Mi A Haña Algu Miho Cu Oro

Manera Charles Mylton A Relat’e

Un dia Tata a bisa: “Laga nos manda Charlie Merca unda placa ta crece na palu. Lo e por haña poco i manda pa nos!”

DI BERDAD, hende a pensa cu na Merca bo por a piki oro for di abou. Den e dianan ei, bida na Oost Europa tabata masha duru mes. Mi mayornan tabatin un hacienda chikitu i nan tabata cria poco baca i algun galiña. Nos no tabatin coriente ni kranchi paden. Pero, ya, ningun bisiña tampoco tabatin e cosnan aki.

Mi a nace na Hoszowczyk dia 1 di januari 1893, casi 106 aña pasá. Nos pueblo tabata na Galacia, e tempu ei un provincia dje imperio austro-húngaro. Awor Hoszowczyk ta situá den oost di Polonia, no masha leu for di Slovakia i Ucrania. Ei e winternan tabata severo i tabatin capanan diki di sneu. Ora mi tabatin mas o ménos shete aña, mi tabata cana rond di mei kilometer bai n’e riu i cu un hacha mi tabata coba un buracu den e ijs pa saca awa. Mi tabata hiba e awa cas i Mama tabata us’é pa cushiná i haci limpiesa. E tabata laba paña den e riu i tabata usa e pidanan mas grandi di ijs como washi.

Na Hoszowczyk no tabatin scol, pero mi a siña papia polaco, ruso, slovaco i ucraniano. Nos a ser criá den e religion griego-ortodox, i mi tabata sirbidó di altar. Pero for di tempu mi tabata hopi yong, mi a haña un disgustu den pastornan cu tabata bisa cu nos no mag come carni diabierne i nan sí tabata hacié.

Algun di nos amigunan, despues di a traha na Merca, a bolbe bek cu placa pa drecha nan cas i cumpra ekipo pa hacienda. Esaki ta loke a impulsá Tata pa papia tocante mandá mi Merca huntu cu algun bisiña kendenan tabata planea un otro biahe pa Merca. Esei tabata na 1907 ora mi tabatin 14 aña.

Perdí na Merca

Pronto mi tabata riba barcu, i den dos siman nos a crusa Océano Atlántico. N’e tempu ei, bo mester tabatin 20 dollar, sino nan tabata mandá bo bek bo pais. Mi tabatin un moneda di plata di 20 dollar, p’esei mi tabata un dje miyones di hendenan cu a pasa atrabes di Ellis Island, New York, cu tabata e porta pa drenta Merca. Naturalmente, no tabatin palu di placa, ni bo no tabata haña oro abou. En realidad, hopi caminda tabata di tera so!

Nos a coge un trein bai Johnstown, Pennsylvania. E hombernan cu tabata huntu cu mi a yega di bai ei caba i nan tabata sa di un posada unda mi por a keda. E idea tabata pa mi topa mi ruman muher mas grandi cu tabata biba na Jerome, Pennsylvania. Ta despues mi a haña sa cu esei tabata keda na un distancia di un 25 kilometer so. Pero ami tabata bisa Yarome en bes di Jerome, pasobra den mi idioma nativo ta pronunciá e “J” manera un “Y” i no manera na ingles “Dj.” Niun hende a yega di tende di Yarome. Pues, ata mi awor den un pais straño, sin por papia masha ingles i cu hopi tiki cen.

Tur mainta mi tabata sali bai busca trabou. Na e djob center nan tabata logra haña trabou pa solamente dos of tres hende for di e multitud cu tabata para pafó den rij. P’esei tur dia mi tabata bolbe n’e posada pa studia ingles for di algun buki pa bo siña bo mes. Tin biaha mi tabata coge djob, pero lunanan tabata pasa i mi cen tabata cerca di caba.

Uní cu Mi Rumannan

Un dia mi a pasa banda di un hotel cu tabatin un bar cerca dje stacion di trein. E cuminda tabata hole masha bon mes! Sandwich, hot dog i otro cosnan di come den e bar tabata grátis si bo cumpra un cerbes cu tabata costa cincu cen pa un glas grandi. Aunke mi tabata menor di edad, e bartender a sinti duele di mi i a bendé mi un cerbes.

Miéntras mi tabata come, algun homber a bini paden i bisa: “Bebe pa caba! E trein cu ta bai Jerome ta yegando.”

Mi a puntra: “Boso kier men Yarome?”

“No, Jerome,” e hombernan a bisa. Ta e ora ei mi a haña sa unda mi ruman muher tabata biba. De facto, den e bar, mi a topa un homber cu tabata biba djis tres cas despues di dje! Pues mi a cumpra un karchi di trein i por fin mi a topa cu mi ruman muher.

Mi ruman muher i su casá tabata manehá un posada pa mineronan di carbon, i mi a bai biba cerca nan. Nan a haña un trabou pa mi di vigilá un pomp cu tabata wanta e awa for dje mina. Ki ora cu e stop di traha, mi mester a yama un mecánico. Mi tabata gana dies placa pa dia. Despues mi a traha riba spoorban, na un lugá di traha bloki i asta mi a traha como un agente di seguro. Despues mi a muda bai Pittsburgh unda mi ruman homber Steve tabata biba. Ei nos a traha den un fábrica di heru. Nunca mi a gana suficiente cen pa manda cas.

Un Famia i un Entiero

Un dia ora mi tabata cana bai trabou, mi a mira un criá di cas hóben, pará dilanti e cas caminda e tabata traha. Mi a bisa den mi mes: ‘Waw, e mucha ei sí ta bunita.’ Tres siman despues, na 1917, ami cu Helen a casa. Durante e siguiente dies añanan, nos a haña seis yu di cua unu a muri ora e tabata chikitu ainda.

Na 1918, Pittsburgh Railways a contratá mi como shofer di tram. Banda dje garashi di tram tabatin un cafeteria unda bo por a dal un kofi. Paden, a parce cu e dos hombernan griego cu tabata doño dje lugá no tabata wori si bo a cumpra algu, basta nan por a predicá cu bo tocante Bijbel. Mi tabata bisa nan: “Boso kier bisá mi cu henter mundu ta robes i cu ta boso dos so tin rason?”

“Awel, wak kico Bijbel ta bisa!” nan tabata respondé. Pero e tempu ei, nan no a logra convencé mi.

Lamentablemente, na 1928, mi kerida Helen a bira malu. Pa e muchanan haña mihó cuido, mi a hiba nan cerca mi ruman muher i su casá na Jerome. E tempu ei nan a cumpra un hacienda caba. Mi tabata bishitá e muchanan regularmente i tur luna mi tabata manda cen pa nan cuminda. Tambe mi tabata manda paña pa nan. Lamentablemente, Helen su salú a sigui bai atras i dia 27 di augustus 1930 el a muri.

Mi a sintí mi so i kibrá. Ora mi a bai cerca e pastor pa regla asuntu di entiero, el a bisa: “Bo no ta pertenecé n’e misa aki mas. Bo tin mas cu un aña sin paga contribucion.”

Mi a splik’é cu mi casá tabatin hopi tempu malu i cu mi a duna tur cen extra na mi yunan pa nan por a contribuí na e misa na Jerome. Tog mi mester a fia 50 dollar pa mi paga mi debenan atrasá, p’e pastor bai di acuerdo pa haci e entiero. Tambe e pastor a pidi 15 dollar mas p’e haci un misa na cas di mi cuñá caminda amigu i famianan a planea pa reuní huntu pa rindi nan último tributo na Helen. Mi no por a paga e 15 dollar, pero e pastor a bai di acuerdo pa haci e misa, basta mi pagu’é dia mi cobra.

Ora mi a cobra mi mester a usa e cen pa cumpra sapatu i paña pa scol pa e muchanan. Wel, rond di dos siman despues, e pastor a drenta mi tram. “Ainda bo debé mi 15 dollar,” el a bisa. Anto, ora el a baha na borchi, el a menasá mi: “Mi ta bai cerca bo shef i lagu’é kita e cen for di bo salario.”

Ora mi a caba di traha e dia ei, mi a bai cerca mi shef i a cont’é loke a pasa. Aunke e tabata un católico, el a bisa: “Si e pastor ei bini aki, lo mi bis’é bon cla kico mi ta pensa di dje!” Esei a poné mi cuminsá pensa: ‘Ta nos cen so e pastornan kier, pero nunca nan ta siña nos nada di Bijbel.’

Siñando e Berdad

E siguiente biaha cu mi tabata den e cafetaria cu e dos griegonan tabata manehá, nos a papia tocante mi experencia cu e pastor. Como resultado, mi a cuminsá studia Bijbel cu Studiantenan di Bijbel, manera Testigonan di Jehova tabata yama e tempu ei. Mi tabata keda lantá henter anochi lesando Bijbel i literatura bíblico. Mi a haña sa cu Helen no tabata sufri den purgatorio, manera e pastor a bisa, sino cu e tabata drumí den morto. (Job 14:13, 14; Juan 11:11-14) Sí, mi a haña algu muchu mas mihó cu oro—tabata e berdad!

Un par di siman despues, na mi promé reunion di Studiantenan di Bijbel na e Garden Theatre na Pittsburgh, mi a hisa mi man i a bisa: “Awenochi, mi a siña mas tocante Bijbel cu mi a siña tur e añanan den misa.” Despues ora nan a puntra ken kier traha den e trabou di predicá e siguiente dia, mi a bolbe hisa man.

Anto dia 4 di october 1931, mi a simbolisá mi dedicacion na Jehova mediante bautismo bou di awa. Miéntras tantu, mi por a huur un cas i trece mi yunan bek na cas huntu cu mi, i mi a paga un criá di cas pa yudá mi cuida nan. Apesar di mi responsabilidadnan familiar, mi a participá den e rasgo di sirbishi special, yamá auxiliar, for di januari 1932 te cu juni 1933. Durante e tempu ei, mi a dedicá 50 pa 60 ora tur luna papiando cu otro hende tocante Bijbel.

Rond dje tempu ei, mi bista a cuminsá cai riba un mucha muher atractivo cu aparentemente semper a bai i bini for di trabou den mi tram. Nos bistanan tabata contra otro den e spiel dje tram. Asina ami cu Mary a conocé otro. Nos a namorá i a casa na augustus 1936.

Rond di 1949, debí cu mi tabatin basta tempu ta traha, mi por a scoge pa traha un warda cu a permití mi traha pionero, manera ta yama sirbishi di tempu completo. Mi yu muher mas chikitu, Jean, a cuminsá traha pionero na 1945, i nos a traha pionero huntu. Despues Jean a conocé Sam Friend, kende tabata sirbi na Betel, e sede mundial di Testigonan di Jehova na Brooklyn, New York.a Nan a casa na 1952. Mi a sigui traha pionero na Pittsburgh i tabata conducí hopi studio di Bijbel, na un tempu cu asta 14 diferente famia tur siman. Na 1958 mi a baha cu penshon como shofer di tram. Despues di esei, e trabou di pionero a bira fácil, pasobra mi no mester a traha ocho ora pa dia na trabou mas.

Na 1983, Mary a bira malu. Mi a purba cuid’é mes bon cu el a cuidá mi pa casi 50 aña. Finalmente, el a muri dia 14 di september 1986.

Hañando Mi Lugá di Nacementu

Na 1989, Jean i Sam a hibá mi cu nan n’e congresonan na Polonia. Tambe nos a bishitá e lugá unda mi a crece. Ora e rusonan a conkistá e parti ei di mundu, nan a cambia nomber di e stadnan i a deportá hende pa otro pais. Nan a deportá un di mi ruman hombernan pa Istanbul i un ruman muher pa Rusia. I niun hende cu nos a puntra, no tabata conocé e nomber di mi pueblo.

Despues, cierto cerunan leu a parcé mi conocí. Segun nos tabata yega mas cerca, mi tabata reconocé mas cos dje pueblo—un ceritu, un crusada, un misa, un brug over dje riu. Pa nos sorpresa, di ripiente, nos a mira un borchi cu tabata bisa “Hoszowczyk”! No muchu tempu promé, e comunistanan a perde poder, i a restorá e nombernan original dje pueblonan.

Nos cas no tabat’ei mas, pero e fornu cu nos tabata usa pa cushiná pafó sí tabat’ei, parcialmente derá den tera. Anto mi a mustra nan un palu grandi i a bisa: “Wak e palu ei. Mi a plant’é promé cu mi a bai Merca. Wak con grandi el a bira!” Despues, nos a bai bishitá algun santana, buscando nomber di miembronan di famia, pero nos no a haña ningun.

Poniendo e Berdad na Promé Lugá

Ora Jean su casá a muri na 1993, el a puntrá mi si mi tabata kier pa e sali for di Betel pa bin cuidá mi. Mi a bis’é cu esei lo ta e cos di mas malu cu e por a haci, i ainda mi ta pensa mescos. Mi a biba riba mi mes te cu mi 102 aña, pero despues a bira necesario pa mi bai biba den un cas di cuido. Ainda mi ta anciano den Congregacion Bellevue na Pittsburgh, i diadomingo e rumannan ta bin buscá mi pa bai reunion na Salon di Reino. Aunke mi actividad di predicá ta limitá, mi ta keda riba e lista di pionero cu salú delicado.

Atrabes di añanan, mi a disfrutá di scolnan special pa entrená superintendentenan, organisá dor di Sociedad Watch Tower. Aña pasá na december, mi a asistí na algun sesion dje Scol di Ministerio di Reino pa ancianonan di congregacion. I dia 11 di april cu a pasa ei, Jean a hibá mi n’e Conmemoracion di Cristo su morto, un celebracion cu mi tin e privilegio di participá na dje tur aña for di 1931.

Algun di e personanan cu ken mi a studia Bijbel ta sirbi awor como anciano, otronan como misionero na Sur América i otronan ta welonan sirbiendo Dios huntu cu nan yunan. Tres di mi mes yunan—Mary Jane, John i Jean—mescos cu hopi di nan yu i nietunan ta sirbiendo Jehova Dios fielmente. Mi ta haci oracion pa un dia mi otro yu muher i mi sobrá nietu i bisanietunan por haci mescos.

Awor na edad di 105 aña, ainda mi ta animá tur hende pa studia Bijbel i conta otronan loke nan a siña. Sí, mi ta convencí cu si bo keda pegá na Jehova, nunca lo bo keda desapuntá. E ora ei, abo tambe lo por disfrutá di algu mihó cu oro cu ta caba—e berdad cu ta permití nos logra un relacion precioso cu nos Dunador di Bida, Jehova Dios.

[Nota]

[Plachi na página 25]

Tempu mi tabata core tram

[Plachi na página 26]

Den e cas di cuido unda mi ta biba awor

[Plachi na página 27]

E borchi di caya cu nos a haña na 1989