E Feria Di October​—⁠“Europa Su Feria Internacional di Cabai Mas Antiguo”

DJE CORESPONSAL Di Spierta! NA IRLANDA

SIMAN pasá esaki tabata un pueblo chikitu trankil i ketu, caminda hende tabata haci nan trabou di tur dia trankilamente. Pero e siman aki, ta un bochincha di otro mundu. E pueblo ta yen-yen, ya cu un 6.000 habitante local ta sirbi como anfitrion pa mas cu 50.000 bishitante. Pero, loke realmente ta hala atencion, no ta e multitud di hende manera vruminga, ni e hopi stèndnan, ni sikiera e entretenedónan colorido riba caya, sino e cabainan! Nan ta tur caminda!

Unda nos ta? Na e pueblo chikitu di Ballinasloe, situá un 140 kilometer west di Dublin, capital di Irlanda. Kico a trece un cambio asina drástico den e lugá aki cu normalmente ta masha trankil? Ta loke e organisadónan ta describí como “Europa su feria internacional di cabai mas antiguo,” e Feria di October.

Di Con na Ballinasloe?

Kico ta haci e Feria di October asina popular? Spierta! a entrevistá George, un cunukero local cu a bende hopi cabai aki. E ta bisa: “Na Ballinasloe, tur hende, tantu ricu como pober, por trece cualkier sorto di cabai pa bende. Esei ta tur cos.” Pero kico tin di diferente den esei? “Den hopi otro lugá, benta di cabai ta un actividad masha restringí i regulá,” George ta splica. “Tin algun benta público cu ta ofrecé un rasa di cabai so. I por lo general tin yen di formulario pa yena ora di haci e benta. No tin asina tantu feria di cabai caminda ken cu ta por trece un cabai, hib’é n’e tereno di yerba dje feria i djis bend’é! Aki n’e Feria di October, compra i benta di cabai ainda ta tuma lugá casi mescos cu a bai e último dos of treshen añanan, esta, via negociacion directo sin formalidad, aki mes pará riba e yerba.”

Nos a puntra nos mes: ‘Con bini Ballinasloe a bira e centro di tal actividad frenético? Di con comerciantenan a bini di leu, asta for di Rusia, pa cumpra cabai aki?’ Laga nos bai bek den historia un ratu pa haña e contesta.

Algun dje reynan prominente di Irlanda tabata goberná na Tara, situá un 30 kilometer nortwest di Dublin. E tabata un centro religioso, i despues político, di Irlanda. Hende tabata bai Tara pa paga nan belasting i pa tende di leynan nobo cu a ser introducí. Kico Tara tin di haci cu Ballinasloe? Wel, Ballinasloe a lanta unda tabatin un parti plat pa crusa e riu net riba un dje rutanan natural for di west cu a hiba na Tara. Biaheronan cu tabata bai i bini dje residencia real a haña e lugá plat aki, cu tabata na un distancia di mas o ménos un dia riba cabai for di costa west, un lugá cumbiniente pa intercambiá noticia i producto. Segun e organisadónan dje Feria di October, tin ‘evidencia di compra i benta di cabai den e área for di siglo 5 E.C.’

Den tempu mas recien, Ballinasloe su sitio stratégico a hacié un lugá ideal pa e feria oficial grandi cu nan a establecé aki na principio di siglo 18. Algun cunukero tabata sali pa bini rond di un luna di antemano, pa asina cana trece nan bacanan n’e marshe aki pa bende nan, maske esaki a nificá pa algun di nan un biahe di un 200 kilometer. Cu tempu, cabai a bira e atraccion principal aki.

E tera rond di Ballinasloe ta masha fértil i perfecto pa crio di bestia. E ta producí bestianan fuerte i robusto, salú i productivo. Autor Mark Holdstock ta splica: “Cabainan irlandes ta bon conocí pa nan físico fuerte.” E ta sigui: “Rasanan manera e cabai irlandes di hala carga a crece bon pa cientos di aña den e paisahe aki, i atrabes di siglonan nan a bira mas i mas fuerte.”

Pakico Mester di Cabai

Awe e artículo principal riba agenda ta compra i benta di cabai! Kico a haci cabai asina importante? Den siglo 18 i 19, cunukeronan na tur parti di Irlanda a haci uso extenso di cabai pa cultivá e tera. Nan tabatin mester di cabai fuerte i confiabel pa hala ploeg riba terenonan cu hopi biaha tabata muhá i yen di lodo. Pero tabatin un otro demanda grandi pa cabai. Ehércitonan tabatin mester di cabai fuerte cu no a spanta dor dje boroto di bataya i cu tabatin e forsa i resistencia pa transportá suministronan pisá crusando tereno brutu. E cabai irlandes di hala carga tabatin tur e característicanan aki, i pues tabata hopi buscá. Rasand’e cu un pura sangre ingles a producí un cabai balente i atlético, cu tabata ideal pa usa den cabayeria.

Mescos cu miles di soldá tabata muri den guera, asina tambe miles di cabai. Pa reemplasá esnan cu a muri den e hopi batayanan bringá na Europa, representantenan di ehército di hopi pais europeo, asta te leu aya na Rusia, tabata dispuesto pa haci e biahe bai Ballinasloe pa cumpra pura sangre nobo i confiabel. Pa meimei di siglo 19, e Feria di October a bira “e feria di cabai mas grandi na Europa.” Holdstock ta bisa cu “segun rumor, mitar dje cabainan usá den e Bataya di Waterloo tabata cumprá na Ballinasloe.”a

Técnicanan pa Compra i Benta di Cabai

Naturalmente, durante siglo 20 e demanda specífico ei pa cabai a mengua drásticamente. Vehículonan militar a reemplasá cabayeria, i tractor a tuma lugá di ploeg halá pa cabai. Eigenlijk, compra i benta di cabai a casi para na Ballinasloe. Pero, rond di 40 aña pasá, nan a rebibá e feria aki.

Con George, mencioná anteriormente, ta haci su compra i benta di cabai aki? E ta conta: “Gewoon mi ta cana bai para riba e yerba cu e cabainan cu mi kier bende, i tardi of trempan un hende ta bini cerca mi i puntra mi ki prijs mi ta pidi.” Anto George ta splica algun dje secretonan di compra i benta di cabai: “Nos ta negoshá pa un ratu, hopi bes bastante enérgicamente. Si e cumpradó ègt kier mi cabai, lo e soru pa no mustra muchu interes, ya cu e tin miedu cu lo mi tene e prijs haltu. Por ta e ta bai i bolbe despues, cu e speransa cu entretantu ningun otro hende no a haci un mihó oferta. E por asta manda un colega argumentá cu mi i tene mi ocupá, pa asina otro hende no haña chens di haci mi un oferta. Finalmente nos ta yega na un acuerdo pa un prijs i ta confirm’é dor di duna otro man. Por lo general, e ta djis paga kèsh, i e cabai ta cambia di doño, ei mes. Como cu no tin un cuerpo central cu ta regulá nada di esaki, una bes entregá e placa, no tin ningun garantia!”

Un hende djafó por haña cu ta difícil pa sa cua cabai ta na benta i cua no. “Si e ta riba e yerba,” George ta bisa, “e ta na benta.” Anto e ta mencioná algun dje custumbernan local: “Antes nan tabata pone un klompi di lodo n’e atras dje cabai si e ta bendí caba i tin biaha te ainda nan ta haci esei. Of, e doño nobo tabata djis cana bai cuné. Siguiendo un otro tradicion bieu den compra i benta di cabai na Irlanda, e bendedó tabatin e custumber di debolbé e cumpradó ‘placa di suerte,’ despues cu el a paga pa un cabai nobo. Esaki tabata un suma chikitu di placa cu bo ta duna bek despues cu a haci e transaccion principal. Supuestamente e ta duna e cabai ‘bon suerte’ cerca su doño nobo.”

George ta spierta: “Bo mester tin ègt bon conocimentu di cabai i di nan balor. Normalmente, bo ta haña loke bo a paga p’e, i mayoria hende ta bai cas satisfecho. Pero asta e comerciantenan di cabai mas experenciá mester ta alerto. Mi sa di un comerciante cu a bende un cabai i despues a bai den bar pa dal un par di drinks promé cu e bai cas. Miéntras tantu, e doño nobo a peña i corta e cabei dje cabai, cambiando su aparencia drásticamente. Anto a presentá e cabai ‘nobo’ na e doño original, kende a cumpr’é bek mesora pa un prijs muchu mas haltu, keriendo cu ta trata di un otro cabai!”

Tin otro desbentaha, ademas dje peliger di haci un mal compra. “Tene cuidou unda bo ta para!” George ta consehá. “No lubidá, cu asina tantu cabai pará riba otro, kisas pa oranan largu, i cu tantu actividad tumando lugá rond di nan, hopi di nan lo ta nervioso i cla pa tira skop. Mi a mira hopi cabai spantá lanta para riba nan pianan patras, asta ora ginetenan experenciá tabata dirigí nan.” E ta sigui bisa: “An, sí! Anto bisti un bon par di lars di rubber. Por ta e cos cu bo ta trapa aden no ta lodo!”

[Nota]

[Plachi na página 16]

Un cabai pintá ta warda pa nan bend’é

[Plachi na página 16, 17]

E tereno di yerba na Ballinasloe riba dia di apertura

[Plachi na página 17]

E rasa aki ta un mescla entre un cabai irlandes di hala carga i un pura sangre ingles