Humanidad Tin Mester dje Conocimientu di Dios

“Lo bo comprendé e temor di Jehova, i lo bo haña e conocimentu mes di Dios.”—PROVERBIONAN 2:5.

 1. Pakico nos por bisa cu e curason humano ta un obra maestro di creacion divino?

ROND di 5.600.000.000 curason humano ta batiendo riba tera n’e momento aki. Tur dia, bo mes curason ta bati 100.000 biaha i ta pomp e ekivalente di 7.600 liter di sanger dor dje 100.000 kilometer di ader dje sistema cardiovascular di bo curpa. Ningun otro músculo ta traha mas duru cu e obra maestro aki di creacion divino.

 2. Con abo lo describi e curason figurativo?

² Tin tambe 5.600.000.000 curason figurativo funcionando riba tera. Den e curason figurativo nos tin nos emocionnan, nos motivacionnan, nos deseonan. E ta e asiento di nos pensamentu, nos comprendimentu, nos boluntad. E curason figurativo por ta orguyoso of humilde, tristu of alegre, scur of iluminá.—Nehemías 2:2; Proverbionan 16:5; Mateo 11:29; Echonan 14:17; 2 Corintionan 4:6; Efesionan 1:16-18.

3, 4. Con curason di hende ta ser alcansá cu e bon nobo?

³ Jehova Dios por lesa e curason humano. Proverbionan 17:3 ta bisa: “E baso di refiná ta pa plata i e fornu ta pa oro, pero Jehova ta e examinador di curasonnan.” Sin embargo, en bes di simplemente lesa cada curason i pronunciá huicio, Jehova ta usando su Testigonan pa yega n’e curason humano cu e bon nobo. Esaki ta na armonia cu e palabranan di apostel Pablo: “‘Tur hende cu inbocá e nomber di Jehova lo ser salbá.’ Sin embargo, con nan lo inbocá esun den ken nan no a pone fe? Con, na nan turno, nan lo pone fe den esun di ken nan no a tende? Con, na nan turno, nan lo tende sin un hende pa predicá? Con, na nan turno, nan lo predicá aménos cu nan a ser mandá? Net manera ta pará skirbí: ‘Ki bunita ta e pianan di esnan cu ta declará e bon nobo di bon cosnan!’ ”—Romanonan 10:13-15.

⁴ Jehova a hiba di gustu pa manda su Testigonan na tur parti dje tera pa “declará bon nobo di bon cosnan” i pa haña esnan cu tin un curason receptivo. Awor aki nos ta mas cu 5.000.000 na cantidad—un proporcion di 1 Testigo pa rond di 1.200 hende riba tera. Alcansando e miles di miyones di hende riba tera cu e bon nobo no ta fácil. Pero Dios ta dirigiendo e trabou aki mediante Jesucristo i ta atraendo hende di curason onrado. Pues, e profecia skirbí na Isaías 60:22 ta resultando di ta cierto: “E chikitu mes lo bira mil, i esun menor un nacion poderoso. Ami mes, Jehova, lo aceler’é na su debido tempu.

 5. Kico ta conocimentu, i kico nos por bisa dje sabiduria di mundu?

⁵ E tempu ei ta awor, i un cos ta sigur—e miles di miyones di hende riba tera tin mester di conocimentu. Básicamente, conocimentu ta nificá ser familiarisá cu echonan cu a ser adkerí mediante experencia, observacion of estudio. E mundu a acumulá hopi conocimentu. Hende a haci progreso den áreanan manera transporte, cuido médico i comunicacion. Pero ta conocimentu di mundu ta loke humanidad realmente tin mester? Apénas! Guera, opresion, malesa i morto ta sigui plaga humanidad. E sabiduria di mundu hopi bes a resultá di ser inconfiabel i ta cambia cada momento.

 6. En cuanto sanger, con e conocimentu di Dios ta compará cu sabiduria mundano?

⁶ Pa ilustrá esaki: Un par di siglo pasá, tabata e custumber pa recurí na saca sanger for dje curpa como un supuesto método di curacion. Den e último oranan di bida di George Washington, e promé presidente di Merca, nan a saca sanger for di dje bes tras bes. Na un dado momento el a bisa: “Lagá mi muri trankil; mi no por wanta hopi mas.” E tabatin rason, pasobra el a muri e mésun dia ei—14 di december, 1799. En bes di saca sanger for dje curpa, awe e énfasis ta riba transfusioná sanger den e curpa humano. Ambos procedura ta cargá cu problemanan mortífero. Sin embargo, durante tur e tempu aki, e Palabra di Dios a bisa: “Sigui abstené boso... di sanger.” (Echonan 15:29) E conocimentu di Dios semper ta corecto, confiabel i al dia.

 7. Con conocimentu exacto dje Scritura ta compará cu sabiduria mundano en cuanto criamentu di yu?

⁷ Considerá un otro ehempel di sabiduria inconfiabel di mundu. Pa añanan, sicólogonan a boga pa criamentu di yu di un manera permisivo, pero un di su apoyadornan despues a admití cu esaki tabata un eror. E Asociacion Filológico Aleman a bisa un biaha cu ser permisivo ta “por lo ménos indirectamente responsabel p’e problemanan cu nos tin awor cu hóbennan.” Sabiduria di mundu por zwai p’aki i p’aya manera bentá dor di bientu, pero conocimentu bíblico exacto ta insagudibel. Bijbel ta duna conseho balansá riba entrenamentu di yu. “Castigá bo yu i lo e trese descanso pa bo i duna hopi placer na bo alma,” Proverbionan 29:17 ta bisa. Tal disiplina mester ser duná cu amor, pasobra Pablo a skirbi: “Tatanan, no iritá boso yunan, sino sigui cria nan den e disiplina i reglamentu mental di Jehova.”—Efesionan 6:4.

“E Conocimentu Mes di Dios”

8, 9. Con lo bo splica loke Proverbionan 2:1-6 ta bisa tocante e conocimentu cu humanidad realmente tin mester?

⁸ Aunke Pablo tabata un homber educá, el a bisa: “Si cualkier hende entre boso ta kere ku e ta sabí den e sistema di cosnan aki, lagu’e bira un bobo, p’e por bira sabí. Pasobra e sabiduria dje mundu aki ta bobedad cu Dios.” (1 Corintionan 3:18, 19) Solamente Dios por suministrá e conocimentu cu humanidad realmente tin mester. Tocante esei, Proverbionan 2:1-6 ta bisa: “Mi yu, si bo ricibí mi dichonan i atesorá cu bo mi mes mandamentunan, pa asina bo presta atencion cu bo oido na sabiduria, pa bo incliná bo curason na dicernimentu; si, ademas, bo sclama pa comprendimentu mes i duna bo bos pa dicernimentu mes, si bo sigui busk’é como pa plata, i como pa tesoro scondí bo sigui en busca di dje, den tal caso lo bo comprendé e temor di Jehova, i lo bo haña e conocimentu mes di Dios. Pasobra Jehova mes ta duna sabiduria; for di su boca tin conocimentu i dicernimentu.”

⁹ Esnan cu ta ser motivá pa un bon curason ta presta atencion na sabiduria dor di aplicá corectamente e conocimentu cu Dios ta duna. Nan ta incliná nan curason na dicernimentu, evaluando cuidadosamente e echonan cu nan ta siñando. En efecto, nan ta sclama pa comprendimentu, of e abilidad pa mira con e aspectonan di un asuntu ta relacioná cu otro. Esnan di curason hustu ta traha como si fuera nan ta coba pa plata i ta busca pa tesoronan scondí. Pero ki gran tesoro esnan cu tin curason receptivo ta haña? Esei ta “e conocimentu mes di Dios.” Kico esei ta? Senciyamente bisá, e ta e conocimentu hañá den e Palabra di Dios, e Bijbel.

10. Kico nos mester haci pa por disfrutá di un bon salú spiritual?

¹⁰ E conocimentu di Dios ta sano, stabil i dunador di bida. E ta promové salú spiritual. Pablo a urgi Timoteo: “Sigui retené e patronchi di palabranan saludabel cu bo a tende for di mi cu e fe i amor cu ta en relacion cu Cristo Jesus.” (2 Timoteo 1:13) Un idioma tin un patronchi di palabra. Di igual manera, e “idioma puru” di berdad bíblico tin “e patronchi di palabranan saludabel,” basá principalmente riba e tema dje Bijbel dje vindicacion di Jehova su soberania mediante e Reino. (Sofonias 3:9) Nos tin cu mantené e patronchi aki di palabranan saludabel den mente i curason. Si nos kier evitá problema p’e curason figurativo i keda spiritualmente saludabel, nos mester aplicá e Scritura den bida diario i saca pleno probecho dje provisionnan spiritual cu Dios ta haciendo mediante “e esclabo fiel i discreto.” (Mateo 24:45-47; Tito 2:2) Laga nos semper corda cu pa un bon salú spiritual, nos tin mester dje conocimentu di Dios.

11. Cua ta algun motibu pakico humanidad tin mester dje conocimentu di Dios?

¹¹ Considerá otro motibunan pakico e miles di miyones di hende riba tera tin mester dje conocimentu di Dios. Nan tur sa con e tera i humanidad a yega na existencia? No, nan no sa. Henter humanidad conocé e Dios berdadero i su Yu? Tur hende ta conciente dje cuestionnan cu Satanas a lanta tocante soberania divino i integridad humano? Atrobe e contesta ta no. Hende en general sa pakico nos ta bira bieu i ta muri? Un bes mas nos tin cu bisa no. Tur e habitantenan dje tera ta realisá cu e Reino di Dios ta gobernando awor i cu nos ta bibando den e último dianan? Nan ta na altura dje mal forsanan spiritual? Tur hende tin conocimentu confiabel tocante con pa tin un bida di famia felis? I e masanan di hende sa cu un bida gososo den Paradijs ta e propósito di nos Creador pa humanidad obediente? Riba e preguntanan aki tambe e contesta ta no. Claramente, anto, humanidad tin mester dje conocimentu di Dios.

12. Con nos por adorá Dios “cu spiritu i cu berdad”?

¹² Tambe, humanidad tin mester dje conocimentu di Dios debí na loke Jesus a bisa den oracion riba e último anochi di su bida terenal. Su apostelnan mester tabata profundamente conmoví pa tend’é bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Aplicando tal conocimentu ta e único manera pa adorá Dios aceptablemente. “Dios ta un Spiritu, i esnan cu ta ador’é mester adorá cu spiritu i cu berdad,” Jesus a bisa. (Juan 4:24) Nos ta adorá Dios “cu spiritu” ora nos ser conmoví pa un curason yená cu fe i amor. Con nos ta ador’é “cu berdad”? Dor di studia su Palabra i ador’é segun su berdad revelá—“e conocimentu mes di Dios.”

13. Ki incidente ta registrá na Echonan 16:25-34, i kico nos por siña for di dje?

¹³ Miles di hende ta cuminsá adorá Jehova tur aña. Sin embargo, mester conducí studionan di Bijbel cu hende interesá pa un tempu largu, of ta posibel pa esnan di curason onrado yega n’e punto di bautismo mas rápidamente? Wel, considerá loke a sosodé den e caso dje carcelero i su famia mencioná na Echonan 16:25-34. Pablo i Sílas a ser encarcelá na Filípos, pero den meianochi un temblor grandi a habri e portanan dje prizon. Keriendo cu tur e prizoneronan a scapa i cu lo el a ser castigá severamente, e carcelero tabata na punto di cometé suicidio ora Pablo a bis’é cu nan tur tabat’ei. Pablo i Sílas “a papia e palabra di Jehova cuné huntu cu tur esnan den su cas.” E carcelero ei i su famia tabata gentilnan cu no tabatin ningun conocimentu di e Scritura Santu. Tog, riba e solo anochi ei, nan a bira creyente. Mas cu esei, “nan tur sin excepcion, e i esnan di dje a ser bautisá.” Eseinan tabata circunstancianan extraordinario, pero personanan nobo a ser siñá e berdadnan básico i despues nan a siña otro cosnan na reunionnan di congregacion. Algu similar lo mester ta posibel awe.

E Cosecha Ta Grandi!

14. Pakico tin un necesidad pa conducí un mayor cantidad di studio di Bijbel eficas den un periodo di tempu mas corticu?

¹⁴ Lo ta excelente si Testigonan di Jehova por a conducí un cantidad mas grandi di studionan di Bijbel eficas den un periodo di tempu mas corticu. Tin un berdadero necesidad pa esaki. Den paisnan di Oost Europa, por ehempel, hende mester bai riba un lista di espera pa studionan di Bijbel. Esei ta e caso tambe na otro lugánan. Den un pueblo na República Dominicana, cincu Testigo tabatin asina tantu peticion cu nan no por a conducí tur e studionan. Kico nan a haci? Nan a animá esnan interesá pa asisti na reunionnan n’e Salon di Reino i pone nan nomber riba un lista di espera pa studionan di Bijbel. Mésun situacion ta existí na hopi lugá na tur parti dje tera.

15, 16. Kico a ser percurá pa plama e conocimentu di Dios mas lihé, i cua ta algun detaye di dje?

¹⁵ Teritorionan inmenso—cunucunan grandi pa cosecha—ta habriendo p’e pueblo di Dios. Aunke Jehova, “e Doño dje Cosecha,” ta mandando mas trahadó, ainda tin hopi di haci. (Mateo 9:37, 38) P’esei, pa plama e conocimentu di Dios mas lihé, e ‘esclabo fiel’ a percurá algu cu ta suministrá di un manera compacto informacion specífico di manera cu studiantenan di Bijbel por haci progreso spiritual cu cada les. Esei ta un publicacion nobo cu por ser cubrí den studionan di Bijbel na cas basta lihé—tal bes den un par di luna. I nos por cargu’é fácilmente den nos maletin, tas of asta den nos sacu di paña! Tabata un deleite p’e cientos di miles di persona cu a bini huntu n’e Congresonan di Districto “Alabadornan Gososo” di Testigonan di Jehova ricibí e buki nobo aki di 192 página titulá Conocimentu cu Ta Hiba na Bida Eterno.

¹⁶ Escritornan den vários pais a prepará material cu a ser compilá cuidadosamente den forma final p’e buki Conocimentu. P’esei, e mester tin un atraccion internacional. Pero lo dura hopi tempu promé cu e publicacion nobo aki ser presentá den e idiomanan di hende rond mundu? No, pasobra un buki di 192 página por ser traducí mas lihé cu bukinan mas grandi. Pa october 1995, e Comité di Redaccion dje Cuerpo Gobernante a aprobá e traduccion dje buki aki for di ingles den mas cu 130 idioma.

17. Ki factornan mester haci e buki Conocimentu fácil pa usa?

¹⁷ Puntonan specífico den cada capítulo dje buki Conocimentu lo mester permití studiantenan haci progreso spiritual bastante rápido. E buki ta presentá e berdadnan bíblico den un manera edificante. E no ta concentrá demasiado riba doctrinanan falsu. Un idioma claro i un desaroyo lógico lo mester haci e buki aki fácil pa usa pa conducí studionan di Bijbel i yuda hende capta e conocimentu di Dios. Ademas di textonan citá, tin textonan bíblico mencioná cu e studiante por busca ora e ta prepará p’e consideracion. Por lesa esakinan durante e studio segun tempu ta permití, aunke lo no ta sabí pa trece material adicional cu lo por stroba e puntonan principal di sali na cla. Mas bien, esnan cu ta conducí studio di Bijbel mester purba dicerní i comunicá n’e studiante loke e buki ta probando den cada capítulo. Esaki ta nificá cu e maestro mester studia e buki aki diligentemente p’e ideanan principal ta hopi cla den su mente.

18. Ki sugerencianan ta ser duná relacioná cu e uso dje buki Conocimentu?

¹⁸ Con e buki Conocimentu cu Ta Hiba na Bida Eterno por acelerá e trabou di haci disipel? E buki di 192 página aki por ser studiá den un periodo di tempu relativamente corticu, i esnan “corectamente dispuesto pa bida eterno” mester por siña suficiente mediante un studio di dje pa haci un dedicacion na Jehova i ser bautisá. (Echonan 13:48) Pues laga nos haci bon uso dje buki Conocimentu den e ministerio. Si un studiante di Bijbel ta hopi leu caba den studiamentu di un otro buki, lo ta práctico pa complet’é. Si esei no ta e caso, ta recomendabel pa cambia studionan di Bijbel p’e buki Conocimentu. Despues di completá e publicacion nobo aki, no ta recomendabel pa conducí un studio cu e mésun studiante den un di dos buki. Esnan cu ta brasa e berdad por completá nan conocimentu dor di asistí na reunionnan di Testigonan di Jehova i tambe dor di lesa Bijbel i vários publicacion cristian riba nan mes.—2 Juan 1.

19. Promé cu nos conducí studionan di Bijbel den e buki Conocimentu, pakico lo ta bon pa repasá página 175 te cu 218 den e buki Organisá pa Cumpli cu Nos Ministerio?

¹⁹ E buki Conocimentu a ser skirbí cu e meta pa yuda un persona contestá tur e preguntanan cu e ancianonan ta repasá cu publicadornan no-bautisá cu ta deseá di bautisá como Testigo di Jehova. P’esei, promé cu bo cambia bo studionan di Bijbel actual p’e publicacion nobo aki, ta recomendabel pa bo dedicá un par di ora repasando e preguntanan na página 175 te cu 218 dje buki Organisá pa Cumpli cu Nos Ministerio.a Esaki lo yudá bo enfatisá e contestanan na tal preguntanan durante studionan di Bijbel for dje buki Conocimentu.

20. Kico bo ta planea pa haci cu e buki Conocimentu cu Ta Hiba na Bida Eterno?

²⁰ Hende na tur parti di mundu mester tende e bon nobo. Sí, humanidad tin mester dje conocimentu di Dios, i Jehova tin su Testigonan pa haci esei conocí. Awor nos tin un buki nobo cu nos amoroso Tata celestial a percurá mediante e esclabo fiel i discreto. Lo bo us’é pa siña e berdad i trece onor na Jehova su nomber santu? Jehova siguramente lo bendicioná bo segun bo ta haci tur esfuerso pa haci e conocimentu cu ta hiba na bida eterno disponibel pa hopi.

[Nota]

Con Lo Bo Contestá?

◻ Con lo bo describí e curason figurativo?

◻ Kico ta e conocimentu di Dios?

◻ Pakico humanidad tin mester dje conocimentu di Dios?

◻ Cua buki nobo ta disponibel, i con bo ta planea pa us’é?

[Plachi na página 10]

Tin hopi motibu pakico e miles di miyones di hende riba tera tin mester dje conocimentu di Dios