Tene Kompashon ku “Tur Sorto di Hende”

ORA Hesus tabata siña su disipelnan kon pa prediká e bon notisia, el a rekonosé ku e notisia di Reino lo no a ser risibí na un manera positivo tur ora. (Luk. 10:3, 5, 6) Den sirbishi nos por topa hende ku ta reakshoná brutu òf asta ta maltratá nos. Nos tin ku atmití ku despues di reakshonnan asina, ta bira difísil pa nos tene kompashon ku esnan ku nos ta prediká na dje.

Un persona ku tin kompashon ta mira e nesesidat- i problemanan di otro hende, ta sinti duele di nan i ta deseá di yuda nan. Si nos kuminsá pèrdè nos sintimentu di kompashon pa hende ku nos ta topa den sirbishi, nos por kuminsá pèrdè nos zelo i bira improduktivo den nos sirbishi. Di otro banda, si nos kultivá kompashon, ta komo si fuera nos ta pone mas palu den e kandela i nos ta oumentá nos zelo pa e sirbishi!—1 Tes. 5:19.

Kon nos por kultivá kompashon asta den sirkunstansianan difísil? Laga nos analisá ehèmpel di tres persona ku ta bale la pena pa nos imitá, esta, Yehova, Hesus i apòstel Pablo.

Pa míles di aña Yehova ta soportá e reproche ku hende ta trese riba su nòmber. Tòg, ketu bai “e ta bondadoso asta ku hende malagradesí i malbado.” (Luk. 6:35) Yehova su pasenshi ta demostrá su bondat. E ta deseá pa “tur sorto di hende ser salbá.” (1 Tim. 2:3, 4) Aunke Yehova ta odia maldat, e ta mira hende komo kriaturanan presioso i no ke pa nan pèrdè nan bida.—2 Ped. 3:9.

Yehova sa kon Satanas a logra siega hende ku no ta sirbi Dios. (2 Kor. 4:3, 4) Hopi hende a lanta ku siñansanan falsu i komportashon robes for di chikitu, i pa motibu di esei ta bira difísil pa nan aseptá e bèrdat. Yehova ta ansioso pa yuda hende asina. Kon nos por sa esei?

Laga nos wak kon Yehova a mira e ninivitanan di antigwedat. Aunke nan tabata masha violento, Yehova a bisa Yonas: “I Ami no mester tene duele di Nínive, e stat grandi, kaminda tin mas ku shent’i binti mil persona, ku no sa e diferensia entre nan man drechi i man robes?” (Yon. 4:11) Yehova a mira ku e ninivitanan no tabata sa nada tokante dje. P’esei, el a tene kompashon di nan i a manda Yonas bai spièrta nan.

Meskos ku Yehova, nos tambe ta balorá hende mashá. Nos por imit’é ora nos ta purba di yuda kualke hende ku ke skucha, asta si nan kisas no ta aseptá e bèrdat.

Meskos ku su Tata, Hesus tambe a sinti kompashon pa hende ku tabata den nesesidat spiritual. “Ora el a mira e multitut, el a haña duele di nan, pasobra nan tabata soyá i deskuidá, manera karné sin wardadó.” (Mat. 9:36) Hesus por a wak mas leu i e tabata sa ku e hendenan ku a bin skuch’é, a ser siñá doktrinanan falsu i a ser maltratá pa nan lidernan religioso. Maske e tabata sa ku hopi hende lo a laga diferente opstákulo stroba nan di reakshoná faborablemente, tòg Hesus a “siña nan hopi kos.”—Mar. 4:1-9.

Ora hende papia malu di nos mensahe, nos mester wak mas aleu i puntra nos mes dikon nan a reakshoná asina. Algun di nan por tin un punto di bista negativo di Beibel òf di kristianismo debí na e mal ehèmpel di esnan ku ta bisa ku nan ta kristian. Otronan kisas a tende mentira tokante nos kreensianan. I tin hende ku ta ser despresiá pa nan miembronan di famia òf pa nan komunidat si nan aseptá nos mensahe.

Algun hende ku nos ta topa den sirbishi por reakshoná na un manera negativo debí na un eksperensia troumátiko ku a afektá nan emoshonalmente. Un ruman muhé misionero ku yama Kim a bisa: “Den sierto parti di nos teritorio, tin hopi hende ku ta víktima di guera i a pèrdè tur loke nan tabatin. Nan no tin un berdadero speransa pa futuro. Nan ta frustrá i ta masha deskonfiá. Den e área akí, nos ta topa hopi hende ku ta oponé nos mensahe. Na un okashon, ora mi tabata prediká, m’a ser ataká.”

Kon Kim a sigui mustra kompashon apesar di un eksperensia asina? El a bisa: “Ora nan trata mi malu, mi ta purba di kòrda loke Proverbionan 19:11 ta bisa, esta: ‘Prudensia di un hende ta hasi ku e no ta rabia lihé.’ Mi ta kòrda riba e background di e hendenan den nos teritorio i esei ta yuda mi tene kompashon ku nan. No ta tur hende den nos teritorio ta odia òf oponé nos. Den e mesun área ei, nos tin algun bon rebishita.”

Nos por puntra nos mes: ‘Kon ami lo a reakshoná si mi tabata den e posishon di e hendenan ku nos ta prediká na dje?’ Por ehèmpel, kiko si bes tras bes nos ta tende mentira tokante Testigunan di Yehova? Den e kaso ei, kisas nos tambe lo a reakshoná na un manera negativo i lo tabata ke pa hende tene kompashon ku nos. Ora nos kòrda riba e mandamentu di Hesus pa trata otro hende manera nos ke pa nan trata nos, nos ta ser motivá pa mustra empatia asta den situashonnan difísil.—Mat. 7:12.

Apòstel Pablo a mustra kompashon asta na opositornan violento. Dikon? Pasobra e no a lubidá kon e mes tabata den pasado. El a bisa: “Ántes mi tabata un blasfemadó, un persiguidó i un hòmber arogante i ònbeskòp. Sinembargo, el a mustra miserikòrdia na mi, pasobra mi a aktua den ignoransia i sin fe.” (1 Tim. 1:13) El a rekonosé ku Yehova i Hesus a mustra gran miserikòrdia na dje. I probablemente el a mira den e hendenan ku el a prediká na dje, kosnan ku e mes a yega di hasi.

Tabatin biaha ku Pablo a hañ’é konfrontá ku hende ku a tene duru na siñansanan falsu. Kon el a reakshoná? Echonan 17:16 ta bisa ku ora Pablo tabata na Aténas, “el a mira ku e stat tabata yen di imágen i esei a irit’é mashá.” Pero Pablo a usa esei mes pa duna un bon testimonio. (Echo. 17:22, 23) El a adaptá su manera di prediká na e sirkunstansia di vários sorto di hende ‘pa di tur manera posibel e por salba algun.’—1 Kor. 9:20-23.

Nos por imitá Pablo i tolerá aktitutnan negativo òf kreensianan robes di hende ku nos ta topa, i despues usa takto pa introdusí e “bon nobo di felisidat.” (Isa. 52:7) Un ruman muhé ku yama Dorothy ta konta: “Den nos teritorio, hopi hende a siña ku Dios ta severo i ta kla pa kondená. Mi ta elogiá hende asina pa nan fe fuerte den Dios i despues mi ta hala atenshon na loke Beibel ta bisa tokante Yehova su personalidat amoroso i su promesa pa futuro.”

Mas serka nos yega di e fin “di e último dianan,” mas nos por spera ku e aktitut di algun hende ku nos ta prediká na dje “lo bai di malu pa pió.” (2 Tim. 3:1, 13) Pero nos mester evitá ku e tendensia ei ta afektá nos kompashon òf pone nos pèrdè nos goso. Yehova por duna nos e fortalesa pa “sigui vense malu ku bon.” (Rom. 12:21) Un ruman muhé pionero ku yama Jessica ta konta: “Hopi bes mi ta haña hende ku ta mustra falta di humildat i ta menospresiá nos mensahe. Esei por ta masha iritante. Ora mi kuminsá mi kòmbersashon, mi ta pidi Yehova den silensio pa yuda mi mira e persona manera e ta mir’é. Esei ta pone mi stòp di pensa riba mi mes i pensa kon mi por yuda e persona akí.”

Nos mester pensa tambe kon nos por animá nos rumannan. Jessica ta bisa: “Si un di nos tabatin un mal eksperensia, mi ta purba pa no pensa riba dje. Mi ta preferá kòmbersá riba tópikonan positivo, manera e bon efekto ku nos sirbishi tin apesar di e reakshonnan negativo di hende ku nos ta topa.”

Yehova ta konsiente di e desafionan ku nos ta konfrontá den sirbishi. E ta keda masha kontentu ora nos ta imitá su miserikòrdia! (Luk. 6:36) Ta di komprondé ku Yehova su kompashon no ta sin límite. Nos por tin konfiansa ku Yehova sa presis ki ora e mester pone fin na e sistema di kosnan akí. Mientrastantu, nos trabou di prediká ta urgente. (2 Tim. 4:2) Laga nos sigui kumpli ku nos asignashon ku zelo i ku tierno kompashon pa “tur sorto di hende.”