Saca Beneficio for di “e Grano di Shelu”

DJIS despues di nan liberacion milagroso for di Egipto, e israelitanan a demostrá un gran falta di fe den nan Libertador, Jehova. Como resultado, Jehova a laga nan dual den e desierto di Sínai pa 40 aña. Durante tur e tempu ei, e israelitanan i e “inmenso multitud mixto” di stranhero cu a djoin nan a come i bebe “te na satisfaccion.” (Exodo 12:37, 38) Salmo 78:23-25 ta conta nos con esaki por tabata posibel: “E [Jehova] a duna ordu na e shelu nublá ariba, i el a habri e portanan di shelu mes. I el a sigui laga mana yobe pa nan come, i el a duna nan e grano di shelu. Hende a come asta e pan di esnan poderoso; provision cu el a manda pa nan te na satisfaccion.”

Como unu cu a come dje mana, Moises a duna un descripcion dje alimento único aki. El a skirbi cu mainta, despues cu “e capa di serena evaporá . . . , riba suela dje desierto tabatin un cos fini manera scama, cu parce un capa fini di ijs cristalino riba tera. Ora e yunan di Israel a mir’é, nan a cuminsá puntra otro: ‘Ta kico e ta?’” of literalmente na hebreo “man hú?” Probablemente e expresion aki ta e orígen di e palabra “mana,” e nomber cu israelitanan a duna e alimento aki. Moises a bisa: “E tabata blancu manera simia di silantro, i e tabata smak manera buskuchi cu honing.”—Exodo 16:13-15, 31, nota na pia di página.

Mana no tabata un alimento cu a existí den naturalesa, manera algun hende ta pretendé. Un forsa sobrenatural a pon’é presentá. Por ehempel, nan por a disponé di dje sin importá e lugá of temporada. Si a ward’é te su manisé, e tabata cria bichi i cuminsá hole stinki; tog, e porcion dòbel cu cada famia a piki riba e dia promé cu e sabat semanal no a daña, i nan por a com’é riba sabat—e dia cu mana no tabata cai. No tin duda cu mana tabata un percuracion milagroso.—Exodo 16:19-30.

E echo cu Salmo 78 ta mencioná “esnan poderoso,” of “angelnan,” ta indicá cu kisas Jehova a usa angelnan pa percurá p’e mana. (Salmo 78:25, nota na pia di página) Sea cual sea e caso, hende tabatin tur motibu pa gradicí Dios pa su bondad. Sin embargo, mayoria hende a manifestá un actitud malagradecí pa cu Esun mes cu a libra nan for di sclabitud na Egipto. Nos tambe por keda sin duna e debido balor na Jehova su percuracionnan, of asta bira malagradecidu si nos no meditá riba su bondad amoroso. P’esei, nos por ta gradicidu cu Jehova a incluí e registro di Israel su liberacion i loke a sosodé despues pa “nos instruccion.”—Romanonan 15:4.

Un Les pa Israel Ta Beneficiá Cristiannan

Tempu cu Jehova a percurá p’e mana, e tabatin mas na mente cu djis satisfacé necesidad físico di un tres miyon israelita. E kier a ‘humiyá nan i pone nan na prueba’ pa asina refiná nan pa nan mes beneficio. (Deuteronomio 8:16; Isaías 48:17) Si nan a respondé na e refinamentu i disiplina, Jehova lo tabatin goso den ‘haci loke ta bon na nan den nan dianan despues’ dor di duna nan pas, prosperidad i felicidad den e Tera Primintí.

Un cos vital cu nan mester a siña ta cu “hende no ta biba di pan so, sino di tur expresion cu ta sali for di boca di Jehova hende ta biba.” (Deuteronomio 8:3) Si Dios no a percurá pa mana, e pueblo lo a muri di hamber—un echo cu nan a reconocé mesora. (Exodo 16:3, 4) Diariamente israelitanan apreciativo a ser recordá cu nan a dependé totalmente di Jehova, i p’esei nan a ser humiyá. Una bes nan a yega den e Tera Primintí cu su abundancia material, nan tabatin ménos chens di lubidá Jehova i nan dependencia riba dje.

Mescos cu e israelitanan, cristiannan tin cu keda corda cu nan ta dependé di Jehova pa nan necesidadnan pa bida, tantu físico como spiritual. (Mateo 5:3; 6:31-33) Como contesta riba un dje tentacionnan dje Diabel, Jesucristo a cita e palabranan di Moises cu nos ta haña na Deuteronomio 8:3, bisando: “Ta pará skirbí: ‘Hende mester biba, no di pan so, sino di tur expresion cu ta sali for dje boca di Jehova.’” (Mateo 4:4) Sí, berdadero adoradónan di Dios ta ser alimentá dor di lesa e expresionnan di Jehova hañá den su Palabra. Ademas, ora nan experenciá e beneficio dje expresionnan aki den nan bida miéntras nan ta cana cu Dios i ta pone interesnan di Reino na promé lugá, nan fe ta ser fortalecé.

Hende imperfecto por perde aprecio pa cosnan cu ta bira un parti rutinario di nan bida, asta si e cosnan aki ta un refleho di Jehova su interes amoroso. Por ehempel, na cuminsamentu e israelitanan a keda asombrá i tambe contentu cu e percuracion sobrenatural di mana, pero cu tempu hopi di nan tabata keha. “Nos alma a haña asco dje pan despreciabel,” nan a murmurá sin respet—un indicacion cu nan a cuminsá “hala for dje Dios bibu.” (Númeronan 11:6; 21:5; Hebreonan 3:12) P’esei, nan ehempel ta sirbi como “spiertamentu pa nos riba ken e fin dje sistema di cosnan a yega.”—1 Corintionan 10:11.

Con nos por haci caso dje ehempel spiertador aki? Un manera ta dor di nunca permití nos mes keda sin duna e debido balor n’e siñansanan bíblico of percuracionnan cu nos ta ricibí mediante e clase di esclabo fiel i discreto. (Mateo 24:45) Una bes nos cuminsá considerá Jehova su regalonan como cosnan cu ta bini di mes of nos cuminsá fada di nan, nos relacion cuné ta cuminsá fria.

Cu bon motibu, Jehova no ta manda un avalancha constante di cosnan nobo i excitante riba nos. Mas bien, gradualmente i den un manera progresivo, e ta duna claridad di lus aumentante riba su Palabra. (Proverbionan 4:18) Esaki ta permití su pueblo asimilá i practicá loke nan ta siña. Jesus a sigui ehempel di su Tata ora el a siña su promé disipelnan. El a splica nan e Palabra di Dios “te n’e grado cu nan por a scucha,” of “comprendé,” segun algun traduccion.—Marco 4:33; compará cu Juan 16:12.

Fortificá Bo Aprecio p’e Percuracionnan di Jehova

Jesus a usa ripiticion tambe. Naturalmente, kisas e mente ta capta un cierto punto lihé, por ehempel, un principio bíblico. Pero haci caso di dje i hacié un parti dje “personalidad nobo” cristian kisas ta tuma un poco mas tempu, foral si e manera i actitudnan dje mundu bieu ta profundamente ancrá. (Efesionan 4:22-24) Esei sigur tabata e caso cu e disipelnan di Jesus ora nan mester a vence orguyo i cultivá humildad. Vários biaha Jesus mester a siña nan tocante humildad. Cada bes el a presentá e mésun punto básico for di un ángulo diferente pa asina nan por a comprendé, i cu tempu esei a sosodé tambe.—Mateo 18:1-4; 23:11, 12; Lucas 14:7-11; Juan 13:5, 12-17.

Den tempu moderno, reunionnan cristian i publicacionnan di Sociedad Watch Tower ta sigui e ehempel di Jesus den su uso di ripiticion bon planeá. P’esei, laga nos apreciá esaki como un expresion di Dios su bondad amoroso pa nos, i nunca fada di loke nos ta ricibí, manera e israelitanan a fada di mana. Sí, segun cu nos ta haci nos best cu pacenshi pa absorbá Jehova su recordatorionan regular, nos lo cosechá fruta excelente den nos bida. (2 Pedro 3:1) Un actitud apreciativo asina en berdad ta mustra cu nos “ta capta e sentido” dje Palabra di Dios, cu mente i curason. (Mateo 13:15, 19, 23) Relacioná cu esaki, nos tin un ehempel excelente den e salmista David cu, aunke e no tabatin e variedad di alimento spiritual cu nos ta ricibí awe, tog a describí Jehova su leynan como “mas dushi cu honing i e honing cu ta basha for dje panalnan”!—Salmo 19:10.

“Mana” Cu Ta Duna Bida Eterno

“Ami ta e pan di bida,” Jesus a bisa e hudiunan. “Boso antepasadonan a come mana den e desierto i tog a muri. . . . Ami ta e pan bibu cu a baha for di shelu; si un hende come dje pan aki lo e biba pa semper . . . E pan cu lo mi duna ta mi carni na fabor di bida di mundu.” (Juan 6:48-51) Pan of mana literal no a duna niun hende bida eterno ni no por haci esei tampoco. Pero esnan cu ehercé fe den e rescate di sacrificio di Jesus, cu tempu lo disfrutá dje bendicion di bida eterno.—Mateo 20:28.

Mayoria hende cu beneficiá dje rescate di Jesus lo disfrutá di bida eterno den paradijs riba tera. “Un multitud grandi” di esakinan, prefigurá dor di e “inmenso multitud mixto” di stranhero cu a djoin e israelitanan den nan exodo for di Egipto, lo sobrebibí e binidero “tribulacion grandi” cu lo limpia e tera di tur loke ta malu. (Revelacion 7:9, 10, 14; Exodo 12:38) E personanan cu e israelitanan mes a prefigurá ta disfrutá di un recompensa asta mas grandi. Apostel Pablo a describí esakinan, cu ta 144.000 persona en total, como esnan cu ta forma e Israel spiritual di Dios. Ora nan muri, nan tin e recompensa di un resureccion pa bida den shelu. (Galationan 6:16; Hebreonan 3:1; Revelacion 14:1) Einan, Jesus lo duna nan un clase special di mana.

E Nificacion di “e Mana Scondí”

E Jesus resucitá a bisa Israel spiritual: “Na esun cu vence lo mi duna un tiki dje mana scondí.” (Revelacion 2:17) E mana simbólico scondí aki ta haci nos corda e mana cu Dios a manda Moises warda den un pochi di oro den e arca sagrado di pacto. E Arca tabata wardá den e lugá Santísimo dje tabernáculo. Einan el a keda fuera di bista, scondí, na moda di papia. Wardá como un recuerdo, e muestra di mana aki no a daña tanten cu el a keda den e Arca, pues e ta un símbolo apropiado di un suministro di alimento incoruptibel. (Exodo 16:32; Hebreonan 9:3, 4, 23, 24) Dor di duna e 144.000 e mana scondí, Jesus ta duna garantia cu nan lo ricibí inmortalidad i incorupcion como yunan spiritual di Dios.—Juan 6:51; 1 Corintionan 15:54.

“E fuente di bida ta cerca bo [Jehova],” un salmista a bisa. (Salmo 36:9) E percuracion di mana—tantu literal como simbólico—ta un bon reafirmacion dje berdad fundamental ei! E mana cu Dios a duna antiguo Israel, e mana figurativo percurá den forma di Jesus su carni cu el a duna na nos fabor i e mana simbólico scondí cu Dios ta duna e 144.000 mediante Jesus, ta corda nos tur cu nos ta dependé completamente di Dios pa bida. (Salmo 39:5, 7) Laga nos reconocé e dependencia aki regularmente cu humildad i modestia. Na su turno Jehova lo ‘haci loke ta bon na nos den nos dianan despues.’—Deuteronomio 8:16.

[Plachinan na página 26]

Pa haña bida eterno, tur hende ta dependé di “e pan bibu cu a baha for di shelu”

[Plachi na página 28]

Asistencia na reunionnan cristian ta mustra nos aprecio pa e recordatorionan di Jehova