E Spiritu di Mundu Ta Venenando Bo?

DIA 12 di september, 1990, un explosion a tuma lugá den un fábrica na Kazakstan. Radioactividad peligroso a bin resultá den e atmósfera, menasando e salú dje 120.000 habitantenan local, di cua hopi a protestá públicamente den e cayanan contra e veneno mortífero.

Pero segun cu mas informacion a sali na cla, nan a descubrí cu ta pa hopi década nan tabata bibando den un ambiente venenoso. Den transcurso di añanan, a benta 100.000 ton di desperdicio radioactivo na un lugá na aire liber sin vigilancia. Aunke e peliger tabata riba nan stupi, ningun hende a tum’é na serio. Pakico no?

Tur dia, den e stadion local di deporte, funcionarionan tabata pone riba un borchi e conteo di radiacion, loke tabata duna e impresion cu no tabatin ningun clase di peliger. E cifranan tabata exacto, pero nan a indicá solamente e radiacion gamma. E radiacion alfa, cu nan no tabata midi, por ta mes fatal. Hopi mama a cuminsá comprendé pakico nan yunan tabata bira malu cada bes asina.

Den sentido spiritual, tambe nos por ser venená pa contaminacion invisibel. I mescos cu e hendenan desafortuná na Kazakstan, e mayoria ta inconciente dje peliger cu ta menasá bida di hende. Bijbel ta identificá e polucion aki como “e spiritu di mundu,” cu ta ser orkestrá pa nada ménos cu Satanas e Diabel. (1 Corintionan 2:12) Den un manera malicioso e Adversario di Dios ta usa e spiritu—of actitud prevalente—aki dje mundu pa debilitá nos debocion piadoso.

Con e spiritu di mundu por caba cu nos fortalesa spiritual? Dor di stimulá e deseo di wowo i dor di probechá di nos egoismo natural. (Efesionan 2:1-3; 1 Juan 2:16) Como ehempel, laga nos considerá tres diferente área den cua pensamentu mundano por venená nos spiritualidad gradualmente.

Buscando Promé e Reino

Jesus a insta cristiannan pa ‘busca promé e Reino i Dios su husticia.’ (Mateo 6:33) Di otro banda, e spiritu di mundu, por hiba nos pa duna indebido importancia na nos mes interes i comodidadnan. E peliger inicial ta sinta, no den bandoná interesnan spiritual completamente, sino den laga nan na di dos lugá. Nos por pasa por haltu dje peliger—mescos cu e hendenan na Kazakstan a haci—pa motibu di un sentido falsu di siguridad. Nos añanan di sirbishi fiel i aprecio pa nos rumannan spiritual por pone nos pensa cu nunca nos por bandoná e caminda dje berdad. Posiblemente, hopi persona den e congregacion efesio a pensa asina.

Rond di aña 96 E.C., Jesus a duna nan e siguiente conseho: “Mi tin esaki contra bo, cu bo a bandoná e amor cu bo tabatin na principio.” (Revelacion 2:4) E cristiannan aki cu hopi aña di sirbishi a wanta hopi dificultad. (Revelacion 2:2, 3) Nan a ser siñá dor di ancianonan fiel, incluyendo apostel Pablo. (Echonan 20:17-21, 27) Sin embargo, den transcurso di añanan, nan amor pa Jehova a fria, i nan a perde nan impulso spiritual.—Revelacion 2:5.

Probablemente, algun dje efesionan a ser afectá p’e comercialismo i prosperidad den e stad. Lamentablemente, e coriente materialista dje sociedad djawe a hiba algun cristian asina tambe. Un corementu determiná tras di un estilo di bida cómodo lo distraé nos sigur-sigur for di metanan spiritual.—Compará cu Mateo 6:24.

Spiertando contra e peliger aki, Jesus a bisa: “E lampi dje curpa ta e wowo. P’esei, si bo wowo ta simpel, henter bo curpa lo ta briyante; pero si bo wowo ta malbado, [“envidioso,” nota], henter bo curpa lo ta scur.” (Mateo 6:22, 23) Un wowo “simpel” ta un wowo cu ta enfocá riba cosnan spiritual, un wowo cu ta fihá riba e Reino di Dios. Di otro banda, un wowo “malbado” of un wowo “envidioso” ta di un hende cu ta bijziend, cu por enfocá solamente riba deseonan carnal instantáneo. Metanan spiritual i futuro recompensanan ta fuera di su alcanse pa comprendé.

Jesus a bisa den e versículo mas promé: “Caminda bo tesoro ta, ei bo curason tambe lo ta.” (Mateo 6:21) Con nos por sa si nos curason ta concentrá riba sea cosnan spiritual of cosnan material? Tal bes e mihó guia ta nos combersacion, ya cu ‘for di abundancia di curason e boca ta papia.’ (Lucas 6:45) Si nos ta haña nos mes ta papia constantemente tocante cosnan material of logronan mundano, esei ta evidencia cu nos curason ta dividí i cu nos vision spiritual ta deficiente.

Carmen,a un ruman muher di Spaña, a lucha cu e problema aki. “Mi a lanta den e berdad,” Carmen ta splica, “pero cu 18 aña di edad, mi a cuminsá mi mes speelschool. Tres aña despues mi tabatin cuater trahadó, e negoshi tabata floreciendo, i mi tabata gana hopi placa. Pero, tal bes loke a satisfacé mi mas tabata e echo cu mi tabata financieramente independiente, i mi tabata ‘exitoso.’ Pa ta franco, mi curason tabata den mi negoshi—e tabata mi amor di mas grandi.

Mi a sinti cu mi por a dedicá mayor parti di mi tempu na interesnan comercial i tog ser un Testigo. Di otro banda, mi tabatin tambe e sintimentu persistente cu mi por a haci mas pa sirbi Jehova. Loke finalmente a persuadí mi pa pone interesnan di Reino na promé lugá tabata e ehempel di dos amiga cu tabata pionero. Un di nan, Juliana, tabata den mi congregacion. E no tabata pone presion riba mi pa traha pionero, pero su combersacionnan i e goso cu e claramente tabata saca for di su ministerio a yudá mi reconsiderá mi mes balornan spiritual.

Algun tempu despues, ora mi tabata cu vakansi na Merca, mi a keda cerca Gloria, un ruman muher pionero. El a caba di bira biuda, i e tabatin cu cria su yu muher di cincu aña i cuida su mama cu tabatin cancer. Tog e tabata traha pionero. Su ehempel i su aprecio sincero p’e ministerio a toca mi curason. E cuater dianan corticu cu mi a pasa den su cas a hací mi determiná pa duna Jehova mi mihó parti. Na promé lugá mi a bira pionero regular, i un par di aña despues, ami cu mi esposo a ser invitá pa sirbi na Betel. Mi a sali for di mi negoshi—un obstáculo pa mi progreso spiritual—i awor mi ta sinti cu mi bida ta exitoso den bista di Jehova, loke realmente ta conta.”—Lucas 14:33.

Ora nos siña pa “haci sigur dje cosnan mas importante,” manera Carmen a haci, nos lo tuma decisionnan sabí relacioná cu nos trabou, educacion, cas i estilo di bida. (Filipensenan 1:10) Pero nos ta haci sigur tambe dje cosnan mas importante ora ta toca recreo? Esaki ta un otro área den cua e spiritu di mundu ta ehercé un influencia enorme.

Tene Tempu Liber den Su Lugá Apropiado

E spiritu di mundu ta probechá astutamente di hende su deseo natural pa sosiegu i tempu liber. Siendo cu mayoria hende no tin ningun berdadero speransa pa futuro, ta di comprendé cu nan mester busca pa yena nan bida actual cu entretenimentu i diberticion. (Compará cu Isaías 22:13; 1 Corintionan 15:32.) Nos ta haña nos mes ta duna mas i mas importancia na tempu liber? Esei lo por ta un señal cu e mundu su manera di pensa ta formando nos punto di bista.

Bijbel ta spierta nos: “Esun cu ta stima diberticion [“entretenimentu,” Lamsa] lo ta un individuo den necesidad.” (Proverbionan 21:17) No tin nada malu den dibertí, pero si nos ta stim’é, of ta asigná importancia primordial na dje, esei lo hiba na deficiencia spiritual. Nos apetit spiritual lo bira dof sigur-sigur, i nos lo tin ménos tempu disponibel pa predicá e bon nobo.

P’e motibu aki, e Palabra di Dios ta consehá nos pa “ta mentalmente prepará pa accion, cu dominio propio perfecto.” (1 Pedro 1:13, The New English Bible) Dominio propio ta necesario pa limitá nos tempu liber na loke ta razonabel. Ser prepará pa accion ta nificá ser cla pa actividad spiritual, sea ta studio, reunion of sirbishi di veld.

Kico di sosiegu necesario? Nos mester sinti nos culpabel ora nos ta tuma tempu pa relahá? Di ningun manera. Sosiegu ta esencial, specialmente den e mundu djawe yen di stres. No obstante, como cristiannan dedicá nos no por permití nos bida drei rond di tempu liber. Demasiado tempu liber por floha nos i hiba nos na ménos actividad i na haci ménos cosnan significativo. E por baha nos sentido di urgencia, i asta e por animá nos pa entregá na excesonan. Con, anto, nos por tin un punto di bista balansá pa cu sosiegu?

Bijbel ta recomendá pa tuma un tiki sosiegu en bes di cansa bo curpa excesivamente—specialmente si e trabou seglar ta innecesario. (Eclesiástes 4:6) Aunke sosiegu ta yuda nos curpa recobrá energia, e fuente di energia spiritual ta Dios su forsa activo. (Isaías 40:29-31) Nos ta ricibí e spiritu santu aki en coneccion cu nos actividadnan cristian. Studio personal ta alimentá nos curason i ta stimulá deseonan corecto. Asistencia na reunionnan ta fomentá aprecio pa nos Creador. Participacion den e ministerio cristian ta promové sintimentu pa cu otronan. (1 Corintionan 9:22, 23) Manera Pablo a splica den un manera realístico, “ounke físikamente nos ta bayendo atras, spiritualmente nos ta keda renobá kada dia.”—2 Corintionan 4:16, Sosiedat Antiano di Beibel.

Ileana, mama di seis yu i esposa di un casá incrédulo, tin un bida masha ocupá. E tin responsabilidadnan pa cu su mes famia i vários otro pariente, locual ta nificá cu e semper ta ocupá i tin purá. No obstante, el a establecé tambe un ehempel notabel den predicacion i preparacion pa reunion. Con e por atendé cu asina tantu cos?

“Realmente ta reunionnan i sirbishi di veld ta yudá mi cumpli cu mi otro responsabilidadnan,” Ileana ta splica. “Por ehempel, despues di sali predicá, mi tin hopi cos pa pensa ariba ora mi ta haci mi trabou di cas. Hopi biaha mi ta canta segun cu mi ta hacié. Di otro banda, si mi perde un reunion of haci poco den sirbishi di veld, trabou di cas ta bira un berdadero peso.”

Ki un contraste cu e importancia excesivo cu hende ta duna na tempu liber!

Bunitesa Spiritual Ta Agradá Jehova

Nos ta biba den un mundu cu dia pa dia ta mas obsesioná cu aparencia físico. Hende ta gasta hopi placa na tratamentu pa mehorá nan aparencia i reducí e efectonan di behes. Esakinan ta, entre otro, transplante di cabei, pinta cabei, implante di pechu i cirugia plástico. Miyones di hende ta bai centronan pa baha peso, gym, i aerobic, of nan ta cumpra video di ehercicio i buki di dieta. E mundu kier haci nos kere cu e pasaporte pa felicidad ta nos aparencia físico, cu nos “imágen” ta tur cos.

Na Merca, un investigacion citá den e revista Newsweek a saca na cla cu 90 porciento di tienernan mericano blancu “no tabata satisfecho cu nan curpa.” E búskeda desesperá p’e curpa ideal por afectá nos spiritualidad. Dora tabata un Testigo di Jehova hóben cu tabatin bergwensa di su aparencia físico pa motibu cu e tabata un tiki gordo. “Ora mi tabata haci compra, tabata difícil pa haña bon paña na mi size,” e ta splica. “Ta parce cu paña na moda a ser trahá pa tienernan slank so. Pió ainda, hende tabata haci comentarionan di menosprecio tocante mi peso, locual tabata molestiá mi hopi, specialmente ora nan a bini for di mi rumannan spiritual.

Como consecuencia, mi a bira mas i mas obsesioná cu mi aparencia, te n’e grado cu balornan spiritual a cuminsá bai na di dos lugá den mi bida. Tabata como si fuera mi felicidad a dependé dje size di mi cintura. Vários aña a pasa, i awor cu mi a madurá como muher i como cristian, mi ta mira cosnan di un manera diferente. Aunke mi ta cuida mi aparencia, mi ta realisá cu ta bunitesa spiritual ta loke ta conta mas, i esei ta loke ta duná mi e mayor satisfaccion. Una bes mi a comprendé esei, mi tabata capas pa pone interesnan di Reino na nan debido lugá.”

Sara tabata un muher fiel di antigwedad cu tabatin e punto di bista balansá aki. Aunke Bijbel ta papia di su bunitesa físico ora e tabatin mas cu 60 aña di edad, e ta hala atencion principalmente na su cualidadnan excelente—e persona secreto di curason. (Génesis 12:11; 1 Pedro 3:4-6) El a demostrá un spiritu suave i mansu, i el a obedecé su esposo di un manera sumiso. Sara no tabata indebidamente preocupá tocante con otronan tabata mir’é. Aunke el a bini di un famia ricu, di buena gana el a biba den tent pa mas cu 60 aña. Den un manera mansu i inegoista el a apoyá su esposo; e tabata un muher di fe. Esei ta loke a hacié un muher berdaderamente bunita.—Proverbionan 31:30; Hebreonan 11:11.

Como cristiannan, nos ta interesá pa mehorá nos bunitesa spiritual, un bunitesa cu, si nos cultiv’é regularmente, lo crece i permanecé. (Colosensenan 1:9, 10) Nos por soru pa nos aparencia spiritual den dos manera importante.

Nos ta bira mas bunita den bista di Jehova segun cu nos ta participá den nos ministerio salbador di bida. (Isaías 52:7; 2 Corintionan 3:18–4:2) Ademas, segun cu nos ta siña manifestá cualidadnan cristian, nos bunitesa ta bira mas profundo. Oportunidad pa mehorá nos bunitesa spiritual tin na abundancia: “Tene tierno cariño un pa otro. Den mustra onor un na otro hiba delantera. . . . Briya cu e spiritu. . . . Sigui e caminda di hospitalidad. . . . Alegrá cu hende cu ta alegrá; yora cu hende cu ta yora. . . . No paga malu cu malu na ningun hende. . . . Sea pacífico cu tur hende.” (Romanonan 12:10-18) Si nos cultivá actitudnan asina nos lo gana e simpatia di Dios i tambe di nos próhimo, i lo e minimisá e aparencia mahos di nos tendencianan pecaminoso heredá.—Galationan 5:22, 23; 2 Pedro 1:5-8.

Nos Por Rechasá e Spiritu di Mundu!

Den asina tantu maneranan sutil, e spiritu venenoso di mundu por debilitá nos integridad. E por haci nos insatisfecho cu loke nos tin i ansioso pa pone nos mes necesidad i interesnan dilanti esnan di Dios; of e por haci nos haña pensamentunan di hende en bes di esnan di Dios, dunando indebido importancia na tempu liber of aparencia físico.—Compará cu Mateo 16:21-23.

Satanas ta dicididu pa destruí nos spiritualidad, i e spiritu di mundu ta un di su armanan principal. Corda cu e Diabel por cambia su tácticanan for di esnan di un leon cu ta grita duru pa esun di un colebra cauteloso. (Génesis 3:1; 1 Pedro 5:8) De bes en cuando, e mundu ta vence un cristian dor di persecucion brutal, pero mas tantu biaha e ta venen’é lentamente. Pablo tabata mas preocupá tocante e último peliger: “Mi tin miedu cu di un of otro manera, mescos cu e colebra a seducí Eva dor di su astucia, boso mente por ser corumpí i alehá for di e sinceridad i puresa cu ta debí na e Cristo.”—2 Corintionan 11:3.

Pa protehá nos mes for dje colebra su astucia, nos tin cu identificá e ideanan cu ta “originá cu mundu” anto rechasá nan firmemente. (1 Juan 2:16) Nos no mester ser engañá pa kere cu mundu su manera di pensa no ta perhudicial. E aire venenoso dje sistema di Satanas a alcansá nivelnan alarmante.—Efesionan 2:2.

Una bes pensamentu mundano ser identificá, nos por combatié dor di yena nos mente i curason cu Jehova su siñansa puru. Mescos cu Rey David, laga nos bisa: “Hací mi conocé bo mes camindanan, O Jehova; siñá mi bo mes bereanan. Hací mi cana den bo berdad i siñá mi, pasobra bo ta mi Dios di salbacion.”—Salmo 25:4, 5.

[Nota]

[Plachi na página 26]

Corementu tras di un estilo di bida cómodo por distraé nos for di metanan spiritual