Sunem—Marcá pa Amor i Violencia

DEN sur di Galilea, n’e punta oost dje yanura abou di Jezreel, tabata situá e stad di Sunem. E stad chikitu aki tabata testigo di dos dje batayanan mas significativo den historia di Bijbel, pero e tabata renombrá tambe como e lugá di nacementu di dos hende muher cu tabata bon ehempel di amor leal.

Tras di Sunem tabatin e ceru cu supuestamente tabata Moré, miéntras cu na otro banda dje yanura, mas o ménos ocho kilometer leu, tabatin e Ceru di Gilboa. Entre e dos ceritunan ei, tabatin un tera fructífero i ricu na awa—un dje regionnan mas productivo di henter Israel.

E cunucu berde aki rond di Sunem ta percurá e esena pa un dje historianan di amor mas encantador cu a yega di ser relatá—E Cantica di Sálomon. E cantica aki ta conta di un bunita mosa di cunucu cu a preferá di casa cu su compañero wardadó di bestia en bes di aceptá e oferta di Rey Sálomon pa bira un di su esposanan. Sálomon a usa tur su sabiduria i rikesa pa gana su curason. Bes tras bes, el a elogi’é: “Ken e muher aki ta cu ta mirando abou manera e aurora, bunita manera luna yen, puru manera solo briyante?” I el a primintí di malcri’é cu tur e hoyanan cu e mosa por a imaginá.—Cantica di Sálomon 1:11; 6:10.

Pa dun’é un muestra di su bida real, Sálomon a laga e mucha muher compañ’é pa Jerusalem como parti di su comitiva, compañá pa 60 di su mihó soldatnan. (Cantica di Sálomon 3:6-11) Sálomon a aloh’é den su palacio real, un palacio asina impresionante cu ora e reina di Saba a mir’é, “a resultá cu no tabatin mas spiritu den dje.”—1 Reynan 10:4, 5.

Pero e mosa di Sunem tabata leal n’e yoncuman wardadó. “Manera un palu di apel entre e palunan di mondi,” el a bisa, “asina mi stimá ta.” (Cantica di Sálomon 2:3) Laga Sálomon alegrá cu su mil cunucunan di wijndruif. Un cunucu di wijndruif—huntu cu e mosa su stimá—tabata suficiente p’e. Su amor no por a ser sagudí.—Cantica di Sálomon 8:11, 12.

Un otro muher bunita tabata biba na Sunem. Nos no sa nada di su aparencia físico, pero siguramente e tabata bunita di curason. Bijbel ta bisa cu el a ‘restringí su mes’—of a pasa den basta problema—pa por a duna profeta Eliseo (Erratum: Elías) cuminda i acomodacion regularmente.—2 Reynan 4:8-13.

Nos por imaginá con Eliseo (Erratum: Elías) a regresá gradicidu despues di un biahe largu i agotador, p’e kamber chikitu den dak cu e muher i su esposo a prepará p’e. Probablemente el a bishitá nan cas cu frecuencia, siendo cu su ministerio a dura un total di 60 aña. Pakico e muher sunamita aki a insistí pa Eliseo (Erratum: Elías) keda na nan cas tur biaha cu el a pasa riba e caminda ei? Pa motibu cu el apreciá e trabou di Eliseo (Erratum: Elías). E profeta humilde i inegoista aki a actua como e concenshi dje nacion, recordando reynan, sacerdotenan i hende comun di nan deber pa sirbi Jehova.

Sin duda e muher sunamita tabata un dje hendenan cu Jesus tabatin na mente ora el a bisa: “Esun cu ricibí un profeta pa motibu cu e ta un profeta lo ricibí recompensa di profeta.” (Mateo 10:41) Jehova a otorgá un recompensa special n’e muher temeroso di Dios aki. Aunke e tabata steril pa hopi aña, el a duna lus na un yu homber. Añanan despues el a haña tambe yudansa divino ora un hamber di shete aña a desolá e tera. E relato conmovedor aki ta haci nos corda cu nos Tata celestial no ta keda sin tuma nota dje bondad cu nos ta mustra na su sirbidónan.—2 Reynan 4:13-37; 8:1-6; Hebreonan 6:10.

Dos Bataya Decisivo

Aunke Sunem ta ser recordá como e lugá di biba dje muhernan leal aki, e tabata testigo tambe di dos bataya cu a cambia e curso di historia di Israel. Tabatin un tereno ideal di bataya ei cerca—e yanura entre e ceritunan di Moré i Gilboa. Semper comandantenan militar den tempunan bíblico tabata campa caminda tabatin un suministro abundante di awa, tereno haltu pa proteccion, i, si ta posibel, un posicion for di cua por mira riba un vaye di yanura secu cu suficiente espacio pa maniobrá trupanan, cabai i garoshinan. Sunem i Gilboa a ofrecé e bentahanan ei.

Durante e tempu dje huesnan, un ehército di 135.000 madianita, amalekita i otronan a campa den e yanura dilanti Moré. Nan kamelnan tabata “mes numeroso cu e pipitanan di santu di laman cu ta na oriya di laman.” (Huesnan 7:12) Enfrente di nan na otro banda dje yanura, banda dje pos di Harod na pia di Ceru di Gilboa, tabatin e israelitanan bou di Hues Gídeon, kende tabatin solamente 32.000 soldat.

Durante e dianan promé cu un bataya, cada banda tabata purba demoralisá e otro. E trupa di hombernan cu tabata haci mofa, e kamelnan di guera, e garoshinan, i e cabainan por a hinca temor den e soldatnan israelita na pia. Sin duda, e madianitanan—cu tabata cla prepará miéntras e israelitanan tabata organisando nan mes—a resultá di ta un espectáculo spantoso. Ora Gídeon a puntra, “Ken tin miedu i ta tembla?” dos tercer parti di su ehército a reaccioná bandonando e tereno di bataya.—Huesnan 7:1-3.

Solamente 10.000 soldat israelita awor tabata wak e otro banda dje yanura na 135.000 soldat enemigu, i no a tarda muchu cu Jehova a reducí e cantidad di soldat israelita na un grupito di 300. Siguiendo e custumber israelita, e grupo chikitu aki a ser partí den tres division. Bou dje capa di scuridad, nan a plama i a tuma nan posicion na tres banda dje campamentu enemigu. Anto riba e ordu di Gídeon, e 300 hombernan a dal e poronnan cu tabata tapa nan antorchanan kibra, a tene e antorchanan ei na haltu i a grita, “e spada di Jehova i di Gídeon!” Nan a supla nan cachunan i a sigui supla. Den e scuridad, e multitud mesclá di soldatnan spantá a imaginá nan cu ta 300 trupa tabata atacando nan. Jehova a bira cada un contra e otro, i “henter e campamentu a sali na careda i a cuminsá grita i tabata hui.”—Huesnan 7:15-22; 8:22.

Un di dos bataya a tuma lugá cerca di Sunem durante e tempu di Rey Saul. Bijbel ta informá cu “e filisteonan a hunta nan mes i nan a bini i lanta un campamentu na Sunem. Di manera cu Saul a reuní henter Israel huntu i nan a lanta campamentu na Gilboa,” mescos cu e ehército di Gídeon a haci añanan promé. Pero Saul, distinto di Gídeon, tabatin masha poco confiansa den Jehova i el a preferá di consultá un medium spiritista na En-dor. Ora el a mira e campamentu dje filisteonan, “el a haña miedu, i su curason a cuminsá tembla masha tantu.” Den e bataya cu a sigui, e israelitanan a hui na careda i a sufri un derota pisá. Tantu Saul como Jonatan a perde nan bida.—1 Samuel 28:4-7; 31:1-6.

Asina ta cu e historia di Sunem a bira marcá pa tantu amor como violencia, confiansa den Jehova i dependencia riba e demoñonan. Den e vaye di yanura aki, dos hende muher a mustra constancia den amor i hospitalidad, i dos lider israelita a bringa batayanan decisivo. Tur cuater ehempel ta ilustrá e importancia di dependé riba Jehova, kende nunca ta faya na recompensá esnan cu ta sirbié.

[Plachi na página 31]

Pueblo moderno di Sulam n’e sitio di antiguo Sunem, cu Moré den fondo

[Rekonosementu]

Pictorial Archive (Near Eastern History) Est.