Enfoká Riba e Bondat di Yehova Su Organisashon
“Nos lo keda satisfecho ku e bondat di bo kas.”—SALMO 65:4.
1, 2. (a) Ki efekto e areglonan en konekshon ku e tèmpel lo tabatin riba e pueblo di Dios? (b) Kon David a sostené konstrukshon di e tèmpel?
DAVID di Israel di antigwedat ta un di e hendenan di mas sobresaliente menshoná den e Skritura Hebreo. E wardadó, músiko, profeta i rei aki a pone su konfiansa kompletu den Yehova Dios. E relashon íntimo ku David tabatin ku Yehova a lanta den dje un deseo pa traha un kas pa Dios. E kas òf tèmpel ei lo a bira e sentro di adorashon berdadero den Israel. David tabata sa ku e areglonan en konekshon ku e tèmpel lo a trese goso i bendishon pa e pueblo di Dios. P’esei David a kanta: “Bendishoná ta esun ku bo [Yehova] ta skohe i ta hala serka bo, pa biba den bo pationan. Nos lo keda satisfecho ku e bondat di bo kas, bo tèmpel santu.”—Salmo 65:4.
2 Yehova no a laga David supervisá e konstrukshon di Su kas. Mas bien, el a reservá e privilegio ei pa su yu Salomon. David no a murmurá pa motibu ku un otro hende a haña e privilegio ku e mes a deseá asina tantu. E kos di mas importante p’e tabata pa e tèmpel ser konstruí. El a sostené e proyekto di henter su kurason dor di pasa e plannan arkitektóniko ku el a risibí di Yehova pa Salomon. Ademas, David a organisá míles di levita den divishonnan di sirbishi i a kontribuí ku gran kantidat di oro i plata pa konstrukshon di e tèmpel.—1 Krónikanan 17:1, 4, 11, 12; 23:3-6; 28:11, 12; 29:1-5.
3. Ki aktitut sirbidónan di Dios tin pa loke ta e areglonan pa adorashon berdadero?
3 E israelitanan fiel a sostené e areglonan ku a ser hasí pa adorashon berdadero na e kas di Dios. Komo sirbidónan di Yehova di e tempu aktual, nos tambe ta sostené areglonan pa adorashon den e parti terenal di Yehova su organisashon. Ku esei nos ta demostrá ku nos tin e mesun aktitut ku David tabatin. Nos no tin un aktitut di keha. Mas bien, nos ta enfoká riba e bondat di e organisashon di Dios. Bo a yega di pensa tokante e hopi kosnan bon pa kua nos por ta berdaderamente gradisidu? Laga nos konsiderá algun di nan.
Gradisidu pa Esnan Ku Ta Hiba Delantera
4, 5. (a) Kon “e esklabo fiel i prudente” ta kumpli ku su enkargo? (b) Kiko algun Testigu ta pensa di e kuminda spiritual ku nan ta risibí?
4 Nos tin bon motibu pa ta gradisidu pa “e esklabo fiel i prudente” ku Hesukristu a nombra riba su pertinensianan riba tera. E klase di esklabo di kristiannan ungí ku spiritu ta enkabesá e trabou di prediká e bon nobo, ta programá reunionnan pa adorashon i ta publiká literatura bíbliko den mas ku 400 idioma. Miónes di hende rònt mundu ta risibí ku gratitut e “kuminda [spiritual ei] na su debido tempu.” (Mateo 24:45-47) Sigur no tin motibu pa keha tokante esei.
5 Pa hopi aña, un Testigu di Yehova di edat avansá ku yama Elfi a haña konsuelo i sosten dor di tuma na pechu e konseho bíbliko ku e klase di esklabo ta trese padilanti den su publikashonnan. Apresio profundo a motivá Elfi pa skirbi: “Kiko lo a para di mi sin e organisashon di Yehova?” Peter i Irmgard tambe ta sirbiendo Dios pa hopi dékada. Irmgard ta ekspresá su gratitut pa tur e publikashonnan ku “Yehova su organisashon amoroso i bondadoso” a perkurá, inkluso esnan diseñá pa hende ku tin nesesidatnan spesial, manera personanan ku tin problema ku bista òf ku oido.
6, 7. (a) Kon e aktividatnan di e kongregashonnan rònt mundu ta ser supervisá? (b) Kiko algun hende a bisa tokante e parti terenal di Yehova su organisashon?
6 E “esklabo fiel” ta wòrdu representá pa e Kuerpo Gobernante di Testigunan di Yehova, un grupo chikitu di hòmbernan ungí ku spiritu ku ta sirbi na e sede mundial di Testigunan di Yehova na Brooklyn, New York. E Kuerpo Gobernante ta nombra sirbidónan di Yehova ku tin eksperensia pa sirbi na sukursalnan ku ta supervisá e aktividatnan di mas ku 98.000 kongregashon rònt mundu. Hòmbernan ku ta kumpli ku rekisitonan bíbliko ta ser nombrá komo ansiano i sirbidó ministerial den e kongregashonnan aki. (1 Timoteo 3:1-9, 12, 13) E ansianonan ta hiba delantera i ta pastoriá e tou di Dios bou di nan kuido ku amor. Ta un bendishon bèrdat di por ta parti di e tou aki i di por eksperensiá e amor i unidat ku ta eksistí entre henter e asosiashon di “rumannan”!—1 Pedro 2:17; 5:2, 3.
7 En bes di keha, hopi bes e rumannan ta ekspresá apresio pa e guia spiritual amoroso ku nan ta risibí for di e ansianonan. Tuma por ehèmpel Birgit, un esposa kristian i mama ku tin 30 i piku aña. Komo teenager, el a haña su mes enbolbí den mal asosiashon i kasi el a kometé malecho. Pero e konseho bíbliko franko di e ansianonan i e sosten ku el a risibí di su rumannan kristian a skap’é for di un situashon ku por a bira hopi peligroso. Kiko Birgit ta pensa awor? E ta bisa: “Mi ta hopi gradisidu ku ainda mi ta pertenesé na Yehova su organisashon maravioso.” Un mucha hòmber di 17 aña ku yama Andreas a bisa: “Esaki di bèrdat ta Yehova su organisashon, e mihó organisashon na mundu.” Nos no mester ta gradisidu pa e bondat di e parti terenal di Yehova su organisashon?
Esnan Ku Ta Hiba Delantera Ta Imperfekto
8, 9. Kiko algun kontemporáneo di David a yega di hasi, i kon David a reakshoná riba e akshonnan ei?
8 Ta bèrdat ku e personanan nombrá pa hiba delantera den adorashon berdadero ta imperfekto. Nan tur ta faya i algun tin debilidatnan persistente ku nan ta trahando duru pa dominá. Esaki mester disgustá nos? Nò. Asta sierto personanan enkargá ku hopi responsabilidat den Israel di antigwedat a kometé fayonan grave. Por ehèmpel, tempu ku David tabata hóben ainda, nan a manda yam’é pa sirbi komo músiko pa kalma Rei Saul ku tabata bastante perturbá. Despues, Saul a purba mata David, kende finalmente a hañ’é ta hui pa su bida.—1 Samuel 16:14-23; 18:10-12; 19:18; 20:32, 33; 22:1-5.
9 Otro israelitanan a komportá nan di un manera traishonero. Por ehèmpel Joab, e komandante militar di David, a mata Saul su pariente Abner. Absalon a konspirá kontra su tata David pa e reinado. I David su konsehero di konfiansa, Ahitofel, a traishon’é. (2 Samuel 3:22-30; 15:1-17, 31; 16:15, 21) Tòg David no a keha amargamente, ni e no a bira lomba pa adorashon berdadero. Al kontrario, atversidat a motivá David pa pega na Yehova i mantené e aktitut ekselente ku e tabatin ora el a hui pa motibu di Saul. E tempu ei, David a kanta: “Tene miserikòrdia di mi, o Dios, tene miserikòrdia di mi, pasobra den bo mi alma ta tuma refugio; den e sombra di bo alanan lo mi tuma refugio, te ora ku destrukshon [“atversidat,” NW] pasa bai.”—Salmo 57:1.
10, 11. Kiko un kristian ku yama Gertrud a eksperensiá tempu ku e tabata yòn, i kiko el a bisa tokante e fayonan di su rumannan den fe?
10 Nos no tin motibu pa keha ku tin traishon den e organisashon di Dios awe. Ni Yehova ni su angelnan ni wardadónan spiritual no ta tolerá presensia di personanan malbado i traishonero den e kongregashon kristian. No opstante, nos tur ta haña nos konfrontá ku imperfekshon humano, tantu di nos mes komo di otro sirbidó di Dios.
11 Tempu ku Gertrud, kende a sirbi Yehova pa hopi aña, tabata yòn, nan a akus’é falsamente ku e ta un gañadó i no un proklamadó di Reino di tempu kompletu. Kon el a reakshoná? Gertrud a murmurá tokante e trato ei? Nò. Djis promé ku su morto na 2003 ku 91 aña di edat, el a reflekshoná riba su bida i a bisa: “E eksperensianan aki i otronan ku mi a pasa aden despues a siña mi ku apesar di e fayonan ku hende ta kometé, Yehova ta esun ku ta dirigí su gran obra, den kua e ta usa nos ku ta hende imperfekto.” Ora Gertrud a haña su mes konfrontá ku e imperfekshonnan di otro sirbidónan di Dios, el a akudí na Yehova den orashon sinsero.
12. (a) Ki mal ehèmpel algun kristian di e promé siglo a pone? (b) Riba kiko nos mester konsentrá?
12 Siendo ku asta e kristiannan di mas leal i deboto ta imperfekto, ora un sirbidó nombrá kometé un fayo, laga nos sigui hasi “tur kos sin murmurá.” (Filipensenan 2:14) Ta masha lamentabel pa bai tras di e mal ehèmpel di algun persona di e kongregashon kristian di promé siglo! Segun disipel Hudas, e maestronan falsu di e tempu ei no a “hasi kaso di outoridat i a papia ofensivamente di esnan glorioso.” Ademas, e malechornan ei tabata “murmuradó, kehadó tokante nan suerte den bida.” (Hudas 8, 16, NW) Laga nos rechasá e rumbo ku e murmuradónan ei a sigui i konsentrá riba e kosnan ekselente ku nos ta risibí di e “esklabo fiel.” Laga nos mustra nos apresio pa e bondat di Yehova su organisashon i “hasi tur kos sin murmurá.”
“E Diskurso Aki Ta Ofensivo”
13. Kon algun hende a reakshoná riba sierto siñansanan di Hesukristu?
13 Miéntras ku algun persona den e promé siglo tabata murmurá kontra sirbidónan nombrá, otronan tabata murmurá kontra e siñansanan di Hesus. Manera Juan 6:48-69 ta trese dilanti, Hesus a deklará: “Esun ku kome mi karni i bebe mi sanger tin bida eterno.” Ora Hesus su disipelnan a tende e palabranan aki, hopi di nan a bisa: “E diskurso aki ta ofensivo, ken por skuch’é?” [NW] Hesus tabata konsiente ku “su disipelnan tabata murmurá kontra esaki.” Ademas, “komo resultado di esaki hopi di [nan] a retirá i no tabata kana kuné mas.” Pero no ta tur disipel a murmurá. Ripará kiko a pasa ora Hesus a puntra e 12 apòstelnan: “Boso tambe kier bai anto?” Apòstel Pedro a kontestá: “Señor, serka ken nos lo bai? Abo tin e palabranan di bida eterno. I nos a kere i a haña sa ku Abo ta Esun Santu di Dios.”
14, 15. (a) Pakiko algun persona ta bira mal kontentu ku sierto aspekto di siñansa kristian? (b) Kiko nos por siña for di e kaso di un hòmber ku yama Emanuel?
14 Den e tempu aktual, un grupo masha chikitu di sirbidó di Dios a bira mal kontentu ku algun aspekto di siñansa kristian i a murmurá kontra e parti terenal di Yehova su organisashon. Pa ki motibu? Hopi bes e personanan aki ta murmurá pasobra nan no ta komprondé Dios su manera di hasi kosnan. E Kreadó ta revelá e bèrdat na su pueblo na un manera progresivo. P’esei de bes en kuando nos komprondementu di e Skritura tin ku wòrdu refiná. E gran mayoria di Yehova su sirbidónan ta alegrá riba e refinamentunan ei. Pero algun ta bira “demasiado hustu” i ta resistí kambio. (Eklesiastés 7:16) Orguyo por hunga un ròl, i algun ta kai den e trampa di pensamentu independiente. Sea kual sea e motibu, e murmuramentu ei ta peligroso, ya ku e por pone nos bai bèk den mundu i su kamindanan.
15 Tuma por ehèmpel Emanuel. E ta un Testigu ku tabata kritiká algun kos ku el a lesa den publikashonnan di “e esklabo fiel i prudente.” (Mateo 24:45) El a stòp di lesa nos literatura kristian i ku tempu a bisa e ansianonan di su kongregashon ku e no ke tabata un Testigu di Yehova mas. Sin embargo, den poko tempu Emanuel a bin realisá ku e siñansanan di Yehova su organisashon en bèrdat ta korekto. El a tuma kontakto ku e Testigunan, a atmití su fayo i a ser restorá komo Testigu di Yehova. Dor di esei, el a bolbe bira un hòmber felis.
16. Kiko por yuda nos vense duda tokante sierto siñansanan kristian?
16 Kiko nos mester hasi si nos sinti nos tentá pa murmurá pa motibu di algun duda ku nos por tin relashoná ku sierto siñansanan di Yehova su organisashon? Den e kaso ei laga nos no pèrdè pasenshi. Ku tempu e “esklabo fiel” por publiká algu ku ta kontestá nos preguntanan i klarifiká nos dudanan. Ta sabí pa buska yudansa di ansianonan kristian. (Hudas 22, 23) Orashon, estudio personal i asosiashon ku rumannan kristian ku tin un enfoke spiritual tambe por yuda nos eliminá duda i haña mas apresio pa e bèrdatnan di Beibel fortalesedor di fe ku nos a siña pa medio di Yehova su kanal di komunikashon.
Mantené un Aktitut Positivo
17, 18. En bes di murmurá, ki aktitut nos mester tin, i pakiko?
17 Nos tin ku atmití ku hende imperfekto tin un tendensia natural pa peka, i kisas algun persona por tin un inklinashon fuerte pa keha sin ku nan tin un base pa esei. (Génesis 8:21; Romanonan 5:12) Pero si nos krea e kustumber di murmurá, nos ta pone nos relashon ku Yehova Dios na peliger. P’esei nos tin ku dominá kualke posibel inklinashon pa murmurá.
18 En bes di murmurá tokante sierto kosnan den e kongregashon, ta bon pa nos mantené un aktitut positivo i sigui un rutina ku ta tene nos okupá, gososo, reverente, balansá i sano den fe. (1 Korintionan 15:58; Tito 2:1-5) Yehova tin kontròl riba tur aspekto di su organisashon, i Hesus ta konsiente di desaroyonan den kada kongregashon, meskos ku e tabata den e promé siglo. (Revelashon 1:10, 11) Warda ku pasenshi riba Dios i Kristu, Kabes di e kongregashon. Nan por utilisá wardadónan responsabel pa korigí situashonnan ku tal bes mester ser reahustá.—Salmo 43:5; Kolosensenan 1:18; Tito 1:5.
19. Mientras ku nos ta spera pa e Reino tuma pleno kontròl riba asuntunan di humanidat, riba kiko nos tin ku enfoká?
19 Pronto e mal sistema di kosnan aki lo kaba, i e Reino Mesiániko lo tuma pleno kontròl riba asuntunan di humanidat. Mientras tantu, ta masha importante pa kada un di nos mantené un aktitut positivo! Esei lo yuda nos rekonosé e birtutnan di nos rumannan kristian, en bes di konsentrá riba nan fayonan. Ora nos enfoká riba e bon aspektonan di nan personalidat, esei lo hasi nos felis. Asina nos lo ser animá i edifiká spiritualmente, en bes di keda kansá emoshonalmente pa motibu di murmuramentu.
20. Un aktitut positivo lo permití nos disfrutá di ki bendishonnan?
20 Un aktitut positivo lo permití nos tambe pa kòrda e hopi bendishonnan ku nos ta disfrutá di dje pa motibu ku nos ta asosiá ku e parti terenal di Yehova su organisashon. Esaki ta e úniko organisashon na mundu ku ta leal na e Soberano di universo. Kiko bo ta pensa di e echo ei i e privilegio di por rindi adorashon na e úniko Dios berdadero, Yehova? Nos ta deseá pa bo aktitut ta meskos ku esun di David, kende a kanta: “Abo ku ta skucha orashon, serka bo tur hende ta bin. Bendishoná ta esun ku bo ta skohe i ta hala serka bo, pa biba den bo pationan. Nos lo keda satisfecho ku e bondat di bo kas.”—Salmo 65:2, 4.
Bo Ta Kòrda?
• Pakiko nos mester ta gradisidu pa e rumannan ku ta hiba delantera den e kongregashon?
• Kon nos mester reakshoná ora rumannan ku ta hiba delantera den kongregashon kometé fayo?
• Kon nos mester mira refinamentu den komprondementu di e Skritura?
• Kiko por yuda un kristian vense duda?
[Plachi na página 20]
David a duna Salomon e plannan di e tèmpel i a sostené adorashon berdadero di henter su kurason
[Plachi na página 23]
Gustosamente ansianonan kristian ta duna yudansa spiritual