Parehanan Resien Kasá, Pone Yehova na Promé Lugá den Boso Bida

1-2. (a) Dikon parehanan resien kasá mester konfia den Yehova? (Salmo 37:3, 4) (b) Kiko nos lo trata den e artíkulo akí?

FALTA poko tempu pa bo kasa òf bo ta resien kasá? Si ta asina, sin duda bo no por warda pa pasa tempu ku e persona ku bo ta stima asina tantu. Ta klaru ku bida kasá tin su difikultatnan, anto parehanan resien kasá tin ku tuma desishonnan importante. E manera ku boso ta atendé ku e difikultatnan ei i e desishonnan ku boso ta tuma, lo tin efekto riba boso felisidat pa hopi aña. Si boso dependé riba Yehova, boso lo tuma bon desishon, boso matrimonio lo ta mas fuerte, i boso lo ta mas felis. Di otro banda, si boso no sigui Dios su konseho, e chèns ta hopi grandi ku boso lo agregá strès na boso matrimonio, i boso lo ta infelis.—Lesa Salmo 37:3, 4.

² Aunke e artíkulo ta spesialmente pa parehanan resien kasá, e ta trata difikultat ku tur pareha kasá por haña nan kuné. Tambe lo e resaltá lèsnan ku nos por siña for di algun personahe fiel den Beibel. Nos por apliká e lèsnan ei den vários área di nos bida, inkluso matrimonio. Ademas, nos lo wak kiko nos por siña for di algun pareha di nos tempu.

3-4. Ki retonan parehanan resien kasá por haña nan kuné?

³ Algun hende por animá un pareha resien kasá pa nan tin e supuesto bida normal. Por ehèmpel, mayornan òf famianan yegá por keda puntra un pareha resien kasá: ‘Ki dia nos ta haña yu pa karga?’ Òf kisas famia- i amigunan ku bon intenshon por bisa e pareha resien kasá pa kumpra un kas i yen’é ku kosnan bunita.

⁴ Si un pareha no paga tinu, sin ku nan sa, nan por hinka nan kurpa den hopi debe. Anto komo resultado, nan ta haña ku nan tur dos tin ku bai traha pa paga debe. Esei na su turno ta pone ku nan no tin tempu pa estudio personal, Adorashon Komo Famia ni sirbishi. Nan por asta kuminsá falta reunion pa traha overtaim pa nan por gana mas sèn òf pa tin sigur ku nan ta keda ku nan trabou. Tur e kosnan ei ta pone ku e pareha ei ta pèrdè oportunidatnan masha bunita di por hasi mas pa Yehova den su sirbishi.

 5. Kiko nos ta siña for di Klaus i Marisa?

⁵ Eksperensia ta mustra ku hende ku ta laga nan bida drei rònt di kosnan material no ta felis. Wak loke Klaus i Marisa tabatin di bisa tokante esei.b Ora ku nan a kaba di kasa, nan tur dos tabata traha fultaim pa asina nan por tabatin un bida mas konfortabel. Pero, nan no tabata niun tiki felis. Klaus a atmití: “Materialmente nos tabata mas ku bon pará, pero spiritualmente nos no tabatin niun meta. I pa mi ta onesto, nos bida tabata kompliká i yen di strès.” Kisas meskos ku nan bo tambe a ripará ku si bo bida ta drei rònt di kosnan material, esei no ta duna bo niun tiki satisfakshon. Si esei ta bo kaso, no desanimá. Ora bo tuma tempu i analisá e bon ehèmpel di otronan, esei lo yuda bo hasi e kambionan nesesario. Pero promé, laga nos wak kiko esposonan por siña for di Rei Yehosafat.

 6. Kon Yehosafat a sigui e konseho di Proverbionan 3:5 i 6 ora un ehérsito grandi a bini pa atak’é?

⁶ Esposonan, debí na tur boso responsabilidatnan boso sa haña boso ku hopi strès? E relato di Rei Yehosafat sigur lo interesá boso. Komo rei, Yehosafat tabatin e responsabilidat pa siguridat di henter un nashon. Kon el a atendé ku e responsabilidat asina grandi ei? Yehosafat a hasi tur loke e tabata por pa protehá esnan ku tabata bou di su kuido. El a fortifiká e statnan di Huda, i el a reuní un ehérsito di mas ku 1.160.000 sòldá. (2 Kró. 17:12-19) Pero, despues el a hañ’é ku un problema hopi grandi. El a haña menasa for di un ehérsito grandi di amonita, moabita i e hòmbernan di e serunan di Seir. Nan a menasá tantu Yehosafat, su famia komo e nashon. (2 Kró. 20:1, 2) Kiko lo el a hasi awor? El a pidi Yehova pa yud’é i pa dun’é forsa. Loke ku Yehosafat a hasi tabata na armonia ku e konseho sabí ku tin na Proverbionan 3:5 i 6. (Les’é.) E orashon di Yehosafat ku nos ta haña na 2 Krónikanan 20:5-12, ta laga nos mira kuantu el a konfia den Yehova. Kon Yehova a kontestá Yehosafat su orashon?

 7. Ki kontesta Yehosafat a haña pa su orashon?

⁷ Yehova a laga Jahaziel, un levita, bisa Yehosafat kiko e mester a hasi. Yehova a bisa: “Stashoná boso mes, para i mira e salbashon di SEÑOR na boso fabor.” (2 Kró. 20:13-17) Esei sigur no tabata un strategia normal pa bringa un bataya! Pero, e instrukshonnan ei no a bini di hende, sino di Yehova. Konfiando plenamente den su Dios, Yehosafat a hasi presis manera Yehova a bis’é. Ora nan a sali pa enfrentá e enemigu, Yehosafat a pone, no e sòldánan ku mas eksperensia te dilanti pero, e kantadónan ku no tabatin niun arma. Yehova no a laga Yehosafat na kaya; El a derotá e ehérsito enemigu.—2 Kró. 20:18-23.

 8. Kiko esposonan por siña di Yehosafat?

⁸ Esposonan, tin hopi lès ku boso por siña for di e relato di Rei Yehosafat. Boso ta responsabel pa perkurá pa bienestar di boso famia, p’esei boso ta hasi hopi esfuerso pa protehá i perkurá pa boso famia. Ora boso haña boso ku problema, kisas boso promé reakshon ta pa boso mes resolvé e asuntu. Pero, no dependé riba boso mes forsa. Na lugá di esei, pidi Yehova yudansa den boso orashon personal. Ademas, huntu ku boso esposa, keda roga Yehova pa yudansa. Studia Beibel i nos publikashonnan. Apliká e konsehonan ku boso ta haña. Kisas no ta tur hende lo ta di akuerdo ku boso ta tuma desishonnan a base di Beibel, asta nan por bisa ku ta ko’i kèns boso ta hasi. Nan por bisa ku sèn i loke por hasi kuné ta e mihó kos ku boso famia mester. Pero, kòrda riba Yehosafat. For di e desishonnan ku el a tuma el a proba ku el a konfia den Yehova. Yehova no a laga e hòmber leal ei na kaya i lo e no laga boso tampoko na kaya. (Sal. 37:28; Heb. 13:5) Kiko mas parehanan por hasi pa nan tin sigur ku nan por tin un bida felis huntu?

 9. Kiko nos sa tokante Profeta Isaías i su kasá?

⁹ Pa Isaías i su kasá, e kos di mas importante den nan bida tabata di sirbi Yehova. Isaías tabata un profeta i dor ku Beibel ta yama su kasá “profeta muhé,” ta parse ku su kasá tambe tabatin un asignashon komo profeta. (Isa. 8:1-4) Ta bisto ku adorashon di Yehova tabata na promé lugá den nan bida. Isaías i su kasá sigur ta un bunita ehèmpel pa parehanan kasá awe.

10. Kon studiamentu di profesianan di Beibel por yuda parehanan kasá hasi tur loke nan por pa Yehova?

¹⁰ Parehanan kasá, ora boso ta hasi tur loke boso por den Yehova su sirbishi, boso ta imitando Isaías i su kasá. P’esei, studia profesianan di Beibel huntu, i boso lo mira kon semper e profesianan ei ta kumpli. Esei lo pone ku boso ta haña mas konfiansa ainda den Yehova.c (Tito 1:2) Meditá riba kon boso tambe por forma parti den kumplimentu di algun profesia di Beibel. Por ehèmpel, ora boso ta sali den sirbishi, boso ta yuda kumpli ku e profesia di Hesus tokante e bon notisia di e Reino ku lo ser prediká den henter e tera promé ku e fin yega. (Mat. 24:14) Segun ku boso ta mira ku e profesianan di Beibel ta kumpli, boso lo haña mas gana pa hasi tur loke boso por pa Yehova.

11. Kiko Akila ku Priskila por a hasi, i dikon?

¹¹ Parehanan kasá ku ta yòn ainda por siña for di Priskila i Akila, un pareha hudiu ku tabata biba na Roma. Nan a skucha e bon notisia tokante Hesus i a bira kristian. Sin duda, nan tabata kontentu ku nan bida. Pero, bida a dal un buèlta inesperá ora Emperador Claudio a duna òrdu pa tur hudiu sali fo’i Roma. Djis imaginá kiko esei lo a nifiká pa e pareha ei. Nan mester a bandoná tur loke nan tabata konosé, buska un kas i kuminsá ful di nobo ku nan negoshi di trahamentu di tènt. Tur e kosnan ku nan a haña nan kuné lo a stroba nan di pone e Reino na promé lugá? Kisas boso sa e kontesta kaba. Asina ku nan a yega Korinto, nan a kuminsá yuda e kongregashon einan i huntu ku Pablo, nan a hasi nan esfuerso pa fortalesé e rumannan einan. Despues, nan a muda bai otro statnan unda tabatin mester di mas predikadó. (Echo. 18:18-21; Rom. 16:3-5) Nan tabatin un bida drùk pero felis.

12. Dikon parehanan kasá mester pone metanan spiritual?

¹² Ora parehanan kasá awendia pone e Reino na promé lugá, nan ta imitando Priskila i Akila. E mihó momento pa un pareha papia tokante tur nan metanan, ta promé ku nan kasa. Ora un pareha ta tuma desishon huntu i ta hasi esfuerso pa logra nan metanan spiritual, nan lo tin mas chèns di mira Yehova su man den nan bida. (Ekl. 4:9, 12) Wak kiko Russell i Elizabeth tin di bisa tokante esei. Russell a bisa: “Promé ku nos a kasa, nos a hasi sigur di papia tokante nos metanan spiritual.” Elizabeth a bisa: “Nos tabatin e tipo di kòmbersashonnan ei ya asina den futuro ora ku nos mester a tuma kualke desishon, nos lo no a skohe algu ku lo a stroba nos di logra e metanan ei.” Sirkunstansia di Russell i Elizabeth a permití nan muda bai Mikronesia pa sirbi unda tin mester di mas predikadó.

13. Segun Salmo 28:7, kiko lo pasa ora nos ta konfia den Yehova?

¹³ Meskos ku Russell i Elizabeth, hopi pareha a disidí di mantené nan bida simpel pa asina nan por tin sufisiente tempu pa prediká i siña hende tokante e Reino. Ora un pareha pone metanan spiritual i duna tur di nan pa logra e metanan ei, nan lo haña yen di bendishon. Nan lo mira Yehova su man den nan bida, nan lo konfia den dje mas ainda, i nan lo ta berdaderamente felis.—Lesa Salmo 28:7.

14. Kon Apòstel Pedro i su kasá a mustra ku nan a konfia e promesa ku tin na Mateo 6:25, 31-34?

¹⁴ Parehanan kasá, boso por siña tambe for di Apòstel Pedro i su kasá. Entre seis luna pa un aña despues ku Pedro a topa Hesus pa promé biaha, e mester a tuma un desishon hopi importante. Debí ku Pedro tabata biba di piskamentu, e mester a tene kuenta ku e situashon di su famia ora Hesus a pidié pa bira su siguidó fultaim. (Luk. 5:1-11) Kiko el a hasi? El a skohe pa bai i prediká huntu ku Hesus. Anto esei tabata un bon desishon! Nos tin bon motibu pa kere ku Pedro su kasá a apoy’é. De echo, Beibel ta bisa ku el a kompañá Pedro por lo ménos den algun di su biahenan despues ku Hesus a resusitá. (1 Kor. 9:5) Sin duda, pasobra e tabata un bon esposa kristian, esei a permití ku Pedro por a sintié liber pa duna konseho na esposo- i esposanan kristian. (1 Ped. 3:1-7) Ta bisto ku, Pedro i su kasá tabata konfia den Yehova. Nan tabata sa ku lo e perkurá pa nan, si nan pone e Reino na promé lugá den nan bida.—Lesa Mateo 6:25, 31-34.

15. Kiko nos ta siña di Tiago ku Esther?

¹⁵ Si boso tin un tempu kasá kaba, kiko boso por hasi pa haña mas gana di hasi mas pa Yehova? Algu ku por yuda ta di wak loke otro parehanan a hasi. Boso por lesa e seri “Nan A Ofresé Nan Mes di Buena Gana.” Tiago ku Esther, un pareha kasá na Brazil, a haña masha gana di hasi mas pa Yehova ora ku nan a lesa e artíkulonan ei. Tiago a bisa: “Ora nos tabata lesa e eksperensianan i a mira kon Yehova a yuda su sirbidónan den nos tempu, nos tambe tabata ke sinti Yehova su man ta guia nos i yuda nos.” Ku tempu nan a muda bai Paraguay i desde 2014 nan ta sirbiendo den e teritorio portugues. Esther a bisa: “Un teksto ku nos tur dos gusta masha tantu mes ta Efesionan 3:20. Bes tras bes nos a mira e palabranan ei kumpli den nos sirbishi na Yehova.” Den e karta ei ku Pablo a skirbi, el a sigurá ku Yehova lo duna nos muchu mas di loke nos ta pidi. I esei semper ta e kaso!

16. Serka ken parehanan resien kasá por pidi konseho?

¹⁶ Parehanan resien kasá, boso por siña hopi for di otro rumannan ku a siña dependé riba Yehova. Algun pareha tin hopi aña ta traha komo pionero. Dikon boso no ta pidi nan konseho ora boso ta bezig ta evaluá boso metanan? Esei ta un otro manera ku boso ta mustra ku boso ta konfiando den Yehova. (Pro. 22:17, 19) Ansianonan tambe por yuda boso pone metanan spiritual i logra nan.

17. Kiko a pasa ku Klaus i Marisa, i kiko nos ta siña for di nan?

¹⁷ Pero, no ta tur biaha ora nos disidí pa hasi mas pa Yehova kosnan ta bai manera nos a pensa. Esei ta loke a pasa ku Klaus i Marisa menshoná na paragraf 5. Despues ku nan tabatin tres aña kasá, nan a muda i a bai traha komo boluntario den konstrukshon na e sukursal di Finlandia. Pero, despues nan a bin haña sa ku nan no por a keda einan mas ku seis luna. Na promé instante esei a dal nan hopi duru. Pero djis despues, nan a haña invitashon pa sigui un kurso di idioma arabir. Anto awor nan ta sirbiendo masha kontentu den e teritorio arabir na un otro pais. Mirando bèk, Marisa a atmití: “No ta fásil pa bandoná tur loke bo konosé i hinka bo bida kompletamente den man di Yehova. Pero Yehova semper a yuda nos na maneranan ku nos hamas por a imaginá. Tur e kosnan ei a laga mi konfiansa den Yehova bira mas i mas fuerte.” Manera nos por a mira den e ehèmpel di Klaus i Marisa, nos por tin sigur ku Yehova semper lo rekompensá nos si nos konfia kompletamente den dje.

18. Kiko parehanan kasá por hasi pa nan sigui konfia den Yehova?

¹⁸ Matrimonio ta un regalo di Yehova. (Mat. 19:5, 6) Anto e ke pa parehanan kasá apresiá e regalo ei. (Pro. 5:18) Parehanan resien kasá, dikon boso no ta tuma tempu pa analisá kon boso ta hibando boso bida? Boso ta dunadó tur di boso pa laga Yehova mira ku boso ta kontentu ku tur loke e ta hasi pa boso? Papia ku Yehova. Buska prinsipionan den su Palabra ku ta apliká na boso situashon. Anto sigui e konseho ku Yehova ta duna boso. Boso por tin sigur ku boso lo tin felisidat i satisfakshon den boso bida ora boso pone Yehova na promé lugá den boso matrimonio.