Lo Bo Mantené Bo Integridat?

“Te na mi morto lo mi no bandoná mi integridat.”—JÒB 27:5.

1, 2. Riba kiko nos tin ku traha, i ki preguntanan nos lo konsiderá?

IMAGINÁ bo mes ta analisá e mapa di un kas. Bo ta atmirá e diseño práktiko di e kas. Ku plaser bo ta pensa riba e maneranan ku e kas ei lo por benefisiá abo i bo famia. Pero bo no ta di akuerdo ku djis pensa so riba e mapa ei lo no yuda ku nada a ménos ku bo realmente traha e kas, bai biba aden i manten’é?

² Di mes manera, kisas nos ta pensa ku integridat ta un kualidat masha importante ku lo benefisiá nos i nos sernan kerí mashá. Pero djis pensa riba nos integridat kristian lo no benefisiá nos mashá a ménos ku nos realmente traha pa mantené nos integridat. Ora un hende ke traha òf konstruí un edifisio ta meskos. Djis pensa riba e mapanan lo tin masha poko benefisio si un persona no hinka tempu i esfuerso den e konstrukshon. (Luk. 14:28, 29) Di mes manera, pa nos mantené nos integridat, e ta kosta tempu i esfuerso. Pero, e ta bale la pena! P’esei, laga nos konsiderá tres pregunta: Kon nos por ta hende di integridat? Kon nos por mantené nos integridat kristian? Kiko un hende por hasi si pa un tempu e no a mantené su integridat?

Kon Nos Por Ta Hende di Integridat?

3, 4. (a) Den ki maneranan Yehova ta yuda nos kultivá integridat? (b) Kon nos por kultivá e integridat ku Hesus a desplegá?

³ Manera nos a mira den e artíkulo anterior, Yehova ta duna nos e onor di por disidí si nos ke ta hende di integridat òf nò. Pero, nos por ta kontentu ku e no ta laga nos pa nos kuenta den e asuntu akí. Mas bien, e ta siña nos kon pa kultivá e kualidat balioso akí, i na un manera generoso, e ta duna nos su spiritu santu, ku ta yuda nos apliká Su siñansanan. (Luk. 11:13) Ademas, Yehova ta asta perkurá protekshon den sentido spiritual pa hende ku ta hasi esfuerso pa kana den integridat.—Pro. 2:7.

⁴ Kon Yehova a siña nos pa ta hende di integridat? Riba tur kos, el a hasi esei dor di manda su Yu, Hesus, na tera. Hesus a hiba un bida di obedensia perfekto. El a “bira obedesidu te na morto.” (Fil. 2:8) Hesus a obedesé su Tata selestial den tur loke el a hasi asta ora esaki tabata masha difísil. El a bisa Yehova: “No mi boluntat, ma di bo sosodé.” (Luk. 22:42) Ta bon pa kada un di nos hasi nos mes e pregunta: ‘Mi tambe ta obediente asina?’ Si nos ta obedesé Dios kontinuamente ku e motivashon korekto, nos lo ta hende di integridat. Konsiderá algun área di bida den kua obedensia ta spesialmente importante.

5, 6. (a) Kon David a enfatisá e importansia di mantené nos integridat asta ora otro hende no ta mira nos? (b) Ki reto kristiannan ta konfrontá awendia pa mantené nan integridat ora nan ta nan so?

⁵ Nos mester obedesé Yehova asta ora ta parse ku nos ta nos so. Salmista David a mira e importansia di integridat na okashonnan ku kisas e tabata su so. (Lesa Salmo 101:2.) Komo rei, konstantemente David tabata huntu ku otro hende. Sin duda, tabatin hopi bes ku e tabatin sientos, asta míles di opservadó. (Kompará ku Salmo 26:12.) Na e momentonan ei tabata importante pa el a mantené su integridat, pasobra e rei mester a pone un bon ehèmpel pa su pueblo. (Deu. 17:18, 19) Sinembargo, David a siña ku asta ora ku podisé e tabata su so—‘den su kas’—e mester a kana den integridat. Kiko di nos?

⁶ Na Salmo 101:3, nos ta haña e siguiente palabranan di David: “Lo mi no pone nada malu dilanti di mi wowo.” Awendia tin hopi oportunidat pa pone kos malu dilanti nos wowonan, foral ora nos ta nos so. Akseso na Internet ta un reto pa hopi hende den e aspekto akí. Ta fásil pa nos kai den e tentashon pa wak kosnan inapropiá òf asta pornográfiko. Pero ora nos ta hasi asina, nos ta desobedesé e Dios ku a inspirá David pa skirbi e palabranan ei, no ta bèrdat? Pornografia ta algu perhudisial, pasobra e ta lanta golosidat i deseonan robes den hende, e ta daña konsenshi, afektá matrimonio i hasi daño na tur persona enbolbí.—Pro. 4:23; 2 Kor. 7:1; 1 Tes. 4:3-5.

 7. Ki siguransa bíbliko por yuda nos mantené nos integridat ora nos ta nos so?

⁷ Klaru ku un sirbidó di Yehova no ta su so nunka. Na un manera amoroso, nos Tata selestial ta opservá nos. (Lesa Salmo 33:13.) Yehova ta keda masha kontentu ora e ta mira kon bo ta resistí tentashon. Dor di hasi esei, bo ta hasi kaso di e spièrtamentu ku e palabranan di Hesus na Mateo 5:28 ta kontené. Hasi tur esfuerso pa bo keda determiná pa no wak imágennan ku lo por tentá bo pa hasi loke ta malu. No kambia bo integridat balioso pa e akto bergonsoso di wak òf lesa kosnan pornográfiko!

8, 9. (a) Ki reto pa mantené nan integridat, Daniel i su kompañeronan a haña nan kuné? (b) Kon hóbennan kristian awe ta agradá Yehova i nan kompañeronan kristian?

⁸ Un otro manera pa demostrá ku nos ta hende di integridat ta dor di obedesé Yehova ora nos ta entre hende ku no ta Testigu. Pensa riba Daniel i su tres kompañeronan. Ora nan tabata hóben, nan a ser hibá Babilonia komo katibu. Einan, rondoná di hende inkrédulo ku no tabata sa mashá òf nada mes di Yehova, e kuater hebreonan a haña nan bou di preshon pa kome kuminda ku e Lei di Dios a prohibí. Fásilmente, e hóbennan akí por a konvensé nan mes ku esaki no tabata algu malu i kome e kumindanan akí. Al fin i al kabo, nan mayornan, e otro hudiunan di mas edat i e saserdotenan no por a mira kiko nan tabata hasi. Ken sí lo tabata sa? Yehova. P’esei, nan a para firme i a obedes’é apesar di e preshon i rísiko.—Dan. 1:3-9.

⁹ Rònt mundu, hóbennan Testigu di Yehova ta tuma un posishon similar; nan ta kumpli ku Dios su normanan pa kristiannan i ta nenga di entregá na preshon perhudisial di nan pareunan. Hóbennan, ora boso nenga di papia palabra malu, nenga di enbolbé boso mes ku droga, ku violensia, den inmoralidat i otro aktonan robes, boso ta obedesiendo Yehova. Segun ku boso ta hasi esei, boso ta manteniendo boso integridat. Boso ta benefisiá boso mes, i boso ta agradá Yehova i boso kompañeronan kristian!—Sal. 110:3.

10. (a) Ki pensamentu robes tokante fornikashon a pone algun hóben kibra nan integridat? (b) Kon integridat ta yuda nos aktua korektamente ora nos ta konfrontá e peliger di fornikashon?

¹⁰ Nos mester ta obedesidu tambe ora nos ta atendé ku miembronan di e sekso opuesto. Nos sa ku e Palabra di Dios ta prohibí fornikashon. Sinembargo, ta fásil pa nos kambia di un persona obediente pa un persona permisivo. Por ehèmpel, algun hóben a hasi sèks oral òf a masturbá otro rasonando ku e aktonan akí no ta dje malu ei pasobra nan ta pensa ku téknikamente nan no ta “teniendo relashon seksual.” E hóbennan ei ta lubidá—òf kisas ta skohe pa ignorá—ku e palabra bíbliko pa fornikashon òf inmoralidat ta inkluí tur e práktikanan ei, ku ta mal kondukta pa kua un persona por ser ekspulsá.a Loke ta pió ainda ta ku nan ta ignorá e echo ku nan mester mantené nan integridat. Siendo ku nos ta hasi esfuerso pa mantené nos integridat, nos no ta buska èksküs pa hasi maldat. Meskos ku nos no ta para pegá ku un kandela pensando ku nos lo no kima, nos no ta purba hasi maldat ku e pensamentu ku nos lo no haña kastigu. Nos no ta enfoká únikamente riba e disiplina ku nos lo por risibí di e kongregashon pa un akto di maldat. Mas bien, nos enfoke ta pa hasi loke ta agradá Yehova i evitá loke ta hasié tristu. En bes di wak kon leu nos por bai sin haña kastigu, nos ta keda leu for di piká i ta “hui for di inmoralidat.” (1 Kor. 6:18) Asina nos ta demostrá ku nos ta hende di berdadero integridat.

Kon Nos Por Mantené Nos Integridat?

11. Dikon kada un akto di obedensia ta importante? Ilustrá.

¹¹ Nos ta kultivá integridat dor di obedensia, pues nos ta mantené integridat dor di sigui obedesé. Un solo akto di obedensia por parse insignifikante—un asuntu di poko importansia. Sinembargo, atraves di tempu, e aktonan di obedensia ei ta forma un registro di integridat. Laga nos ilustr’é asin’akí: Un solo blòki por parse insignifikante, pero si nos pega nan huntu kuidadosamente, nos por traha un kas bunita. Pues, dor di sigui agregá na nos aktonan di obedensia, nos ta mantené nos integridat.—Luk. 16:10.

12. Kon David a pone un bon ehèmpel den mantené integridat apesar di maltrato i inhustisia?

¹² Nos integridat ta bisto spesialmente ora nos ta perseverá apesar di difikultat, maltrato òf inhustisia. Konsiderá e ehèmpel bíbliko di David. Komo un hòmber yòn, el a soportá persekushon na man di un rei ku supuestamente mester a representá Yehova su outoridat. Sinembargo, Rei Saul a pèrdè Yehova su aprobashon i e tabata masha yalurs riba David, kende sí tabatin Dios su aprobashon. Apesar di esei, Saul a keda fungi komo rei pa un tempu, i el a usa e ehérsito di Israel pa persiguí David. Yehova a permití e inhustisia akí sigui pa algun aña. David a rabia ku Dios? El a konkluí ku no tabatin sentido pa perseverá? Al kontrali. El a keda ku rèspèt profundo pa Saul su posishon komo e ungí di Dios i a nenga di hasi Saul daño ora el a haña oportunidat pa hasi esei.—1 Sam. 24:2-7.

13. Kon nos por mantené nos integridat ora nos wòrdu ofendí?

¹³ David ta un ekselente ehèmpel pa nos awe. Nos ta forma parti di un kongregashon mundial di hende imperfekto. Kualke un di e personanan akí por trata nos inhustamente òf asta bandoná e bèrdat. Siguramente, nos ta bendishoná ku nos ta biba den un tempu ku Yehova su pueblo, komo grupo, hamas por ser ruiná. (Isa. 54:17) Pero, kon nos lo reakshoná ora un persona desapuntá nos òf ofendé nos? Si nos permití renkor kontra un ko-adoradó venená nos kurason, nos integridat na Dios por ta den peliger. Nunka nos mester usa e kondukta di otronan komo un èksküs pa nos rabia ku Dios òf asta bandoná e bèrdat. (Sal. 119:165) Ora nos ta perseverá asta bou di prueba, esaki lo yuda nos mantené nos integridat.

14. Kon hende di integridat ta reakshoná ora tin kambio den e organisashon i ahuste den asuntu di doktrina?

¹⁴ Nos por mantené nos integridat tambe dor di evitá e aktitut di buska fout òf di kritiká ora surgi kambionan den e organisashon di Dios. Klaru ku esei ta nifiká ku nos ta leal na Yehova. Awor mas ku nunka e ta bendishoná su pueblo. Nunka promé, adorashon berdadero no a ser halsá asina tantu riba tera. (Isa. 2:2-4) Ora tin ahustenan den splikashon di tekstonan di Beibel òf den e manera ku kosnan ta ser hasí, nos ke aseptá nan. Nos ta kontentu pa mira evidensia ku e lus spiritual ta sigui oumentá. (Pro. 4:18) Si nos tin difikultat pa komprondé un kambio, nos ta pidi Yehova yuda nos komprondé e punto. Miéntras tantu, nos ta keda obediente, manteniendo nos integridat.

Kiko si un Hende No Mantené Su Integridat?

15. Ken ta e úniko persona ku por kibra bo integridat?

¹⁵ E pregunta ei ta pone nos pensa seriamente, no ta bèrdat? Manera nos a siña den e artíkulo anterior, integridat ta un kualidat di sumo importansia. Sin e kualidat ei, nos no por tin un relashon ku Yehova ni berdadero speransa. Kòrda esaki: Den henter e universo ta ún persona so por kibra bo integridat. E persona ei ta abo mes. Jòb a komprondé e bèrdat akí bon kla. El a bisa: “Te na mi morto lo mi no bandoná mi integridat.” (Jòb 27:5) Si bo tin e mesun determinashon ei i si bo ta keda serka Yehova, esei lo yuda bo mantené bo integridat.—Sant. 4:8.

16, 17. (a) Si un persona kometé un piká serio, kiko e no mester hasi? (b) Kiko ta e kos korekto pa hasi?

¹⁶ Apesar di esei, algun hende ta kibra nan integridat. Meskos ku a sosodé den tempu di e apòstelnan, algun kristian ta kometé piká serio bes tras bes. Si esei a sosodé ku bo, bo situashon ta sin speransa? No nesesariamente. Kiko por ser hasí? Promé, laga nos konsiderá loke bo no mester hasi. Hende tin e tendensia di skonde nan piká pa nan mayornan, kompañeronan kristian òf ansianonan. Sinembargo, Beibel ta rekordá nos: “Esun ku skonde su pikánan lo no prosperá, ma esun ku konfesá i laga nan lo haña miserikòrdia.” (Pro. 28:13) Esnan ku ta purba skonde nan pikánan ta kometé un fayo grandi, pasobra nos no por skonde nada pa Dios. (Lesa Hebreonan 4:13.) Algun ta asta purba hiba un bida dòbel; nan ta pretendé di sirbi Yehova miéntras nan ta praktiká piká ainda. Un persona ku ta hiba un bida dòbel asina a pèrdè su integridat. Yehova no ta keda kontentu ku aktonan di adorashon di personanan ku ta skonde piká serio. Al kontrali, e hipokresia ei ta pon’é rabia.—Isa. 1:11-16.

¹⁷ Nos tin instrukshon kla di Beibel ku ta mustra kiko un kristian mester hasi ora e kometé un piká serio. E tin ku buska yudansa di ansianonan kristian. Yehova tin un areglo pa trata ku kasonan di malesa spiritual serio. (Lesa Santiago 5:14.) No laga miedu di un posibel disiplina òf korekshon stroba bo di buska bo salú spiritual. Akaso un persona sabí lo laga e doló di un angua òf asta di un operashon strob’é di trata un malesa grave ku ta pone su bida na peliger?—Heb. 12:11.

18, 19. (a) Kon e ehèmpel di David ta mustra ku un hende por rekobrá su integridat? (b) Kiko ta bo determinashon relashoná ku bo integridat?

¹⁸ Tin speransa ku e persona por rekobrá kompletamente? Bo por rekobrá bo integridat unabes ku bo a pèrd’é? Konsiderá e ehèmpel di David atrobe. El a kometé un piká serio. El a wak i a deseá esposa di un otro hòmber, a kometé adulterio i a plania asesinato di e esposo inosente. Ta difísil pa nos pensa ku David tabata un hòmber di integridat e tempu ei, no ta bèrdat? Pero, su situashon tabata sin speransa? David tabatin mester di disiplina fuerte, i el a risibié. Despues di esei, su repentimentu sinsero a pone ku Yehova a mustra miserikòrdia na dje. David a siña for di e disiplina i a rekobrá su integridat dor di a obedesé Dios i perseverá den esaki. David su bida tabata un ehèmpel di loke nos ta lesa na Proverbionan 24:16: “Un hende hustu ta kai shete bes, i ta lanta atrobe.” E resultado? Lesa kiko Yehova a bisa Salomon tokante David despues ku David a muri. (Lesa 1 Reinan 9:4.) Dios a rekordá David komo un hòmber di integridat. Yehova por i ta purifiká pekadónan ku repentí asta di e mancha di pikánan serio.—Isa. 1:18.

¹⁹ Sí, lo bo ta un hende di integridat ora bo ta obedesé Dios motivá pa amor. Sigui perseverá lealmente, i si bo kometé un piká serio, manifestá berdadero repentimentu. Nos integridat ta masha balioso. Ohalá ku nos kada un tin e determinashon ku David tabatin. El a bisa: “Pa loke ta ami, lo mi kana den mi integridat.”—Sal. 26:11.

[Nota]

Kon Lo Bo Kontestá?

• Kon bo por ta un hende di integridat?

• Den ki maneranan bo por mantené bo integridat?

• Kon un hende por rekobrá su integridat?

[Kuadro na página 16]

‘TABATA UN BUNITA GESTO DI BONDAT’

Un señora ku tabatin sinku luna na estado a ekspresá e palabranan ei relashoná ku e bondat i integridat di un hende muhé ku e no tabata konosé. Vários ora despues ku el a sali for di un kafetaria, el a realisá ku el a laga su pòtmòni einan. Den e pòtmòni tabatin 3.600 florin, hopi mas tantu plaka ku e sa kana kuné normalmente. Despues, el a deklará na un korant lokal: “Mi a keda hopi kibrá.” Sinembargo, un hende muhé hóben a haña e pòtmòni, i mesora el a buska e doño legítimo. Dor ku e no a logra, el a hiba e pòtmòni na warda di polis. I e polisnan a buska i a haña e señora na estado. E doño gradisidu a bisa: “Esei tabata un gesto di bondat masha masha bunita mes.” Dikon e persona akí a hasi asina tantu esfuerso pa debolbé e plaka? E korant a bisa ku komo Testigu di Yehova, e persona akí “a desplegá e integridat ei debí na e religion ku el a lanta aden.”

[Plachi na página 17]

Hóbennan por mantené nan integridat bou di prueba

[Plachi na página 18]

Pa un tempu, David no a mantené su integridat, pero el a rekobr’é