Laga Jehova Haña Fabor den Loke Bo Ta Haci
“Corda esaki . . . sí, na mi fabor, O mi Dios . . . Cordá mi, sí, O mi Dios, pa bon.”—NEHEMIAS 13:22, 31.
1. Kico ta yuda esnan dedicá na Dios traha un informe excelente cerca Jehova?
JEHOVA su sirbidornan tin tur e yudansa necesario pa traha un informe excelente cerca dje. Pakico? Pa motibu cu nan tin un relacion íntimo cu Dios como parti di su organisacion terenal. El a revelá su propósitonan na nan, i el a duna nan yudansa i perspicacia spiritual pa medio di su spiritu santu. (Salmo 51:11; 119:105; 1 Corintionan 2:10-13) En bista dje circunstancianan special aki, Jehova amorosamente ta rekerí di su sirbidornan terenal pa rindi cuenta di nan mes na dje, tantu pa loke nan ta i pa loke nan ta logra den su fortalesa i cu e yudansa di su spiritu santu.
2. (a) Den ki maneranan Nehemías a traha un bon informe pa su mes cerca Dios? (b) Cu ki súplica Nehemías a concluí e buki bíblico cu ta carga su nomber?
2 Un homber cu a traha un bon informe pa su mes cerca Dios tabata Nehemías, cargador di copa dje Rey perso Artaherhes (Longimano). (Nehemías 2:1) Nehemías a bira gobernador dje hudiunan i a reconstruí e muraya di Jerusalem apesar di enemigu i peliger. Cu celo pa adoracion berdadero, el a pone e Ley di Dios na vigor i a mustra interes den esnan oprimí. (Nehemías 5:14-19) Nehemías a urgi e levitanan pa purificá nan mes regularmente, pa vigilá e portanan, i santificá e dia di sabat. P’esei e por a pidi den oracion: “Corda esaki tambe, sí, na mi fabor, O mi Dios i tene lástima di mi, sí, conforme e abundancia di bo bondad amoroso.” Apropiadamente, tambe, Nehemías a concluí su buki inspirá pa Dios cu e súplica: “Cordá mi, sí, O mi Dios, pa bon.”—Nehemías 13:22, 31.
3. (a) Con lo bo describí un persona cu ta haci bon? (b) Meditando riba e curso di Nehemías por haci nos puntra nos mes ki preguntanan?
3 Un persona cu ta haci bon ta birtuoso i ta efectuá obranan recto cu ta beneficiá otronan. Nehemías tabata un homber asina. E tabatin un temor reverencial di Dios i gran celo pa adoracion berdadero. Ademas, e tabata gradicidu pa su privilegionan den sirbishi di Dios i a traha un excelente informe pa su mes cerca Jehova. Meditando riba su curso por wel haci nos puntra nos mes, ‘Con mi ta mira mi privilegionan i responsabilidadnan cu Dios a duná mi? Ki clase di informe mi ta trahando pa mi mes cerca Jehova Dios i Jesucristo?’
Conocimentu Bíblico Ta Haci Nos Responsabel na Dios
4. Ki comision Jesus a duna su siguidornan, i kico esnan cu tabata “corectamente dispuesto pa bida eterno” a haci?
4 Jesus a duna su siguidornan e comision aki: “Bai . . . i haci disipel di hende di tur nacion, bautisando nan . . . , siñando nan pa warda tur loke mi a manda boso.” (Mateo 28:19, 20) Mester a haci disipel dor di siña nan. Esnan siñá asina i cu tabata “corectamente dispuesto pa bida eterno” lo a ser bautisá, mescos cu Jesus. (Echonan 13:48; Marco 1:9-11) Nan deseo pa warda tur loke el a manda lo a bini di curason. Nan lo a alcansá e punto di dedicacion dor di gana i aplicá conocimentu exacto dje Palabra di Dios.—Juan 17:3.
5, 6. Con nos tin cu comprendé Santiago 4:17? Ilustrá su aplicacion.
5 Mas profundo nos conocimentu di Bijbel ta, mihó e fundeshi pa nos fe ta. Na mésun tempu, nos deber di rindi cuenta na Dios ta bira mas grandi. Santiago 4:17 ta bisa: “Si un hende sa con pa haci loke ta corecto i tog no ta hacié, esei ta un picá p’e.” E declaracion aki ta evidentemente un conclusion di loke disipel Santiago a caba di bisa tocante bromamentu en bes di dependé completamente riba Dios. Si un persona sa cu e no por logra nada duradero sin e yudansa di Jehova, pero no ta actua conforme cu esei, e ta un picá. Pero e palabranan di Santiago por aplicá tambe na picánan debí na negligencia. Den Jesus su comparacion di carné i cabritu, por ehempel, e cabritunan ta ser condená, no pa obranan malu, sino dor cu nan no a yuda e rumannan di Cristo.—Mateo 25:41-46.
6 Un homber cu ken Testigonan di Jehova tabata conduciendo un studio di Bijbel tabata haciendo poco progreso spiritual, aparentemente pasobra e no a stop di huma, aunke e tabata sa cu e mester a stop. Un anciano a pidié lesa Santiago 4:17. Despues di comentá riba e nificacion dje texto aki, e anciano a bisa: “Aunke bo no ta bautisá, bo tin cu rindi cuenta i bo tin cu carga e responsabilidad completo pa bo decision.” Felismente, e homber a reaccioná, a stop di huma, i pronto a cualificá pa bautismo como símbolo di su dedicacion na Jehova Dios.
Nos Tin cu Duna Cuenta pa Nos Ministerio
7. Cua ta un manera pa manifestá nos gratitud pa “e conocimentu mes di Dios”?
7 Nos deseo sincero mester ta pa agradá nos Creador. Un manera pa manifestá nos gratitud pa “e conocimentu mes di Dios” ta di cumpli cu e comision di haci disipel di su Yu, Jesucristo. Esaki tambe ta un manera pa demostrá nos amor pa Dios i pa nos próhimo. (Proverbionan 2:1-5; Mateo 22:35-40) Sí, nos conocimentu di Dios ta haci nos responsabel na dje, i nos tin cu mira nos semehante como potencial disipelnan.
8. Pakico nos por bisa cu Pablo a sinti cu e mester a duna cuenta na Dios pa su ministerio?
8 Apostel Pablo tabata sa cu aceptá di henter curason i obedecé e bon nobo ta resultá den salbacion, miéntras cu rechas’é por trece destruccion. (2 Tesalonicensenan 1:6-8) P’esei el a sinti cu e mester a duna cuenta na Jehova pa su ministerio. Realmente, Pablo i su socionan a apreciá nan ministerio asina tantu cu nan a evitá cuidadosamente di asta duna e impresion cu nan tabata saca ganashi financiero for di dje. Ademas, Pablo su curason a impuls’é pa bisa: “Awor, si mi ta declarando e bon nobo, esei no ta motibu pa mi broma, pasobra necesidad ta poné riba mi. Realmente, ai di mi si mi no declará e bon nobo!”—1 Corintionan 9:11-16.
9. Ki debe importante tur cristian tin cu paga?
9 Siendo cu nos ta sirbidornan dedicá di Jehova, ‘necesidad ta poné riba nos pa declará e bon nobo.’ Ta nos comision pa predicá e mensahe di Reino. Nos a aceptá e responsabilidad ei ora nos a dedicá nos mes na Dios. (Compará cu Lucas 9:23, 24.) Ademas, nos tin un debe di paga. Pablo a bisa: “Tantu pa griegonan como pa bárbaronan, tantu pa sabínan como pa bobonan mi ta un debedor: di manera cu di mi parti tin un deseo intenso pa declará e bon nobo na boso tambe ei na Roma.” (Romanonan 1:14, 15) Pablo tabata un debedor pasobra e tabata sa cu e tabatin deber di predicá di manera cu hende por a tende e bon nobo i ser salbá. (1 Timoteo 1:12-16; 2:3, 4) P’esei el a traha duru pa cumpli cu su comision i paga su debe na su semehante. Como cristiannan, nos tambe tin un debe asina di paga. Predicá e Reino tambe ta un manera principal di demostrá amor pa Dios, pa su Yu, i pa nos próhimo.—Lucas 10:25-28.
10. Dor di haci kico algun a expandé nan ministerio?
10 Un manera pa traha un informe aceptabel cerca Dios ta pa usa nos abilidadnan pa expandé nos ministerio. Pa ilustrá: Den añanan recien hende di hopi grupo nacional a bai biba na Gran Bretania. Pa alcansá hende asina cu e bon nobo, mas cu 800 pionero (predicador di Reino di tempu completo) i cientos di otro Testigonan ta siñando diferente idioma. Esaki a resultá den un tremendo estímulo p’e ministerio. Un pionero cu tabata duna les di chines a bisa: “Mi nunca a pensa cu un dia lo mi siña mi idioma na otro Testigonan, pa nan compartí e berdad cu otronan den e manera aki. E ta asina satisfaciente!” Bo por expandé bo ministerio den un manera similar?
11. Kico tabata e resultado ora un cristian a duna testimonio informalmente?
11 Probablemente, cada un di nos lo haci tur loke ta na nos alcanse pa salba un homber cu ta hogando. Jehova su sirbidornan ta igualmente ansioso pa usa nan abilidadnan pa duna testimonio na tur oportunidad. Recientemente un Testigo a sinta banda di un señora den un bus i a papia cuné tocante Bijbel. Emocioná cu loke el a tende, e señora a haci hopi pregunta. Ora e Testigo tabata cerca di baha for dje bus, e señora a rogu’é p’e bini na su cas, ya cu ainda e tabatin hopi pregunta. E Testigo a bai di acuerdo. E resultado? El a cuminsá un studio di Bijbel, i seis luna despues e señora a bira un publicador di Reino no-bautisá. Pronto e mes tabata conduciendo seis studio di Bijbel. Ki un recompensa emocionante pa usa bo abilidadnan den sirbishi di Reino!
12. Con nos por usa nos abilidadnan como ministernan eficasmente den sirbishi di veld?
12 Nos por usa nos abilidadnan como minister eficasmente den veld dor di usa publicacionnan manera e buki di 192 página Conocimentu cu Ta Hiba na Bida Eterno. Pa april, 1996, e Comité di Redaccion dje Cuerpo Gobernante di Testigonan di Jehova a aprobá e publicacion dje buki Conocimentu den mas cu 140 idioma, i p’e tempu ei 30.500.000 ehemplar di dje a ser imprimí caba den 111 idioma. E buki aki a ser skirbí cu e meta di yuda studiantenan di Bijbel siña suficiente tocante Dios su Palabra i propósitonan pa haci un dedicacion na Jehova i bautisá. Siendo cu publicadornan di Reino lo no conducí un studio di Bijbel cu e mésun studiante pa hopi aña, nan por conducí studionan cu mas hende of aumentá nan participacion den e trabou di cas-pa-cas i otro formanan dje ministerio. (Echonan 5:42; 20:20, 21) Conciente di nan responsabilidad dilanti Dios, nan ta dirigí atencion na spiertamentunan divino. (Ezekiel 33:7-9) Pero nan interes principal ta di onra Jehova i yuda mas tantu hende posibel siña tocante e bon nobo den e tempu corticu cu a sobra ainda p’e mal sistema di cosnan aki.
Trahando un Informe Excelente Como Famia
13. Pakico famianan deboto mester tin un studio di Bijbel di famia regular?
13 Cada individuo i famia cu ta aceptá berdadero cristianismo ta responsabel na Dios i p’esei mester “forsa padilanti te na madures” i bira “sólido den fe.” (Hebreonan 6:1-3; 1 Pedro 5:8, 9) Por ehempel, esnan cu a studia e buki Conocimentu i a ser bautisá tin cu completá nan conocimentu dje Scritura dor di asistí regularmente na reunionnan i tambe dor di lesa Bijbel i otro publicacionnan cristian. Famianan deboto mester tin tambe un studio regular di famia, pasobra esei ta un manera importante pa “keda lantá, para firme den fe, comportá . . . manera homber, bira fuerte.” (1 Corintionan 16:13) Si bo ta cabes di un famia, bo ta specialmente responsabel na Dios pa haci sigur cu bo famia ta bon alimentá spiritualmente. Mescos cu alimento físico nutritivo ta contribuí na salú natural, asina alimento spiritual abundante i regular ta necesario pa abo i bo famia keda “saludabel den fe.”—Tito 1:13.
14. Kico tabata e resultado dje testimonio cu un hobencita israelita bon instruí a duna?
14 Si tin yunan den bo famia, Dios lo haña fabor den loke bo ta haci ora bo ta duna nan instruccion spiritual sólido. Tal siñamentu lo beneficiá nan, mescos cu el a beneficiá un hobencita israelita cu a ser capturá dor dje asirionan den e tempu di Dios su profeta Eliseo. E hobencita a bira criá dje esposa di un hefe di ehército sirio, yamá Naman, cu tabatin lepra. Aunke e mucha muher tabata yong, el a bisa su doño: “Si solamente mi señor tabata dilanti e profeta cu ta den Samaria! Den e caso ei lo e recuperá for di su lepra.” Debí na su testimonio, Naman a bai Israel, a cumpli finalmente cu e instruccion di Eliseo pa baña shete bes den Riu Jordan, i a ser limpiá di lepra. Ademas, Naman a bira un adorador di Jehova. Cuantu esei mester a emocioná e hobencita ei!—2 Reynan 5:1-3, 13-19.
15. Pakico ta importante pa mayornan duna nan yunan un entrenamentu spiritual excelente? Ilustrá.
15 No ta fácil pa lanta yunan temeroso di Dios den e mundu sin normanan moral aki cu ta drumí den poder di Satanas. (1 Juan 5:19) Sin embargo, for di Timoteo su infancia, su wela Loida i su mama, Eunice, a siñ’é cu éxito e Scritura. (2 Timoteo 1:5; 3:14, 15) Studiando Bijbel cu bo yunan, hibando nan na reunionnan cristian regularmente, i cu tempu lagando nan compañá bo den e ministerio tur ta parti dje patronchi di entrenamentu pa cua bo mester rindi cuenta na Dios. Un cristian na Gales, awor den su 80 i picu aña, ta corda cu den cuminsamentu di añanan ’20, su tata tabata bai cuné ora e tabata cana 10 kilometer over di un ceru (un biahe ida i buelta di 20 kilometer) pa distribuí tratadonan bíblico na habitantenan di un pueblo den e vaye despues dje ceru. “Tabata durante e oranan di canamentu ei cu mi tata tabata inculcá e berdad den mi curason,” e ta bisa cu gratitud.
Ancianonan Ta Duna Cuenta —Den ki Manera?
16, 17. (a) Ki privilegionan hombernan di edad spiritualmente maduro a disfrutá di dje den Israel di antigwedad? (b) Compará cu e situacion den Israel di antigwedad, pakico mas ta ser rekerí di ancianonan cristian awe?
16 “Cabei blancu ta un corona di bunitesa ora e ser hañá den e caminda di husticia,” e homber sabí Sálomon a bisa. (Proverbionan 16:31) Pero no ta solamente edad físico ta ekipá un homber pa responsabilidad den e congregacion dje pueblo di Dios. Hombernan di edad spiritualmente maduro den Israel di antigwedad a sirbi como huesnan i oficialnan pa administrá husticia i mantené pas, órden, i salú spiritual. (Deuteronomio 16:18-20) Aunke mescos ta cierto dje congregacion cristian, mas ta ser rekerí di ancianonan segun cu e fin dje sistema di cosnan aki ta yega cerca. Pakico?
17 E israelitanan tabata un ‘pueblo scogí’ cu Dios a libra for di Egipto di antigwedad. Siendo cu nan a ricibí e Ley pa medio di nan mediador, Moises, nan desendientenan a nace den un nacion dedicá i tabata bon na altura dje preceptonan di Jehova. (Deuteronomio 7:6, 11) Sin embargo, ningun hende ta nace den un nacion dedicá asina awe, i comparativamente poco hende ta lanta den famianan deboto bon familiarisá cu e berdad bíblico. Specialmente esnan cu recientemente a cuminsá “cana den e berdad” kisas tin mester di instruccion riba con pa biba segun principionan bíblico. (3 Juan 4) P’esei ki un responsabilidad tin riba scouder di ancianonan fiel segun cu nan ta ‘tene n’e patronchi di palabranan saludabel’ i ta yuda Jehova su pueblo!—2 Timoteo 1:13, 14.
18. Ki clase di yudansa ancianonan di congregacion mester ta prepará pa duna, i pakico?
18 Un mucha chikitu cu ta siña cana por trompecá i cai. E ta sinti su mes insigur i tin mester di yudansa di su mayornan i nan mester dun’é confiansa atrobe. Un individuo dedicá na Jehova di igual manera por trompecá of cai spiritualmente. Asta apostel Pablo a haña ta necesario pa lucha pa haci loke tabata corecto of bon den bista di Dios. (Romanonan 7:21-25) Wardadornan dje tou di Dios tin cu duna yudansa amoroso na cristiannan cu a peca pero cu ta berdaderamente repentí. Ora ancianonan a bishitá un muher dedicá cu a cometé un eror serio, el a bisa den presencia di su esposo dedicá: “Mi sa cu boso lo expulsá mi!” Pero el a basha na yoramentu ora e ancianonan a bis’é cu nan tabata kier a sa ki yudansa tabata necesario pa restorá e famia spiritualmente. Conciente cu nan mester a duna cuenta, e ancianonan tabata contentu pa yuda un compañero creyente repentí.—Hebreonan 13:17.
Sigui Traha un Informe Excelente
19. Con nos por sigui traha un informe excelente pa nos mes cerca Dios?
19 Ancianonan di congregacion i tur otro sirbidor di Dios mester sigui traha un informe excelente pa nan mes cerca Jehova. Esaki ta posibel si nos pega n’e Palabra di Dios i haci su boluntad. (Proverbionan 3:5, 6; Romanonan 12:1, 2, 9) Specialmente nos kier haci bon na esnan relacioná cu nos den fe. (Galationan 6:10) Sin embargo, e cosecha ta grandi ainda, i e trahadornan ta keda poco. (Mateo 9:37, 38) Pues laga nos haci bon na otronan dor di proclamá diligentemente e mensahe di Reino. Jehova lo haña fabor den loke nos ta haci si nos cumpli cu nos dedicacion, haci su boluntad i proclamá fielmente e bon nobo.
20. Kico nos ta siña for di un consideracion dje curso di Nehemías?
20 Por lo tantu, laga nos sigui tin hopi di haci den e trabou di Señor. (1 Corintionan 15:58) I nos ta haci bon di refleccioná riba e ehempel di Nehemías, kende a reconstruí e muraya di Jerusalem, a pone e Ley di Dios na vigor i a promové adoracion berdadero celosamente. El a pidi den oracion pa Jehova Dios cord’é p’e bon cu el a haci. Ta nos deseo pa bo resultá di ta mes deboto na Jehova, i p’e haña fabor den loke bo ta haci.
Con Bo Ta Contestá?
◻ Ki ehempel Nehemías a pone?
◻ Pakico conocimentu ta haci nos responsabel na Dios?
◻ Con nos por traha un informe aceptabel cerca Jehova den nos ministerio?
◻ Kico famianan por haci pa traha un informe excelente cerca Dios?
◻ Con ancianonan cristian ta rindi cuenta?
[Plachi na página 18]
Mescos cu Pablo, nos por traha un informe excelente cerca Dios como proclamadornan di Reino
[Plachi na página 19]
Bo yunan ta firme den fe manera e hobencita israelita den cas di Naman?