Ruman Hòmbernan​—Sembra ku e Spiritu na Bista i Hasi Esfuerso!

“Esun ku sembra ku e spiritu na bista lo kosechá bida eterno for dje spiritu.”​—GAL. 6:8, NW.

1, 2. Kon Mateo 9:​37 i 38 ta kumpliendo, i debí na esei, ki nesesidat tin den e kongregashonnan?

NOS ta bibando den un tempu históriko! Sí, nos ta testigu di kumplimentu di Hesukristu su profesia relashoná ku un trabou ku ta avansá rápidamente rònt mundu. Hesus a bisa: “E kosecha ta masha grandi, ma trahadó ta poko. P’esei, pidi e Señor di kosecha pa manda trahadó na su kosecha.” (Mat. 9:​37, 38) I awe mas ku nunka, Yehova Dios ta kontestando e orashonnan ei. Por ehèmpel, durante e aña di sirbishi 2009, e kantidat di kongregashon di Testigunan di Yehova rònt mundu a oumentá ku 2.031, i awor nan ta 105.298. I pa dia, un averahe di 757 persona a batisá.

² Debí na e kresementu akí, tin mester di mas ruman hòmber kualifiká pa guia, siña i pastoriá e pueblo di Dios. (Efe. 4:11) Atraves di dékadanan, Yehova a nombra hòmbernan kualifiká pa kuida su karnénan, i nos por ta sigur ku lo e sigui hasi esei. E profesia di Mikeas 5:5 ta duna nos e siguransa ku durante e último dianan Yehova su pueblo lo tin “shete wardadó di karné” i “ocho lider.” Esaki ta un manera figurativo pa indiká ku lo tin un gran kantidat di hòmber kapas pa dirigí Dios su pueblo.

 3. Splika kiko ta nifiká “sembra ku e spiritu na bista.”

³ Si bo ta un ruman hòmber batisá, kon bo por haña e deseo pa asumí responsabilidat den kongregashon? Un faktor klave ta: “Sembra ku e spiritu na bista.” (Gal. 6:8, NW) Esaki ta enserá biba di tal manera ku bo ta permití Dios su spiritu santu influensiá bo bida. Sea determiná tambe pa no “sembra ku e karni na bista.” Pues, evitá di laga, entre otro, e deseo pa hiba un bida kómodo, rekreo i entretenimentu stroba bo di hasi mas den Dios su sirbishi. Tur kristian tin ku “sembra ku e spiritu na bista,” i ku tempu, ruman hòmbernan ku hasi esei lo kualifiká pa haña responsabilidatnan den kongregashon. Pa motibu ku tin un gran nesesidat di sirbidó ministerial i ansiano awe, e artíkulo akí ta dirigí spesialmente na hòmbernan kristian. P’esei, ruman hòmbernan, nos ta animá boso pa hasi orashon ora boso ta konsiderá e artíkulo akí.

Hasi Esfuerso pa Kualifiká pa “Un Bon Trabou”

4, 5. (a) Ruman hòmbernan batisá tin ku hasi esfuerso pa kualifiká pa ki privilegio den kongregashon? (b) Ki esfuerso nan tin ku hasi?

⁴ Un hòmber kristian no ta bira un superintendente outomátikamente. E tin ku traha duru pa kualifiká pa e “bon trabou” akí. (1 Tim. 3:1) Esei ta enserá sirbi rumannan den fe i perkurá sinseramente pa nan nesesidatnan. (Lesa Isaias 32:​1 i 2.) Un ruman hòmber ku ta hasi esfuerso ku e motivashon korekto pa kualifiká pa privilegio den kongregashon no ta ambisioso. Mas bien, su deseo ta pa traha na benefisio di otronan.

⁵ Un ruman ku ke kualifiká komo diákono, òf sirbidó ministerial, òf superintendente mester hasi esfuerso pa kumpli ku e rekisitonan ku tin den e Skritura. (1 Tim. 3:​1-10, 12, 13; Tito 1:​5-9) Si bo ta un ruman hòmber dediká na Yehova, puntra bo mes: ‘Mi ta partisipá plenamente den e trabou di prediká? Mi ta yuda otronan hasi esei? Mi ta mustra interes sinsero den mi rumannan den fe i ta fortalesé nan? Mi tin e reputashon di ta un bon studiante di e Palabra di Dios? Mi ta hasi esfuerso pa mehorá e kalidat di mi komentarionan? Mi ta kumpli diligentemente ku e asignashonnan ku e ansianonan ta duna mi?’ (2 Tim. 4:5) Ta importante pa pensa seriamente riba e preguntanan akí.

 6. Kon un ruman hòmber por kualifiká pa responsabilidat den kongregashon?

⁶ Kiko mas por yuda un ruman hòmber kualifiká pa asumí responsabilidat den kongregashon? E tin ku “wòrdu fortalesí ku poder pa medio di [Dios] su spiritu.” (Efe. 3:16) Sirbidónan ministerial i ansianonan den kongregashon no ta ser eligí pa medio di votamentu. Mas bien, un ruman hòmber ta ser nombrá a base di su progreso spiritual. Awor, kon e por progresá spiritualmente? Un manera ta di “kana segun e spiritu” i kultivá su fruta. (Gal. 5:​16, 22, 23) Segun ku e ruman ta desplegá e kualidatnan spiritual nesesario pa kumpli ku mas responsabilidat i ta apliká konseho pa mehorá, su ‘progreso lo ta bisto pa tur hende.’​—1 Tim. 4:15.

Sakrifisio Propio Ta Nesesario

 7. Kiko sirbi otronan ta enserá?

⁷ Sirbi otronan ta rekerí trabou duru i sakrifisio propio. Debí ku superintendentenan kristian ta wardadó di e tou di Dios, nan ta masha preokupá ku e problemanan di e karnénan. Tuma nota ki efekto e trabou di wardadó tabatin riba apòstel Pablo. El a bisa e rumannan na Korinto: “Den hopi aflikshon i angustia di kurason mi a skirbi boso ku hopi lágrima; no pa hasi boso bira tristu, ma pa boso por sa di e amor ku mi tin spesialmente pa boso.” (2 Kor. 2:4) Ta bisto anto ku Pablo a hasi su trabou ku henter su kurason.

8, 9. Menshoná algun hòmber den tempu bíbliko ku a perkurá pa e nesesidatnan di otro hende.

⁸ Hòmbernan ku ta traha na benefisio di sirbidónan di Yehova semper tabatin un aktitut di sakrifisio propio. Por ehèmpel, ta difísil pa imaginá ku Noe a bisa miembronan di su famia: ‘Laga mi sa ora e arka ta kla pa mi djòin boso.’ Moisés no a bisa e israelitanan na Egipto: ‘Lo mi topa boso na Laman Kòrá. Wak kon boso ta yega.’ Josué hamas lo a bisa: ‘Laga mi sa ora e murayanan di Jeriko kai.’ I Isaias no a mustra dede riba un otro hende i bisa: ‘At’é ei! Mand’é!’​—Isa. 6:8

⁹ Pero, nos mihó ehèmpel ta Hesukristu, kende semper a sigui guia di Dios su spiritu santu. Boluntariamente el a aseptá su asignashon pa sirbi komo Redentor di humanidat. (Juan 3:16) E amor ku a motivá Hesus pa hasi sakrifisio no mester motivá nos pa hasi meskos? Un ruman hòmber ku tin hopi tempu ta sirbi komo ansiano a deskribí su sintimentunan asin’akí: “Loke a konmové mi profundamente ta e palabranan ku Hesus a dirigí na Pedro, esta, ‘pastoriá mi karnénan.’ Atraves di añanan, mi a realisá kon algun palabra amabel òf un simpel akto di bondat por animá un hende. Mi ta gusta e trabou di pastoreo.”​—Juan 21:16.

10. Kiko por motivá hòmbernan kristian pa sirbi nan rumannan ku e mesun aktitut di Hesus?

¹⁰ Den nan trato ku e tou di Dios, ruman hòmbernan den kongregashon mester reflehá e aktitut di Hesus, kende a bisa: “Lo mi refreská boso.” (Mat. 11:28, NW) Ta fe den Dios i amor pa e kongregashon ta motivá hòmbernan kristian pa hasi esfuerso pa kualifiká pa e bon trabou akí. I e kualidatnan ei ta pone tambe ku nan no ta pensa ku e trabou ta eksigí demasiado di nan tempu i energia. Pero kiko si un ruman hòmber no ke hasi esfuerso pa sirbi e kongregashon? Kon e por kultivá e deseo ei?

Kultivá e Deseo pa Sirbi

11. Kon un ruman hòmber por kultivá e deseo pa sirbi den kongregashon?

¹¹ Bo ta pensa ku bo no tin e abilidat- i kualidatnan nesesario? Akaso esei ta pone ku bo no ta hasi esfuerso pa kualifiká pa asumí responsabilidat den kongregashon? Si esei ta e kaso, ta bon pa bo resa pidi Yehova su spiritu santu ku lo yuda bo trata ku kualke preokupashon relashoná ku e asuntu akí. (Luk. 11:13) Ta Yehova su spiritu santu ta motivá un ruman hòmber pa hasi esfuerso pa kualifiká pa privilegio den kongregashon i ta duna e ruman akí fortalesa pa rindi sirbishi sagrado. Bon mirá, e deseo pa sirbi ta bini di Dios. (Fil. 2:13; 4:13, NW) P’esei, ta masha apropiá pa pidi Yehova yuda bo kultivá e deseo pa aseptá responsabilidat den kongregashon.​—Lesa Salmo 25:​4 i 5.

12. Kon un persona por haña sufisiente sabiduria pa kumpli ku responsabilidatnan ku Dios ta dun’é?

¹² Kisas un ruman hòmber no ta hasi esfuerso pa progresá, pasobra e ta pensa ku e nesesidatnan di kongregashon ta kompliká i lo eksigí hopi di dje. E por pensa tambe ku e no tin sufisiente sabiduria pa asumí e responsabilidatnan ei. Si esei ta e kaso, e por haña sabiduria si e bira mas diligente den su estudio di e Palabra di Dios i di publikashonnan basá riba Beibel. Ta bon pa e puntra su mes: ‘Mi ta apartá tempu pa studia Dios su Palabra? Mi ta hasi orashon pa haña sabiduria?’ Disipel Santiago a skirbí: “Si kualke di boso falta sabiduria, lag’é pidi Dios, kende ta duna na tur hende generosamente i sin reproche, i esaki lo wòrdu duná na dje.” (Sant. 1:5) Bo ta kere e palabranan inspirá akí? Konsiderá e kaso di Salomon. Kontestando su orashon, Dios a dun’é ‘un kurason sabí i disernimentu.’ P’esei, e por a diserní entre bon i malu ora di husga e pueblo. (1 Rei. 3:​7-14) Ta sierto ku e kaso di Salomon tabata spesial. Apesar di esei, nos por tin e konfiansa ku Dios lo duna sabiduria na hòmbernan ku e ta enkargá ku e responsabilidat di kuida su karnénan.​—Pro. 2:6.

13, 14. (a) Splika kon “e amor di Kristu” a motivá Pablo. (b) Ki efekto “e amor di Kristu” mester tin riba nos?

¹³ Algu otro ku ta yuda nos kultivá e deseo pa sirbi otronan ta meditashon riba tur loke Yehova i su Yu ta hasi pa nos. Por ehèmpel, laga nos konsiderá 2 Korintionan 5:​14 i 15. (Les’é.) Den ki sentido “e amor di Kristu ta obligá nos?” E amor ku Kristu a desplegá, entregando su bida na nos fabor pa kumpli ku Dios su boluntat, ta asina grandi ku e ta yena nos ku gratitut i ta konmové nos kurason. Pablo, por ehèmpel, a laga e amor di Kristu influensiá su akshonnan. P’esei, e no a buska su mes interes; mas bien, e kos prinsipal den su bida tabata sirbi Dios i su próhimo, tantu paden komo pafó di kongregashon.

¹⁴ Sí, meditashon riba e amor di Kristu ta motivá nos pa ta gradisidu. Esei, na su turno, ta yuda nos realisá ku ta sumamente inapropiá pa nos sigui “sembra ku e karni na bista,” esta, kore tras di metanan egoista i biba prinsipalmente pa agradá nos mes. Mas bien, nos ta hasi kambio den nos bida pa pone e trabou di Dios na promé lugá. Sí, amor ta motivá nos pa “sirbi” nos rumannan den fe. (Lesa Galationan 5:13.) Si nos ta konsiderá nos mes un sirbidó ku ta traha humildemente na fabor di Yehova su sirbidónan dediká, nos lo trata otro ku dignidat i rèspèt. Siguramente, nos lo no imitá e aktitut ku Satanas ta promové, esta, un aktitut di kritiká i husga hende.​—Rev. 12:10.

Un Proyekto di Henter Famia

15, 16. Ki influensia miembronan di famia tin riba nombramentu di un ruman hòmber komo sirbidó ministerial òf ansiano?

¹⁵ Ora di determiná si un ruman hòmber kasá ta kualifiká komo sirbidó ministerial òf ansiano, ta konsiderá tambe e situashon den su famia, sea ku e tin yu òf nò. Sí, e spiritualidat i reputashon di su famia pa gran parti ta determiná si e ta ser nombrá òf nò. Esaki ta enfatisá ku ta masha importante pa e famia apoyá e esposo i tata pa alkansá su meta pa sirbi komo sirbidó ministerial òf ansiano den kongregashon.​—Lesa 1 Timoteo 3:​4, 5 i 12.

¹⁶ Yehova ta keda masha kontentu ora miembronan di un famia kristian ta kooperá ku otro. (Efe. 3:​14, 15) Pa un kabes di famia manehá su kas “bon” i a la bes kumpli ku su responsabilidatnan den kongregashon, e mester ta balansá. P’esei, ta di sumo importansia pa un ansiano òf sirbidó ministerial tin un estudio di famia, esta, Adorashon Komo Famia, tur siman ku su esposa i yunan, asina henter e famia por benefisiá. Ademas, e tin ku partisipá regularmente ku su famia den sirbishi. Di otro banda, nan tambe mester kooperá kuné komo e kabes di kas.

Lo Bo Ke Bolbe Sirbi den Kongregashon?

17, 18. (a) Kiko un ruman hòmber tin ku hasi si el a pèrdè su privilegio di sirbi komo ansiano? (b) Ki aktitut un ruman hòmber ku a yega di sirbi komo ansiano òf sirbidó ministerial mester tin?

¹⁷ Kisas un tempu bo tabata sirbi komo ansiano òf sirbidó ministerial, pero awor no mas. No opstante, bo a sigui stima Yehova, i p’esei, bo por ta sigur ku e tambe ta interesá den bo. (1 Ped. 5:​6, 7) Kisas bo a haña konseho pa hasi algun kambio? Si ta asina, sea dispuesto pa atmití bo fayo i korigié ku e yudansa di Dios. Wak pa bo no bira amargá. Sea sabí i desplegá un aktitut positivo. Un ansiano ku a pèrdè su privilegionan di sirbishi despues di a sirbi pa hopi aña a bisa: “Mi a pone komo meta pa sigui asistí na e reunionnan, bai sirbishi i lesa Beibel regularmente manera mi tabata hasi ora mi tabata ansiano. I mi a logra e meta ei. Ademas, mi a siña tene pasenshi pasobra ounke mi a kere ku lo mi a bolbe haña mi privilegio di ansiano denter di ún òf dos aña, a tuma shete aña promé ku esei a sosodé. Loke a yuda mi inmensamente durante e tempu ei ta e animashon pa no kansa ni entregá sino sigui hasi esfuerso pa kumpli ku e rekisitonan pa sirbi.”

¹⁸ Si bo ta un ruman hòmber ku ta den e situashon ei, no desanimá. Reflekshoná riba e manera ku Yehova ta bendishoná bo ministerio i bo famia. Edifiká bo famia spiritualmente, bishitá e enfermonan i enkurashá e débilnan. I riba tur kos, balorá e privilegio ku bo tin di prediká e bon notisia di Reino i di alabá Yehova komo su Testigu.a​—Sal. 145:​1, 2; Isa. 43:​10-12.

Bolbe Analisá Boso Sirkunstansia

19, 20. (a) Kiko tur ruman hòmber batisá ta ser animá pa hasi? (b) Kiko nos lo konsiderá den e siguiente artíkulo?

¹⁹ Awe mas ku nunka, tin un gran nesesidat di ansiano i sirbidó ministerial. P’esei, nos ta animá tur ruman hòmber batisá pa bolbe analisá nan sirkunstansia i puntra nan mes: ‘Dikon mi no ta un sirbidó ministerial òf ansiano?’ Ta esensial pa ruman hòmbernan pidi Dios yuda nan mediante spiritu santu pa nan por haña e punto di bista korekto di e asuntu importante akí.

²⁰ Tur miembro di kongregashon lo benefisiá di e trabou duru ku ruman hòmbernan ta hasi ku un aktitut di sakrifisio propio. Sí, ora nos ta hasi kosnan na un manera bondadoso i sin egoismo, nos lo disfrutá di e goso di sirbi otronan, i a la bes, nos ta sembra ku e spiritu na bista. Di otro banda, nos no mester hasi Dios su spiritu santu tristu. E siguiente artíkulo lo konsiderá kon nos por evitá esei.

[Nota]

Kon Lo Bo Kontestá?

• Ki siguransa e profesia na Mikeas 5:5 ta duna nos?

• Splika kiko un aktitut di sakrifisio propio ta enserá.

• Kon un ruman hòmber por kultivá e deseo di sirbi otronan?

• Ki influensia miembronan di famia tin riba nombramentu di un ruman hòmber komo sirbidó ministerial òf ansiano?

[Plachinan na página 25]

Kiko bo por hasi pa kualifiká komo sirbidó ministerial òf ansiano?