Ora Jesus Bini den Gloria di Reino

“Algun di esnan cu ta pará aki . . . lo no purba morto di ningun manera te cu promé nan mira e Yu di hende biniendo den su reino.”—Mateo 16:28.

1, 2. Kico a sosodé djis despues di Pentecoste 32 E.C., i kico tabata e propósito dje suceso?

DJIS despues di Pentecoste 32 E.C., tres di Jesucristo su apostelnan a mira un vision memorabel. Segun e registro inspirá, “Jesus a tuma Pedro i Santiago i Juan su ruman cuné i a hiba nan riba un ceru haltu caminda nan tabata nan so. I el a ser transfigurá dilanti nan.”—Mateo 17:1, 2.

² E vision di transfiguracion a bini na un tempu crítico. Jesus a cuminsá conta su siguidónan cu e tabata bai sufri i muri den Jerusalem, pero nan a haña su palabranan difícil pa comprendé. (Mateo 16:21-23) E vision a fortalecé e fe di Jesus su tres apostelnan como preparacion pa su binidero morto i tambe p’e añanan di trabou duru i prueba cu e congregacion cristian lo a experenciá. Nos awe por siña algu for dje vision? Sí, pasobra loke el a prefigurá realmente ta tuma lugá den nos tempu.

3, 4. (a) Kico Jesus a bisa seis dia promé cu e transfiguracion? (b) Describí loke a sosodé durante e transfiguracion.

³ Seis dia promé cu e transfiguracion, Jesus a bisa su siguidónan: “E Yu di hende ta destiná pa bini den e gloria di su Tata cu su angelnan, i e ora ei lo e recompensá cada un segun su comportacion.” E palabranan aki lo a cumpli na “e conclusion dje sistema di cosnan.” Jesus a sigui bisa: “En berdad mi ta bisa boso cu tin algun di esnan cu ta pará aki cu lo no purba morto di ningun manera te cu promé nan mira e Yu di hende biniendo den su reino.” (Mateo 16:27, 28; 24:3; 25:31-34, 41; Daniel 12:4) E transfiguracion a tuma lugá como cumplimentu dje último palabranan aki.

⁴ Kico exactamente e tres apostelnan a mira? Lucas ta duna e siguiente descripcion dje suceso: “Miéntras cu [Jesus] tabata haciendo oracion e aparencia di su cara a bira diferente i su bistí a bira relumbrantemente blancu. Tambe, mira! dos homber tabata combersando cuné, kendenan tabata Moises i Elías. Esakinan a aparecé cu gloria i a cuminsá papia tocante su baimentu cu e tabata destiná pa cumpli den Jerusalem.” Anto, “un nubia a forma i a cuminsá tapa [e apostelnan] cu sombra. Miéntras nan tabata drentando den e nubia, nan a yena cu temor. I un bos a sali for dje nubia, bisando: ‘Esaki ta mi Yu, esun cu a ser scogí. Scuch’é.’”—Lucas 9:29-31, 34, 35.

Nos Fe Ta Ser Fortalecé

 5. Ki efecto e transfiguracion tabatin riba apostel Pedro?

⁵ Apostel Pedro ya caba a identificá Jesus como “e Cristo, e Yu di e Dios bibu.” (Mateo 16:16) E palabranan di Jehova for di shelu a confirmá e identificacion ei, i e vision di Jesus transfigurá tabata un muestra adelantá di Cristo su binimentu den poder di Reino i gloria, finalmente pa husga humanidad. Mas cu 30 aña despues dje transfiguracion, Pedro a skirbi: “No tabata dor di sigui cuenta falsu mañosamente inventá cu nos a haci boso conocé e poder i presencia di nos Señor Jesucristo, sino tabata dor di a bira testigo ocular di su magnificencia. Pasobra el a ricibí di Dios e Tata onor i gloria, ora palabranan manera esakinan a ser dirigí na dje mediante e gloria magnífico: ‘Esaki ta mi yu, mi stimá, kende mi mes a aprobá.’ Sí, nos a tende e palabranan aki dirigí for di shelu miéntras nos tabata cuné riba e ceru santu.”—2 Pedro 1:16-18; 1 Pedro 4:17.

 6. Con cosnan a desaroyá despues dje transfiguracion?

⁶ Awe, nos fe tambe ta ser fortalecé dor di loke e tres apostelnan a mira. Naturalmente, cosnan a tuma lugá progresivamente desde 32 E.C. E siguiente aña, Jesus a muri i a ser resucitá, i a subi bai n’e man drechi di su Tata. (Echonan 2:29-36) Na Pentecoste dje aña ei, e ‘Israel nobo di Dios’ a ser producí, i un campaña di predicacion a cuminsá, iniciando den Jerusalem i mas despues plamando pa e finnan dje tera. (Galationan 6:16; Echonan 1:8) Casi inmediatamente e fe di Jesus su siguidónan a ser poné na prueba. E apostelnan a ser arestá i batí severamente pa motibu cu nan a nenga di stop di predicá. Pronto Esteban a ser matá. Caba Santiago, un testigo ocular dje transfiguracion, a ser matá. (Echonan 5:17-40; 6:8–7:60; 12:1, 2) Sin embargo, Pedro cu Juan a sobrebibí pa sirbi Jehova fielmente pa hopi aña mas. De facto, yegando na fin di e promé siglo E.C., Juan a registrá mas vision di Jesus den gloria celestial.—Revelacion 1:12-20; 14:14; 19:11-16.

 7. (a) Na ki tempu e vision dje transfiguracion a cuminsá cumpli? (b) Na ki tempu Jesus a recompensá algun segun nan comportacion?

⁷ Desde cuminsamentu di “e dia di Señor” na 1914, hopi dje visionnan cu Juan a mira a ser cumplí. (Revelacion 1:10) Kico di Jesus su ‘binimentu den e gloria di su Tata,’ manera e transfiguracion a prefigurá? E vision aki a cuminsá cumpli n’e nacementu dje Reino celestial di Dios na 1914. Ora Jesus, manera un strea di dia, a sali riba e esena universal como un Rey recien entronisá, esei tabata, na moda di papia, e aurora di un dia nobo. (2 Pedro 1:19; Revelacion 11:15; 22:16) Jesus a recompensá algun persona n’e tempo ei segun nan comportacion? Sí. Tin evidencia fuerte cu djis despues di esei, e resureccion celestial di cristiannan ungí a cuminsá.—2 Timoteo 4:8; Revelacion 14:13.

 8. Ki sucesonan lo marca e culminacion dje cumplimentu dje vision di transfiguracion?

⁸ Sin embargo, pronto Jesus lo bini “den su gloria, i tur e angelnan huntu cuné” p’e por husga henter humanidad. (Mateo 25:31) N’e tempo ei, lo e revelá su mes den tur su gloria magnífico i duna “cada un” recompensa hustu pa su comportacion. Esnan manera carné lo heredá bida eterno den e Reino prepará pa nan, i esnan manera cabritu lo bai pa “cortamentu eterno.” Ki un conclusion espléndido esei lo ta dje cumplimentu dje vision di transfiguracion!—Mateo 25:34, 41, 46; Marco 8:38; 2 Tesalonicensenan 1:6-10.

Jesus Su Compañeronan Glorificá

 9. Nos mester spera cu Moises i Elías lo ta huntu cu Jesus den e cumplimentu dje vision di transfiguracion? Splica.

⁹ Jesus no tabata su so den e transfiguracion. E tres apostelnan a mira Moises i Elías huntu cuné. (Mateo 17:2, 3) Nan tabata literalmente presente? No, pasobra e dos hombernan ei a muri hopi tempu promé caba i tabata drumí den Sheol sperando un resureccion. (Eclesiástes 9:5, 10; Hebreonan 11:35) Nan lo aparecé cu Jesus ora e bini den gloria celestial? No, pasobra Moises i Elías a biba promé cu e speransa celestial a habri pa hende. Nan lo ta parti dje ‘resureccion terenal di e hustunan.’ (Echonan 24:15) Pues nan aparicion den e vision dje transfiguracion ta simbólico. Di kico?

10, 11. Ken Elías i Moises ta representá den diferente contexto?

¹⁰ Den otro contextonan, Moises i Elías ta figuraran profético. Como mediador dje pacto di Ley, Moises a prefigurá Jesus, e Mediador dje pacto nobo. (Deuteronomio 18:18; Galationan 3:19; Hebreonan 8:6) Elías a prefigurá Juan Bautista, un predecesor dje Mesías. (Mateo 17:11-13) Ademas, den e contexto di Revelacion capítulo 11, Moises i Elías a prefigurá e resto ungí den e tempu di fin. Con nos sa esei?

¹¹ Wel, bai na Revelacion 11:1-6. Na versículo 3 nos ta lesa: “Lo mi haci mi dos testigonan profetisá pa mil dos shent’i sesenta dia bistí na paña di sacu.” E profecia aki a cumpli riba e resto di cristiananan ungí durante Guera Mundial I.a Pakico dos testigo? Pasobra e resto ungí ta efectuá obranan cu, den un sentido spiritual, ta manera esnan di Moises i Elías. Versículo 5 i 6 ta sigui bisando: “Si un hende kier haci [e dos testigonan] daño, candela ta sali for di nan boca i ta devorá nan enemigunan; i si un hende lo kier haci nan daño, den e manera aki e tin cu ser matá. Esakinan tin e autoridad di cera shelu pa awa no cai durante e dianan di nan profetisamentu, i nan tin autoridad riba e awanan pa haci nan bira sanger i pa dal e tera cu tur sorto di plaga cuantu biaha cu nan kier.” Dje manera ei, Revelacion ta recordá nos dje milagernan cu Elías i Moises a haci.—Númeronan 16:31-34; 1 Reynan 17:1; 2 Reynan 1:9-12.

12. Den e contexto dje transfiguracion, ken Moises i Elías ta representá?

¹² Ken, anto, Moises i Elías ta prefigurá den e contexto dje transfiguracion? Lucas ta bisa cu nan a aparecé huntu cu Jesus “cu gloria.” (Lucas 9:31) Claramente, na ta prefigurá cristiananan cu a ser ungí cu spiritu santu como “co-herederonan” cu Jesus i dje manera ei a ricibí e speransa maraviyoso di ser “glorificá huntu” cuné. (Romanonan 8:17) E ungínan resucitá lo ta huntu cu Jesus ora e bini den e gloria di su Tata pa “recompensá cada un segun su comportacion.”—Mateo 16:27.

Testigonan Manera Moises i Elías

13. Ki rasgonan ta marca Moises i Elías como representacionnan profético apropiado di Jesus su co-herederonan ungí glorificá huntu cuné?

¹³ Tin rasgonan notabel cu ta marca Moises i Elías como representacionnan profético apropiado di Jesus su co-herederonan ungí. Tantu Moises como Elías a sirbi como bocero di Jehova pa hopi aña. Tur dos a enfrentá e rabia di un gobernante. Den un tempo di necesidad, cada un a ser sostené dor di un famia stranhero. Tur dos a profetisá cu curashi na reynan i a para firme contra profetanan falsu. Tantu Moises como Elías a mira demostracionnan di Jehova su poder riba Ceru di Sínai (yamá tambe Horeb). Tur dos a comisioná sucesornan n’e banda oost di Jordan. I durante e dianan di tantu Moises (cu Hosué) i Elías (cu Eliseo) e mayor cantidad di milagernan a ser efectuá, cu excepcion di esnan cu a tuma lugá durante e bida di Jesus.b

14. Con e ungínan a sirbi como bocero di Jehova, mescos cu Moises i Elías?

¹⁴ Tur esaki no ta recordá nos di e Israel di Dios? Sí, en berdad. Jesus a bisa su fiel siguidónan: “Bai, pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso. I, mira! mi ta cu boso tur e dianan te n’e conclusion dje sistema di cosnan.” (Mateo 28:19, 20) Den obedencia n’e palabranan aki, cristiananan ungí a sirbi como Jehova su bocero for di Pentecoste 33 E.C. te awor. Mescos cu Moises i Elías, nan a enfrentá e rabia di gobernantenan i a duna testimonio na nan. Jesus a bisa su 12 apostelnan: “Nan lo hiba boso dilanti gobernadónan i reynan pa mi causa, como testimonio pa nan i pa e nacionnan.” (Mateo 10:18) Su palabranan a ser cumplí bes tras bes durante e historia dje congregacion cristian.—Echonan 25:6, 11, 12, 24-27, 26:3.

15, 16. Ki paralelonan tin entre e ungínan na un banda i Moises i Elías na otro banda den e asuntu di (a) sali sin temor na defensa dje berdad? (b) ricibí yudansa for di hende no-israelita?

¹⁵ Ademas, cristiannan ungí tabata personanan sin temor mescos cu Moises i Elías saliendo na defensa dje berdad contra falsedad religioso. Corda con Pablo a denunciá e profeta falsu hudiu Bar-Jesus i cu tacto pero cu firmesa a desenmascará e falsedad dje diosnan dje atenonan. (Echonan 13:6-12, 17:16, 22-31) Corda, tambe, cu den e tempu actual e resto ungí cu curashi a desenmascará cristiandad i e dunamentu di testimonio ei tabata un plaga pa cristiandad.—Revelacion 8:7-12.c

¹⁶ Ora Moises a hui dje rabia di fárao, el a haña refugio den e cas di un no-israelita, Reuel, yamá tambe Jetro. Algun tempu despues, Moises a ricibí conseho balioso en cuanto organisacion for di Reuel, kende su yu, Hobab, a guia Israel dor dje desierto.d (Exodo 2:15-22; 18:5-27; Númeronan 10:29) Hende cu no ta miembro ungí di e Israel di Dios a yuda miembronan di e Israel di Dios di igual manera? Sí, nan a ser apoyá dor di e “multitud grand” di “otro carnénan,” cu a aparecé riba esena durante e último dianan aki. (Revelacion 7:9; Juan 10:16; Isaías 61:5) Prediciendo e apoyo caluroso i amoroso cu e “carnénan” aki lo a ofrecé su rumannan ungí, Jesus a bisa nan proféticamente: “Mi a haña hamber i boso a duna mi algu di come; mi a haña sed i boso a duná mi algu di bebe. Mi tabata un stranhero i boso a ricibí mi hospitalariamente; sunú, i boso a bistí mi. Mi a bira malu i boso a cuidá mi. Mi tabata den prizon i boso a bishitá mi. . . . Di berdad mi ta bisa boso, te n’e grado cu boso a hacié na un dje mas chikitunan aki di mi rumannan, boso a hacié na mi.”—Mateo 25:35-40.

17. Con e ungínan tabatin un experencia similar na esun di Elías riba Ceru di Horeb?

¹⁷ Ademas, e Israel di Dios tabatin un experencia comparabel cu esun di Elías riba Ceru di Horeb.e Mescos cu tempu Elías tabata hui for di Reina Jezabel, e resto ungí yen di miedu a pensa cu nan trabou a ser completá na fin di Guera Mundial I. Anto, tambe mescos cu Elías, nan tabatin un encuentro cu Jehova, kende a bin pa husga e organisacionnan cu tabata pretendé di ta “e cas di Dios.” (1 Pedro 4:17; Malakías 3:1-3) Miéntras cu cristiandad a ser hañá deficiente, e resto ungí a ser reconocé como “e esclabo fiel i discreto” i a ser nombrá riba tur Jesus su pertenencianan terenal. (Mateo 24:45-47) Na Horeb, Elías a tende “un bos calmu i abou” cu a resultá di ta esun di Jehova, dunand’e mas trabou pa haci. Den e periodo ketu dje añanan despues di guera, fiel sirbidónan ungí di Jehova a tende su bos for dje páginanan di Bijbel. Nan tambe a percibí cu nan tabatin un comision pa cumpli cuné.—1 Reynan 19:4, 9-18; Revelacion 11:7-13.

18. Con manifestacionnan sobresaliente di Jehova su poder a ser canalisá mediante e Israel di Dios?

¹⁸ Finalmente, tabatin manifestacionnan sobresaliente di Jehova su poder cu a ser canalisá mediante e Israel di Dios? Despues di Jesus su morto, e apostelnan a efectuá hopi milager, pero esakinan a caba gradualmente. (1 Corintionan 13:8-13) Awendia, nos no ta mira milager den un sentido físico. Di otro banda, Jesus a bisa su siguidónan: “Cu mayor berdad mi ta bisa boso, esun cu ta ehercé fe den mi, esun ei tambe lo haci e obranan cu mi ta haci, i lo e haci obranan mayor cu esakinan.” (Juan 14:12) Esaki tabatin un cumplimentu inicial ora Jesus su disipelnan a predicá e bon nobo atrabes dje Imperio Romano den e promé siglo. (Romanonan 10:18) Obranan asta mas grandi a ser hací awe segun cu e resto ungí a hiba delantera den e predicacion dje bon nobo “den tur e tera habitá como testimonio pa tur nacion.” (Mateo 24:14) E resultado? Siglo 20 tabata testigo dje recogementu di e mayor cantidad di fiel sirbidónan dedicá di Jehova den historia. (Revelacion 5:9, 10; 7:9, 10) Ki evidencia magnífico di Jehova su poder!—Isaias 60:22.

Jesus Su Rumannan Ta Bini den Gloria

19. Na ki tempo Jesus su rumannan ungí ta ser mirá hutu cuné den gloria?

¹⁹ Ora e resto di Jesus su rumannan ungí finalisá nan curso terenal, nan ta ser glorificá huntu cuné. (Romanonan 2:6, 7; 1 Corintionan 15:53; 1 Tesalonicensenan 4:14, 17) Asina nan ta bira rey i sacerdotenan inmortal den e Reino celestial. Huntu cu Jesus, nan e ora ei lo “pastoreá e pueblo cu un bara di heru di manera cu nan lo ser kibrá na pida-pida manera wea di klei.” (Revelacion 2:27; 20:4-6; Salmo 110:2, 5, 6) Huntu cu Jesus, nan lo sinta riba trononan pa husga “e diesdos tribunan di Israel.” (Mateo 19:28) E creacion cu ta suspirando a spera e sucesonan aki ansiosamente, cuanan ta parti di “e revelacion dje yunan di Dios.”—Romanonan 8:19-21; 2 Tesalonicensenan 1:6-8.

20. (a) Relacioná cu ki prospecto e transfiguracion a fortalecé Pedro su fe? (b) Con e transfiguracion ta fortalecé cristianan awe?

²⁰ Pablo a papia dje revelacion di Jesus durante e “tribulacion grandi” ora el a skirbi: “E ta bini pa ser glorificá en coneccion cu su santunan i pa ser considerá den e dia ei cu admiracion en coneccion cu tur esnan cu a ehercé fe.” (Mateo 24:21; 2 Tesalonicensenan 1:10) Ki un prospecto magnífico esei ta pa Pedro, Santiago, Juan i tur cristian ungí cu spiritu! E transfiguracion a fortalecé Pedro su fe. Siguramente lesando tocante dje ta fortalecé nos fe tambe i ta fortificá nos confiansa cu pronto Jesus lo “recompensá cada un segun su comportacion.” Fiel cristiannan ungí cu ta na bida ainda ta mira con nan confiansa cu nan lo ser glorificá huntu cu Jesus ta ser confirmá. Sabiendo cu lo e salba nan atrabes dje fin dje mal sistema di cosnan aki pa drenta den un glorioso mundu nobo, e fe dje otro carnénan ta ser fortalecé. (Revelacion 7:14) Ki un animacion pa para firme te n’e fin! I e vision aki por siña nos hopi mas, manera nos lo mira den e siguiente artículo.

[Nota]

Bo Ta Corda?

◻ Ken a aparecé huntu cu Jesus den e transfiguracion?

◻ Con e fe dje apostelnan a ser fortalecé dor dje transfiguracion?

◻ Ora Moises i Elías a aparecé “cu gloria” huntu cu Jesus den e transfiguracion, ken nan a representá?

◻ Ki paralelonan tin entre Moises i Elías na un banda i e Israel di Dios na otro banda?

[Plachi na página 10]

E fransfiguracion a forfalecé e fe di cristiannan di pasado i dje tempu actual