“Busca Pas i Sigui Tras di Dje”

“Si ta posibel, cuantu cu ta dependé di boso, sea pacífico cu tur hende.”—ROMANONAN 12:18.

 1, 2. Cua ta algun motibu di con ningun pas cu hende trece no por dura?

IMAGINÁ bo un cas cu fundeshi swak, balki putrí i un dak cu a sak den otro. Lo bo sinti gana di muda bai biba den dje i hacié bo hogar? Casi sigur cu no. Asta si verf e di nobo, esei lo no cambia e echo cu e cas ei tin problema structural. Tin hopi chens cu tardi of trempan lo e basha den otro.

² Cualkier pas cu originá den e mundu aki ta mescos cu e cas ei. E pas ei su fundeshi, esta, promesa i strategia di hende, ta swak, pasobra “ningun salbacion ta pertenecé” na hende. (Salmo 146:3) Atrabes di henter historia, tur loke nos ta mira ta un lista largu di conflicto entre nacion, grupo étnico i tribu. Ta berdad cu tabatin periodonan breve di pas, pero ki sorto di pas? Si dos nacion ta den guera, anto nan declará pas sea pa motibu cu un dje nacionnan a ser derotá, of pasobra niun di dos no ta mira ningun bentaha mas den sigui bringa, ta ki sorto di pas esei ta? E odio, desconfiansa i yaluzí cu a ocasioná e guera no a disparcé. Pas cu ta un simpel fachada, manera un man di verf pa tapa hostilidad, no ta pas duradero.—Ezekiel 13:10.

 3. Di con e pas di Dios su pueblo ta diferente for di cualkier pas cu hende por producí?

³ Sin embargo, pas berdadero ta existí sí den e mundu aki habracá dor di guera. Na unda? Entre esnan cu ta sigui e pasonan di Jesucristo: cristiannan genuino cu ta obedecé Jesus su palabranan i ta haci nan esfuerso pa imitá e manera cu el a biba. (1 Corintionan 11:1; 1 Pedro 2:21) E pas cu ta existí entre cristiannan berdadero di diferente rasa, posicion social i nacionalidad ta genuino, pasobra e ta originá for di e relacion pacífico cu nan tin cu Dios, i e relacion aki ta basá riba nan fe den e sacrificio di rescate di Jesucristo. Nan pas ta un regalo di Dios, no algu cu hende a bin cuné. (Romanonan 15:33; Efesionan 6:23, 24) Nan tin e pas aki debí cu nan ta someté nan mes na e “Prins di Pas,” Jesucristo, i ta adorá Jehova, “e Dios di amor i di pas.”—Isaías 9:6; 2 Corintionan 13:11.

 4. Con un cristian ta “sigui tras di” pas?

⁴ Cerca hende imperfecto, pas no ta algu cu ta bini di mes. Ta p’esei Pedro a bisa cu tur cristian mester “busca pas i sigui tras di dje.” (1 Pedro 3:11) Con nos por haci esei? Un profecia antiguo ta mustra nos e contesta. Papiando atrabes di Isaías, Jehova a bisa: “Tur bo yunan lo ta personanan siñá pa Jehova, i e pas di bo yunan lo ta abundante.” (Isaías 54:13; Filipensenan 4:9) Sí, pas genuino ta bini pa esnan cu ta obedecé Jehova su siñansanan. Ademas, pas, huntu cu ‘amor, goso, gran pacenshi, amabilidad, bondad, fe, suavedad i dominio propio,’ ta fruta di Dios su spiritu santu. (Galationan 5:22, 23) Un hende sin amor, sin goso, sin pacenshi i cu no ta bondadoso, cu ta malbado, infiel, feros of sin dominio propio, no por gosa dje pas aki.

“Pacífico cu Tur Hende”

 5, 6. (a) Ki diferencia tin entre ser trankil i haci of promové pas? (b) Cu ken cristiannan ta purba promové pas?

⁵ Un definicion di pas ta “un estado di trankilidad of kietud.” Un definicion asina por incluí hopi situacion caminda no tin lucha. Sí, asta un hende morto ta na pas! Pero pa nos gosa di pas berdadero, nos mester ta mas cu djis na pas. Den su Sermon Riba Ceru Jesus a bisa: “Felis ta e hacidónan di pas, ya cu nan lo ser yamá ‘yunan di Dios.’” (Mateo 5:9) Jesus tabata papiando cu hende cu despues lo a haña oportunidad di bira yu spiritual di Dios i ricibí bida inmortal den shelu. (Juan 1:12; Romanonan 8:14-17) I lo yega e dia ora cu henter humanidad obediente cu no tin speransa di bai biba den shelu lo gosa di “e glorioso libertad dje yunan di Dios.” (Romanonan 8:21) Ta hacidónan di pas so por tin e speransa ei. Hopi bes tin un diferencia entre ser trankil, of na pas, i ser un hacidó di pas. Ser un hacidó di pas den e sentido bíblico ta implicá promové pas activamente, i crea pas tin bes caminda anteriormente no tabatin pas.

⁶ Cu esaki na mente, considerá e conseho cu apostel Pablo a duna e romanonan: “Si ta posibel, cuantu cu ta dependé di boso, sea pacífico cu tur hende.” (Romanonan 12:18) Pablo no tabata djis bisa e romanonan cu nan mester tabata hende trankil, aunke esei lo a yuda sí. El a animá nan pa haci, esta, promové pas. Cu ken? Cu “tur hende”: miembro di famia, otro cristiannan i asta hende cu no a compartí nan creencianan. El a animá e romanonan pa nan promové pas cu otronan ‘cuantu cu a dependé di nan.’ No, e no tabata kier pa nan a comprometé nan creencianan djis pa tene pas. Pero na lugá di provocá hende innecesariamente, nan mester a acercá nan cu intencionnan pacífico. E cristiannan mester a haci asina, sea cu nan a trata cu hende den e congregacion, of cu hende pafó di dje. (Galationan 6:10) Na armonia cu esaki, Pablo a skirbi: “Semper sigui tras di loke ta bon pa otro i pa tur sobrá.”—1 Tesalonicensenan 5:15.

 7, 8. Con i pakico cristiannan ta promové pas cu hende cu no ta compartí nan creencianan?

⁷ Con nos por promové pas cu esnan cu no ta compartí nos creencianan, i cu kisas asta ta oponé nan? Pa cuminsá nos por evitá di cana cu un actitud di superioridad. Por ehempel, difícilmente nos por bisa cu nos ta hacidó di pas si nos ta usa expresionnan degradante pa referí na un persona specífico. Jehova a revelá su huicio contra organisacionnan i gruponan di hende, pero nos no tin derecho di papia di niun hende individual como si fuera cu e ta condená caba. De echo, nos no ta husga hende, ni sikiera nos opositornan. Despues cu Pablo a bisa Tito p’e duna e cristiannan na Creta conseho tocante e manera cu nan mester trata cu autoridadnan humano, Pablo a bis’é p’e corda nan “pa no papia malu di ningun hende, pa no busca guera, pa ta razonabel, desplegando tur suavedad pa cu tur hende.”—Tito 3:1, 2.

⁸ Haci pas cu hende cu no ta compartí nos fe ta contribuí hopi pa nan haña un bon impresion dje berdad. Claro cu nos no ta cultivá amistad cu ta “daña custumbernan útil.” (1 Corintionan 15:33) Pero nos por mustra bon manera sí, i nos mester trata tur hende cu dignidad i bondad. Pedro a skirbi: “Mantené boso conducta excelente entre e nacionnan, pa den loke nan ta papia contra boso como malechor, nan, como testigo ocular di boso obranan excelente, por glorificá Dios den e dia di su inspeccion.”—1 Pedro 2:12.

Promové Pas den e Ministerio

 9, 10. Ki ehempel di trata cu hende no-creyente den un forma cu ta promové pas apostel Pablo a pone?

⁹ E cristiannan di promé siglo tabata conocí pa nan curashi. Nan no a suavisá nan mensahe, i ora nan a enfrentá oposicion, nan a keda determiná pa obedecé Dios como gobernante mas bien cu hende. (Echonan 4:29; 5:29) Sin embargo, nan no a bruha kere cu curashi kier men ser brutu. Wak con Pablo a trata e asuntu ora el a defendé su fe dilanti rey Herodes Agripa II. Herodes Agripa tabatin un relacion di incesto cu su ruman muher Bernice. Pero Pablo no a duna Agripa un les riba moralidad. Mas bien el a enfatisá algun punto cu nan tabatin en comun, i el a duna Agripa reconocimentu como un experto riba custumber hudiu i como un hende cu a kere den e profetanan.—Echonan 26:2, 3, 27.

¹⁰ Ta labia Pablo a labia Agripa dor cu e por a dun’é su libertad? No. Pablo a djis papia e berdad, manera e mes a yega di consehá. Nada cu el a bisa Herodes Agripa no tabata falsu. (Efesionan 4:15) Pero Pablo tabata un hacidó di pas, i e tabata sa con pa bira “tur cos pa tur clase di hende.” (1 Corintionan 9:22) Su meta tabata di defendé su derecho di predicá tocante Jesus. Como bon maestro, el a cuminsá na mencioná algu riba cua e i Agripa por a bai di acuerdo. Asina Pablo a yuda un rey inmoral mira cristianismo na un manera mas faborabel.—Echonan 26:28-31.

11. Con nos por ta hacidó di pas den nos ministerio?

¹¹ Con nos por ta hacidó di pas den nos ministerio? Nos, mescos cu Pablo, mester evitá discusion. Ta berdad cu tin bes nos tin cu “papia e palabra di Dios sin miedu” i defendé nos fe cu curashi. (Filipensenan 1:14) Pero mayoria bes nos meta principal ta di predicá e bon nobo. (Mateo 24:14) Una bes un hende mira e berdad tocante Dios su propósitonan, e por cuminsá deshací di ideanan religioso falsu i limpia su mes di prácticanan impuru. P’esei, te caminda por, ta bon pa nos duna énfasis na cosnan cu lo atraé nos oyentenan, i cuminsá cu cosnan cu nos tin en comun cu nan. Lo no yuda si nos provocá un hende cu lo por a scucha nos mensahe si nos a acerk’é cu tacto.—2 Corintionan 6:3.

Hacidó di Pas den Famia

12. Con nos por ta hacidó di pas den famia?

¹² Pablo a bisa cu esnan cu casa “lo tin tribulacion den nan carni.” (1 Corintionan 7:28) Nan lo haña nan cu vários dificultad. Entre otro, algun pareha tin desacuerdo de bes en cuando. Con mester trata cu e desacuerdonan aki? Na un manera cu ta promové pas. Un hacidó di pas lo haci su esfuerso pa evitá cu un conflicto ta escalá. Con? Di promé, dor di dominá su lenga. Ora nos usa e órgano chikitu aki pa haci remarke sarcástico of insultante, di berdad e por ta “un cos ingobernabel i perhudicial, yen di veneno fatal.” (Santiago 3:8) Un hacidó di pas ta usa su lenga pa edificá, no pa desbaratá.—Proverbionan 12:18.

13, 14. Con nos por mantené pas ora nos faya den algu cu nos a bisa, of ora emocionnan lanta?

¹³ Debí cu nos ta imperfecto, de bes en cuando nos tur ta bisa cos cu nos ta lamentá despues. Ora esaki sosodé, drecha asuntu lihé pa bo haci pas. (Proverbionan 19:11; Colosensenan 3:13) Evitá di cai den “debatenan tocante palabra” i “discusion violento tocante cosnan insignificante.” (1 Timoteo 6:4, 5) En bes di esei, wak mas leu i purba comprendé e berdadero sintimentunan di bo casá. Si e papia brutu cu bo, no respond’é mescos. Corda cu “un contesta, ora e ta suave, ta apartá rabia.”—Proverbionan 15:1.

¹⁴ Tin bes lo bo tin cu tuma e conseho na Proverbionan 17:14: “Promé cu e pleitu estayá, bai for di ei.” Apartá bo mes emocionalmente for dje situacion explosivo. Despues, ora cu boso emocionnan a calma, probablemente boso lo por solucioná e problema na bon manera. Den algun caso kisas ta útil pa pidi yudansa di un superintendente cristian maduro. Hombernan asina, cu experencia i empatia, por ta un yudansa refrescante ora cu pas den un matrimonio ta na peliger.—Isaías 32:1, 2.

Hacidónan di Pas den Congregacion

15. Segun Santiago, cua mal actitud a desaroyá entre algun cristian i di con e actitud ei ta “terenal,” “bestial” i “demoniaco”?

¹⁵ Lamentablemente, algun cristian di promé siglo a desplegá un spiritu yalurs i pleitista, net lo contrario cu pas. Santiago a bisa: “Esei no ta e sabiduria cu ta baha djariba, sino ta terenal, bestial, demoniaco. Pasobra unda cu tin yaluzí i pleitu, tin desordu i tur cos baho.” (Santiago 3:14-16) Tin hende ta kere cu e palabra griego traducí como “pleitu” tin di haber cu ambicion egoista, bringamentu pa puesto. Santiago tin bon motibu pa categoris’é como “terenal, bestial, demoniaco.” Atrabes di henter historia, gobernantenan di mundu a pleita manera bestia salbahe cu ta bringa cu otro. En berdad pleitamentu ta “terenal” i “bestial.” E ta “demoniaco” tambe. E angel hambrá pa poder cu a bai contra Jehova Dios i a bira Satanas, e gobernante dje demoñonan, ta esun cu a manifestá e cualidad perhudicial aki pa promé bes.

16. Con algun cristian di promé siglo a manifestá un spiritu manera di Satanas?

¹⁶ Santiago a urgi cristiannan pa nan traha duru pa no desaroyá un spiritu pleitista, pasobra e no ta contribuí na pas. El a skirbi: “Di ki fuente tin guera i di ki fuente tin pelea den boso? Nan no ta dje fuente aki, esta, di boso deseo fuerte pa placer sensual cu ta na conflicto den boso miembronan?” (Santiago 4:1) Aki, “deseo fuerte pa placer sensual” por ta referí na un anhelo golos pa cos material, of un deseo pa prominencia, control of influencia. Mescos cu Satanas, evidentemente algun hende den e congregacion tabata kier a briya cu prominencia na lugá di ta ‘esnan menor’ manera Jesus a bisa cu su siguidónan berdadero lo ta. (Lucas 9:48) Un actitud asina por kita e pas dje congregacion.

17. Con cristiannan djawe por ta hacidó di pas den congregacion?

¹⁷ Awe nos tambe tin cu resistí e tendencia pa bira materialista, yalurs of ambicioso pa prominencia. Si nos ta berdadero hacidó di pas, nos lo no sinti nos menasá si algun hende den congregacion ta mas ábil cu nos riba algun tereno, ni nos lo no desgabá nan cerca otro hende dor di pone nan motivacion na duda. I si tin algu cu nos ta bon den dje, nos lo no usa e abilidad aki pa nos sobresalí mas cu otronan, como si fuera pa duna di comprendé cu ta danki na nos abilidad i conocimentu e congregacion lo prosperá. Un spiritu asina lo causa division; lo e no trece pas. Hacidónan di pas no ta cana broma cu nan talentonan. Mas bien nan ta usa nan cu modestia pa sirbi nan rumannan i trece onor na Jehova. Nan ta realisá cu al fin i al cabo, ta amor—no abilidad—ta identificá un cristian berdadero.—Juan 13:35; 1 Corintionan 13:1-3.

“Pas Como Bo Superintendentenan”

18. Con ancianonan ta promové pas entre nan mes?

¹⁸ Ancianonan di congregacion ta hiba delantera den ser hacidó di pas. Jehova a predicí tocante su pueblo: “Lo mi nombra pas como bo superintendentenan i husticia como esnan cu ta asigná bo tarea.” (Isaías 60:17) Na armonia cu e palabranan profético aki, esnan cu ta sirbi como wardadó cristian ta traha duru pa promové pas entre nan mes i den e tou. Ancianonan por mantené pas entre nan mes dor di desplegá e “sabiduria djariba” cu ta pacífico i razonabel. (Santiago 3:17) Ya cu nan tin diferente antecedencia i experencia den bida, de bes en cuando ancianonan den congregacion lo tin diferencia di opinion. Esei kier men cu nan no tin pas? No si nan trata e asuntu corectamente. Un hacidó di pas ta expresá su idea cu modestia, anto ta scucha idea di otronan cu respet. Na lugá di insistí riba su propio punto di bista, un hacidó di pas lo pensa bon riba e punto di bista di su ruman huntu cu oracion. Generalmente no ta problema si tin diferente punto di bista, basta nan no ta bai contra ningun principio bíblico. Si e otronan no ta di acuerdo cuné, un hacidó di pas lo aceptá nan punto di bista i apoyá e decision dje mayoria. Asina lo e mustra cu e ta razonabel. (1 Timoteo 3:2, 3) Ancianonan cu experencia sa cu mantené pas ta mas importante cu haña loke bo kier.

19. Con ancianonan ta actua como hacidó di pas den congregacion?

¹⁹ Ancianonan ta promové pas cu miembronan dje tou dor di apoyá nan i no criticá nan esfuersonan di mas. Ta berdad cu tin bes algun cristian tin mester di reahuste. (Galationan 6:1) Pero duna disiplina no ta e trabou principal di un superintendente cristian. Loke e ta haci hopi bes ta elogiá e rumannan. Ancianonan amoroso ta purba mira cos bon den otronan. Superintendentenan ta balorá e trabou duru di otro cristiannan, i nan tin confiansa cu nan compañeronan di creencia ta haci nan best.—2 Corintionan 2:3, 4.

20. Den ki manera e congregacion ta beneficiá si nos tur ta hacidó di pas?

²⁰ P’esei, den famia, den congregacion i ora nos ta trata cu hende cu no ta compartí nos creencianan, nos ta purba promové pas—traha pa pas. Si nos cultivá pas diligentemente, nos lo contribuí n’e felicidad dje congregacion. Na mes momento nos lo ser protehá i fortalecí den hopi manera, manera nos lo mira den e siguiente artículo.

Bo Ta Corda?

• Kico kier men ser un hacidó di pas?

• Con nos por promové pas ora nos ta trata cu hende cu no ta Testigo?

• Cua ta algun manera cu nos por cultivá pas den famia?

• Con ancianonan por promové pas den congregacion?

[Plachi na página 9]

Hacidónan di pas ta evitá un actitud di superioridad

[Plachinan na página 10]

Cristiannan ta promové pas den e ministerio, na cas i den congregacion