Mi Curason Ta Pasa Over cu Gratitud

MANERA JOHN WYNN A RELAT’E

Cuantu biaha mi no tabata resistí pa bai reunion di Testigonan di Jehova! Mi tabata fingi dolor di stoma of dolor di cabes—cualkier cos pa no bai. Pero e firmesa di mi mama semper a caba unbes cu tal enfermedad, i mi tabata hañá mi ta cana bai cuné e tres kilometernan pa e Salon di Reino, scuchand’e ta papia over di e Palabra di Dios cu un compañera mas bieu.

ESAKI a siñá mi un les balioso: Mayornan nunca mester stop di ta firme, den un manera amoroso, pa loke ta recto den bista di Dios. (Proverbionan 29:15, 17) Nunca nan mester lubidá e mandamentu divino di ‘no bandoná nos reunimentu huntu.’ (Hebreonan 10:25) Ora mi wak bek riba mi bida, ki gradicidu mi ta cu mi mama a poné mi haci loke tabata mihó pa mi!

Gradicidu pa Ehempelnan Excelente

Aunke mi tata tabata un incrédulo, el a tolerá Mama su creencianan ora Mama a bira un Studiante di Bijbel, manera Testigonan di Jehova tabata conocí e tempu ei. Na 1913 el a bai tende e discurso “Mas Ayá dje Graf,” cu Charles T. Russell, e promé presidente dje Sociedad Watchtower, a duna. Sin embargo, Mama a yega lat, i ya tur stul tabata ocupá. Pues nan a invit’é sinta huntu cu otronan cu a yega lat rond dje plataforma, masha cerca di Pastor Russell. E discurso ei a impresion’é profundamente. El a ser publicá e siguiente dia den e corant local, i Mama a warda un copia di dje i tabata les’é frecuentemente.

Despues dje reunion, Mama a entregá un papel cu su nomber i adres, i pronto un Studiante di Bijbel a tuma contacto cuné. Cu tempu el a cuminsá parti tratadonan di Bijbel di cas pa cas den nos pueblo natal di Gloucester, Inglatera. For di tempu cu ami i mi dos ruman muhernan tabata hopi chikitu, nos a participá cu Mama den e trabou di predicá.

Ora Harry Francis, un Studiante di Bijbel celoso, a muda pa Gloucester, Mama a dun’é un caluroso bon biní. Pronto, el a mustra un interes personal den mi, i su animacion tabata un factor principal cu despues mi a bira pionero, manera ministernan di tempu completo ta ser yamá. E ehempel di Ruman Francis a siñá mi un les importante: Esnan di mas edad semper mester busca maneranan pa animá esnan mas hóben.

Tempu mi mama a bira un Studiante di Bijbel, mas hende den Gloucester tambe a bira. Sin embargo, algun anciano den e congregacion a cuminsá pensa masha cos di nan mes, i miembronan dje klas—manera nos tabata yama e congregacion e tempu ei—a cuminsá sigui hende individual. Un biaha na reunion, algun ruman tabata blo pusha Mama den su lomba, urgiend’e pa hisa su man pa vota pa cierto anciano. Pero Mama tabata sa cu e ancianonan ei no tabata poniendo un bon ehempel, i el a nenga di ser intimidá pa vota pa nan. N’e tempu ei, den e último parti di añanan ’20, hopi hende a bai for dje congregacion i a stop di cana den e caminda dje berdad. (2 Pedro 2:2) Sin embargo, nunca Mama a desviá di apoyá e organisacion lealmente, poniendo asina un excelente ehempel pa mi.

Mi Posicion na Fabor dje Berdad

Cu tempu, na juni 1939, ora mi tabatin 18 aña, mi a ser bautisá den e Riu Severn. E aña ei tambe mi a ser nombrá sirbidó di zonido. Den e dianan ei nos tabata usa tocadisconan masha grandi cu tabata resoná den lugánan público e mensahe “Religion Ta un Trampa i un Fraude.” E énfasis n’e tempu ei tabata riba exponé e hipocresia i siñansanan falsu di cristiandad.

Un biaha mi tabata na cabes di un procesion cu tabata carga un spandoek cu a proclamá na un banda “Religion Ta un Trampa i un Fraude” i n’e otro banda “Sirbi Dios i Cristo e Rey.” Huntu cu nos tabata cana un pony cu posternan grandi na cada banda di su lomba anunciando e discurso público. Ki un bista e procesion ei lo mester tabata den e stad masha religioso di Gloucester!

Apesar di dificultad económico na cas, Mama a animá mi pa bira un pionero. Pues, na september 1939, na comienso di Guera Mundial II, mi a yega na mi promé asignacion di pionero na Leamington, un pueblo chikitu na Warwickshire. Den e pueblo tabata biba un cantidad di miembronan di clero cu a baha cu penshon.

Nos tabata usa un tocadisco leve den nos ministerio di cas-pa-cas, tocando discursonan di Joseph F. Rutherford, e tempu ei presidente di Watch Tower Bible and Tract Society. Tambe nos tabatin un tocadisco grandi (cu por a usa pa auditorionan mas grandi) i cu tabata hopi mas pisá, i nos a transport’é den un garoshi di baby. Tin biaha miembronan di clero, rabiá cu e mensahe cu tabata exponé religion falsu, tabata core cu nos for di nan tereno. Pero nos no tabata desanimá. Jehova a bendicioná nos trabou, i awe tin un congregacion di mas cu shen Testigo na Leamington.

Na 1941, den e cayente di Guera Mundial II, mi a muda pa Gales, caminda mi a traha pionero den e pueblonan di Haverfordwest, Carmarthen i Wrexham. Como minister di tempu completo, mi a haña dispensacion for di servicio militar, pero hende no a apreciá nos posicion neutral. Pues, nan tabata acusá ami cu mi compañero di ta spion of simpatisantenan dje enemigu. Un anochi, polis a rondoná nos trailer. Mi compañero, cu a caba di yega for di su trabou di saca carbon, a saca su cabes pafó pa wak ta ken tabata ei. Su cara tabata tur na rut di carbon, i pa polis el a parce como si fuera e tabata cla pa un atake di comando. Nos mester a duna basta splicacion!

Nos a ser bendicioná ricamente den nos asignacionnan. Un biaha, miéntras nos tabata na Carmarthen, John Barr dje oficina di sucursal na Londen (awor e ta un miembro dje Cuerpo Gobernante) a haci nos un bishitá animador. N’e tempu ei, tabatin solamente un par di publicadó na Carmarthen; actualmente, tin mas cu shen. Awor aki Wrexham tin tres congregacion, i recientemente mi tabatin e privilegio di dedicá un bunita Salon di Reino na Haverfordwest.—1 Corintionan 3:6.

Gradicidu pa Mi Ministerio

Tempu nos tabata na Swansea, Sur Gales, mi compañero, Don Rendell, no a haña dispensacion militar. El a ser encarcelá apesar di a splica cu su concenshi no a permitié bai bringa contra compañeronan cristian den otro pais. (Isaías 2:2-4; Juan 13:34, 35) Pa anim’é, i tambe pa duna un testimonio n’e bisiñanan, mi a pone un tocadisco grandi cerca dje prizon i a toca discursonan bíblico.

Sin embargo, e hende muhernan den becindario dje prizon no a gusta esaki i nan a colectá placa pa paga soldatnan pa bati ami cu mi compañero. Nos a sali na careda, coriendo tur cu tin en busca dje proteccion dje Salon di Reino, miéntras cu mi tabata pusha tambe e garoshi di baby cu e tocadisco grandi aden. Pero ora nos a yega n’e salon, e tabata cerá na yabi! Net na tempu polis a intervení i a scapa nos di un bon halá di sota.

Evidentemente e incidente a bira bon conocí. Poco tempu despues, ora mi tabata predicá den cunucu cerca di Swansea, un homber a bisá mi cu aprobacion: “Cristianismo ta loke boso [Testigonan di Jehova] ta defendé, manera e yoncuman na Swansea kende cu curashi a proclamá loke el a kere i tabatin cu core busca proteccion.” Ki sorprendí el a keda ora el a haña sa cu ta ami tabata e yoncuman ei!

No tabata fácil pa traha pionero den e añanan ei di guera. Nos no tabatin hopi cos material, pero loke nos tabatin, nos a apreciá i disfrutá di dje. Semper nos a ricibí un suministro regular di alimento spiritual, i nunca nos a falta un reunion, solamente ora nos tabata malu. Mi a cumpra un baiskel bieu, i nos a laga pone macutunan grandi riba dje pa carga un tocadisco i tambe literatura bíblico. Tin bes mi tabata biaha 80 kilometer pa dia riba e baiskel! Mi a traha pionero un shete aña i tin grato recuerdo dje tempu ei.

Na 1946, despues cu Guera Mundial II a terminá, mi a ser invitá pa traha na Betel, manera e oficinanan principal di Testigonan di Jehova den nan respectivo pais yama. E tempu ei nos Betel tabata situá na Craven Terrace 34, pegá cu e Tabernáculo di Londen. Mi a disfrutá dje asociacion cu esnan di mas edad einan, manera Alice Hart, kende su tata, Tom Hart, probablemente tabata e promé Testigo na Inglatera.

Hañando un Fiel Compañera

Na 1956, mi a bandoná Betel pa casa cu Etty, un pionero cu mi a cera conocí cuné ora el a bini for di Hulanda pa bishitá su ruman muher mayó, cu e tempu ei tabata biba na Londen. Ora cu guera tabata yegando su fin, Etty tabata duna les di typen i steno na un scol di comercio na Tilburg, parti sur di Hulanda. Un dia un otro maestro a ofrecé di compañ’é cu baiskel te cas pa haci sigur cu Etty ta yega sano i salbo. E maestro tabata un católico romano. Ora nan a yega cas, a lanta un combersacion entre e cu e mayornan di Etty, kendenan tabata protestant. Un amistad a forma, i e maestro a cuminsá bishitá nan cas regularmente.

Pronto despues dje guera, e maestro aki a bini na Etty su cas, gritando, “Mi a haña e berdad!”

“Mi a kere cu bo di cu bo tabatin e berdad ora bo tabata un católico romano!” Etty su tata a contestá.

“No!” e maestro a respondé tur excitá. “Testigonan di Jehova ta esnan cu tin e berdad!”

E anochi ei i hopi anochi mas tabatin discusionnan intenso over di Bijbel. Djis despues Etty a bira un pionero. Den su ministerio e tambe a topa oposicion amargo, cu na Hulanda tabata bini di Iglesia Católico Romano. Muchanan, instigá dor di pastornan, tabata stroba su combersacionnan ora e tabata bai di cas pa cas, i un biaha nan a kibra su baiskel. El a hib’é pa un drechadó di baiskel cu anteriormente a tuma un foyeto cerca dje. “Wak kico e muchanan a haci!” Etty a bisa cu awa na wowo.

“Ai, no entregá,” e homber a respondé bondadosamente. “Bo ta haciendo un trabou excelente. Lo mi drecha bo baiskel por nada.” I el a hacié.

Etty a ripará cu e pastornan no tabata interesá den nan tou te ora cu el a cuminsá studia Bijbel cu nan. E ora ei e pastornan i soeurnan tabata pasa pa debilitá e hendenan su fe tantu den e Bijbel como den Jehova. Apesar di esaki, el a disfrutá di hopi studio di Bijbel fructífero.

Gradicidu pa Nos Bida Huntu

Despues di nos casamentu, ami cu Etty a ser asigná cu e trabou biahero na Inglatera, i pa casi cincu aña, nos a bishitá congregacionnan pa fortalecé nan spiritualmente. Despues mi a ricibí un invitacion pa asistí na e di 36 klas di Galad, tené na e sede mundial di Testigonan di Jehova na Brooklyn, New York. E curso di dies luna, cu a ser completá na November 1961, tabata particularmente diseñá pa entrená ruman homber pa manehá trabou den oficinanan di sucursal di Testigonan di Jehova. Miéntras mi tabata afó, Etty a keda Inglatera na Betel di Londen. Despues di mi graduacion, nos a ser asigná huntu ei na Betel.

E siguiente 16 añanan, mi a traha n’e departamento di sirbishi, atendiendo asuntunan relacioná cu actividadnan di congregacion. Anto, na 1978, ora e superintendente di Cas di Betel, Pryce Hughes, a muri, mi a ser nombrá na su lugá. Atrabes dje hopi añanan aki e tabata un asignacion recompensador pa ta responsabel pa e bienestar di nos creciente famia di Betel. Awor nos tin mas cu 260 miembro den nos famia.

Na 1971 mi mama stimá a muri na edad di 85 aña. Ami cu Etty a bai Gloucester p’e entiero, caminda un ruman a considerá masha bunita e speransa celestial cu Mama tabatin. (Filipensenan 3:14) Mi ta gradicidu pa e cuido amoroso cu mi ruman muhernan, Doris i Grace, a duna Mama den su behes, haciendo asina posibel pa ami cu Etty sigui den e ministerio di tempu completo.

Hopi bes ami cu Etty ta pensa riba nos mayornan i con nan a cria nos den un manera amoroso i firme. Ki un debe incalculabel nos tin pa cu nan! Specialmente mi mama a pone un ehempel maraviyoso pa mi i mi ruman muhernan, edificando aprecio den nos pa Jehova i pa su organisacion.

En berdad, nos curason ta pasa over cu gratitud ora nos contemplá cada dia nobo di sirbishi na nos Tata celestial, Jehova. Ki un Dios amoroso i maraviyoso e ta! E salmista di Bijbel a expresá nos sintimentunan ora el a skirbi: “Lo mi halsá bo, O mi Dios e Rey, i lo mi bendicioná bo nomber te na tempu indefiní, asta pa semper. Henter dia lo mi bendicioná bo, i lo mi alabá bo nomber te na tempu indefiní, asta pa semper.”—Salmo 145:1, 2.

[Plachi na página 26]

Cu mi esposa, Etty