Laga Nos Sigui Mustra Amor Leal!

1-2. Ki motibu nos tin pa mustra amor leal na nos rumannan?

NOS tin vários bon motibu pa mustra amor leal na nos rumannan. E buki di Proverbionan ta menshoná algun di nan: “No laga miserikòrdia i bèrdat bandoná bo . . . asina lo bo haña grasia i aprobashon den bista di Dios i hende.” “E hende miserikòrdioso ta hasi bon na su mes alma.” “Esun ku aspirá na hustisia i lealtat [òf, amor leal, NW] ta haña bida.”—Pro. 3:3, 4; 11:17; 21:21.

² E proverbionan ei ta menshoná tres motibu pakiko nos lo mester mustra amor leal. Di promé, ora nos mustra amor leal, nos ta bira presioso den bista di Dios. Di dos, nos mes ta benefisiá ora nos mustra amor leal. Por ehèmpel, nos ta sera amistat fuerte ku nos rumannan. Di tres, mustrando amor leal por hiba na mas bendishon den futuro, inkluso bida eterno. Ta bisto anto ku nos tin bon motibu pa sigui Yehova su konseho: “Kada un mustra kariño i kompashon na su ruman.”—Zak. 7:9.

 3. Kua preguntanan nos lo kontestá den e artíkulo akí?

³ Den e artíkulo akí, nos ta bai kontestá kuater pregunta. Na ken nos tin ku mustra amor leal? Kiko nos ta siña tokante amor leal for di e buki di Rut? Kon nos por mustra amor leal awe? Kiko ta e benefisionan ora nos mustra amor leal?

 4. Kon nos por imitá Yehova? (Marko 10:29, 30)

⁴ E artíkulo anterior a yuda nos komprondé ku Yehova ta mustra amor leal solamente na esnan ku ta stim’é i ta sirbié. (Dan. 9:4) Nos ke “imitá Dios, komo yunan stimá.” (Efe. 5:1) P’esei, nos tambe ke stima nos rumannan ku amor leal.—Lesa Marko 10:29, 30.

5-6. Kiko por yuda nos komprondé amor leal mas mihó?

⁵ Ta klaru ku mas mihó nos komprondé kiko amor leal ta, mas fásil lo ta pa nos mustr’é na nos rumannan. Pa nos haña un mihó komprondementu di kiko amor leal ta, ban kompar’é ku lealtat.

⁶ Ban bisa ku un trahadó ta traha na e mesun kompania pa basta aña. Hende por bisa ku e ta fiel, òf leal, na e kompania. Pero, e no ta einan pasobra e stima e doñonan di e kompania. Pa traha einan kisas e no tin nodi di sera konosí ku e doñonan òf bai di akuerdo ku tur nan desishonnan. E ta djis kontentu ku e tin un trabou ku e por gana su sèn. Tanten e no haña un mihó oferta, lo e sigui traha einan te dia e baha ku penshon.

7-8. (a) Kiko ta pone ku un hende ta mustra amor leal? (b) Dikon nos ta bai analisá kapítulo 1 i 2 di e buki di Rut?

⁷ Si un hende ta leal, òf fiel, esei ta algu hopi bon. Pero, loke ta hasi amor leal i lealtat diferente for di otro ta e motivashon. Awor dikon Dios su sirbidónan tabata mustra amor leal? Nan a mustra amor leal no pasó nan tabatin ku hasié sino pasó nan mes tabata ke. Wak loke David a hasi. El a stima su amigu Jonatan ku henter su kurason apesar ku Jonatan su tata kier a mat’é. Asta añanan despues ku Jonatan a muri, amor leal a motivá David pa kuida Mefi-boset, Jonatan su yu.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Nos por siña hopi tokante amor leal si nos analisá e promé dos kapítulonan di e buki di Rut. Kiko nos por siña tokante amor leal for di Rut, Boas i Noemí? Anto kon nos por apliká e lèsnan ku nos ta siña den nos kongregashon?b

 9. Kon bini Noemí a pensa ku e man di Dios tabata kontra dje?

⁹ Den e buki di Rut nos no ta lesa di Rut so pero tambe di su suegra Noemí i di Boas, un hòmber ku tabata stima Dios i ku tabata famia di e kasá di Noemí. Debí na skarsedat di kuminda na Israel, Noemí, su kasá i su dos yunan a muda pa Moab. Einan Noemí su kasá a muri i su dos yu hòmbernan a kasa. Lamentablemente un tempu despues, nan tambe a muri. (Rut 1:3-5; 2:1) Kada un di e gòlpinan ei tabata hopi duru pa Noemí i emoshonalmente nan a kibr’é mas i mas. Na dado momento e tabata asina kibrá ku asta el a pensa ku Yehova tabata kontra dje. Wak e palabranan ku el a usa pa deskribí e sintimentunan ei. El a bisa: “E man di SEÑOR a sali kontra mi.” “E Todopoderoso a trata mi ku hopi amargura.” Anto asta el a bisa ku Dios ta “kontra mi i e Todopoderoso a afligí mi.”—Rut 1:13, 20, 21.

10. Kiko Yehova a hasi ora el a skucha e palabranan di Noemí?

¹⁰ Kiko Yehova a hasi ora el a skucha e palabranan di Noemí? E no a stòp di yuda Noemí; mas bien el a komprondé p’e. Yehova sa ku “opreshon ta hasi un hende sabí bira loko.” (Ekl. 7:7) Pues, e mester a yuda Noemí mira ku e no a bandon’é. Kon el a hasi esei? (1 Sam. 2:8) El a motivá Rut pa mustra Noemí amor leal. Rut tabata stima su suegra i e tabata ke yud’é. I ku masha pasenshi i kariño el a yud’é pa no sintié asina desanimá i sinti ku ainda Yehova tabata stim’é. Kiko nos ta siña di Rut?

11. Kiko ta motivá hopi ruman pa yuda i apoyá nan rumannan ku ta desanimá?

¹¹ Amor leal ta motivá nos pa yuda nos rumannan ku ta kibrá òf desanimá. Meskos ku Rut a keda na Noemí su lado, awe tambe tin hopi ruman ku ta imitá Rut i no ta bandoná nan rumannan ku ta kibrá òf deprimí. Nan stima nan rumannan, i nan ke hasi tur loke nan por pa yuda nan. (Pro. 12:25; 24:10) Esei ta kuadra ku loke Apòstel Pablo a animá nos pa hasi: “Papia palabranan di konsuelo ku esnan ku ta deprimí, apoyá e débilnan [i] tene pasenshi ku tur.”—1 Tes. 5:14.

12. Kiko hopi biaha ta e mihó manera pa yuda un ruman desanimá?

¹² Hopi biaha e mihó manera pa yuda un ruman desanimá ta di skuch’é i lag’é sa ku bo ta stim’é. Yehova nunka lo no lubidá tur loke bo a hasi pa un di su karnénan presioso. (Sal. 41:1) Proverbionan 19:17 ta bisa: “Esun ku tene miserikòrdia di un hende pober ta fia SEÑOR, i lo e pag’é bèk pa su bon obra.”

13. Den ki sentido Rut i Orfa tabata diferente, i kon Rut a mustra amor leal? (Wak e plachi di portada.)

¹³ Nos por komprondé mas tokante amor leal si nos wak kiko a pasa ku Noemí despues ku su kasá i dos yunan a muri. Ora ku Noemí a tende ku “SEÑOR a bishitá su pueblo dor di duna nan kuminda,” el a disidí di regresá su pais bèk. (Rut 1:6) Tantu Rut komo Orfa a kompañá nan suegra. Pero na kaminda, tres biaha Noemí a bisa nan pa nan bai Moab bèk. Kiko nan a hasi? Nos ta lesa: “Orpa a sunchi Noemi yam’é ayó, miéntras Ruth sí a keda tene su suegra sin ke laga bai.” (Ruth 1:7-14, BPK) Orfa a hasi eksaktamente loke Noemí a bis’é i a regresá Moab. Rut tambe tabatin tur derecho di regresá Moab, pero e no a hasi esei. Debí na e amor leal ku e tabatin pa Noemí, el a hasi algu muchu mas mihó. El a skohe pa keda na Noemí su lado. (Rut 1:16, 17) El a disidí esei, no pasó e tabatin ku hasi esei, pero pasó e mes tabata ke. Rut di bèrdat a mustra amor leal. Kiko nos ta siña for di loke Rut a hasi?

14. (a) Kiko hopi di nos rumannan awe a disidí di hasi? (b) Segun Hebreonan 13:16, kon nos por hasi Yehova kontentu?

¹⁴ Amor leal ta pone ku nos ta hasi mas di loke ta ser ferwagt di nos. Awe, meskos ku den pasado, hopi di nos ke mustra amor leal na nos rumannan, asta na esnan ku nos no konosé personalmente. Por ehèmpel, ora nos haña sa ku tin un desaster natural, mesora nos ta puntra: ‘Ruman, kiko mi por hasi?’ Si nos haña sa ku un ruman a hañ’é den pèrtá, mesora nos ta yega serka e ruman ei i dun’é yudansa. Meskos ku e kristiannan di promé siglo di Masedonia, hopi ruman awe ta hasi mas di loke ta ser ferwagt di nan. Nan ta hasi hopi sakrifisio pa yuda nan rumannan den nesesidat. (2 Kor. 8:3) Sin duda, Yehova ta super kontentu ku nan ta mustra amor leal na nan rumannan.—Lesa Hebreonan 13:16.

15-16. Kon Rut a keda insistí pa yuda Noemí?

¹⁵ Nos por siña un par di lès hopi bunita si nos analisá e relato di Rut i Noemí. Ban wak un par nan.

¹⁶ Keda insistí. Ora Rut a bisa Noemí ku lo e sigui kompañ’é te na Huda, na promé instante Noemí a nenga. Pero, Rut a keda insistí. Kiko tabata e resultado? “Ora Noemí a mira ku e tabata desididu pa bai kuné, e no a bis’é nada mas.”—Rut 1:15-18.

17. Kiko lo motivá nos pa sigui purba di yuda nos rumannan?

¹⁷ E lès: Pa yuda ruman ku ta deprimí ta eksigí hopi pasenshi. Pero, djis sigui purba di yuda nan, keda insistí. Un ruman ku nos sa ta pasando den momentonan hopi difísil, kisas na promé instante lo nenga nos yudansa. Pero, amor leal lo motivá nos pa keda hasi nos bèst pa purba di yud’é i keda na su lado. (Gal. 6:2) Nos ta spera ku un dia lo e aseptá nos yudansa i konsuelo.

18. Kiko por a pone Rut rabia?

¹⁸ No sea lihé pa rabia. Ora Noemí i Rut a yega Bètlehèm, Noemí su bisiñanan di ántes a bin top’é. El a bisa nan: “Mi a bai yen, ma SEÑOR a trese mi bèk bashí.” (Rut 1:21) Bo por imaginá bo kon Rut a sintié ora el a para tende Noemí bisa e palabranan ei? Rut a hasi tur loke e tabata por pa yuda Noemí. El a yora kuné, el a konsol’é i a kana dianan largu huntu kuné. Apesar di tur e kosnan ku e pober a hasi, Noemí a bisa: “SEÑOR a trese mi bèk bashí.” Noemí ni sikiera a menshoná e yudansa ku el a haña di Rut ku tabata pará band’i dje. Esei lo a dal Rut hopi duru. Asina mes, e no a bandoná Noemí.

19. Kiko lo yuda nos keda na lado di un ruman ku ta desanimá?

¹⁹ E lès: Ora bo ta hasiendo tur bo esfuerso pa yuda un ruman ku ta hopi desanimá, por sosodé ku e ruman akí por bisa algu ku ta hùrt bo. Purba di no kunsumí ni rabia pa loke el a bisa. Nos ta keda na su lado i pidi Yehova yuda nos haña un manera pa konsol’é.—Pro. 17:17.

20. Kiko a duna Rut e forsa pa no entregá?

²⁰ Si un ruman mester di animashon, dun’é. Rut a mustra Noemí amor leal, pero awor Rut mes tabatin mester di animashon. I Yehova a motivá Boas pa anim’é. Boas a bisa Rut: “Ku SEÑOR rekompensá bo obra, i ku bo pago sea kompleto for di SEÑOR, e Dios di Israel, bou di kende su alanan bo a bin buska refugio.” E palabranan bunita ei a konsolá Rut. El a kontestá Boas: “Bo a konsolá mi, i di bèrdat bo a papia ku kariño ku bo sirbiente.” (Rut 2:12, 13) Boas su palabranan tabata nèt na tempu i a duna Rut e forsa pa no entregá.

21. Segun Isaías 32:1 i 2, kiko ansianonan tin ku hasi?

²¹ E lès: Tin biaha, esnan ku ta mustra amor leal na nan rumannan tambe mester di animashon. Ora Boas a ripará kon bon Rut tabata trata Noemí, el a elogiá Rut pa esei. Awe tambe, ora ansianonan ripará kon bon rumannan ta trata otronan, nan mester elogiá nan pa esei. Animashon ku ta nèt na tempu, ta duna e rumannan e forsa ku nan mester pa no entregá.—Lesa Isaías 32:1, 2.

22-23. Kiko a pone ku Noemí su pensamentunan a kambia? (Salmo 136:23, 26)

²² Poko despues di esei, Boas a sòru pa Rut i Noemí tin mas ku sufisiente kumindá. (Rut 2:14-18) Kiko Noemí a hasi? El a bisa: “Dios bendishon’é. SEÑOR semper a keda fiel na bibu i morto.” (Ruth 2:20a, BPK) Esei sí tabata un kambio. Mas promé el a bisa tur na lágrima: “SEÑOR . . . a afligí mi,” pero awor el a bisa tur kontentu: “SEÑOR semper a keda fiel.” Kiko a pone ku Noemí a kuminsá pensa asina?

²³ Awor numa Noemí a bin realisá ku Dios nunka a bandon’é. Yehova a usa Rut pa dun’é e yudansa ku e tabatin mester pa e biahe largu pa Huda. (Rut 1:16) Noemí tambe a bin komprondé ku Yehova a usa Boas pa yuda tantu e komo Rut. (Rut 2:19, 20b) Kisas el a pensa: ‘Awor sí mi ta komprondé. Yehova nunka a bandoná mi. Tur e tempu ei e tabata na mi lado!’ (Lesa Salmo 136:23, 26.) Sin duda Noemí mester tabata masha gradisidu ku Rut i Boas a keda na su lado i nunka a bandon’é. Nan tur tres lo a keda masha kontentu mes ku Noemí a haña su goso atrobe i e forsa nesesario ku e tabatin mester pa e por a sigui sirbi Yehova.

24. Dikon nos ke sigui mustra amor leal na nos rumannan?

²⁴ Pues, kiko nos a siña den e buki di Rut tokante amor leal? Amor leal ta motivá nos pa sigui yuda nos rumannan ku ta den nesesidat i keda na nan lado. E ta motivá nos tambe pa nos hasi èkstra esfuerso pa yuda nan. Ansianonan mester buska oportunidat pa animá esnan ku ta mustrando amor leal den e kongregashon. Ora nos mira un ruman ku nos a yuda bolbe haña su goso i e forsa pa por sirbi Yehova, esei ta hasi nos masha kontentu mes. (Echo. 20:35) Pero, dikon ta masha importante pa nos sigui mustra amor leal? Pasobra nos ke imitá i agradá Yehova, kende ta “abundá den miserikòrdia.” Sí, Yehova ta yen di amor leal.—Éks. 34:6; Sal. 33:22.