Job Su Recompensa ​—⁠Un Fuente Di Speransa

“Jehova . . . a bendicioná e fin di Job despues mas cu su principio.” ​—⁠JOB 42:⁠12.

JEHOVA “ta bira e recompensador di esnan cu ta busk’é sinceramente.” (Hebreo 11:⁠6) Tambe e ta motivá su pueblo dedicá pa duna testimonio cu curashi, asta si pruebanan a haci nan mes débil cu hende morto. (Job 26:⁠5; Revelacion 11:​3, 7, 11) Esei a resultá di ta cierto den e caso di Job cu su sufrimentu. Aunke el a ser difamá dor di tres consolador falsu, e no a ser silenciá pa temor di hende. Mas bien, el a duna un testimonio cu curashi.

² Hopi Testigo di Jehova djawe a sufri gran persecucion i dificultad asina cu a hiba nan te na rand di morto. (2 Corintio 11:23) Sin embargo, mescos cu Job, nan a demostrá amor pa Dios i a practicá husticia. (Ezekiel 14:​14, 20) Tambe nan a logra pasa atrabes di nan pruebanan, determiná pa agradá Jehova, fortalecí pa duna un testimonio cu curashi, i yená cu berdadero speransa.

Job Ta Duna un Testimonio cu Curashi

³ Den su discurso final, Job a duna un testimonio asta mas grandi cu el a duna anteriormente. El a silenciá completamente su consoladornan falsu. Cu sarcasmo skerpi, el a bisa: “O, di cuantu yudansa bo tabata pa unu sin poder!” (Job 26:⁠2) Job a elogiá Jehova, kende su poder ta cologá nos globo terenal na nada den espacio i ta wanta e nubianan cargá cu awa ariba dje tera. (Job 26:​7-9) Sin embargo, Job a bisa cu tal milagernan ‘ta nada mas cu e randnan di Jehova su camindanan.’​—⁠Job 26:⁠14.

⁴ Sigur di su inocencia, Job a declará: “Te ora mi muri lo mi no kita mi integridad for di mi mes!” (Job 27:⁠5) Contrali n’e acusacionnan falsu cu a ser lansá contra dje, e no a haci nada pa merecé loke a bini riba dje. Job tabata sa cu Jehova no ta tende e oracionnan di apóstatanan sino lo recompensá wardadornan di integridad. Esaki por wel recordá nos cu pronto e tempestad di Armagedon lo kita e malbadonan for di nan lugá di poder, i nan lo no scapa di Dios su man sin piedad. Te n’e tempu ei, Jehova su pueblo lo cana den nan integridad.​—⁠Job 27:​11-23.

⁵ Imaginá e trio ‘sabí den cos di mundu’ scuchando segun cu Job a mustra cu hende a usa su abilidadnan pa haña oro, plata i otro tesoronan den tera i den laman. “Pero,” el a bisa, “un sacu yen di sabiduria ta bal mas cu unu yen di perla.” (Job 28:18) Job su consoladornan falsu no por a cumpra berdadero sabiduria. Su fuente ta e Creador di bientu, awaceru, weerlicht i bos. En berdad, e ‘temor reverencial di Jehova​—⁠esei ta sabiduria, i pa apartá di loke ta malu ta comprendimentu.’​—⁠Job 28:⁠28.

⁶ Apesar di su sufrimentu, Job no a stop di sirbi Jehova. En bes di alehá for dje Haltísimo, e homber di integridad aki a anhelá pa e “intimidad cu Dios” cu e tabatin promé. (Job 29:⁠4) Job no tabata bromando ora el a conta con el a ‘rescatá esnan afligí, a bisti su mes cu husticia, i tabata un berdadero tata p’e pobernan.’ (Job 29:​12-16) Mas bien, e tabata citando e echonan di su bida como un fiel sirbidor di Jehova. Abo a edificá un registro excelente asina? Naturalmente, Job tabata desenmascarando tambe e falsedad dje acusacionnan cu e tres fingidornan hipócrita a lanta.

⁷ Job a ser harí dor di hombernan mas hóben cuné, ‘kende nan mayornan lo e no a pone ni sikiera cu e cachónan di su tou.’ El a ser odiá i scupí. Gravemente afligí manera e tabata, tog Job no a ser mustrá ningun consideracion. (Job 30:​1, 10, 30) Sin embargo, debí cu e tabata henteramente dedicá na Jehova, e tabatin un concenshi limpi i por a bisa: “Lo e pisá mi den un balansa exacto i Dios lo yega di conocé mi integridad.” (Job 31:⁠6) Job no tabata un adúltero of un conspirador, i e no a keda sin yuda esnan den necesidad. Aunke e tabata ricu, e nunca a confia den rikesa material. Ademas, Job no participá den idolatria dunando debocion na cosnan sin bida, manera luna. (Job 31:​26-28) Confiando den Dios, el a pone un ehempel excelente como un wardador di integridad. Apesar di tur su sufrimentu i e presencia di consoladornan falsu, Job a haci un defensa maestral i a duna un testimonio espléndido. Ora su palabranan a yega na un fin, el a mira na Dios como su Hues i Recompensador.​—⁠Job 31:​35-40.

Elihú Ta Papia

⁸ Ei cerca tabatin e hóben Elihú, un desendiente di Nahor su yu Buz i pues un famia leu di Jehova su amigu Abraham. (Isaías 41:⁠8) Elihú a mustra respet pa hende di mas edad scuchando na ámbos banda dje debate. Sin embargo, el a papia cu curashi relacioná cu cosnan riba cua nan tabata ekibocá. Por ehempel, su rabia a cende contra Job cu a “declará su mes alma hustu mas bien cu Dios.” Elihú su furia tabata specialmente dirigí contra e consoladornan falsu. Nan declaracionnan a parce di exaltá Dios pero realmente a reproch’é dor di a tuma Satanas su banda dje controversia. “Yen di palabra” i impulsá pa spiritu santu, Elihú tabata un testigo imparcial di Jehova.​—⁠Job 32:​2, 18, 21.

⁹ Job a bira mas preocupá cu su mes vindicacion en bes di cu esun di Dios. En realidad, el a debatí cu Dios. Sin embargo, ora Job su morto a bira inminente, tabatin un indicacion di restoracion. Con asina? Wel, Elihú a ser impulsá pa bisa cu Jehova a faborecé Job cu e mensahe aki: “Libr’é di baha den e buracu! Mi a haña un rescate! Laga su carni bira mas frescu cu den hubentud; lagu’e regresá n’e dianan di su vigor hubenil.”​—⁠Job 33:​24, 25.

¹⁰ Elihú a corigí Job ora el a bisa cu no tin probecho den haña placer den Dios dor di mantené integridad. Elihú a bisa: “Sea leu for dje Dios berdadero p’e actua di un manera malbado, i p’e Todopoderoso actua inhustamente! Pasobra segun e manera cu hende terenal ta actua lo e recompens’é.” Job a actua imprudentemente ora el a enfatisá su mes husticia, pero el a haci esei sin suficiente conocimentu i perspicacia. Elihú a agregá: “Laga Job ser probá te n’e límite en cuanto su contestanan entre hende cu ta practicá loke ta dañoso.” (Job 34:​10, 11, 35, 36) Di igual manera, nos fe i integridad por ser probá completamente solamente si nos ta ser “probá te n’e límite” den algun manera. No obstante, nos Tata celestial amoroso lo no laga nos ser tentá mas ayá di loke nos por soportá.​—⁠1 Corintio 10:⁠13.

¹¹ Segun cu Elihú a continuá, atrobe el a mustra cu Job tabata poniendo demasiado énfasis riba su mes husticia. Mester a fiha atencion riba nos Magnífico Formador. (Job 35:​2, 6, 10) Dios “lo no conservá ningun malbado bibu, pero e huicio di esnan afligí lo e duna,” Elihú a bisa. (Job 36:⁠6) Ningun hende por exigí cuenta di Dios i bisa cu e tabata inhustu. Dios ta mas sublime di loke nos por sa, i su añanan ta ininvestigablemente infinito. (Job 36:​22-26) Ora nos ta ser probá dolorosamente, corda cu nos Dios eterno ta hustu i lo recompensá nos pa nos fiel actividadnan na su alabansa.

¹² Miéntras Elihú tabata papia, un tempestad tabata menasando. Segun cu e tempestad a yega cerca, Elihú su curason a cuminsá bula i tembla. El a papia di cosnan grandi cu Jehova a haci i a bisa: “Presta oido na esaki, O Job; para ketu i mustra bo mes atento n’e obranan maraviyoso di Dios.” Mescos cu Job, nos tin cu considerá Dios su obranan maraviyoso i dignidad inspirador di temor. “En cuanto e Todopoderoso, nos no a sonde’é,” Elihú a bisa. “E ta sublime den poder, i rectitud i abundancia di husticia lo e no menospreciá. P’esei laga hende tem’é.” (Job 37:​1, 14, 23, 24) Elihú su expresionnan di conclusion ta recordá nos cu ora Dios bai ehecutá huicio riba e malbadonan pronto, lo e no menospreciá rectitud i husticia i lo conservá esnan cu ta tem’é como su adoradornan reverencial. Ki un privilegio pa ta entre tal wardadornan di integridad cu ta reconocé Jehova como e Soberano Universal! Wanta mescos cu Job a wanta, i nunca laga e Diabel alehá bo for di bo lugá bendicioná entre e multitudnan felis aki.

Jehova Ta Contestá Job

¹³ Ki asombrá Job mester tabata ora Jehova a papia cuné desde e tempestad! E tempestad ei tabata un obra di Dios, no manera e bientu grandi cu Satanas a usa pa tumba e cas i mata Job su yunan. Job a keda boca habrí ora Dios a puntr’é: “Unda bo tabata ora mi a funda e tera? . . . Ken a pone su piedra di skina, ora e streanan di mainta a sclama huntu gososamente, i tur e yunan di Dios a cuminsá grita den aplauso?” (Job 38:​4, 6, 7) Jehova a haci Job un pregunta tras di otro tocante laman, e bistí di nubia di laman, aurora, portanan di morto, lus i scuridad i e constelacionnan di strea. Job no por a bisa nada ora el a ser puntrá: “Bo a yega di conocé e statutonan di cielu?”​—⁠Job 38:⁠33.

¹⁴ Otro preguntanan a indicá cu promé cu hende a ser creá i duná dominio riba piscá, para, bestia i criaturanan cu ta lastra abou, Dios tabata percurando pa nan​—⁠sin ningun yudansa of conseho humano. Jehova su preguntanan mas aleu a mencioná criaturanan manera toro salbahe, abestrus i cabai. Job a ser puntrá: “Ta riba bo ordu un águila ta bula bai laira i ta traha su neshi na haltu?” (Job 39:27) Naturalmente cu no! Imaginá Job su reaccion ora Dios a puntr’é: “Mester tin cualkier debate entre un persona pulushi cu e Todopoderoso?” Nada straño cu Job a bisa: “Mira! Mi a yega di ta di poco importancia. Kico lo mi respondé bo? Mi man mi a pone riba mi boca.” (Job 40:​2, 4) Siendo cu Jehova semper tin rason, si un dia nos mester yega di ser tentá pa keha contra dje, nos mester ‘pone nos man riba nos boca.’ E preguntanan di Dios tambe ta magnificá su superioridad, su dignidad i su fortalesa, manera su creacion ta manifestá.

Behemot i Leviatan

¹⁵ Siguientemente Jehova a mencioná Behemot, cu ta ser considerá generalmente di ta un hipopótamo [nijlpaard]. (Job 40:​15-24) Remarcabel pa su tamaño inmenso, peso grandi i cueru taai, e animal herbívora aki ‘ta come yerba berde.’ Fuente di su poder i energia ta den su heupnan i e tendonnan (pees) di su barica. E wesunan di su pianan ta mes fuerte cu “tubu di koper.” Behemot no ta drenta den pánico den awanan torencial pero ta landa fácilmente contra e coriente di awa.

¹⁶ Tambe Dios a puntra Job: “Bo por saca Leviatan cu un anzue, of bo por tene su lenga abou cu un cabuya?” E descripcion di Leviatan ta cuadra cu e crocodil. (Job 41:​1-34) Lo e no cera un pacto di pas cu ningun hende, i ningun hende sabí ta asina tribí p’e bai excitá e reptil aki. Flechanan no ta core cuné, i “e ta hari e sagudimentu ruidoso di un gabalina.” Un Leviatan rabiá ta haci e profundidadnan herebé mescos cu un wea di ungwento cu ta cushiná. E echo cu Leviatan i Behemot tabata hopi mas poderoso cu Job, a yud’é humiyá su mes. Nos tambe mester reconocé humildemente cu nos no ta poderoso riba nos mes. Nos mester dje sabiduria i fortalesa cu Dios ta duna pa evitá e djentenan skerpi di Satanas, e Colebra, i pa cumpli cu nos asignacionnan den Jehova su sirbishi.​—⁠Filipense 4:13; Revelacion 12:⁠9.

¹⁷ Completamente humiyá, Job a reconocé su punto di bista robes i a admití cu el a papia sin conocimentu. Sin embargo, el a expresá fe cu lo e “contemplá Dios.” (Job 19:​25-27) Con esei por a sosodé, siendo cu ningun hende por mira Jehova i sigui biba? (Exodo 33:20) En realidad, Job a mira e manifestacion di poder divino, a tende palabra di Dios, i su wowo di comprendimentu a ser habrí pa mira e berdad tocante Jehova. P’esei Job ‘a hala tras i a repentí den stof i shinishi.’ (Job 42:​1-6) E hopi preguntanan cu e tabata incapas pa contestá a proba Dios su supremacia i a mustra con chikitu hende ta, asta un hende asina dedicá na Jehova manera Job tabata. Esaki ta yuda nos mira cu nos interesnan no mester ser poné riba e santificacion di Jehova su nomber i e vindicacion di su soberania. (Mateo 6:​9, 10) Nos interes primario mester ta pa warda integridad na Jehova i onra su nomber.

¹⁸ Pero kico dje consoladornan falsu cu a kere den nan mes husticia? Jehova debidamente por a mata Elifas, Bildad i Zofar dor cu nan no a papia e berdad tocante dje, manera Job sí a haci. “Tuma pa boso mes siete toro i siete chubat’i carné i bai cerca mi sirbidor Job,” Dios a bisa, “i boso tin cu ofrecé un sacrificio kimá na fabor di boso mes; i mi sirbidor Job mes lo resa pa boso.” E trio tabatin cu humiyá nan mes pa cumpli cu esei. E wardador di integridad, Job, mester a resa pa nan i Jehova a haña su oracion aceptabel. (Job 42:​7-9) Pero kico dje esposa di Job, kende a inst’é pa maldicioná Dios i muri? Ta parce cu el a ser reconciliá cu Job mediante e misericordia di Dios.

Recompensanan Primintí Ta Duna Nos Speransa

¹⁹ Asina cu Job a stop di preocupá tocante su sufrimentu i a ser rebibá den sirbishi di Dios, Jehova a cambia asuntunan p’e. Despues cu Job a resa p’e trio, Dios ‘a bira bek su condicion di cautiverio’ i a dun’é ‘tur loke tabata di dje na dobel cantidad.’ Jehova a demostrá Su superioridad riba e Diabel dor di a para Satanas su man causante di malesa i milagrosamente a cura Job. Tambe Dios a core cu e trupanan di demoño i a tene nan bou di control, poniendo atrobe un trankera rond di Job cu Su campamentu angelical.​—⁠Job 42:10; Salmo 34:⁠7.

²⁰ Job su rumannan homber i muher, i conocínan di antes a sigui bini pa come cuné, compasioná cuné i consol’é riba e calamidad cu Jehova a permití bini riba dje. Nan cada un a duna Job placa i un renchi di oro. Jehova a bendicioná e fin di Job mas cu su principio, di manera cu el a yega di tin 14.000 carné, 6.000 camel, 1.000 tou di baca i 1.000 buricu hembra. Tambe Job a bin haña siete yu homber i tres yu muher, e mésun cantidad cu e tabatin anteriormente. Su yu muhernan​—⁠Jemima, Kesías i Keren-hapuc​—⁠tabata e muhernan di mas bunita den e pais, i Job a duna nan un herencia entre nan rumannan homber. (Job 42:​11-15) Ademas, Job a biba 140 aña mas i a mira cuater generacion di su desendientenan. E relato ta concluí: “Gradualmente Job a muri, bieu i satisfecho di dianan.” (Job 42:​16, 17) E extension di su bida tabata e obra milagroso di Jehova Dios.

²¹ E relato bíblico tocante Job ta haci nos mas conciente di Satanas su trikinan i e ta yuda nos mira con soberania universal ta relacioná cu integridad humano. Mescos cu Job, tur hende cu ta stima Dios lo ser poní na prueba. Pero nos por wanta mescos cu Job a wanta. El a sobrebibí su pruebanan cu fe i speransa, i su recompensanan tabata hopi. Como Jehova su sirbidornan awe, nos tin berdadero fe i speransa. I ki un speransa magnífico e Gran Recompensador a pone dilanti cada un di nos! Teniendo na mente e recompensa celestial lo yuda esnan ungí sirbi Dios lealmente p’e resto di nan bida riba tera. Hopi hende cu tin speransa terenal lo no muri nunca mas, pero esnan cu sí ta muri lo ser recompensá cu un resureccion den Paradijs riba tera, huntu cu Job mes. Cu tal berdadero speransa den curason i mente, laga tur cu ta stima Dios proba cu Satanas ta un mentiroso dor di para firmemente na banda di Jehova como wardador di integridad i apoyador leal di su soberania universal.

[Study Questions]

1. Kico Jehova ta haci pa su pueblo, asta ora pruebanan ta debilitá nan bastante?

2. Aunke nan a sufri persecucion i dificultad, con Testigonan di Jehova a pasa atrabes di nan pruebanan?

3. Ki clase di testimonio Job a duna den su discurso final?

4. Kico Job a bisa tocante integridad, i pakico e por a expresá su mes den e manera ei?

5. Con Job a definí berdadero sabiduria?

6. Pakico Job a papia tocante su bida di antes?

7. Ki clase di persona Job tabata?

8. Ken Elihú tabata, i con el a manifestá tantu respet como curashi?

9. Con Elihú a indicá cu lo tin un restoracion pa Job?

10. Te na ki grado Job mester a ser probá, pero di kico nos por ta sigur en bista di 1 Corintio 10:⁠13?

11. Ora nos ta ser probá dolorosamente, kico nos mester corda?

12. Kico Elihú su expresionnan di conclusion ta indicá tocante Dios su ehecucion di huicio riba e malbadonan?

13, 14. (a) Relacioná cu kico Jehova a cuminsá haci Job pregunta? (b) Ki puntonan nos por siña for di otro preguntanan cu Dios a haci Job?

15. Behemot ta ser considerá generalmente ki sorto di animal, i cua ta algun di su característicanan?

16. (a) E descripcion di Leviatan ta cuadra cu cua criatura, i cua ta algun dato di dje? (b) E poder di Behemot i Leviatan por indicá kico en cuanto cumplimentu cu asignacionnan den Jehova su sirbishi?

17. (a) Di ki manera Job a “contemplá Dios”? (b) Kico a ser probá dor dje preguntanan cu Job tabata incapas pa contestá, i con esaki por yuda nos?

18. Kico Job su consoladornan falsu tabatin cu haci?

19. En coneccion cu Job, con Jehova a demostrá Su superioridad riba e Diabel?

20. Den ki maneranan Jehova a recompensá i bendicioná Job?

21. Con e relato bíblico tocante Job ta yuda nos, i kico nos mester ta determiná pa haci?

[Caption on page 18]

Jehova su declaracionnan tocante Behemot i Leviatan a yuda haci Job humilde

[Caption on page 20]

Con Lo Bo Respondé?

◻ Ki tabata algun punto cu Job a trece dilanti den su contesta final na su consoladornan falsu?

◻ Con Elihú a proba di ta un testigo imparcial di Jehova?

◻ Cua tabata algun pregunta di Dios na Job, i ki efecto nan tabatin?

◻ Con abo a beneficiá for dje relato bíblico tocante Job?