cuerpo Gobernante a desaroyá den e historia moderno di Testigonan di Jehova?

◻ Ki textonan bíblico ta autorisá e dunamentu di autoridad n’e otro carnénan den Jehova su organisacion?

◻ Con “e cosnan den shelu” i “e cosnan riba tera” a ser recogé huntu den e Cristo?

[Plachi na página 16]

Asta ora su miembronan original no tabata na Jerusalem mas, un cuerpo gobernante a sigui funcioná ei

[Plachi na página 18]

Cristiannan ungí maduro tabata un bendicion p’e pueblo di Jehova

C. T. Russell 1884-1916

J. F. Rutherford 1917-42

N. H. Knorr 1942-77

F. W. Franz 1977-92

M. G. Henschel 1992-