No Entregá den Haci Loke Ta Excelente
“Laga nos no entregá den haci loke ta excelente, pasobra n’e debido tempu nos lo cosechá si nos no cansa.”—GALATIONAN 6:9.
1, 2. (a) Pakico awante ta necesario pa por sirbi Dios? (b) Con Abraham a mustra awante, i kico a yud’é haci esei?
COMO Testigo di Jehova, ta un placer pa haci e boluntad di Dios. Tambe nos ta haña refrescamentu den carga e “yugo” di ser disipel. (Mateo 11:29) No obstante, no ta semper fácil pa sirbi Jehova cu Cristo. Apostel Pablo a splica esaki claramente ora el a urgi compañeronan cristian: “Boso tin mester di awante, afin cu, despues cu boso a haci e boluntad di Dios, boso por ricibí e cumplimentu dje promesa.” (Hebreonan 10:36) Awante ta necesario pasobra sirbi Dios por ta un desafio.
2 E bida di Abraham sigur ta un prueba dje echo ei. Hopi bes el a enfrentá decisionnan difícil i circunstancianan di tension. E ordu pa bandoná e bida confortabel di Ur tabata djis e cuminsamentu. No a tarda muchu cu el a enfrentá hamber, hostilidad di parti di su bisiñanan, enemistad di algun di su mes hendenan i e crueldad di guera. Tambe el a hera di perde su casá. I pruebanan mas grandi tabata na caminda. Pero nunca Abraham a entregá den haci loke ta excelente. Esaki ta remarcabel foral ora bo considerá cu e no tabatin e Palabra di Dios den su totalidad, manera nos tiné awe. No obstante, sin duda e tabata sa dje promé profecia, den cua Dios a declará: “Lo mi pone enemistad entre abo i e muher i entre bo simia i su simia.” (Génesis 3:15) Como esun mediante ken e Simia lo a bini, Abraham di mes lo tabata e blanco di enemistad satánico. Realisando e echo aki sin duda a yuda Abraham wanta su pruebanan gososamente.
3. (a) Pakico e pueblo di Jehova djawe mester verwagt tribulacion? (b) Ki animacion Galationan 6:9 ta duna nos?
3 Awe, e pueblo di Jehova tambe mester verwagt tribulacion. (1 Pedro 1:6, 7) Al fin i al cabo, Revelacion 12:17 ta spierta nos cu Satanas ta ‘haciendo guera’ contra e resto ungí. Pa motibu di nan asociacion estrecho cu e ungínan, e ‘otro carnénan’ tambe ta blanco di Satanas su rabia. (Juan 10:16) Ademas dje oposicion cu cristiannan lo por enfrentá den nan ministerio público, tambe nan por haña nan cu preshonnan difícil den nan bida personal. Pablo ta urgi nos: “Laga nos no entregá den haci loke ta excelente, pasobra n’e debido tempu nos lo cosechá si nos no cansa.” (Galationan 6:9) Sí, aunke Satanas ta busca pa destruí nos fe, nos tin cu tuma nos posicion contra dje, sólido den fe. (1 Pedro 5:8, 9) Kico por resultá for di nos fiel curso di bida? Santiago 1:2 i 3 ta splica: “Consider’é tur goso, mi rumannan, ora boso ta topa cu vários prueba, ya cu boso sa cu e calidad probá aki di boso fe ta obra awante.”
Atake Frontal
4. Con Satanas a usa atake frontal den un intento pa kibra e integridad dje pueblo di Dios?
4 E bida di Abraham ta ilustrá hopi bon e ‘vários pruebanan’ cu un cristian por topa awe. Por ehempel, e tabatin cu tuma accion contra e atake dje invasornan cu a bini di Sinar. (Génesis 14:11-16) Nada straño cu Satanas ta sigui usa atake frontal den forma di persecucion. Desde fin di Segundo Guera Mundial, decenas di pais a imponé prohibicion gubernamental riba e obra cristian educativo di Testigonan di Jehova. E Anuario 2001 di Testigonan di Jehova ta conta nos dje violencia cu cristiannan na Angola tabatin cu soportá na man di enemigu. Cu confiansa den Jehova, nos rumannan den e paisnan ei a nenga fielmente di renunciá nan fe! Nan a tuma accion, no dor di recurí na violencia of rebelion, sino dor di persistí discretamente den e trabou di predicá.—Mateo 24:14.
5. Con hóbennan cristian por ta víctima di persecucion na scol?
5 Sin embargo, persecucion no necesariamente ta encerá violencia. Cu tempu Abraham a ser bendicioná cu dos yu homber: Ismael i Isaac. Génesis 21:8-12 ta bisa nos cu na un ocasion Ismael tabata “haci bofon” di Isaac. Den su carta n’e Galationan, Pablo ta mustra cu esaki tabata mas serio cu wega di mucha, pasobra e ta bisa cu Ismael a persiguí Isaac! (Galationan 4:29) Pues nos por bisa corectamente cu mofa di parti di compañero di scol i atake verbal di parti di opositor ta persecucion. Un hóben cristian cu yama Ryan ta corda con su compañeronan di klas tabata torment’é: “E careda di 15 minuut den bus di cas pa scol i di scol pa cas, a parce manera oranan largu segun cu nan tabata papia co’i abusu cu mi. Nan tabata kima mi cu paperclip cu nan a keinta cu lighter di sigaria.” Kico tabata e motibu dje trato cruel aki? “Mi entrenamentu teocrático a haci mi diferente for dje demas hóbennan na scol.” No obstante, cu sosten di su mayornan, Ryan a logra wanta fielmente. Hóbennan, e mofa di bo pareunan a desanimá bo? Wel, no entregá! Dor di wanta fielmente, lo bo experimentá e cumplimentu di Jesus su palabranan: “Felis boso ta ora hende ta reprochá boso i ta persiguí boso i cu mentira ta papia tur sorto di cos malu contra boso pa mi causa.”—Mateo 5:11.
Ansiedad di Tur Dia
6. Kico por daña relacion entre compañeronan cristian awe?
6 Hopi dje pruebanan cu nos ta enfrentá awe ta encerá e ansiedadnan comun di tur dia. Abraham mes tabatin cu soportá tensionnan cu a desaroyá entre su wardadónan di bestia i esnan di su subrino Lot. (Génesis 13:5-7) Mescos tambe awe, diferencianan di personalidad i yaluzí sin ta necesario por daña relacion i asta menasá e pas dje congregacion. “Unda cu tin yaluzí i pleitu, tin desordu i tur cos baho.” (Santiago 3:16) Ta ki importante anto pa nos no entregá sino pone pas promé cu orguyo, mescos cu Abraham a haci, i busca e interes di otro hende!—1 Corintionan 13:5; Santiago 3:17.
7. (a) Kico un persona mester haci ora e sinti cu un compañero cristian a ofend’é? (b) Den ki manera Abraham a pone un excelente ehempel di mantené bon relacion cu otro hende?
7 Ser pacífico por ta un desafio ora nos ta sinti cu un compañero di creencia a trata nos inhustamente. Proverbionan 12:18 ta bisa: “Ta existí esun cu ta papia sin pensa manera e hincánan di un spada.” Palabra papiá sin pensa, asta ora el a ser papiá inocentemente, por causa dolor profundo. E dolor ta asta mas grandi ainda ora nos sinti cu un hende a calumniá nos of ora nos a bira víctima di redashi baho. (Salmo 6:6, 7) Pero un cristian no por laga ofensa pon’é entregá! Si bo ta den un situacion asina, tuma e iniciativa pa corigí asuntunan dor di papia na un manera bondadoso cu e persona cu a ofendé bo. (Mateo 5:23, 24; Efesionan 4:26) Sea incliná pa pordoná e persona ei. (Colosensenan 3:13) Dor di no carga rencor, nos ta haci posibel pa cura tantu nos propio emocionnan como nos relacion cu nos ruman. Abraham no a sigui carga ningun rencor cu e por tabatin contra Lot. Al contrario, Abraham a sali mesora na defensa di Lot i su famia!—Génesis 14:12-16.
Pruebanan Causá pa Nos Mes
8. (a) Con cristiannan por “hinca nan mes tur caminda cu hopi dolor”? (b) Kico a permití Abraham tene un punto di bista balansá di cos material?
8 Nos tin cu admití cu tin bes nos mes ta busca prueba. Por ehempel, Jesus a manda su siguidónan: “Stop di acumulá tesoronan pa bo mes riba tera, unda mòt i frus ta destruí, i unda ladron ta kibra drenta i horta.” (Mateo 6:19) Tog, algun ruman ta “hinca nan mes tur caminda cu hopi dolor” dor di pone interes material promé cu interesnan di Reino. (1 Timoteo 6:9, 10) Abraham tabata dispuesto pa sacrificá comodidad material pa por a agradá Dios. “Pa medio di fe el a biba como stranhero den e tera dje promesa como den un tera stranhero, i a biba den tent cu Isaac i Jacob, herederonan cuné dje mésun promesa. Pasobra e tabata spera e stad cu tin berdadero fundeshi, di cua stad Dios ta e constructor i trahador.” (Hebreonan 11:9, 10) Abraham su fe den un futuro “stad,” of gobiernu divino, a yud’é p’e no confia den rikesa. Lo no ta sabí pa nos haci mescos?
9, 10. (a) Con un deseo pa prominencia por bira un prueba? (b) Awe, con un ruman homber por comportá su mes como “un menor”?
9 Considerá un otro aspecto. Bijbel ta duna e instruccion claro aki: “Si un hende ta kere cu e ta algu, miéntras cu e no ta nada, e ta gaña su mes mente.” (Galationan 6:3) Ademas, Bijbel ta urgi nos pa no haci “nada motivá pa gana di pleita of motivá pa egoismo, sino . . . cu humildad di mente.” (Filipensenan 2:3) Algun cristian ta trece prueba riba nan mes dor di keda sin aplicá e conseho aki. Motivá pa un deseo pa prominencia en bes di un deseo pa haci “un trabou excelente,” nan ta bira desanimá i malcontentu ora nan no ricibí privilegio den e congregacion.—1 Timoteo 3:1.
10 Abraham a pone un bon ehempel den “no pensa mas di su mes cu ta necesario.” (Romanonan 12:3) Ora el a topa Melkísedec, Abraham no a actua como si fuera su posicion faborecí dilanti Dios a hacié superior. Al contrario, el a reconocé Melkísedec su posicion superior como sacerdote dor di pagu’é un diesmo. (Hebreonan 7:4-7) Mescos tambe, cristiannan awe mester ta dispuesto pa comportá nan mes como “menor” i no exigí tur atencion. (Lucas 9:48) Si esnan cu ta hiba delantera den e congregacion aparentemente no ta duna bo cierto privilegionan, haci un examinacion propio onesto pa determiná con bo por refiná bo personalidad of bo manera di atendé cosnan. En bes di bira amargá pa e privilegionan cu bo no tin, saca pleno probecho dje privilegio cu sí bo tin: e privilegio di yuda otro hende yega na conocé Jehova. Sí, “humiyá boso mes . . . bou dje man poderoso di Dios, p’e por halsa boso n’e debido tempu.”—1 Pedro 5:6.
Fe den e Cosnan Invisibel
11, 12. (a) Con bini algun persona den e congregacion por perde nan sentido di urgencia? (b) Con Abraham a pone un bon ehempel den enfocá su bida riba fe den e promesanan di Dios?
11 Un otro prueba por tin di haber cu e aparente tardansa dje fin di e mal sistema di cosnan aki. Segun 2 Pedro 3:12, cristiannan mester ta “sperando i teniendo mashá presente e presencia dje dia di Jehova.” Sin embargo, hopi a spera riba e “dia” aki pa añanan, tin di nan pa décadanan. Como resultado, algun por bira desanimá i perde nan sentido di urgencia.
12 Wak e ehempel di Abraham atrobe. El a enfocá henter su bida riba fe den e promesanan di Dios, maske tabata imposibel pa nan tur a cumpli durante su bida. Ta berdad cu el a biba suficiente largu pa mira su yu Isaac crece bira grandi. Pero lo a dura siglonan promé cu e desendencia di Abraham por a ser compará cu “e streanan di shelu” of “e pipitanan di santu cu ta na oriya di laman.” (Génesis 22:17) Sin embargo Abraham no a bira amargá ni desanimá. P’esei apostel Pablo por a bisa di Abraham i otro patriarcanan: “Den fe tur esakinan a muri, aunke nan no a obtené e cumplimentu dje promesanan, sino nan a mira nan di leu i a ricibí nan cu gustu i a declará públicamente cu nan tabata stranhero i residente temporal den e tera.”—Hebreonan 11:13.
13. (a) Awe, con cristiannan ta manera “residente temporal”? (b) Pakico Jehova lo trece un fin n’e sistema di cosnan aki?
13 Si Abraham por a mantené su bida enfocá riba promesanan cu lo a cumpli “leu ayá” den futuro, cuantu mas nos awe mester haci mescos, siendo cu e cumplimentu dje cosnan aki ta asina cerca! Mescos cu Abraham, nos tin cu mira nos mes como “residente temporal” den e sistema di Satanas i nenga di hiba un estilo di bida di complacé nos mes. Di mes nos lo a preferá pa “e fin di tur cos” yega awe, i no mañan. (1 Pedro 4:7) Tal bes nos ta sufri di problema serio di salú. Of podisé preshon económico ta casi hoga nos. Pero nos tin cu corda cu Jehova no ta trece e fin djis pa rescatá nos for di circunstancianan pertá, sino pa santificá su propio nomber. (Ezekiel 36:23; Mateo 6:9, 10) E fin lo bini, no necesariamente na un tempu cu lo cumbiní nos, pero na un tempu cu ta sirbi Jehova su propósito mihó.
14. Con Dios su pacenshi ta beneficiá cristiannan awe?
14 Corda tambe, cu “Jehova no ta lento en cuanto su promesa, manera algun hende ta considerá lentitud, pero e tin pacenshi cu boso pasobra e no ta deseá pa ningun hende ser destruí, sino ta deseá pa tur alcansá repentimentu.” (2 Pedro 3:9) Ripará cu Dios tin “pacenshi cu boso”—miembronan dje congregacion cristian. Probablemente, algun di nos tin mester di mas tempu pa haci cambio i ahuste “p’e haña [nos] finalmente sin mancha i sin defecto i na pas.” (2 Pedro 3:14) Nos no mester ta gradicidu anto cu Dios a mustra e pacenshi ei?
Hañando Goso Apesar di Obstáculo
15. Con Jesus por a mantené su goso apesar di prueba, i ki beneficio cristiannan ta saca awe dor di imit’é?
15 E bida di Abraham ta siña cristiannan awe hopi les. El a mustra no solamente pacenshi, sino tambe perspicacia, curashi i amor inegoista. El a duna e adoracion di Jehova prioridad den su bida. Pero nos tin cu corda cu e ehempel superlativo pa nos imitá ta esun cu Jesucristo a pone. E tambe a pasa den vários prueba, pero ningun di nan a pon’é perde su goso. Pakico? Pasobra el a mantené su mente enfocá riba e speransa su dilanti. (Hebreonan 12:2, 3) P’esei Pablo a pidi den oracion: “Awor laga e Dios cu ta suministrá awante i consuelo permití boso tene den boso mes e mésun actitud mental cu Cristo Jesus tabatin.” (Romanonan 15:5) Cu e actitud mental corecto, nos por haña goso apesar di obstáculo cu Satanas por pone den nos caminda.
16. Kico nos por haci ora nos problemanan ta parce aplastante?
16 Ora problemanan ta mustra aplastante, corda bo mes cu mescos cu Jehova a stima Abraham, e ta stima abo tambe. E kier pa bo tin éxito. (Filipensenan 1:6) Pone bo pleno confiansa den Jehova, sigur cu ‘lo e no laga bo ser tentá mas ayá di loke bo por soportá, sino cu huntu cu e tentacion lo e percurá tambe p’e salida pa bo por want’é.’ (1 Corintionan 10:13) Desaroyá e custumber di lesa e Palabra di Dios tur dia. (Salmo 1:2) Perseverá den oracion i pidi Jehova yuda bo wanta. (Filipensenan 4:6) Lo e “duna spiritu santu na esnan cu ta pidié.” (Lucas 11:13) Probechá dje percuracionnan cu Jehova a haci pa sostené bo spiritualmente, manera nos publicacionnan basá riba Bijbel. Tambe, busca apoyo cerca e rumannan. (1 Pedro 2:17) Asistí fielmente na reunionnan cristian, pasobra ei lo bo ricibí e animacion cu bo tin mester pa por wanta. (Hebreonan 10:24, 25) Alegrá den e conviccion cu bo awante ta hiba na un condicion aprobá den bista di Dios i cu bo fieldad ta haci su curason alegrá!—Proverbionan 27:11; Romanonan 5:3-5.
17. Pakico cristiannan no ta entregá na desesperacion?
17 Dios a stima Abraham como su “amigu.” (Santiago 2:23) Asina mes, Abraham a topa cu vários prueba i tribulacion cu a causa hopi tension den su bida. P’esei cristiannan no por spera ménos durante e “último dianan” malbado aki. De echo, Bijbel ta spierta nos cu “hende malbado i impostornan lo bai di malu pa pió.” (2 Timoteo 3:1, 13) En bes di entregá na desesperacion, realisá cu e preshonnan cu nos ta enfrentá ta duna evidencia cu e fin dje mal sistema di Satanas ta cerca. Pero Jesus ta recordá nos cu “esun cu a wanta te na fin ta esun cu lo ser salbá.” (Mateo 24:13) Asina ta, “no entregá den haci loke ta excelente!” Imitá Abraham, i sea entre esnan cu “mediante fe i pacenshi ta heredá e promesanan.”—Hebreonan 6:12.
Bo A Tuma Nota?
• Pakico e pueblo di Jehova mester verwagt prueba i tribulacion awe?
• Den ki maneranan Satanas por usa atake frontal?
• Con cristiannan por resolvé conflicto di personalidad entre nan?
• Con orguyo i egoismo por crea prueba?
• Den ki manera Abraham a pone un bon ehempel di warda riba e cumplimentu dje promesanan di Dios?
[Plachi na página 26]
Hopi hóben cristian ta sufri persecucion den forma di bofon di nan pareunan
[Plachi na página 29]
Den tempu di Abraham e cumplimentu dje promesanan di Dios tabata “leu ayá” den futuro, pero tog el a enfocá su bida riba nan