“Henter e Obligacion di Hende”

“Teme e Dios berdadero i warda su mandamentunan. Pasobra esaki ta henter e obligacion di hende.”—ECLESIASTES 12:13.

 1, 2. Pakico ta apropiado pa considerá nos obligacion pa cu Dios?

“KICO Jehova ta pidi bek di bo?” Un profeta di antigwedad a plantea e pregunta ei. Anto el a specificá loke Jehova a rekerí—ehercé husticia, stima bondad i cana cu modestia cu Dios.—Mikéas 6:8.

² Den e tempu aki di individualismo i independencia, hopi hende ta sinti nan incómodo cu e idea cu Dios ta rekerí algu for di nan. Nan no kier sinti nan obligá. Pero kico dje conclusion cu Sálomon a yega na dje den Eclesiástes? “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende.”—Eclesiástes 12:13.

 3. Pakico nos mester considerá e buki di Eclesiástes masha seriamente?

³ Sea cual sea nos circunstancianan i concepto di bida, nos por saca hopi beneficio si nos considerá e factornan cu a hiba na e conclusion ei. Rey Sálomon, escritor dje buki inspirá aki, a considerá algun di net e cosnan cu ta parti di nos bida di tur dia. Algun lo por concluí lihé cu su análisis ta básicamente negativo. Sin embargo, el a ser inspirá dor di Dios i por yuda nos evaluá nos actividadnan i prioridadnan, cu mas goso como resultado.

Enfrentando e Preocupacionnan Principal di Bida

 4. Kico Sálomon a examiná i trata cuné den Eclesiástes?

⁴ Sálomon a examiná profundamente ‘e ocupacion dje yunan di humanidad.’ “Mi a pone mi curason pa busca i explorá e sabiduria relacioná cu tur loke a ser hací bou di shelu.” Cu “ocupacion” Sálomon no necesariamente kier a men un trabou, of empleo, sino mas bien henter e campo di actividad cu hende homber i muher ta ocupá nan mes cuné atrabes di nan bida. (Eclesiástes 1:13) Laga nos considerá algun interes of ocupacion principal, i despues compará nan cu nos propio actividad i prioridadnan.

 5. Kico ta un dje ocupacionnan principal di hende?

⁵ Placa siguramente ta e centro di hopi interes i actividad humano. Ningun hende por bisa debidamente cu Sálomon tabatin e punto di bista indiferente pa cu placa cu algun hende ricu tin. E no tabatin dificultad pa reconocé cu hende mester di poco placa; teniendo suficiente finansa ta mihó cu biba cu austeridad of biba den pobresa. (Eclesiástes 7:11, 12) Pero probablemente bo a ripará cu placa, huntu cu e posesionnan cu hende ta cumpra cuné, por bira e meta primordial den bida—tantu pa pober como ricu.

 6. Kico nos por siña tocante placa for di un di Jesus su ilustracionnan i for di Sálomon su propio experencia?

⁶ Corda Jesus su ilustracion dje homber ricu cu, nunca satisfecho, a traha pa adkerí mas. Dios a husgu’é como un persona irazonabel. Pakico? Pasobra nos ‘bida no ta resultá for di loke nos ta poseé.’ (Lucas 12:15-21) Sálomon su experencia—probablemente mas extenso cu di nos—ta confirmá e palabranan di Jesus. Lesa e descripcion na Eclesiástes 2:4-9. Pa algun tempu Sálomon a dedicá su mes na adkerí rikesa. El a construí casnan i hardinnan exkisito. E por a permití su mes i a obtené bunita compañeranan. E rikesa i loke esei a permitié haci a trece satisfaccion profundo, un sentido di berdadero logro i nificacion den su bida? El a contestá francamente: “Ami, mi mes, a considerá tur e obranan di mi cu mi mannan a haci i na tur e trabou duru cu mi a traha duru pa logra, i, mira! tur cos tabata banidad i un corementu tras di bientu, i no tabatin nada cu a sirbi di bentaha bou di solo.”—Eclesiástes 2:11; 4:8.

 7. (a) Kico experencia ta proba pa loke ta e balor di placa? (b) Kico abo a mira personalmente cu ta confirmá Sálomon su conclusion?

⁷ Esei ta realístico, un berdad bisto den bida di hopi hende. Nos tin cu admití cu teniendo mas placa riba su mes no ta resolvé tur problema. Lo e por resolvé algun, por ehempel, permitiendo nos obtené cuminda i paña mas fácil. Pero un persona por bisti solamente un set di paña a la bes i disfrutá di solamente un cierto cantidad di cos di come i di bebe. I bo a lesa di hende ricu kende nan bida ta plagá pa divorcio, abusu di alcohol of droga i pleitu den famia. E multimiyonario J. P. Getty a bisa: “Placa no necesariamente ta conectá cu felicidad. Kisas cu infelicidad.” Cu bon motibu, Sálomon a clasificá stimacion di plata cu banidad. Haci un contraste dje echo ei cu Sálomon su observacion: “Dushi ta e soño di esun cu ta rindi sirbishi, sea ta poco of hopi loke e ta come; pero e abundancia cu ta pertenecé na e ricu no ta permitié drumi.”—Eclesiástes 5:10-12.

 8. Ki motibu tin pa no duna demasiado importancia na placa?

⁸ Placa i posesion tampoco ta trece un sentido di contentamentu pa cu futuro. Si bo tabatin mas placa i posesion, probablemente lo bo tabatin mas ansiedad con pa protehá nan, i ainda lo bo no sa kico mañan lo trece. Lo bo por perde nan tur, huntu cu bo bida? (Eclesiástes 5:13-17; 9:11, 12) Siendo cu placa i posesion no ta trece un sentido di contentamentu, no mester ta difícil pa mira pakico nos bida, of ocupacion, mester tin un nificacion mas elevá i mas duradero cu e cosnan ei.

Famia, Fama i Poder

 9. Pakico e examinacion di Sálomon cu bon motibu a incluí bida di famia?

⁹ Sálomon su análisis di bida a incluí e asuntu di preocupacion cu famia. Bijbel ta resaltá bida di famia, incluyendo e goso di haña i cria yu. (Génesis 2:22-24; Salmo 127:3-5; Proverbionan 5:15, 18-20; 6:20; Marco 10:6-9; Efesionan 5:22-33) Sin embargo, esei ta e aspecto mas importante di bida? Parce cu hopi hende ta pensa asina, mirando cuantu énfasis algun cultura ta pone riba matrimonio, yu i lasonan di famia. No obstante, Eclesiástes 6:3 ta mustra cu asta ora bo tin shen yu, esei no ta un clave pa satisfaccion den bida. Imaginá cuantu mayor a haci sacrificionan pa causa di nan yunan afin di duna nan un bon comienso i haci nan bida mas fácil. Pa noble cu esei ta, siguramente e intencion di nos Creador no tabata pa e propósito principal di nos existencia ta djis pa pasa bida over n’e siguiente generacion, manera animalnan ta haci instintivamente pa nan especie sigui existí.

10. Pakico un indebido enfoke riba e famia por resultá di ta banidad?

¹⁰ Cu perspicacia Sálomon a presentá algun realidad di bida di famia. Por ehempel, un homber kisas ta concentrá riba percurá pa su yunan i nietunan. Pero nan lo resultá di ta sabí? Of nan lo actua di un manera bobo cu loke el a lucha pa acumulá pa nan? Si e último sosodé, ki un “banidad i un calamidad grandi” esei lo ta!—Eclesiástes 2:18-21; 1 Reynan 12:8; 2 Crónicanan 12:1-4, 9.

11, 12. (a) Riba ki empeñonan den bida algun hende a concentrá? (b) Pakico nos por bisa cu busca prominencia ta “un corementu tras di bientu”?

¹¹ Na e otro extremo, hopi hende ta considerá un bida di famia normal como ménos importante cu nan meta pa alcansá fama of poder riba otronan. Esaki tal bes ta un fayo cu sa presentá mas cerca hende homber. Bo a mira e tendencia aki den bo compañeronan di scol, coleganan di trabou of bisiñanan? Hopi ta lucha desesperadamente pa hala atencion, pa bira importante of pa ehercé autoridad riba otronan. Pero cuantu berdadero nificacion esaki tin?

¹² Pensa con algun ta lucha pa bira famoso, sea riba un escala chikitu of grandi. Nos ta mira e tendencia aki na scol, den nos becindario i den vários grupo social. Tambe e ta un forsa impulsador den esnan cu kier bira conocí den arte, entretenimentu i política. Sin embargo, esei no ta un esfuerso básicamente bano? Sálomon corectamente a yam’é “un corementu tras di bientu.” (Eclesiástes 4:4) Asta si un hóben bira prominente den un club, den un ekipo di deporte of den un grupo musical—of un cierto homber of muher gana reputacion den un compania of comunidad—cuantu hende realmente sa di nan prominencia? Mayoria hende n’e otro banda dje planeta (of asta dje mésun pais) sa cu e persona ta existí? Of nan ta djis continuá den bida totalmente inconciente di e poco fama cu e persona ei tin? I mescos por ser bisá di cualkier poder of autoridad cu un persona ta alcansá na trabou, den un pueblo, of den un grupo.

13. (a) Con Eclesiástes 9:4, 5 ta yuda nos tene e punto di bista apropiado di lucha pa prominencia of poder? (b) Ki echonan ta un realidad si e bida aki ta tur loke tin? (Mira nota.)

¹³ Kico tal prominencia of autoridad ta nificá a lo largu? Segun cu un generacion ta bai i un otro ta bini, hende prominente of poderoso ta disparcé for dje esena i ta ser lubidá. Esei ta cierto di arkitectonan, músiconan i otro artistanan, reformadornan social, etcétera, mescos cu ta e caso di mayoria político i lidernan militar. Di e ocupacionnan ei, cuantu individuo specífico bo sa di dje cu a biba entre e añanan 1700 pa 1800? Sálomon a evaluá asuntunan corectamente, bisando: “Un cachó bibu ta den un mihó situacion cu un leon morto. Pasobra e bibunan ta conciente cu nan lo muri; pero en cuanto e mortonan, nan no ta conciente di nada en absoluto, . . . e recuerdo di nan a ser lubidá.” (Eclesiástes 9:4, 5) I si e bida aki ta tur loke tin, e ora ei lucha pa haña prominencia of poder realmente ta banidad.a

Nos Enfoke i Obligacion

14. Pakico e buki di Eclesiástes lo mester yuda nos personalmente?

¹⁴ Sálomon no a comentá riba hopi actividad, meta i placer riba cua hende ta enfocá nan bida. Sin embargo, loke el a skirbi ta suficiente. Nos consideracion dje buki no tin nodi ta pesimista of negativo, pasobra di un forma realístico nos a repasá un buki di Bijbel cu Jehova Dios deliberadamente a inspirá pa nos beneficio. E por yuda cada un di nos corigí nos concepto di bida i loke nos ta enfocá ariba. (Eclesiástes 7:2; 2 Timoteo 3:16, 17) Esei ta specialmente asina en bista dje conclusionnan cu Jehova a yuda Sálomon yega na dje.

15, 16. (a) Kico tabata Sálomon su punto di bista di disfrutá di bida? (b) Kico Sálomon a bisa apropiadamente tabata necesario afin di disfrutá di bida?

¹⁵ Un punto cu Sálomon a mencioná bes tras bes tabata cu sirbidornan di e Dios berdadero mester haña goso den nan actividadnan dilanti Dje. “Mi a yega na sa cu no tin nada mas mihó pa nan cu gosa i haci bon durante un hende su bida; i tambe pa tur hende come i en berdad bebe i mira bon pa tur su trabou duru. Esei ta e don di Dios.” (Eclesiástes 2:24; 3:12, 13; 5:18; 8:15) Ripará cu Sálomon no tabata animando corementu di paranda; ni e no a respaldá un actitud di ‘Laga nos come, bebe i pasa bon, pasobra mañan nos ta muri.’ (1 Corintionan 15:14, 32-34) E tabata kier men cu nos mester haña goso den placernan normal, manera come cu bebe, segun cu nos ta ‘haci bon durante nos bida.’ Esei indudablemente ta enfocá nos bida riba e boluntad dje Creador, kende ta determiná loke di berdad ta bon.—Salmo 25:8; Eclesiástes 9:1; Marco 10:17, 18; Romanonan 12:2.

¹⁶ Sálomon a skirbi: “Bai, come bo cuminda cu alegria i bebe bo biña cu un bon curason, pasobra ya caba e Dios berdadero a haña placer den bo obranan.” (Eclesiástes 9:7-9) Sí, e homber of muher cu realmente tin un bida ricu i satisfaciente ta activo den obranan den cua Jehova ta haña placer. Esei ta rekerí di nos pa tum’é na consideracion constantemente. Ki diferente e concepto aki ta for di esun di mayoria hende, cu ta laga razonamentu humano guia nan bida!

17, 18. (a) Con hopi hende ta reaccioná n’e realidadnan di bida? (b) Ki resultado nos semper mester tene na mente?

¹⁷ Aunke algun religion ta siña tocante un bida despues di morto, hopi hende ta kere cu e bida aki ta realmente tur loke nan por ta sigur di dje. Tal bes bo a mira nan reaccioná manera Sálomon a describí: “Pa motibu cu sentencia contra un mal obra no a ser ehecutá lihé, p’esei e curason di e yunan di hende a bira plenamente determiná den nan pa haci malu.” (Eclesiástes 8:11) Asta esnan cu no enbolbé nan mes profundamente den actonan baho ta mustra cu nan ta principalmente interesá den loke ta actual. Esei ta un motibu pakico placa, posesion, prestigio, autoridad riba otronan, famia, of otro interesnan asina ta bira demasiado importante pa nan. Sin embargo, Sálomon no a laga e pensamentu te ei. El a agregá: “Aunke un pecador por ta haciendo malu shen bes i ta continuá pa un tempu largu manera e ta gusta, tog mi ta conciente tambe cu lo resultá bon cu esnan cu ta teme e Dios berdadero, pasobra nan tabatin temor di dje. Pero di ningun manera lo resultá bon cu e malbado, ni lo e no prolongá su dianan cu ta manera un sombra, pasobra e no tin temor di Dios.” (Eclesiástes 8:12, 13) Claramente, Sálomon tabata convencí cu lo resultá bon pa nos si nos “teme e Dios berdadero.” Con bon lo bai cu nos? Nos por haña e contesta den e contraste cu el a haci. Jehova por ‘prolongá nos dianan.’

¹⁸ Specialmente esnan cu ta relativamente yong ainda mester meditá riba e echo completamente confiabel cu cosnan lo resultá bon pa nan basta nan teme Dios. Manera bo por a mira personalmente, e coredor di mas velos por trompecá i perde e careda. Un ehército poderoso por sufri derota. Un comerciante prudente por haña su mes den pobresa. I hopi otro cosnan insigur ta haci bida bastante impredicibel. Pero bo por ta completamente sigur di esaki: E curso mas sabí i mas sigur ta pa disfrutá di bida miéntras bo ta haci bon dentro dje leynan moral di Dios i segun su boluntad. (Eclesiástes 9:11) Esaki ta encerá siña for di Bijbel kico ta e boluntad di Dios, dedicá bo bida na dje i bira un cristian bautisá.—Mateo 28:19, 20.

19. Con hóbennan por usa nan bida, pero cua ta e curso sabí?

¹⁹ E Creador lo no forsa hóbennan ni otronan pa sigui su guia. Nan por bira absorbá den educacion, tal bes asta birando studiante henter nan bida di cantidad grandi di buki di siñansa humano. Esei cu tempu lo resultá di ta cansancio p’e carni. Of hóbennan por cana den e camindanan di nan curason humano imperfecto of sigui loke ta atraé nan bista. Esei cu tur siguransa lo trece shangrinamentu, i un bida asina cu tempu lo resultá di ta simpel banidad. (Eclesiástes 11:9–12:12; 1 Juan 2:15-17) P’esei Sálomon ta haci un apelacion na hóbennan—un apelacion cu nos mester considerá seriamente, sea cual sea nos edad: “Corda, awor, bo Magnífico Creador den e dianan di bo hubentud, promé cu e dianan calamitoso procedé di bini, of e añanan yega ora lo bo bisa: ‘Mi no tin deleite den nan.’”—Eclesiástes 12:1.

20. Kico ta e punto di bista balansá dje mensahe den Eclesiástes?

²⁰ Kico nos lo concluí anto? Wel, kico dje conclusion cu Sálomon a yega na dje? El a mira, of examiná, “tur e obranan cu a ser hací bou di solo, i, mira! tur cos tabata banidad i un corementu tras di bientu.” (Eclesiástes 1:14) Nos no ta haña den e buki di Eclesiástes palabranan di un homber pesimista of disgustá. Nan ta parti dje Palabra inspirá di Dios i digno di nos consideracion.

21, 22. (a) Ki aspectonan di bida Sálomon a tuma na consideracion? (b) Na ki conclusion sabí el a yega? (c) Con examinacion dje contenido di Eclesiástes a afectá bo?

²¹ Sálomon a studia hende su trabou duru, su dificultadnan i su aspiracionnan. El a refleccioná riba con cosnan ta resultá den e curso normal di asuntunan, e resultado frustrante i bano cu asina tantu hende ta experenciá. El a considerá e realidad di imperfeccion humano i morto como resultado di esei. I el a tuma na consideracion i a incluí e conocimentu cu Dios a dun’é di e condicion dje mortonan i e prospectonan pa cualkier futuro bida. Tur esaki a ser evaluá dor di un homber kende su sabiduria a ser aumentá dor di Dios, sí, un dje hendenan di mas sabí cu a yega di biba. Anto e conclusion cu el a yega na dje a ser incorporá den e Scritura Santu p’e beneficio di tur hende cu ta deseá un bida di berdadero nificacion. Nos no mester ta di acuerdo?

²² “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende. Pasobra e Dios berdadero mes lo trece na huicio tur clase di obra relacioná cu tur cos scondí, en cuanto si e ta bon of malu.”—Eclesiástes 12:13, 14.

[Nota]

Bo Ta Corda?

◻ Kico ta e evaluacion sabí dje papel di posesionnan den bo bida?

◻ Pakico nos no mester pone indebido énfasis riba famia, fama of autoridad riba otronan?

◻ Ki actitud divino pa cu gosamentu Sálomon a animá pa nos tin?

◻ Con bo a beneficiá for dje consideracion dje buki di Eclesiástes?

[Plachinan na página 15]

Placa i posesion no ta garantisá contentamentu

[Plachi na página 17]

Hóbennan por ta garantisá cu cosnan lo resultá bon pa nan basta nan teme Dios