Sigui Demostrá Amor —E Ta Edifiká Nos

 1. Ki tópiko importante Hesus a papia di dje riba e último anochi ku el a pasa ku su disipelnan?

HESUS a menshoná amor, òf stimashon, kasi 30 biaha riba e último anochi ku el a pasa ku su disipelnan. El a bisa nan spesífikamente ku nan mester “stima otro.” (Huan 15:12, 17) Nan amor pa otro lo tabata asina remarkabel ku esei lo a identifiká nan klaramente komo su berdadero siguidónan. (Huan 13:34, 35) Hesus no tabata papia aki di djis un sintimentu. E tabata referí na un kualidat masha noble: amor ku a reflehá sakrifisio propio. E di: “Ningun hende no tin un amor mas grandi ku esun ku ta entregá su alma pa su amigunan. Boso ta mi amigunan si boso ta hasi loke mi ta manda boso.”—Huan 15:13, 14.

 2. (a) Na kiko hende ta rekonosé e sirbidónan di Dios awe? (b) Ki pregunta nos lo kontestá den e artíkulo akí?

² Awe, hende ta rekonosé e sirbidónan di Yehova na nan amor sinsero ku ta reflehá sakrifisio propio i na e laso fuerte di union ku nan tin. (1 Huan 3:10, 11) Nos ta masha gradisidu ku e sirbidónan di Yehova di bèrdat ta stima otro, sin importá nan nashonalidat, tribu, idioma, orígen òf edukashon. Pero kisas nos ta puntra nos mes: ‘Dikon foral den nos tempu amor ta asina importante? Kon Yehova i Hesus ta edifiká nos, es desir, fortalesé nos, ku amor? Kon kada un di nos por demostrá e amor akí ku por edifiká i fortalesé otro hende?’—1 Kor. 8:1.

 3. Kon e “tempunan krítiko” akí ta afektá hende?

³ Nos ta biba den “tempunan krítiko,” i bida “no ta nada otro ku molèster i pena.” (Sal. 90:10; 2 Tim. 3:1-5) Hopi hende ta sufri di asina tantu doló emoshonal ku nan no tin gana di biba mas. Segun kálkulo, mas ku 800.000 hende ta kometé suisidio pa aña; esei ta ún hende kada 40 sekònde! Lamentablemente, asta algun di nos rumannan a entregá na e preshonnan ei i a kita nan mes bida.

 4. Menshoná algun personahe di Beibel ku na sierto momento a bisa ku nan ke muri.

⁴ Den tempu di Beibel, algun fiel sirbidó di Dios a sinti nan asina desesperá pa motibu di nan situashon ku nan kier a muri. Por ehèmpel, Yòb tabatin asina tantu doló ku e no kier a sigui biba, i el a bisa: “Mi ta despresiá mi mes bida.” (Yòb 10:1; 14:13) Yonas tabata asina desepshoná pa e manera ku kos a kana den su asignashon ku el a bisa: “Awor, o SEÑOR, pa fabor, kita mi bida, pasobra mihó mi muri ku mi keda na bida.” (Yon. 4:3) Profeta Elías tambe na sierto momento a sintié asina desesperá pa su situashon ku el a pidi pa muri. E di: “Ta basta; awor, o SEÑOR, tuma mi bida.” (1 Rei. 19:4) Ma Yehova tabata stima e sirbidónan fiel ei i tabata ke pa nan biba. En bes di kondená e manera ku nan tabata sinti, el a yuda nan haña nan gana di biba bèk i a fortalesé nan ku amor pa asina nan por a sigui sirbié fielmente.

 5. Dikon nos rumannan tin mester di nos amor foral den e tempu akí?

⁵ Asta si no ta muri nos rumannan ke muri direktamente, hopi di nan ta biba den situashonnan ku ta kousa strès i tin mester di nos amor pa fortalesé nan. Tin ruman ta wanta persekushon i bofon. Otronan ta pasa mal ratu na trabou, kaminda nan koleganan ta kritiká nan òf papia riba nan. Òf nan ta morto kansá di traha overtaim òf debí na e preshon pa kaba ku trabou. Tambe tin ruman ku problema di famia serio. Kisas nan kasá no ta Testigu i ta kritiká nan sinfin. Pa motibu di e preshonnan ei òf otro problema, hopi ruman den kongregashon ta sinti nan físikamente i emoshonalmente agotá i ta kuminsá duda di nan balor. Ken por duna nan ánimo pa sigui padilanti?

 6. Kon Yehova ta fortalesé su sirbidónan?

⁶ Yehova ta fortalesé su sirbidónan i ta sigurá nan ku e ta stima nan awor i lo stima nan pa semper. E pueblo di Israel lo mester a sinti nan hopi animá ora nan a tende Yehova bisa nan: “Bo ta presioso den mi bista, pasobra bo ta onrá, i mi ta stima bo . . . No tene miedu, pasobra mi ta ku bo.” (Isa. 43:4, 5) Bo tambe, komo un sirbidó di Yehova, por tin sigur ku Yehova stima bo tiernamente.a E Palabra di Dios ta primintí esnan ku ta sigui adorashon puru: “SEÑOR bo Dios ta meimei di bo, un guerero viktorioso. E lo regosihá den bo ku alegria.”—Sof. 3:16, 17.

 7. Den ki sentido e amor di Yehova ta manera e amor di un mama ku yu na lechi? (Wak e promé plachi.)

⁷ Yehova ta primintí di fortalesé i konsolá su pueblo sea kual sea e pruebanan ku nan ta konfrontá. El a bisa: “Boso lo bebe pechu, boso lo wòrdu kargá na hep, i karisiá riba skochi. Manera esun ku su mama ta konsolá, asina lo mi konsolá boso.” (Isa. 66:12, 13) Esta un esena konmovedor: un mama amoroso ku ta karga un bebi òf ku ta hunga kuné riba su skochi! Di e manera ei Yehova ta ilustrá kon profundo i tierno su amor pa bo ta, i e ke pa bo sinti bo safe. Bo ta masha stimá i presioso pa Yehova. No duda di esei nunka!—Yer. 31:3.

8, 9. Kon e amor ku Hesus tin pa nos por fortalesé nos?

⁸ Nos tin un otro motibu mas dikon nos sa ku Yehova stima nos: El a “stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Anto ki un gran amor Hesus a demostrá ora el a duna su bida pa nos! E amor ei ta un gran motivashon pa nos. E Palabra di Dios ta primintí ku ni ‘tribulashon ni angustia’ por “separá nos for di e amor ku Kristu tin pa nos.”—Rom. 8:35, 38, 39.

⁹ Tin biaha, nos ta pasa den prueba ku ta agotá nos físikamente òf emoshonalmente, òf ku ta kita nos goso di sirbi Yehova. Pero si nos kòrda kuantu Kristu ta stima nos, esei por duna nos e forsa pa perseverá. (Lesa 2 Korintionan 5:14, 15.) E amor ku Hesus tin pa nos por sostené nos i duna nos e deseo pa sigui biba i sirbi Yehova. E amor ei por motivá nos pa no entregá, asta ora nos konfrontá pruebanan manera desaster natural, persekushon, desepshon personal òf inkietut.

10, 11. Ta ken tin e responsabilidat di fortalesé rumannan ku ta desanimá? Splika esei.

¹⁰ Un otro manera ku Yehova ta edifiká nos ku amor ta via e kongregashon kristian. Si nos ta stima Dios, nos lo stima nos rumannan, i nos lo hasi tur loke nos por pa yuda nan mira ku nan ta balioso i ku Yehova ta stima nan. (1 Huan 4:19-21) Apòstel Pablo a skirbi: “Sigui animá otro i fortalesé otro, manera de echo boso ta hasiendo kaba.” (1 Tes. 5:11) Esei no ta responsabilidat di e ansianonan so. Tur hende den kongregashon por imitá Yehova i Hesus i duna e rumannan konsuelo i fortalesa.—Lesa Romanonan 15:1, 2.

¹¹ Algun ruman den kongregashon ta sufri di depreshon òf tin trastorno emoshonal i kisas tin mester di yudansa profeshonal i remedi. (Luk. 5:31) E ansianonan i otro rumannan den kongregashon ta rekonosé ku nan no tin e entrenamentu di dòkternan di salú mental. Pero tòg nan por ta di gran yudansa si nan sigui e konseho akí: “Papia palabranan di konsuelo ku esnan ku ta deprimí, apoyá e débilnan, tene pasenshi ku tur.” (1 Tes. 5:14) Nos tur tin ku hasi esfuerso pa komprondé kiko nos rumannan ta sinti. Nos mester tene pasenshi ku nan i papia na un manera ku ta konsolá esnan desanimá. Abo ta purba di fortalesé i konsolá otro ruman? Kiko bo por hasi pa bo yudansa por ta asta mas efikas?

12. Kon e amor di un kongregashon a fortalesé un ruman muhé?

¹² Kon nos amor por fortalesé e rumannan ku ta sufri di doló emoshonal? Un ruman muhé ku ta biba na Europa a splika: “Tin biaha mi ta pensa pa mata mi kurpa. Pero mi ta haña hopi bon sosten. E kongregashon ku mi ta pertenesé na dje a salba mi bida. E rumannan ta semper masha animante i amoroso. Aunke ta un par di nan so sa ku mi ta sufri di depreshon, e kongregashon t’ei pa mi tur ora bai. Tin un pareha kasá ku ta manera mi mayornan spiritual. Nan ta kuida mi masha bon mes, i nan t’ei pa mi literalmente 24 ora pa dia.” Klaru ku no ta tur ruman por yuda na e mesun grado. Pero nos sosten sinsero por hasi un gran diferensia pa e rumannan ku ta sufri di doló emoshonal.b

13. Kiko nos mester hasi si nos ke konsolá otro hende?

¹³ Ser un bon skuchadó. (Sant. 1:19) Ta un muestra di amor pa skucha un ruman desanimá ku kompashon. Purba di imaginá kon abo lo a sinti den su situashon. Ku takto, hasi preguntanan ku lo por yuda bo komprondé mihó kon e ta sinti. Laga bo ekspreshon di kara demostrá ku bo interes i preokupashon ta sinsero. Si e ruman ta sinti ku e ke splika kosnan mas en detaye, tene pasenshi i no interumpié. Si bo skuch’é ku pasenshi, lo bo por komprondé mihó kon e ta sintié. E ora ei, e ruman lo tin mas konfiansa den bo i lo ta mas dispuesto pa skucha ora abo ta hasi esfuerso pa papia kos edifikante kuné. Ora hende sa ku bo ta realmente interesá den nan, esei ta duna nan un gran konsuelo.

14. Dikon nos lo no ke ta un persona krítiko?

¹⁴ No sea krítiko. Un persona deprimí lo sintié mas malu ainda si e ta pensa ku nos ta kritik’é. I lo ta mas difísil e ora ei pa nos yud’é. Beibel ta bisa: “Tin hende ta papia sin pensa, manera hinká di spada, ma lenga di hende sabí ta trese kuramentu.” (Pro. 12:18) Klaru ku hamas nos lo no ‘hinka’ personanan deprimí intenshonalmente ku palabranan ofensivo. Ma asta si nos a papia sin pensa, nos por hasi un hende hopi doló. Pa nos por edifiká otro hende ku amor i animá nan, nos mester demostrá kompashon, hasiendo esfuerso pa pone nos mes den nan situashon i komprondé pa nan.—Mat. 7:12.

15. Ki medio balioso nos por usa pa edifiká otro hende ku amor?

¹⁵ Usa e Palabra di Dios pa konsolá hende. (Lesa Romanonan 15:4, 5.) Beibel ta bini di “e Dios ku ta duna perseveransia i konsuelo,” pues no ta un sorpresa ku nos ta haña masha hopi konsuelo den su palabranan. Tambe nos tin vários publikashon bíbliko masha útil, manera e Índise di Publikashon Watch Tower (na spañó) i e Guia pa Buska Informashon den Publikashonnan di Testigunan di Yehova. Nan por yuda nos haña tekstonan di Beibel i informashon ku nos por usa pa konsolá i animá nos rumannan na un manera mas efikas.

16. Ki kualidatnan nos mester tin pa nos por animá un ruman deprimí?

¹⁶ Demostrá ternura i suavedat. Yehova ta “e Tata di tierno miserikòrdia i Dios di tur konsuelo,” i e tin “tierno kompashon” pa su sirbidónan. (Lesa 2 Korintionan 1:3-6; Luk. 1:78; Rom. 15:13) Pablo tabata un bon ehèmpel den esaki pasobra el a imitá Yehova. El a skirbi: “Nos a trata boso ku suavedat, manera ora un mama ku masha ternura ta kuida su yunan na lechi. Pues, komo ku nos tabatin tierno kariño pa boso, gustosamente nos a kompartí no solamente e bon notisia di Dios ku boso, sino tambe nos mes alma, pasobra nos ta stima boso masha hopi.” (1 Tes. 2:7, 8) Ora nos ta demostrá ternura meskos ku Yehova, nos por ta nèt e konsuelo ku un ruman ta pidiendo den orashon.

17. Ki punto di bista realístiko di nos rumannan lo yuda nos animá nan?

¹⁷ No ferwagt perfekshon for di e rumannan. Sea realístiko. Si bo ta ferwagt ku e rumannan su komportashon ta perfekto lo bo keda desepshoná. (Ekl. 7:21, 22) Kòrda esaki: Yehova ta realístiko den loke e ta ferwagt di su sirbidónan. Si nos imitá su ehèmpel, nos lo ta kla pa soportá e imperfekshonnan di otro. (Efe. 4:2, 32) Hamas nos lo ke kompará nos rumannan ku otro òf duna nan e impreshon ku nan no ta hasi sufisiente. Al kontrario, nos ke animá nan i elogiá nan pa loke nan ta hasiendo. Elogio sinsero por edifiká un ruman ku amor i dun’é motibu pa ta felis den e sirbishi di Yehova.—Gal. 6:4.

18. Dikon nos ke edifiká otro ku amor?

¹⁸ Delaster ún karné di Yehova ta presioso p’e i tambe pa Hesus, kende a entregá su bida komo sakrifisio di reskate. (Gal. 2:20) Nos ta stima nos rumannan mashá i ke trata nan ku ternura i amor. Pa nos ta un animashon pa nos rumannan, nos ta “hasi esfuerso pa buska e kosnan ku ta promové pas i ku ta yuda edifiká otro.” (Rom. 14:19) Nos ta anhelá pa e tempu yega pa nos biba den Paradeis, kaminda niun hende lo no tin motibu pa ta desanimá! Lo no tin malesa ni guera mas. Hende lo no muri mas pa motibu di piká heredá, ni lo no tin persekushon mas, ni problema di famia ni desepshon den bida. Na fin di e Mil Aña, tur hende lo ta perfekto. Anto Yehova Dios lo adoptá esnan ku pasa e prueba final ei ku éksito komo su yunan riba tera, i nan lo tin “e glorioso libertat di e yunan di Dios.” (Rom. 8:21) Pues, laga nos ún yuda otro alkansá e meta maravioso ei i sigui demostrá amor ku ta edifiká!