Muhénan Kristian Fiel—Adoradónan Presioso di Dios

“Ser atraktivo ta engañoso i bunitesa ta banidat, ma un muhé ku ta teme SEÑOR, esei lo wòrdu elogiá.”—PROVERBIONAN 31:30.

 1. Kiko ta Yehova su punto di bista di beyesa na komparashon ku esun di mundu?

MUNDU ta pone hopi énfasis riba aparensia eksterior, spesialmente serka hende muhé. Sin embargo, Yehova ta interesá prinsipalmente den e persona interior, ku segun ku su edat ta subi por bira asta mas bunita. (Proverbionan 16:31) P’esei Beibel ta animá hende muhé: “No laga boso dòrnamentu ta di pafó so—flègtmentu di kabei, bistimentu di hoya di oro, òf bistimentu di paña luhoso; ma lag’é ta e persona skondí di e kurason, ku e kalidat inkoruptibel di un spiritu suave i ketu, lokual ta presioso den bista di Dios.”—1 Pedro 3:3, 4.

2, 3. Kon hende muhé a kontribuí na e adelanto di e bon nobo den promé siglo, i kon esaki a ser profetisá?

² Hopi hende muhé menshoná den Beibel a desplegá tal spiritu digno di elogio. Den promé siglo, algun di nan tabatin e privilegio di sirbi Hesus i su apòstelnan. (Lukas 8:1-3) Mas despues, muhénan kristian a bira evangelisadónan seloso; otronan a duna apoyo balioso na hòmbernan kristian ku tabata hiba delantera, inkluso na apòstel Pablo; i algun a demostrá hospitalidat eksepshonal, asta poniendo nan kas disponibel pa tene reunionnan di kongregashon.

³ E echo ku Yehova lo a usa hende muhé den un manera fenomenal asina pa kumpli ku su propósito a ser profetisá den e Skritura. Por ehèmpel, Joel 2:28 i 29 a predisí ku tantu hòmber komo muhé, hóben i bieu, lo a risibí spiritu santu i partisipá den plamamentu di e bon nobo di Reino. E profesia ei a kuminsá kumpli na Pentekòste di aña 33 di nos era. (Echonan 2:1-4, 16-18) Algun muhé ungí pa spiritu a risibí donnan milagroso, manera e don di profetisá. (Echonan 21:8, 9) Mediante nan selo den sirbishi, e gran ehérsito spiritual aki di rumannan muhé fiel a kontribuí na e plamamentu rápido di kristianismo den promé siglo. De echo, rònt di aña 60, apòstel Pablo a skirbi ku e bon nobo a ser “proklamá den henter kreashon bou di shelu.”—Kolosensenan 1:23.

Elogiá pa Nan Kurashi, Selo i Hospitalidat

 4. Dikon Pablo tabatin bon motibu pa elogiá vários hende muhé di e kongregashon kristian di promé siglo?

⁴ Apòstel Pablo mes tabata un persona ku masha apresio pa e sirbishi ku algun hende muhé en partikular a efektuá, meskos ku superintendentenan kristian djawe ta duna gran balor na e sirbishi efektuá dor di rumannan muhé seloso. Entre e muhénan ku Pablo a menshoná na nòmber tabatin “Trifena i Trifosa, trahadónan den Señor,” i “Pérsida, e ruman stimá, kende a traha duru den Señor.” (Romanonan 16:12) Pablo a skirbi ku Euodias i Sintike a “kompartí [su] lucha pa kousa di evangelio.” (Filipensenan 4:2, 3) Prisila, huntu ku su esposo Akila, tambe a sirbi huntu ku Pablo. Prisila ku Akila asta “a riska nan bida” pa Pablo, lokual a motiv’é pa skirbi: “No solamente ami ta duna gradisimentu, ma tambe tur e iglesianan di e paganonan.”—Romanonan 16:3, 4; Echonan 18:2.

5, 6. Den ki maneranan Prisila a pone un bon ehèmpel pa rumannan muhé awe?

⁵ Kiko a kontribuí na Prisila su selo i kurashi? Na Echonan 18:24-26 nos ta haña un relato ku ta indiká ta kiko a kontribuí na esei. Einan nos ta lesa ku el a apoyá su esposo pa yuda pone Apolos, un gran oradó, al dia ku e bèrdatnan revelá. Ta bisto anto ku Prisila tabata un studiante diligente di e Palabra di Dios i di e siñansa di e apòstelnan. Komo resultado, el a desaroyá kualidatnan ekselente ku a hasié presioso pa Dios i pa su kasá i un miembro balioso di e kongregashon di promé. Awe e tantísimo rumannan muhé kristian trahadó ku diligentemente ta studia Beibel i ta tuma di e alimento spiritual ku Yehova ta perkurá mediante ‘e mayordomo fiel,’ tambe ta ser konsiderá presioso.—Lukas 12:42.

⁶ Akila ku Prisila tabata eksepshonalmente hospitalario. Pablo a keda den nan kas ora ku e tabata traha huntu ku nan na Korinto den e negoshi di traha tènt. (Echonan 18:1-3) Ora ku e pareha a muda bai Efeso i despues Roma, nan a sigui mustra hospitalidat kristian, asta poniendo nan kas disponibel pa tene reunionnan di kongregashon. (Echonan 18:18, 19; 1 Korintionan 16:8, 19) Ninfas i Maria, mama di Juan Marko, tambe a habri nan kas pa tene reunionnan di kongregashon.—Echonan 12:12; Kolosensenan 4:15.

Un Poseshon Presioso Awe

7, 8. Ki registro di sirbishi sagrado digno di elogio hopi muhé kristian tin awe, i di kiko nan por ta sigur?

⁷ Meskos ku den promé siglo, muhénan kristian djawe ta hunga un papel klave den e kumplimentu di Dios su propósito, spesialmente den e obra di evangelisá. I ki un ekselente registro e rumannan muhé aki tin! Konsiderá e ehèmpel di Gwen, kende a sirbi Yehova fielmente pa mas ku 50 aña te na su morto na 2002. Su esposo a bisa: “Gwen su selo komo evangelisadó tabata bon konosí den nos stat. P’e, tur hende tabata un posibel kandidato pa risibí Yehova su amor i promesanan. Su lealtat na Dios, na su organisashon i na nos famia—pa no papia mes di su animashon amoroso ora nos tabata desanimá—tabata un gran apoyo pa mi ku e muchanan atraves di nos bida huntu, un bida yen i satisfasiente. E ta hasi hopi falta.” Gwen ku su esposo tabatin 61 aña kasá.

⁸ Dies di míles di ruman muhé kristian, soltero i kasá, ta sirbi komo pionero i misionero, kedando satisfecho ku e nesesidatnan di bida segun ku nan ta plama e mensahe di Reino den teritorionan ku ta varia di statnan drùk te na regionnan aislá. (Echonan 1:8) Hopi di nan a keda sin haña yu òf sin un kas di nan mes, pa nan por a sirbi Yehova mas plenamente. Tin di nan ta duna apoyo leal na nan esposo ku ta sirbi komo superintendente biahero, miéntras ku míles di ruman muhé ta sirbi den kasnan di Bètel rònt mundu. No tin duda ku e muhénan aki ku ta desplegá sakrifisio propio, ta parti di “e rikesa di tur nashon” ku ta yena e kas di Yehova ku gloria.—Hageo 2:7.

9, 10. Kon algun miembro di famia a ekspresá nan apresio pa e ekselente ehèmpel ku esposa- i mamanan kristian ta pone?

⁹ Klaru ku hopi ruman muhé kristian tin responsabilidatnan di famia ku nan mester atendé; i tòg nan ta mantené interesnan di Reino na promé lugá. (Mateo 6:33) Un ruman muhé pionero soltero a skirbi: “Mi mama, dor di su fe firme i ekselente ehèmpel, a hunga un papel klave den e echo ku ami a bira un pionero regular. Eigenlijk e tabata un di mi mihó partnernan di pionero.” Un esposo a bisa di su kasá, ku ta mama di sinku yu muhé adulto: “Nos kas semper tabata limpi i na òrdu. Bonnie a ten’é simpel i sin potoshi ya asina nos famia por a konsentrá riba aktividatnan spiritual. E manera kuidadoso ku el a manehá nos asuntunan finansiero a hasi posibel ku mi por a traha partaim pa 32 aña, i asina dediká mas tempu na nos famia i na asuntunan spiritual. Tambe mi kasá a siña e muchanan e balor di traha duru. Palabranan di elogio so mi tin p’e.” Awe Bonnie ku su kasá ta sirbi na e sede mundial di Testigunan di Yehova.

¹⁰ Un esposo a skirbi relashoná ku su kasá, mama di yunan grandi kaba: “E kualidatnan ku mas mi ta atmirá den Susan ta su amor intenso pa Dios i pa hende, i tambe su komprenshon, empatia i onestidat. Semper e tabata di opinion ku Yehova meresé lo mihó ku nos por dun’é, un prinsipio ku e ta apliká na su mes komo sirbidó di Dios i tambe komo mama.” Ku e apoyo di su kasá, e esposo aki por a aseptá vários privilegionan spiritual, entre otro, sirbi komo ansiano, pionero, superintendente di sirkuito suplente i miembro di e Komité di Kontakto ku Hospital. Muhénan asina ta masha presioso pa nan kasá, pa nan rumannan kristian, i mas ku tur, pa Yehova.—Proverbionan 31:28, 30.

Muhénan Presioso sin Kasá

11. (a) Kon Yehova a revelá su preokupashon pa muhénan fiel, spesialmente pa esnan ku ta biuda? (b) Biuda kristian i otro ruman muhé fiel ku no tin kasá por ta sigur di kiko?

¹¹ Hopi bes Yehova a ekspresá su preokupashon pa e bienestar di biudanan. (Deuteronomio 27:19; Salmo 68:5; Isaias 10:1, 2) E no a kambia. Te ainda e ta profundamente interesá no solamente den biuda, sino tambe den mama soltero i hende muhé ku ta soltero pasobra nan a skohe esei òf pasobra nan no a haña un kasá kristian apropiá. (Malakias 3:6; Santiago 1:27) Si bo ta entre e muhénan ku ta sirbi Yehova fielmente sin e apoyo di un kasá kristian, bo por ta sigur ku bo ta presioso den bista di Dios.

12. (a) Kon algun ruman muhé kristian ta demostrá nan fieldat na Yehova? (b) Ki sintimentunan algun di nos rumannan muhé ta lucha kuné?

¹² Por ehèmpel, tuma nos rumannan muhé kristian ku no a kasa pasobra fielmente nan ta obedesé Yehova su konseho pa kasa “basta ta den Señor.” (1 Korintionan 7:39; Proverbionan 3:1) E Palabra di Dios ta sigurá nan: “[Yehova] ta fiel pa esun ku ta fiel.” (2 Samuel 22:26, Beibel na papiamentu koriente) Sin embargo, pa hopi di nan ta difísil pa keda soltera. Un ruman muhé a bisa: “Mi ta desididu pa kasa solamente den Señor, pero vários biaha mi tabata awa na wowo segun ku mi ta mira mi amiganan ta kasa ku hòmbernan kristian maravioso, miéntras ku ami ta ketu bai mi so.” Un otro ruman muhé a remarká: “Mi a sirbi Yehova pa 25 aña. Mi ta determiná pa keda fiel na dje, pero hopi bes soledat ta hasi mi tristu.” El a agregá: “Rumannan manera mi ta anhelá pa haña animashon.” Kon nos por yuda rumannan fiel asina?

13. (a) Kiko nos ta siña for di e ehèmpel di esnan ku a bishitá e yu muhé di Jefte? (b) Den ki maneranan mas nos por mustra interes pa rumannan muhé soltero den nos kongregashon?

¹³ Un ehèmpel di pasado ta siña nos un manera ku nos por yuda. Ora ku e yu muhé di Jefte a renunsiá su oportunidat di tin un kasá, e pueblo a realisá ku el a hasi un sakrifisio. Kiko nan a hasi pa enkurash’é? “Di aña pa aña e yu muhénan di Israel tabata bai pa duna enkomendashon n’e yu muhé di Jefte e galadita, kuater dia den e aña.” (Huesnan 11:30-40, NW) Di igual manera, nos mester duna enkomendashon sinsero na rumannan muhé soltero ku fielmente ta obedesé e lei di Dios.a Kua ta un otro manera ku nos por mustra nos interes? Den nos orashonnan nos mester pidi Yehova apoyá e rumannan fiel i stimá ei pa nan sigui fielmente den nan sirbishi. Nan ta meresé di haña e siguransa ku Yehova i henter e kongregashon kristian ta stima nan i apresiá nan masha hopi.—Salmo 37:28.

Kon Mayornan Soltera Ta Logra Éksito

14, 15. (a) Dikon kristiannan ku ta mama soltero mester akudí na Yehova pa yudansa? (b) Kon mayornan soltera por aktua na armonia ku nan orashon?

¹⁴ Muhénan kristian ku ta mama soltero tambe ta konfrontá hopi difikultat. Sin embargo, nan por akudí na Yehova pa yuda nan lanta nan yunan na armonia ku prinsipionan bíbliko. Ta bèrdat ku ora bo ta un mayor soltera, bo no por ta mama i tata den tur kos. No opstante, Yehova lo yuda bo atendé e tantísimo responsabilidatnan ku bo tin si bo pidi su yudansa ku fe. Pa ilustrá esaki: Imaginá ku bo tin un saku pisá ku komestibel pa hiba na bo flèt ku ta keda te ariba den un edifisio di vários piso. Lo bo usa e trapi pa chambuká bai ariba si tin un left den e edifisio? Klaru ku nò! Di igual manera, no purba karga karganan emoshonal pisá bo so, miéntras ku bo por pidi Yehova yuda bo. De echo, e ta invitá bo pa akudí na dje. Salmo 68:19 ta bisa: “Bendishoná sea Señor, e Dios di nos salbashon, kende dia tras dia ta karga nos karganan.” Asina tambe 1 Pedro 5:7 ta invitá bo pa tira tur bo preokupashonnan riba Yehova ‘pasobra e ta perkurá pa bo.’ P’esei ora problema i preokupashon ta un peso pa bo, tira bo karga riba bo Tata selestial, i hasi esei “sin stòp.”—1 Tesalonisensenan 5:17; Salmo 18:6; 55:22.

¹⁵ Por ehèmpel, si bo ta mama, sin duda bo ta preokupá pa e influensia ku otro muchanan por tin riba bo yunan na skol òf pa e pruebanan di integridat ku nan kisas tin ku konfrontá. (1 Korintionan 15:33) Esakinan ta motibunan válido pa preokupá. Pero tambe nan ta asuntu pa orashon. De echo, pakiko bo no ta hasi orashon ku bo yunan tokante e kosnan ei promé ku nan sali pa bai skol, podisé despues di a konsiderá e teksto di dia huntu? Orashon sinsero i spesífiko por hasi un impreshon profundo riba mente di mucha. Mas ku tur kos, bo ta pone bo mes den fila pa haña e bendishon di Yehova ora ku pasientemente bo ta hasi esfuerso pa inkulká su Palabra den kurason di bo yunan. (Deuteronomio 6:6, 7; Proverbionan 22:6) Kòrda ku “e wowonan di SEÑOR ta riba e hustunan, i su oreanan ta atento pa skucha nan orashon.”—1 Pedro 3:12; Filipensenan 4:6, 7.

16, 17. (a) Kiko un yu hòmber a bisa di e amor ku su mama a demostrá? (b) Kon e mama su punto di bista spiritual a influensiá su yunan?

¹⁶ Konsiderá e ehèmpel di Olivia, un mama di seis yu. Su esposo inkrédulo a bandoná e famia djis despues ku nan último yu a nase, pero mesora Olivia a tuma e responsabilidat di eduká su yunan den e kaminda di Dios. Olivia su yu hòmber Darren, ku awor tin 31 aña i ta sirbi komo ansiano kristian i pionero, tabatin rònt di 5 aña e tempu ei. Pa kolmo Darren a haña un problema serio di salú ku te awe ta molesti’é, i ku a duna Olivia mas ansiedat. Reflekshonando riba su infansia, Darren a skirbi: “Ainda mi ta kòrda kon mi tabata sinta riba mi kama di hospital sperando ansiosamente riba Mama. Tur dia e tabata bin sinta serka mi i lesa Beibel pa mi. Kaba e ta kanta e kantika ‘Danki, Yehova.’b Te ku awe, esei ta mi kantika di Reino preferí.”

¹⁷ Olivia su konfiansa den Yehova i amor p’e a kontribuí na su éksito komo mama soltero. (Proverbionan 3:5, 6) Su aktitut ekselente a keda reflehá den e metanan ku el a animá su yunan pa pone. Darren a bisa: “Semper Mama a enkurashá nos pa alkansá e meta di sirbishi di tempu kompletu. Komo resultado, ami i kuater di mi sinku ruman muhénan a drenta den sirbishi di tempu kompletu. Sin embargo, Mama nunka no a broma tokante e kosnan aki ku otro hende. Mi ta hasi mi bèst pa imitá su kualidatnan maravioso.” Ta sierto ku no ta tur mucha ta bira sirbidó di Dios ora nan bira grandi, manera e yunan di Olivia. Pero ora un mama hasi su bèst pa biba segun prinsipionan bíbliko, e por tin sigur ku e ta haña Yehova su guia i sosten amoroso.—Salmo 32:8.

18. Kon nos por demostrá ku nos ta apresiá e areglo di e kongregashon kristian ku Yehova a perkurá?

¹⁸ Gran parti di e apoyo ku Dios ta perkurá ta mediante e kongregashon kristian, ku su programa regular di alimentashon spiritual, su hermandat kristian i su ‘donnan den hende’ ku ta spiritualmente maduro. (Efesionan 4:8) Ansianonan fiel ta traha duru pa edifiká tur ruman den kongregashon, dunando atenshon spesial na e nesesidatnan di “wèrfano i biuda den nan aflikshon.” (Santiago 1:27) P’esei keda serka di e pueblo di Dios, i nunka isolá bo mes.—Proverbionan 18:1; Romanonan 14:7.

E Bunitesa di Sumishon

19. Dikon sumishon di esposa no ta nifiká ku e ta inferior, i kua ehèmpel bíbliko ta apoyá esaki?

¹⁹ Yehova a krea e muhé komo un komplemento di e hòmber. (Génesis 2:18) P’esei sumishon di e esposa di ningun manera ta nifiká ku e ta inferior. Mas bien, esei ta duna dignidat na un hende muhé, i ta permitié usa su tantísimo don- i talentonan na armonia ku e boluntat di Dios. Proverbionan kapítulo 31 ta deskribí e vários aktividatnan di un esposa birtuoso òf kapas den Israel di antigwedat: el a yuda esnan den nesesidat, a planta kunuku di wendrùif i a kumpra tereno. Sí, “kurason di su esposo ta konfia den dje, i su esposo . . . no [tabatin] falta di ganashi.”—Versíkulo 11, 16, 20.

20. (a) Kon un muhé kristian mester mira su talento- òf donnan ku Dios a dun’é? (b) Ki kualidatnan ekselente Ester a desplegá, i debí na nan kon Yehova por a us’é?

²⁰ Un muhé modesto, temeroso di Dios, no ta halsa su mes ambisiosamente ni ta kompetí ku su esposo. (Proverbionan 16:18) E no ta buska realisashon personal primordialmente mediante aktividatnan di mundu, sino mas bien e ta usa e donnan ku Dios a dun’é pa prinsipalmente sirbi otro persona: su famia, rumannan kristian, bisiña, i mas ku tur, Yehova. (Galationan 6:10; Tito 2:3-5) Konsiderá e ehèmpel bíbliko di Reina Ester. Ounke e tabata físikamente bunita, e tabata modesto i sumiso. (Ester 2:13, 15) Ora el a kasa, el a demostrá rèspèt profundo pa su kasá, Rei Asuero, distinto for di Vasti, e promé esposa di rei. (Ester 1:10-12; 2:16, 17) Respetuosamente Ester a someté su mes tambe na e opinion di su primu di mas edat, Mardokeo, riba asuntunan apropiá, asta despues ku el a bira reina. Pero Ester no tabata un muhé di karakter débil! Ku kurashi el a desenmaskará Haman, un hòmber poderoso i kruel ku a traha kòmplòt pa destruí e hudiunan. Yehova a usa Ester na un manera poderoso pa konserbá Su pueblo.—Ester 3:8–4:17; 7:1-10; 9:13.

21. Kon un muhé kristian por bira mas i mas presioso pa Yehova?

²¹ Ta bisto anto ku tantu den pasado komo awe, muhénan deboto na Dios a demostrá nan deboshon eksklusivo na Yehova i su adorashon. P’esei, muhénan temeroso di Dios ta presioso den bista di Yehova. Rumannan muhé kristian, laga Yehova forma boso progresivamente mediante su spiritu den un “instrumènt” mas i mas deseabel, unu “prepará pa tur bon obra.” (2 Timoteo 2:21; Romanonan 12:2) E Palabra di Dios ta bisa di e adoradónan presioso aki: “Dun’é di e fruta di su mannan, i laga su mes obranan gab’é den e portanan di stat.” (Proverbionan 31:31) Ohalá esei ta e kaso ku kada un di boso.

[Nota]

Bo Ta Kòrda?

• Kon algun muhé kristian di promé siglo a resultá di ta presioso den bista di Yehova?

• Kon hopi ruman muhé den nos tempu a hasi nan mes presioso den bista di Dios?

• Den ki maneranan Yehova ta apoyá mamanan soltero i otro ruman muhénan ku no tin un kasá?

• Kon un muhé por demostrá rèspèt sinsero pa e areglo ku su kasá ta su kabes?

[Kuadro na página 17]

Ehèmpelnan pa Meditá Ariba

Lo bo tin gana di konsiderá algun ehèmpel mas di muhénan fiel ku Beibel ta menshoná? Wèl, sea asina bon di lesa e tekstonan bíbliko sitá aki bou. Segun ku bo ta meditá riba e diferente personanan menshoná, purba detektá prinsipionan ku lo bo por apliká mas plenamente den bo bida.—Romanonan 15:4.

◆ Sara: Génesis 12:1, 5; 13:18a; 21:9-12; 1 Pedro 3:5, 6.

◆ Muhénan israelita generoso: Eksodo 35:5, 22, 25, 26; 36:3-7; Lukas 21:1-4.

◆ Débora: Huesnan 4:1–5:31.

◆ Ruth: Ruth 1:4, 5, 16, 17; 2:2, 3, 11-13; 4:15.

◆ Muhé di Sunem: 2 Reinan 4:8-37.

◆ Muhé kananeo: Mateo 15:22-28.

◆ Marta ku Maria: Marko 14:3-9; Lukas 10:38-42; Juan 11:17-29; 12:1-8.

◆ Tabita: Echonan 9:36-41.

◆ E kuater yu muhénan di Felipe: Echonan 21:9.

◆ Febe: Romanonan 16:1, 2.

[Plachi na página 15]

Abo ta duna enkomendashon na rumannan muhé soltero ku fielmente ta obedesé e lei di Dios?

[Plachi na página 16]

Ki petishonnan spesífiko por ser menshoná den orashon promé ku e muchanan sali pa bai skol?