E Punto Di Bista Biblico

Fiamentu Entre Amigu

“E MALBADO TA PIDI PA FIA I NO TA PAGA BEK, PERO E HUSTU TA MUSTRA FABOR I TA DUNA REGALO.”—SALMO 37:21.

“NO FIA placa for di niun hende, ni no fia niun hende placa; pasobra hopi bes bo ta perde e fiansa i e amigu.” Asina William Shakespeare, dramaturgo ingles, a skirbi, reitirando un sabiduria masha bieu. Ta sigur cu poco cos den relacion humano tin asina tantu potencial explosivo manera fiamentu di placa. Asta si bo traha e mihó plannan i tin e intencionnan di mas sincero, cos no ta bai semper manera bo a verwagt.—Eclesiástes 9:11, 12.

Circunstancianan por surgi cu ta hacié difícil of imposibel pa e fiadó cumpli cu su pago. Of por sosodé cu esun cu a duna e fiansa di ripiente tin mester dje placa cu el a fia. Manera Shakespeare a señalá, cosnan asina por pone amistad i relacionnan na peliger.

Naturalmente, un persona por tin motibunan válido pa fia un suma di placa. Ora e hañ’é den pertá debí na un accidente serio of dor cu el a perde trabou, e persona por mira un fiansa como su único recurso. Bijbel ta animá esnan cu por pa yuda hende den necesidad ora esei ta den nan poder. (Proverbionan 3:27) Esaki por encerá fia un hende placa. Pero, con cristiannan cu drenta den un areglo asina mester mira nan obligacionnan?

Principionan pa Tuma na Cuenta

Bijbel no ta un manual financiero. E no ta considerá tur e detayenan cu fiamentu di placa lo por encerá. E ta laga cuestionnan manera si mester cobra interes of no i cuantu interes mester cobra, na e personanan enbolbí.a Sin embargo, loke sí Bijbel ta duna, ta principionan masha cla i amoroso cu mester dirigí e actitud i comportacion di ken cu ta fia of duna fiansa.

Considerá principionan cu ta aplicá na e fiadó. Apostel Pablo a exhortá cristiannan pa “no debe ningun hende ni un solo cos, fuera di stima otro.” (Romanonan 13:8) Aunke aki Pablo a duna un principio general, sigur nos por tuma su conseho como un spiertamentu pa nos no hinca nos curpa den debe. Tin biaha ta mihó biba sin cierto cos cu debe otro hende placa. Di con? Proverbionan 22:7 ta splica cu “e fiadó ta sirbidó dje homber cu ta duna e préstamo.” E fiadó tin cu realisá cu tanten cu no paga e placa bek, e ta bou di obligacion. En principio, su recursonan no ta completamente di dje. Paga su debe bek na armonia cu e palabracionnan mester tin un prioridad haltu den su bida, sino tin hopi chens cu lo surgi problema.

Por ehempel, si tempu pasa sin cu e dunadó dje fiansa ricibí e debido pagonan, e por bira iritá. E por mira cosnan cu e fiadó ta haci cu desconfiansa, manera cumpra paña, come na restaurant of bai cu vakansi. Lo e por cuminsá sinti rencor. E relacion entre nan i asta entre nan famianan lo por bira tenso of pió cu esei. Tur esaki por ta e consecuencianan tristu si e fiadó no cumpli cu su palabra.—Mateo 5:37.

Pero kico si di ripiente e fiadó hañ’é strobá di cumpli cu su compromiso debí na un circunstancia fuera di su control? Esaki ta cancelá e debe? No necesariamente. E salmista ta bisa cu e persona hustu “a hura loke ta malu pa su mes, i tog e no ta cambi’é.” (Salmo 15:4) Den un caso asina, e cos amoroso i sabí pa haci lo ta pa e fiadó splica e situacion mesora na esun cu a dun’é e fiansa. Anto nan por drenta un otro areglo. Esaki ta sigurá pas, i lo agradá Jehova Dios.—Salmo 133:1; 2 Corintionan 13:11.

Bon mirá, un persona ta revelá hopi tocante su mes dor dje manera cu e ta manehá su debenan. Un actitud indiferente i casual pa cu paga un fiansa bek, ta revelá un falta di interes den otro hende. Eigenlijk, un persona cu e actitud ei ta demostrá egoismo, su deseonan ta bini na promé lugá. (Filipensenan 2:4) Un cristian cu ta nenga di paga su debenan deliberadamente i concientemente, ta pone su posicion dilanti Dios na peliger, i su accion lo por revelá un curason golos i malbado.—Salmo 37:21.

Esun Cu Ta Duna e Fiansa

Aunke e obligacion principal ta sinta cerca esun cu ta fia e placa, tin principionan tambe cu ta aplicá na esun cu ta duna e fiansa. Bijbel ta indicá cu si nos tin e abilidad di yuda esnan den necesidad, nos mester haci esei. (Santiago 2:14-16) Pero esei no kier men cu un persona ta obligá na fia un hende placa, ni maske si esun cu ta pidié ta un ruman spiritual. Bijbel ta bisa: “Spiertu ta esun cu a mira e calamidad i a sconde su mes.”—Proverbionan 22:3.

E persona cu dicernimentu, dor cu e conocé i ta comprendé e riesgonan masha real enbolbí den fiamentu, lo wak bon promé cu e fia un hende cu pidié cen. Tin bon base pa e peticion? E persona cu ta pidié fi’é placa, a pensa e asuntu bon? E prospectivo fiadó ta un persona bon organisá i di bon reputacion? E ta dispuesto pa firma un documento cu ta describí e términonan dje acuerdo? (Compará cu Jeremías 32:8-14.) Di berdad e ta prepará pa paga bek?

Esaki no kier men cu un cristian mester nenga un persona den necesidad, cu ta parce un potencial rísico pa fia. Un cristian su obligacionnan personal pa cu otro hende ta bai hopi mas leu cu solamente prácticanan di negoshi cu desde un punto di bista comercial ta sano. Apostel Juan ta puntra: “Ken cu tin e medionan dje mundu aki pa sostené bida i ta mira su ruman den necesidad i tog ta cera e porta di su tierno compasion p’e, di ki manera e amor di Dios ta permanecé den dje?” Sí, cristiannan mester mustra amor no “cu palabra ni cu lenga, sino cu echo i berdad.”—1 Juan 3:17, 18.

Den algun caso, un persona lo por dicidí di no fia su ruman den necesidad placa. Tal bes e ta preferá di dun’é un regalo of ofrec’é un of otro forma di yudansa. Den un spiritu similar, ora problema surgi den fiamentu di cen, esun cu a duna e fiansa por scoge pa actua cu misericordia. E por deseá di tene cuenta cu e cambio di circunstancia dje fiadó i haci e periodo di paga bek mas largu, reducí e pagonan of asta eliminá e debe completo. Esakinan ta decisionnan personal cu cada persona mes tin cu tuma.

Cristiannan mester tene na mente cu Dios ta observá tur cos i cu lo e tene nos responsabel pa e manera cu nos ta comportá nos mes i pa e manera cu nos ta usa nos recursonan. (Hebreonan 4:13) Bijbel su conseho pa laga tur nos “asuntunan tuma lugá cu amor,” sigur ta aplicá na fiamentu entre amigu.—1 Corintionan 16:14.

[Nota]

[Plachi na página 18]

“E Cambiadó di Placa cu Su Esposa” (1514), di Quentin Massys

[Rekonosementu]

Scala/Art Resource, NY