Custumbernan Local i Principionan Cristian Nan Ta Compatibel?

STEPHEN, un Testigo di Nort Europa, a ser asigná como misionero na un pais africano. Un dia e tabata cana keiru riba caya huntu cu un ruman homber local, anto el a spanta ora esaki a coge su man tene.

E pensamentu di cana den un caya druk man tené cu un otro homber tabata algu escandaloso pa Stephen. Den su cultura un custumber asina tin conotacion homosexual. (Romanonan 1:27) Sin embargo, pa e ruman africano, tenementu di man no ta nada otro cu un gesto di amistad. Nenga di tene man lo a nificá cu bo ta rechasá e amistad ei.

Pakico nos mester ta interesá den diferencianan di cultura? Pa cuminsá, e pueblo di Jehova ta masha deseoso pa cumpli cu nan comision divino di “haci disipel di hende di tur nacion.” (Mateo 28:19) Pa cumpli cu e tarea aki, algun di nan a muda bai caminda e necesidad pa predicadó ta mas grandi. Pa nan por tin éxito den nan ambiente nobo, nan tin cu comprendé i adaptá nan mes na e diferente culturanan cu nan ta encontrá. Asina nan lo ta capas pa traha na armonia cu nan ruman homber i muhernan, miéntras nan lo ta mas eficas tambe den e ministerio público.

Ademas, den e mundu turbulento aki, hopi hende a hui for di nan pais natal pa motibu di problemanan político i económico, i a establecé nan mes den otro pais. Pues por ta masha bon cu predicando na e bisiñanan nobo aki, nos ta haña nos confrontá cu custumbernan nobo. (Mateo 22:39) Kisas nos promé contacto cu un cultura diferente, por confundí nos un tiki en cuanto custumbernan nobo.

Areanan Bon Definí

Cultura ta algu ancrá den e structura di sociedad humano. P’esei, ki un trabou bano lo e ta si nos bira “demasiado hustu,” i cuminsá investigá delaster un custumber chikitu pa mira si e ta compatibel cu principionan bíblico!—Eclesiástes 7:16.

Di otro banda, ta necesario pa identificá custumbernan local cu claramente ta violá principionan divino. Aunke por lo general, esaki no ta algu difícil, ya cu nos tin e Palabra di Dios “pa rectificá cosnan.” (2 Timoteo 3:16) Por ehempel, den algun pais ta normal cu hombernan tin hopi esposa, pero pa cristiannan berdadero loke ta conta ta e principio bíblico cu ta bisa cu homber mester tin un casá so.—Génesis 2:24; 1 Timoteo 3:2.

Tambe, algun custumber di entiero cu ta intencioná pa tene mal spiritu leu of cu ta basá riba e creencia di cu alma ta inmortal, lo ta inaceptabel pa un cristian berdadero. Algun hende ta ofrecé censia of ta haci oracion na e defuntu pa core cu mal spiritu. Otronan ta tene belorio of asta un segundo entiero cu e meta pa yuda e defuntu prepará pa bida ‘den e siguiente mundu.’ Sin embargo, Bijbel ta siña cu ora un persona muri, e no “ta conciente di nada en absoluto,” i p’esei e no por haci bon ni malu na ningun hende.—Eclesiástes 9:5; Salmo 146:4.

Naturalmente, tin hopi custumber cu ta compatibel cu e Palabra di Dios. Ta ki refrescante pa bo topa cu culturanan unda ainda e spiritu di hospitalidad ta reina, unda ta un custumber pa duna asta un hende desconocí un caluroso bon biní i, si ta necesario, habri porta di cas p’e! Ora abo personalmente haña un trato asina, bo no ta sintí bo impulsá pa sigui e ehempel ei? Si ta asina, sigur-sigur lo e mehorá bo personalidad cristian.—Hebreonan 13:1, 2.

Cua di nos ta gusta pa hende laga nos warda? Den algun pais e ta sosodé masha poco, pasobra puntualidad ta importante pa nan. Bijbel ta bisa nos cu Jehova ta un Dios di ordu. (1 Corintionan 14:33) P’esei, el a pone un “dia i ora” pa caba cu maldad, i e ta sigurá nos cu e suceso aki ‘lo no ta lat.’ (Mateo 24:36; Habacuc 2:3) Custumbernan cu ta promové puntualidad razonabel ta yuda nos pa ta hende ordená i pa mustra respet apropiado pa otro hende i nan tempu, loke sigur ta na armonia cu principionan bíblico.—1 Corintionan 14:40; Filipensenan 2:4.

Kico di Custumbernan Inofensivo?

Aunke ta bisto cu algun custumber ta compatibel cu e bida cristian, tin otronan cu no ta. Pero kico dje custumbernan cu bo no por clasificá como bon of malu? Hopi custumber ta inofensivo of no ta haci daño, i nos actitud pa cu nan por demostrá nos ekilibrio spiritual.

Por ehempel, tin hopi manera pa saludá hende—duna man, buig, duna un sunchi of asta un abraso. Asina tambe, tin un inmenso variedad di custumber pa loke ta etiket di mesa. Den cierto pais tur hende ta come for di un solo skalchi of tayó. Den algun pais nan ta considerá e echo cu un persona ta respu, un expresion aceptabel, asta deseabel, di aprecio. Pero pa otronan e no ta aceptabel i asta nan lo clasifik’é como e colmo di mal manera.

En bes di opiná cua di e custumbernan inofensivo aki abo personalmente ta gusta of laga, pensa cua ta e actitud apropiado pa tuma pa cu nan. Consehonan di Bijbel cu ta conta pa tur tempu, ta recomendá nos pa no haci ‘nada motivá pa gana di pleita of motivá pa egoismo, sino considerá cu humildad di mente cu e otronan ta superior cu nos.’ (Filipensenan 2:3) Ta esei ta loke Eleanor Boykin a indicá den su buki This Way, Please—A Book of Manners (Asina aki, Por Fabor—Un Buki di Etiket), ora el a bisa: “E promé cos cu bo mester, ta un curason bondadoso.”

Un punto di bista humilde asina, lo prevení nos di menospreciá custumber di otronan. Nos lo ta motivá pa tuma e iniciativa i siña tocante e forma di biba di otro hende, participá den nan custumbernan i purba nan cuminda, en bes di hala atras of considerá tur loke ta parce straño como sospechoso. Si nos tin un mente habrí i ta dispuesto pa purba maneranan nobo, nos ta dunando un compliment na nos anfitrion of nos próhimo stranhero. Ora nos ta “hancha” nos curason i nos horizonte, nos tambe ta saca beneficio.—2 Corintionan 6:13.

Ora Custumber Ta Stroba Progreso Spiritual

Kico si nos topa cu custumbernan cu riba nan mes no ta antibíblico, pero cu no ta na beneficio di nos progreso spiritual? Por ehempel, den algun pais kisas hende ta gusta posponé asuntunan. E forma trankil aki di biba, por pone cu nos tin ménos stres, pero casi sigur lo e hacié mas difícil pa nos cumpli cu nos ministerio “plenamente.”—2 Timoteo 4:5.

Con nos por animá otronan pa stop di posponé cosnan importante te “mañan”? Corda cu “e promé cos cu bo mester, ta un curason bondadoso.” Motivá pa amor, nos por pone e ehempel pa nan i splica nan bondadosamente ki beneficio tin den no laga pa mañan loke mester haci awe. (Eclesiástes 11:4) N’e mésun tempu, nos mester tene cuidou pa nos no kibra e confiansa mutuo djis pa mas productividad. Si otronan no aceptá nos sugerencianan mesora, nos no mester manda riba nan of baha nos frustracion riba nan. Semper nos mester duna amor prioridad riba eficiencia.—1 Pedro 4:8; 5:3.

Teniendo Cuenta cu Gustu Local

Nos tin cu haci sigur cu cualkier sugerencia cu nos duna ta bon fundá i no djis un esfuerso pa imponé nos mes gustu personal. Por ehempel, estilo di bisti ta varia masha hopi mes. Den hopi region ta apropiado pa un homber cu ta predicá e bon nobo mara dashi, pero den algun pais tropical hende por haña esaki demasiado formal. Pa un bon indicacion, considerá kico ta e gustu local pa loke ta e bistí apropiado pa un profesional cu ta trata cu público. “Sano huicio” ta vital ora nos ta trata cu e cuestion delicado di bistimentu.—1 Timoteo 2:9, 10.

Kico si nos no ta gusta un custumber? Mester rechas’é automáticamente? No necesariamente. E custumber di hombernan cu ta tene man, cu nos a mencioná na principio, tabata algu mashá normal den e comunidad africano specífico ei. Ora e misionero a ripará cu otro hombernan tabata cana man tené, el a sintié mas trankil.

Durante su biahenan extenso como misionero, apostel Pablo a bishitá congregacionnan cu a consistí di miembronan cu tabatin diferente antecedente. Sin duda, tabatin conflictonan cultural hopi biaha. P’esei, tantu cu e tabata por, Pablo a adaptá su mes na e diferente custumbernan, miéntras cu el a keda firmemente pegá na principionan bíblico. “Mi a bira tur cos pa tur clase di hende,” el a bisa, “pa di tur manera mi por salba algun.”—1 Corintionan 9:22, 23; Echonan 16:3.

Kisas algun pregunta relevante lo por yuda nos wak con nos mester reaccioná na custumber nobo. Ora nos adoptá un cierto custumber—of rechas’é—ki impresion nos ta duna observadónan? Nan lo sinti nan atraí na e mensahe di Reino pasobra nan ta ripará cu nos ta purba integrá den nan cultura? Di otro banda, si nos adoptá un custumber local, ‘hende lo por haña falta den nos ministerio?’—2 Corintionan 6:3.

Si nos kier bira “tur cos pa tur clase di hende,” tal bes nos tin cu cambia algun punto di bista profundamente ancrá di loke ta apropiado of no. Hopi biaha loke ta “bon” i “malu” ta dependé simplemente di e lugá unda bo ta biba. P’esei, den un pais, tenementu di man cerca hende homber ta un muestra di amistad, miéntras cu den hopi otro pais sigur lo e rebahá e mensahe di Reino.

Sin embargo, tin otro custumbernan cu ta aceptabel den vários region i nan por ta asta apropiado pa cristiannan; pero tog nos tin cu tene cuidou.

Tene Cuidou pa No Pasa e Límite!

Jesucristo a bisa cu aunke no por a saca su disipelnan for di mundu, nan ‘no mester tabata parti dje mundu.’ (Juan 17:15, 16) Pero tin biaha, no ta fácil pa distinguí e liña entre loke ta un parti integral dje mundu di Satanas i loke ta djis algu cultural. Por ehempel, casi tur cultura conocé música i bailamentu, aunke den algun pais hende ta atribuí mas importancia na nan.

Kisas ta mashá fácil pa nos tuma un decision—basá mas riba nos antecedente cu riba e principionan bíblico infalibel. Alex, un ruman homber aleman, a haña un asignacion pa bai Spaña. Den su ambiente anterior, bailamentu no tabata mashá popular, pero na Spaña e ta parti dje cultura. E promé biaha cu el a mira un ruman homber i ruman muher baila un baile local excitante, el a keda confundí. E baile aki tabata malu of kisas mundano? Lo e rebahá su normanan cristian si e aceptá e custumber aki? Alex a comprendé cu aunke e música i baile tabata diferente for di Alemania, no tabatin motibu pa asumí cu su rumannan di Spaña tabata rebahando normanan cristian. Su confusion tabata debí na un diferencia cultural.

Sin embargo, Emilio, un ruman homber cu ta gusta baile folklórico di Spaña, ta reconocé cu ta existí un peliger. E ta splica: “Mi ta ripará cu hopi tipo di baile ta rekerí p’e pareha baila pegá. Como un persona soltero mi ta realisá cu esaki por influenciá sintimentu di por lo ménos un dje partnernan. Tin biaha bailamentu por ta djis un excuus pa mustra bo cariño na un persona na kende bo ta sintí bo atraí. Loke por sirbi como proteccion ta di haci sigur cu e música ta saludabel i cu contacto físico ta keda mantené na e mínimo. Sin embargo, mi tin cu admití cu ora un grupo di ruman homber i muher hóben soltero sali bai fiesta huntu, ta mashá difícil pa tene e esfera teocrático.”

Siguramente nos lo no kier usa nos cultura como un excuus pa tuma parti den conducta mundano. Cantamentu i bailamentu tabata parti dje cultura di Israel, i ora nan a haña nan libertad for di Egipto na Laman Corá, nan celebracion a encerá tantu cantica como baile. (Exodo 15:1, 20) Sin embargo, nan tipo di música i baile en particular tabata diferente for di esun dje mundu pagano rond di nan.

Lamentablemente, ora e israelitanan tabata warda Moises baha for di ceru di Sínai, nan a perde pacenshi, a traha un bisé di oro, i despues di a come i bebe nan a “lanta pa dibertí.” (Exodo 32:1-6) Ora Moises i Hosué a tende e zonido di nan cantamentu, el a molestiá nan. (Exodo 32:17, 18) E israelitanan a pasa e “límite,” i awor nan manera di canta i baila a reflehá e mundu pagano rond di nan.

Awe tambe, kisas caminda nos ta biba, generalmente música i baile por ta aceptabel i no ta molestiá ningun hende su concenshi. Pero si baha e lusnan, pone lusnan cu ta cende paga of toca música cu un ritmo diferente, loke anteriormente tabata aceptabel, awor kisas ta reflehá e spiritu di mundu. Un persona lo por pretendé: “E ta parti di nos cultura.” Aron a usa e mésun excuus ora el a consentí cu formanan di entretenimentu i adoracion pagano, i a haci malu di describí nan como “un fiesta pa Jehova.” E excuus swak aki no tabatin valides. Figurá bo, a considerá nan conducta asta como “un bergwensa entre nan opositornan.”—Exodo 32:5, 25.

Cultura Tin Su Lugá

Kisas na promé instante, custumbernan exótico por shok nos, pero no necesariamente tur ta malu. Cu nos “facultadnan perceptivo entrená,” nos por determiná cua custumber ta compatibel cu principio cristian i cua no. (Hebreonan 5:14) Ora nos demostrá di tin un curason bondadoso yen di amor pa nos próhimo, nos lo reaccioná apropiadamente ora nos topa cu custumbernan inofensivo.

Miéntras nos ta predicá e bon nobo di Reino na hende den nos teritorio local of mas leu, un punto di bista balansá en cuanto e variedad di cultura lo pone cu nos por ta ‘tur cos pa tur hende.’ Sin duda nos lo ripará cu si nos ricibí cu gustu e variedad di cultura, esaki lo contribuí cu nos tin un bida ricu, colorido i fasinante.

[Plachi na página 20]

Tin hopi manera apropiado pa expresá saludonan cristian

[Plachi na página 23]

Un punto di bista balansá tocante diferente cultura por hiba na un bida ricu i colorido