Yuda Ruman Hòmbernan pa Nan Sirbi den Kongregashon

“Tur hende ku ta perfektamente instruí lo ta meskos ku su maestro.”—LUK. 6:40.

 1. Kiko Hesus a hasi durante su ministerio pa forma un grupo di disipel ku despues a bira un kongregashon di míles di hende?

APÒSTEL Huan a konkluí su Evangelio ku e siguiente palabranan: “De echo, tin hopi kos mas ku Hesus a hasi, i mi ta suponé ku si un dia mester skirbi nan en detaye, mundu mes lo no por kontené e ròlnan ei.” (Huan 21:25) Sí, durante Hesus su ministerio kòrtiku pero intensivo riba tera, el a logra hopi; el a buska i haña hende, a entrená nan i a organisá kosnan di tal manera ku e trabou ku el a inisiá por a sigui. P’esei, aunke Hesus a laga un grupo chikitu atras ora el a bolbe na shelu na aña 33 di nos era, no a dura mashá ku e grupo akí a oumentá i bira un kongregashon ku a konsistí di míles di hende.—Echo. 2:41, 42; 4:4; 6:7.

2, 3. (a) Dikon tin un nesesidat asina grandi di ruman hòmber pa sirbi den kongregashon? (b) Kiko nos lo mira den e artíkulo akí?

² Awe tin mas ku shete mion publikadó aktivo den mas ku 100.000 kongregashon rònt mundu. P’esei ketu bai tin mester di mas ruman hòmber pa asumí responsabilidat den kongregashon. Por ehèmpel, tin un gran nesesidat di ruman hòmber pa sirbi komo ansiano. Nos tin ku elogiá esnan ku ta hasi esfuerso pa kualifiká pa e privilegio di sirbishi akí, pasobra nan “ta deseá un trabou ekselente.”—1 Tim. 3:1.

³ Sinembargo, no ta outomátikamente un ruman hòmber ta kualifiká pa risibí privilegio den kongregashon. No ta su edukashon, abilidat òf eksperensia den bida ta pone ku e ta kualifiká pa e trabou akí. Mas bien, e mester kumpli ku e rekisitonan ku Beibel ta deskribí pa esei. Awor kon nos por yuda ruman hòmbernan progresá den e bèrdat i kualifiká pa risibí privilegio den kongregashon? Hesus a bisa: “Tur hende ku ta perfektamente instruí lo ta meskos ku su maestro.” (Luk. 6:40) Den e artíkulo akí, nos lo mira kon e Gran Maestro, Hesukristu, a prepará su disipelnan pa risibí mas responsabilidat. I nos lo mira tambe ki lès nos por siña for di e manera ku el a hasi esei.

“Mi A Yama Boso Amigu”

 4. Kon Hesus a demostrá ku e tabata un berdadero amigu pa su disipelnan?

⁴ Hesus a trata su disipelnan manera amigu i no a hasi komo si fuera nan tabata ménos kuné. El a dediká tempu na nan, a konfia nan i ‘a laga nan sa tur kos ku el a tende di su Tata.’ (Lesa Huan 15:15.) Bo por imaginá bo kon kontentu nan a keda ora el a kontestá nan pregunta: “Kiko lo ta e señal di bo presensia i di konklushon di e era akí?” (Mat. 24:3, 4) Ademas, el a kompartí su pensamentu- i sintimentunan íntimo ku nan. Por ehèmpel, riba e anochi ku el a ser traishoná, el a bai ku Pedro, Santiago i Huan den e hòfi di Getsémani. Einan, el a hasi orashon ku fervor. E no a skonde su angustia pa su tres apòstelnan. Pues, nan por a komprondé ku Hesus tabata pasa den un momento difísil. (Mar. 14:33-38) Pensa tambe riba e impakto ku e transfigurashon ku a tuma lugá anteriormente lo a hasi riba e tres apòstelnan ei. (Mar. 9:2-8; 2 Ped. 1:16-18) Sí, e amistat íntimo ku e disipelnan di Hesus tabatin kuné a fortalesé nan pa kumpli ku e trabou importante ku nan mester a hasi despues.

 5. Menshoná algun manera ku ansianonan kristian por yuda nan rumannan.

⁵ Meskos ku Hesus, ansianonan kristian awe tambe ta bira amigu di nan rumannan den fe i ta yuda nan. Nan ta stima nan i ta mustra ku nan ta sinseramente interesá den nan. Aunke ansianonan sa ku tin asuntunan ku ta konfidensial, nan no ta personanan misterioso ku ta tene tur kos sekreto. Mas bien, nan ta konfia nan rumannan i ta kompartí ku nan bèrdatnan bíbliko ku nan a siña. I nunka ansianonan ta trata sirbidónan ministerial ku ta mas yòn ku nan komo personanan ménos importante. Nan sa ku e rumannan akí tin potensial pa sigui progresá. Ademas, nan ta konsiente ku e ruman hòmbernan akí ta stima Yehova i ta duna un kontribushon balioso na e kongregashon.

“Mi A Duna Boso un Ehèmpel”

6, 7. Ki ehèmpel Hesus a pone pa su disipelnan, i ki efekto esaki tabatin riba nan?

⁶ Aunke Hesus su disipelnan tabatin apresio pa kosnan spiritual, tabatin momentonan ku nan kustumbernan i kultura a afektá nan manera di pensa. (Mat. 19:9, 10; Luk. 9:46-48; Huan 4:27) Tòg Hesus no a kritiká ni menasá nan. E no a pone karga muchu pisá riba nan ni konsehá nan pa hasi loke e mes no tabata hasi. Mas bien, Hesus a siña nan mediante su ehèmpel.—Lesa Huan 13:15.

⁷ Ki ehèmpel Hesus a laga pa su disipelnan? (1 Ped. 2:21) El a hiba un bida simpel pa e por tabatin tempu pa sirbi otro hende. (Luk. 9:58) Hesus tabata modesto i semper a basa su siñansa riba e Skritura. (Huan 5:19; 17:14, 17) E tabata un persona aserkabel i bondadoso. Tur loke el a hasi tabata motivá pa amor. (Mat. 19:13-15; Huan 15:12) Hesus su ehèmpel tabatin un bon influensia riba su apòstelnan. Santiago, por ehèmpel, no a kobardiá ora el a hañ’é konfrontá ku morto; el a muri leal na Dios. (Echo. 12:1, 2) Huan tambe a sigui fielmente den Hesus su pasonan pa mas ku 60 aña.—Rev. 1:1, 2, 9.

 8. Ki ehèmpel ansianonan ta pone pa ruman hòmbernan mas hóben i otro hende?

⁸ Pa ansianonan por ta un bon ehèmpel pa ruman hòmbernan hóben, nan mester ta humilde, amoroso i usa nan tempu i energia pa yuda otro hende. (1 Ped. 5:2, 3) Es mas, ansianonan mes tambe ta sinti nan bon ora ku nan manera di siña, nan estilo di bida komo kristian, nan fe fuerte i nan manera di prediká por ta un ehèmpel pa otronan.—Heb. 13:7.

‘Hesus A Manda Nan Prediká’

 9. Kon nos por sa ku Hesus a prepará su disipelnan pa nan por a kumpli ku e trabou di prediká?

⁹ Despues ku Hesus a prediká ku zelo pa mas òf ménos dos aña largu, el a manda su 12 apòstelnan tambe bai prediká. Pero el a instruí nan promé. (Mat. 10:5-14) Na un otro okashon tambe el a duna instrukshon. Ora e tabata bai hasi milager pa alimentá míles di hende, el a splika su disipelnan kon e tabata ke pa nan organisá e hendenan i parti e kuminda. (Luk. 9:12-17) Ta klaru anto ku Hesus a prepará su disipelnan; el a duna nan instrukshon kla i spesífiko. Debí na e preparashon akí i e yudansa ku e apòstelnan a risibí di spiritu santu, nan por a organisá e inmenso trabou di prediká ku a tuma lugá na aña 33 di nos era i despues.

10, 11. Kon nos por yuda personanan resien interesá progresá spiritualmente?

¹⁰ Awe, un hende hòmber ta kuminsá haña instrukshon for di ora ku e kuminsá studia Beibel ku Testigunan. Kisas nos tin ku siñ’é lesa bon. Segun ku nos ta sigui studia kuné, nos ta yud’é den otro áreanan tambe. Ora e kuminsá asistí regularmente na e reunionnan, lo e siña kiko e tin ku hasi pa, por ehèmpel, partisipá den e Skol di Ministerio Teokrátiko i pa bira publikadó no-batisá. Despues ku e batisá, e ruman hòmbernan lo sigui siñ’é mas kos, manera kon pa yuda tene Salòn di Reino den bon kondishon. Ku tempu, ansianonan por yud’é mira kiko e tin ku hasi pa por kualifiká komo sirbidó ministerial.

¹¹ Ora ansianonan ta duna un ruman hòmber batisá un asignashon, nan ta kla pa yud’é p’e hasié bon. P’esei, nan ta splik’é kiko ta e proseduranan di e organisashon ku tin di haber ku su asignashon i ta mustr’é kon e tin ku hasi e trabou. E ruman hòmber tin ku komprondé kiko ta ser ferwagt di dje. I si e tin un poko problema pa kumpli ku su asignashon, e ansianonan no ta konkluí mesora ku e ruman no ta sirbi pa e trabou. Al kontrali, bondadosamente nan ta bolbe splika e ruman kiko e tin ku hasi i kon e tin ku hasié. Ansianonan ta sinti nan felis ora nan mira kon ruman hòmbernan ta aseptá nan yudansa i asina sinti e goso di sirbi otro hende.—Echo. 20:35.

‘Un Hende Sabí Ta Skucha Konseho’

12. Dikon Hesus su konsehonan tabata bon?

¹² Un otro manera ku Hesus a prepará su disipelnan ta di duna nan konseho nesesario na e momento oportuno. Por ehèmpel, el a skual Santiago i Huan pasobra nan tabata ke manda kandela for di shelu riba algun samaritano ku no a risibí Hesus. (Luk. 9:52-55) Anto ora e mama di Santiago i Huan a aserká Hesus i a pidié pa duna su yunan un posishon privilegiá den e Reino, Hesus a dirigí su mes direktamente na e ruman hòmbernan i a bisa nan: “No ta keda na ami pa disidí ken ta sinta na mi man drechi ni na mi man robes; mas bien, e lugánan akí ta pertenesé na esnan pa ken mi Tata a prepará nan.” (Mat. 20:20-23) Tur e konsehonan ku Hesus a duna tabata kla, práktiko i firmemente basá riba e prinsipionan di Dios. El a siña su disipelnan rasoná a base di e prinsipionan ei. (Mat. 17:24-27) Ademas, Hesus tabata konsiente di e limitashonnan di su siguidónan i no a ferwagt perfekshon di nan. Su konsehonan tabata motivá pa berdadero amor.—Huan 13:1.

13, 14. (a) Ken tin mester di konseho? (b) Ki konseho un ansiano lo por duna un ruman hòmber ku no ta progresando den e bèrdat?

¹³ Tardi òf trempan, tur ruman hòmber ku ta hasi esfuerso pa kualifiká pa risibí privilegio den kongregashon tin mester di konseho bíbliko. Anto Proverbionan 12:15 ta bisa ku ‘un hende sabí ta skucha konseho.’ Un ruman hòmber hóben a bisa: “E kos di mas difísil pa mi tabata pa trata ku mi imperfekshonnan. Pero un ansiano a yuda mi mira kosnan den e perspektiva korekto.” Sí, e ansiano a lag’é komprondé ku e no mester tabata perfekto p’e sirbi den kongregashon.

¹⁴ Pero, si ansianonan ripará ku un ruman hòmber tin un kondukta kuestionabel ku ta strob’é di progresá, nan ta tuma inisiativa pa korigié ku suavedat. (Gal. 6:1) I tin biaha, nan tin ku duna konseho pa yuda un ruman kambia su aktitut. Por ehèmpel, kisas nan ta ripará ku un ruman hòmber no ta hasiendo tur loke e por. Den un kaso asina, nan por anim’é pa pensa riba e ehèmpel di Hesus; Hesus a prediká e Reino ku zelo i a enkargá su siguidónan ku e trabou di hasi disipel. (Mat. 28:19, 20; Luk. 8:1) Anto si un ruman hòmber ta parse di ta ambisioso, un ansiano lo por mustr’é kon Hesus a yuda Su disipelnan mira e peligernan di buska prominensia. (Luk. 22:24-27) Awor kiko si un ruman hòmber tin problema pa pordoná otro hende? E ilustrashon di e esklabo ku a nenga di pordoná un otro esklabo maske e mes a ser pordoná pa algu muchu mas grandi por ta di gran yudansa. (Mat. 18:21-35) Ora un ruman mester haña konseho, ta bon pa e ansianonan duna esaki mas pronto posibel.—Lesa Proverbionan 27:9.

“Entrená Bo Mes”

15. Kon e esposa i yunan di un ruman hòmber por yud’é sirbi otronan?

¹⁵ Ta ansianonan ta tuma inisiativa pa prepará ruman hòmbernan pa nan por risibí privilegio den kongregashon, pero otro hende tambe por yuda. Kon asina? Wèl, e esposa i yunan di un ruman hòmber por i mester yud’é den e esfuersonan ku e ta hasi pa kualifiká. I si e ta un ansiano kaba, ta bon pa su esposa i yunan apoy’é. Dikon? Pasobra pa un ansiano por kumpli ku su responsabilidatnan manera mester ta, ta masha importante pa su famia komprondé i aseptá ku e tin ku duna di su tempu i energia na e kongregashon tambe. E ruman hòmber ta keda kontentu ku su famia ta dispuesto pa hasi sakrifisio pa yud’é kumpli ku su responsabilidatnan. I e rumannan den kongregashon tambe ta apresiá esei mashá.—Pro. 15:20; 31:10, 23.

16. (a) Ken prinsipalmente tin ku demostrá ku e tin deseo di sirbi otro hende? (b) Kon un ruman hòmber por demostrá ku e ke risibí privilegio den kongregashon?

¹⁶ Aunke otronan por yuda i apoyá un ruman hòmber, é ta esun ku prinsipalmente tin ku demostrá ku e tin deseo di sirbi otro hende. (Lesa Galationan 6:5.) Klaru ku un ruman hòmber no mester ta un sirbidó ministerial òf un ansiano pa e por partisipá plenamente den sirbishi òf yuda otro hende. Pero si e ke risibí privilegio den kongregashon, e tin ku hasi esfuerso pa kumpli ku e rekisitonan konserní ku Beibel ta deskribí. (1 Tim. 3:1-13; Tito 1:5-9; 1 Ped. 5:1-3) Pues, si un ruman hòmber ke bira un sirbidó ministerial òf ansiano, e mester analisá su mes i wak den ki área e tin ku mehorá pa e por kualifiká. Esaki ta nifiká ku e tin ku lesa Beibel riba un base regular, hasi estudio personal diligentemente, meditá riba loke e ta studia, hasi orashon sinsero i partisipá ku zelo den sirbishi. Hasiendo e kosnan akí, e ta sigui e konseho ku apòstel Pablo a duna Timoteo: “Entrená bo mes ku e meta di kultivá deboshon na Dios.”—1 Tim. 4:7.

17, 18. Kiko un ruman hòmber por hasi si miedu, sintimentu di inkapasidat òf falta di deseo ta strob’é di progresá?

¹⁷ Pero kiko si un ruman hòmber no ta hasi esfuerso pa risibí privilegio den kongregashon pasobra e tin miedu òf ta sintié inkapas? Ta bon pa e pensa riba tur e kosnan ku Yehova Dios i Hesukristu ta hasi pa nos. Sí, Yehova a primintí ku ‘dia tras dia lo e karga nos karganan.’ (Sal. 68:19) Pues, nos Tata selestial por yud’é asumí responsabilidat den kongregashon. Ta bon tambe pa e kòrda ku tin un gran nesesidat di hòmbernan maduro pa sirbi komo sirbidó ministerial i ansiano. Meditashon riba e puntonan ei lo por yuda un ruman hòmber hasi esfuerso pa vense sintimentunan negativo. Ademas, e por hasi orashon pidi Yehova su spiritu santu pa e por haña pas i dominio propio, kualidatnan ku lo yud’é vense miedu òf e sintimentu di ku e no ta kapas. (Luk. 11:13; Gal. 5:22, 23) I nos por tin tur siguransa ku Yehova ta bendishoná tur ruman hòmber ku ke sirbi ku e motivashon korekto.

¹⁸ Awor kiko si un ruman hòmber no tin e deseo di sirbi den kongregashon? Kiko por yud’é? Apòstel Pablo a skirbi: “Dios ta esun ku ta obra den boso i ta duna boso tantu e deseo komo e poder pa hasi tur loke ta agrad’é.” (Flp. 2:13) Pues, ta Yehova Dios ta duna nos e deseo pa sirbi, i su spiritu santu por duna un persona e fortalesa pa rindi sirbishi sagrado. (Flp. 4:13) Es mas, un kristian por resa pidi Dios yud’é hasi loke ta korekto.—Sal. 25:4, 5.

19. Den ki sentido Yehova lo lanta “shete wardadó di karné, sí, ocho lider di hende”?

¹⁹ Yehova ta bendishoná e esfuersonan ku ansianonan ta hasi pa yuda otronan progresá. Es mas, e rumannan ku ta aseptá e yudansa akí i ku ta hasi esfuerso pa risibí privilegio den kongregashon tambe ta risibí su bendishon. I e Skritura ta sigurá nos ku entre e pueblo di Dios lo tin sufisiente ruman hòmber kapas pa dirigí Yehova su organisashon. E ta bisa ku lo lanta “shete wardadó di karné, sí, ocho lider di hende.” (Mik. 5:5) Awe tin hopi ruman hòmber humilde ku tin e deseo di sirbi otronan i ku ta ser prepará pa esei. Tur esaki ta duna gloria na Yehova i ta trese hopi bendishon pa nos.

Kon Lo Bo Kontestá?

• Kon Hesus a yuda su disipelnan kualifiká pa asumí mas responsabilidat?

• Kon ansianonan por imitá Hesus segun ku nan ta prepará ruman hòmbernan pa nan por kualifiká pa sirbi otro hende?

• Kon esposa i yunan por yuda un ruman hòmber pa e por asumí responsabilidat den kongregashon?

• Kiko un ruman hòmber mes por hasi pa kualifiká pa risibí privilegio den kongregashon?

[Plachinan na página 31]

Kon bo por yuda un studiante di Beibel segun ku e ta hasi esfuerso pa progresá?

[Plachi na página 32]

Kon ruman hòmbernan por demostrá ku nan ke sirbi otro hende?