Ken por Libra Hende Ku Ta Sklama pa Yudansa?

“O Dios, duna rei bo huisionan . . . Pasobra e lo libra esun den nesesidat ora ku e sklama pa yudansa.”​—SAL. 72:​1, 12.

 1. Kiko e kaso di David ta siña nos tokante e miserikòrdia di Dios?

E PALABRANAN ei ta masha alentador! Aparentemente, ta Rei David di Israel di antigwedat a skirbi nan.a Hopi aña promé ku el a skirbi esaki, el a sinti remordimentu despues ku el a kometé adulterio ku Bètsabé i a roga Dios: “Segun e grandesa di bo kompashon, kita mi transgreshonnan. . . . Mi piká ta semper mi dilanti. . . . Mira, den inikidat mi a wòrdu formá, i den piká mi mama a konsebí mi.” (Sal. 51:​1-5) Yehova, den su miserikòrdia, ta tene kuenta ku e kondishon imperfekto ku nos a heredá.

 2. Kiko Salmo 72 ta konta nos?

² Yehova ta komprondé e situashon lamentabel ku nos ta den. Manera Beibel a profetisá, e Rei ungí di Dios “lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat.” (Sal. 72:​12, 13) Kon nos lo haña e liberashon ei? Salmo 72 ta konta nos. Originalmente David a skirbi e kantika akí en konekshon ku e reinado di su yu Salomon, ma e salmo ta duna nos un indikashon tambe di e manera ku e gobernashon di Hesukristu, e Yu di Dios, lo libra humanidat di angustia.

Un Bista di Antemano di e Futuro Gobernashon di Hesus

 3. Kiko Salomon a pidi, i kiko Dios a dun’é?

³ David, den su behes, a duna òrdu pa hasi Salomon rei, i poko despues a dun’é instrukshonnan spesífiko, ku e rei nobo a kumpli kuné fielmente. (1 Rei. 1:​32-35; 2:​1-3) Mas despues, Yehova a aparesé na Salomon den un soño i a bis’é: “Pidi loke bo kier pa mi duna bo.” Un kos so Salomon a pidi: “Duna bo sirbidó un kurason di komprondementu pa husga bo pueblo, pa diserní entre bon i malu.” Dios a kumpli ku Salomon su petishon humilde i a dun’é asta mas ku esei.​—1 Rei. 3:​5, 9-13.

 4. Kon un reina di e tempu ei a deskribí e reinado di Salomon?

⁴ Ku e bendishon di Yehova, e reinado di Salomon a resultá den e periodo di pas i prosperidat di mas remarkabel ku un gobièrnu humano a yega di logra. (1 Rei. 4:25) Un di e hendenan ku a bin wak e manera di goberná di Salomon tabata e reina di Saba, kompañá pa un delegashon inmenso. E reina ei a bisa Salomon: “Tabata bèrdat loke mi a tende na mi mes tera . . . Ni mitar nan no a konta mi. Den sabiduria i prosperidat bo ta surpasá e palabranan ku mi a tende.” (1 Rei. 10:​1, 6, 7) Sinembargo, Hesus a desplegá hopi mas sabiduria, i p’esei, ku rason e por a bisa tokante su mes: “Mira, mas ku Salomon t’aki”!​—Mat. 12:42.

Bendishonnan Durante Reinado di e Salomon Mayor

 5. Kiko Salmo 72 ta revelá, i loke Hesus a hasi riba tera ta duna nos ki idea?

⁵ Laga nos analisá awor algun detaye di Salmo 72 ku e meta pa komprondé mihó e bendishonnan ku lo tin durante e reinado di Hesukristu, e Salomon Mayor. (Lesa Salmo 72:​1-4.) E salmo akí ta revelá kon Yehova ta mira “e gobernashon” di su Yu, Hesukristu, e “Prens di Pas.” (Isa. 9:​6, 7) Bou di e guia di Dios, e Salomon Mayor lo ‘husga [òf, “defendé,” NW] e afligínan di e pueblo i salba e yunan di esnan den nesesidat.’ Lo reina pas i hustisia durante su gobernashon. De echo, loke Hesus a hasi ora e tabata riba tera ta yuda nos haña un idea di loke su Reinado di Mil Aña lo logra.​—Rev. 20:4.

 6. Menshoná algun kos ku Hesus a hasi ku ta duna nos un idea di e bendishonnan ku lo tin bou di mando di e Reino.

⁶ Konsiderá algun kos ku Hesus a hasi riba tera i ku ta duna nos un idea di loke lo e hasi pa humanidat komo kumplimentu di Salmo 72. Sin duda nos ta keda impreshoná pa e gran kompashon ku el a demostrá na hende ku tabata sufri. (Mat. 9:​35, 36; 15:​29-31) Por ehèmpel, un hòmber ku tabatin lepra a bini serka Hesus i rog’é: “Si bo kier, bo por hasi mi bira limpi.” Hesus a kontest’é: “Mi kier, sea limpi.” I e hòmber a kura! (Mar. 1:​40-42) Mas despues, Hesus a topa un biuda, kende su úniko yu a muri. Hesus “a sinti kompashon p’e” i a bisa: “Lanta!” I e yu hòmber di e biuda a resusitá!​—Luk. 7:​11-15.

7, 8. Menshoná algun manera ku Hesus a demostrá su poder di kura.

⁷ Ta Yehova a duna Hesus poder pa hasi milager. Esaki a sali na kla, por ehèmpel, den e kaso di “un muhé ku diesdos aña largu tabatin un derame di sanger, i ku a sufri mashá na man di hopi dòkter, i ku a gasta tur loke e tabatin sin ku el a wòrdu yudá, ma mas bien a bira pió.” E muhé akí a drenta meimei di un multitut i mishi ku Hesus, lokual tabata un violashon di Lei pa un hende ku tin ‘derame di sanger.’ (Lev. 15:​19, 25) Hesus a sinti ku poder a sali for di dje, i el a puntra ta ken a mishi kuné. E muhé, ‘tur spantá i na temblamentu, a tira su kurpa abou su dilanti, i a kont’é tur e bèrdat.’ Hesus a realisá ku ta Yehova a kura e muhé, i p’esei el a bis’é bondadosamente: “Mi yu, bo fe a salba bo; bai na pas i sea kurá di bo aflikshon.”​—Mar. 5:​25-27, 30, 33, 34.

⁸ E poder di kura ku Dios a duna Hesus no solamente a benefisiá e hendenan ku el a kura, sino ku siguramente lo mester a laga un impreshon profundo tambe riba opservadónan. Por ehèmpel, hopi opservadó sin duda a keda impreshoná ora nan a mira Hesus kura hende promé ku su famoso Sermon Riba Seru. (Luk. 6:​17-19) Ora Juan Boutista a manda dos mensahero serka Hesus pa konfirmá ku t’e tabata e Mesias, nan a haña Hesus ‘na e momento ei ta kura hopi hende di malesa, di aflikshon i di spiritu malu i ta duna bista na hopi ku tabata siegu.’ Al final Hesus a bisa e dos mensaheronan: “Bai konta Juan loke boso a mira i tende: e siegunan ta mira, e lamnan ta kana, e leprosonan ta wòrdu hasí limpi, e surdunan ta tende, e mortonan ta wòrdu lantá i na e pobernan evangelio ta wòrdu prediká.” (Luk. 7:​19-22) E mensahe ei lo mester tabata un gran animashon pa Juan!

 9. E milagernan di Hesus a duna hende un idea di kiko?

⁹ Ta bèrdat ku e alivio di sufrimentu ku e hendenan a haña di Hesus durante su ministerio riba tera tabata un kos temporal. E hendenan ku el a kura òf resusitá a muri despues. Ma e milagernan ku Hesus a hasi ora e tabata riba tera a duna un idea di e bendishonnan eterno ku humanidat lo gosa di dje bou di su gobernashon Mesiániko.

Pronto Henter e Tera Lo Ta un Paradeis!

10, 11. (a) Kuantu tempu e bendishonnan di Reino lo dura, i kon Hesus su gobernashon lo ta? (b) Ken lo ta serka Kristu den Paradeis, i kiko e tin ku hasi pa biba pa semper?

¹⁰ Purba imaginá kon bida lo ta den Paradeis riba tera. (Lesa Salmo 72:​5-9.) E sirbidónan di e úniko Dios berdadero lo por disfrutá di bida den Paradeis tanten ku solo i luna ta eksistí, pues, pa semper! Rei Hesukristu lo ta un fuente di alivio refreskante, ‘meskos ku áwaseru riba yerba kòrtá, i meskos ku yobida abundante ku ta muha tera.’

¹¹ E speransa di biba pa semper den un paradeis riba tera no ta konmové bo segun ku bo ta imaginá kon e salmo akí lo kumpli? E malechor kologá na staka tambe lo mester a sintié masha emoshoná ora Hesus a bis’é: “Lo bo ta serka mi den Paraiso.” (Luk. 23:43) Durante Hesus su Reinado di Mil Aña, e hòmber ei lo ser resusitá, i, si e someté su mes na e gobernashon di Kristu, lo e por biba pa semper riba tera i disfrutá di salú perfekto i felisidat.

12. Ki oportunidat hende inhustu ku ser resusitá lo haña durante Kristu su Reinado di Mil Aña?

¹² Durante e gobernashon di e Salomon Mayor, Hesukristu, ‘e hustu lo floresé,’ es desir, lo e bona òf prosperá. (Sal. 72:7) Kristu lo demostrá su amor i kuido tierno na abundansia, meskos ku tempu e tabata riba tera. Den e mundu nobo ku Dios a primintí, tur hende—asta e “malbadonan,” òf inhustunan, ku ser resusitá—lo haña e maravioso oportunidat di obedesé e normanan di Yehova i keda biba. (Echo. 24:15) Di mes, hende ku no ke aseptá e rekisitonan di Dios lo no ser permití di sigui biba i asina daña e pas i trankilidat di e mundu nobo.

13. Te kon leu e Reino lo goberná, i pakiko nunka lo no bini un fin na su pas?

¹³ E gobernashon di e Salomon Mayor lo abarká henter e tera, i e salmo ta indiká esei ku e siguiente palabranan: “Lag’é goberná tambe di laman pa laman, i for di Riu Eufrates te na e finnan di tera. Laga e tribunan di desierto bùig su dilanti, i su enemigunan lembe stòf.” (Sal. 72:​8, 9) Sí, Hesukristu lo goberná henter e tera. (Zak. 9:​9, 10) Hende ku ta apresiá su gobernashon i e bendishonnan ku esei ta trese lo “bùig” p’e, es desir, nan lo someté nan mes boluntariamente na dje. Ma e pekadónan ku no repentí lo ser kòrtá kitá for di tera, na moda di papia, asta “na edat di shen aña.” (Isa. 65:20) Nan lo “lembe stòf.”

Hesus Tin Komprenshon pa Nos

14, 15. Kon nos por sa ku Hesus ta komprondé loke hende ta sinti i “lo libra esun den nesesidat ora ku e sklama pa yudansa”?

¹⁴ Humanidat pekaminoso ta den un situashon hopi tristu i mester di yudansa! Ma tin speransa. (Lesa Salmo 72:​12-14.) Hesus, e Salomon Mayor, tin komprenshon pa nos, pasobra e ta komprondé ku nos ta imperfekto. Ademas, el a sufri pa motibu ku el a defendé hustisia, i Dios a permitié konfrontá algun prueba riba su mes forsa. Figurá bo ku Hesus tabatin asina un preshon emoshonal ku “su sodó a bira manera gotanan di sanger ku tabata kai abou na suela.” (Luk. 22:44) Mas despues, riba e staka di tormento, el a sklama: “Mi Dios, mi Dios, pakiko bo a bandoná mi?” (Mat. 27:​45, 46) Apesar di tur loke Hesus a sufri, i maske Satanas a hasi todo por todo pa kit’é for di Yehova, el a keda fiel te na fin.

¹⁵ Nos por tin sigur ku Hesus ta mira nos doló i “lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é.” Ku e mesun amor i komprenshon ku su Tata, Hesus lo “tende esnan den nesesidat” i ‘kura esnan di kurason kibrá, i mara nan heridanan.’ (Sal. 69:33; 147:3) Hesus “por kompadesé di nos debilidatnan,” pasobra el “a wòrdu tentá [òf, “poné na prueba,” NW] den tur kos meskos ku nos.” (Heb. 4:15) Nos ta masha kontentu ku Rei Hesukristu ta goberná awor den shelu i ta ansioso pa trese alivio pa hende ku ta sufri!

16. Dikon Salomon por tabatin komprenshon pa su siudadanonan?

¹⁶ Salomon tambe sin duda a tene “kompashon di e pober.” Ademas, su propio bida tabata marká pa susesonan tristu i troumátiko. Por ehèmpel, su ruman hòmber Amnon a violá su ruman muhé Tamar, i su otro ruman hòmber Absalon a laga mata Amnon pa esei. (2 Sam. 13:​1, 14, 28, 29) Despues, Absalon a bini ku un gòlpi di estado pa purba kita e trono for di David, ma el a frakasá, i Joab a mat’é. (2 Sam. 15:​10, 14; 18:​9, 14) Mas despues, Salomon su ruman hòmber Adonias a trata di bira rei. Si esei lo a sosodé, sin duda esaki lo a nifiká morto pa Salomon. (1 Rei. 1:5) Un otro kos ku tambe ta indiká ku Salomon a komprondé bon kla kiko ta sufrimentu humano ta loke el a bisa den orashon durante inougurashon di e tèmpel di Yehova. El a pidi en konekshon ku su siudadanonan: “Kada un konosé su mes aflikshon i su mes doló . . . [abo, Yehova] pordoná, i duna kada un segun tur su kamindanan.”​—2 Kró. 6:​29, 30.

17, 18. Ki doló algun sirbidó di Dios tin ku lucha kuné, i kiko ta yuda nan?

¹⁷ Awe, nos kada un tin ‘nos mes doló,’ i kisas esei ta bini di kosnan ku nos a pasa den bida. Maria,b un Testigu di Yehova di 30 i piku aña, a skirbi: “Mi tin tur motibu pa ta felis, pero hopi biaha e rekuerdonan di mi pasado ta yena mi ku bèrgwensa i rabia. E ora ei mi ta sinti un tristesa profundo i ta kuminsá yora komo si fuera ta ayera tur kos a sosodé. E rekuerdonan ei ta profundamente grabá, i te ainda nan ta laga mi sinti mi masha kulpabel i inútil.”

¹⁸ Hopi sirbidó di Dios ta komprondé e sintimentunan ei bon-bon, pasobra nan tambe tin nan. Pero kiko por duna nan e fortalesa nesesario pa perseverá? Maria a bisa: “Bon amigu i e rumannan den kongregashon awor ta duna mi felisidat. Tambe mi ta purba konsentrá riba loke Yehova a primintí pa futuro, i mi tin sigur ku e tempu ei mi sklamashon pa yudansa lo kambia den gritu di alegria.” (Sal. 126:5) Pues, nos tin ku pone nos speransa den e Yu di Dios, esun ku el a apuntá komo Gobernante. Beibel a profetisá relashoná kuné: “E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia; i nan sanger lo ta presioso den su bista.” (Sal. 72:​13, 14) Ki un gran konsuelo esaki ta!

Un Mundu Nobo di Abundansia Ta Spera Nos

19, 20. (a) Manera Salmo 72 ta indiká, ki problema e Reino lo solushoná? (b) Ken ta esun prinsipal ku mester risibí krédito pa e Reino di Kristu, i kiko abo ta pensa di loke e Reino lo logra?

¹⁹ Purba imaginá un biaha mas e futuro bunita ku hende hustu lo disfrutá di dje den Dios su mundu nobo bou di gobernashon di e Salomon Mayor. Beibel ta primintí: “Lo tin abundansia di maishi den e tera, riba kabes di e serunan.” (Sal. 72:16) Komo ku normalmente hende no ta kultivá maishi riba seru, e palabranan akí ta enfatisá kon produktivo e tera lo ta. Lo e produsí “manera . . . Líbano,” un region ku den tempu di e reinado di Salomon a produsí kosecha na abundansia. Imaginá bo! Lo no tin skarsedat di kuminda mas, ni hende desnutrí, ni hende ku ta muri di hamber! Tur hende lo disfrutá di “un bankete luhoso.”​—Isa. 25:​6-8; 35:​1, 2.

²⁰ Ken lo risibí e krédito pa tur e bendishonnan akí? Prinsipalmente, e Rei Eterno i Gobernante di universo, Yehova Dios. De echo, e tempu ei nos tur lo uni nos bos yen di alegria na e konklushon di e kantika bunita i alentador akí: “Su nòmber [esta, di Rei Hesukristu] lo permanesé pa semper; su nòmber lo kontinuá tanten ku tin solo; i hende lo wòrdu bendishoná den dje; i tur nashon lo yam’é bendishoná. Bendishoná sea SEÑOR [Yehova] Dios, e Dios di Israel, kende so ta hasi maravianan. I bendishoná sea su nòmber glorioso pa semper; i ku henter tera wòrdu yená ku su gloria. Amèn i Amèn.”​—Sal. 72:​17-19.

[Nota]

Kon Lo Bo Kontestá?

• Salmo 72 a duna un bista profétiko di kiko?

• Ken ta e Salomon Mayor, i te kon leu su gobernashon lo yega?

• Kua di e bendishonnan profetisá den Salmo 72 abo ta gusta mas tantu?

[Plachi na página 28]

Kiko e prosperidat ku tabatin durante e reinado di Salomon a prefigurá?

[Plachi na página 31]

Ta bale la pena pa nos hasi tur esfuerso pa haña bida den Paradeis bou di gobernashon di e Salomon Mayor