Gososo Awor i pa Semper

“Boso hubilá, i sea gososo pa semper den loke mi ta bai crea. Pasobra aki mi ta bai crea Jerusalem un causa pa goso i su pueblo un causa pa húbilo.”—ISAIAS 65:18.

 1. Con adoracion berdadero a afectá individuonan den transcurso di siglonan?

ATRABES di siglonan, multitud di hende a haña goso ricu den sirbi e Dios berdadero, Jehova. David tabata un di e hopinan cu tabata gososo den adoracion berdadero. Bijbel ta relatá cu ora e arca di pacto a ser trecé ariba na Jerusalem, “David i tur e cas di Israel tabata subiendo e arca di Jehova cu gritamentu gososo.” (2 Samuel 6:15) Tal goso den sirbi Jehova no ta un mero cos di pasado. Bo por participá den dje. I asta un midí nobo di goso pronto por ta di bo!

 2. Fuera dje cumplimentu original di Isaías capítulo 35 cu e hudiunan cu a bolbe bek, ken awe ta enbolbí den un otro cumplimentu?

² Den e artículo anterior, nos a examiná e promé cumplimentu dje profecia stimulante registrá den Isaías capítulo 35. Nos por yama esaki debidamente un profecia di restoracion pasobra ta esaki ta loke el a resultá di ta p’e hudiunan di pasado. E tin un cumplimentu similar den nos tempu. Con asina? Wel, cuminsando cu Jesus su apostelnan i otronan na Pentecoste 33 E.C., Jehova ta tratando cu israelitanan spiritual. Esakinan ta hendenan ungí cu e spiritu santu di Dios cu ta bira parti di loke apostel Pablo ta yama “e Israel di Dios.” (Galationan 6:16; Romanonan 8:15-17) Corda, tambe, cu na 1 Pedro 2:9, e cristiannan aki ta ser yamá “un rasa scogí, un sacerdocio real, un nacion santu, un pueblo pa posesion special.” Pedro ta procedé na identificá e asignacion duná na Israel spiritual: “‘Pa boso declará na tur parti e excelencianan’ di esun cu a yama boso for di scuridad den su lus maraviyoso.”

Un Cumplimentu den Nos Tempu

 3, 4. Kico tabata e situacion ora Isaías capítulo 34 a haña un cumplimentu den tempu moderno?

³ Tabatin un tempu na cuminsamentu dje siglo aki ora e resto di Israel spiritual riba tera no tabata consistentemente activo den declará un mensahe asina. Nan no tabata alegrando plenamente den e lus maraviyoso di Dios. En realidad, nan tabata den scuridad considerabel. Ki tempu esei tabata? I kico Jehova Dios a haci tocante esei?

⁴ Tabata den e periodo di Guera Mundial I, pronto despues cu e Reino Mesiánico di Dios a ser establecí den cielu na 1914. E nacionnan, cu apoyo di clero dje iglesianan den vários pais, tabatin hopi rabia riba otro. (Revelacion 11:17, 18) Naturalmente, Dios tabata mes contra cristiandad apóstata cu su clase di clero elevá cu e tabata contra e nacion orguyoso di Edom. P’esei cristiandad, e Edom antitípico, ta na turno pa sinti e cumplimentu moderno di Isaías capítulo 34. E cumplimentu aki pa medio di exterminacion permanente ta mes sigur cu e promé cumplimentu contra Edom di antigwedad.—Revelacion 18:4-8, 19-21.

 5. Ki sorto di cumplimentu Isaías capítulo 35 tabatin den nos tempu?

⁵ Kico di capítulo 35 dje profecia di Isaías, cu su énfasis riba goso? Esei tambe a haña un cumplimentu den nos tempu. Con asina? El a ser cumplí den un restoracion di Israel spiritual for di un tipo di cautiverio. Laga nos examiná e echonan den loke realmente ta historia teocrático recien, locual a tuma lugá durante e bida di hopi hende cu ainda ta na bida.

 6. Pakico por ser bisá cu e resto di Israel spiritual a drenta den un condicion di cautiverio?

⁶ Pa un lapso di tempu relativamente corticu durante e periodo di Guera Mundial I, e resto di Israel spiritual no a keda completamente limpi i na armonia cu e boluntad di Dios. Algun di nan tabata manchá cu erornan doctrinal i a comprometé nan mes dor di no a tuma un posicion completamente neutral pa Jehova ora nan a ser poné bou di presion pa apoyá e nacionnan den guera. Durante e añanan di guera ei, nan a sufri tur forma di persecucion, i nan literatura bíblico asta a ser prohibí den hopi lugá. Finalmente, algun dje rumannan homber mas prominente a ser condená i encarcelá riba acusacionnan falsu. Mirando bek, no ta difícil pa mira cu den un sentido, e pueblo di Dios, en bes di tabata liber, tabata den un condicion di cautiverio. (Compará cu Juan 8:31, 32.) Nan tabatin un falta serio di vision spiritual. (Efesionan 1:16-18) Nan tabata relativamente muda pa loke ta alabansa na Dios, cu e resultado cu nan tabata spiritualmente infructífero. (Isaías 32:3, 4; Romanonan 14:11; Filipensenan 2:11) Bo ta mira con esaki ta un paralelo cu e situacion dje hudiunan di antigwedad den cautiverio na Babilonia?

 7, 8. Ki tipo di restoracion e resto di dia moderno a experenciá?

⁷ Pero Dios lo a laga su sirbidornan moderno den tal estado? No, e tabata determiná pa restorá nan, na armonia cu loke a ser profetisá mediante Isaías. Pues e mésun profecia aki den capítulo 35 ta haña un cumplimentu distintivo den nos tempu, cu e restoracion dje resto di Israel spiritual na prosperidad i salú den un paradijs spiritual. Na Hebreonan 12:12, Pablo a aplicá Isaías 35:3 den un sentido figurativo, mustrando cu tin motibu válido pa nos haci un aplicacion spiritual dje porcion aki di Isaías su profecia.

⁸ Den e periodo despues di guera, e resto ungí di Israel spiritual a sali for di cautiverio, na moda di papia. Jehova Dios a usa Jesucristo, e Ciro Mayor, pa libra nan. Pues, e resto aki por a haci un trabou di reconstruccion, comparabel cu e trabou dje resto di hudiunan di antigwedad, cu a bai bek na nan pais pa reconstruí e tempel literal na Jerusalem. Ademas, e israelitanan spiritual aki den tempu moderno por a cuminsá cultivá i producí un paradijs spiritual yen di mata berde, un hofi di Eden figurativo.

 9. Con algu manera loke ta ser describí na Isaías 35:1, 2, 5-7 a desaroyá den nos tempu?

⁹ Cu lo anterior na mente, laga nos considerá un biaha mas Isaías capítulo 35, i wak promé versículo 1 i 2. Loke a parce di ser un region secu berdaderamente a cuminsá florecé i ser productivo mescos cu e yanuranan antiguo di Saron. Despues, wak versículo 5 pa 7. E wowo di comprendimentu dje resto, di cua un cantidad ainda ta na bida i activo den Jehova su sirbishi, a ser habrí. Nan por a mira mihó e nificacion di loke a sosodé na 1914 i despues di esei. Esei tambe tabatin un influencia riba hopi di nos cu ta forma e “multitud grandi,” sirbiendo awor na lado dje resto.—Revelacion 7:9.

Bo Ta Parti dje Cumplimentu?

10, 11. (a) Den ki manera bo tabata enbolbí den e cumplimentu di Isaías 35:5-7? (b) Con abo personalmente ta sinti tocante e cambionan aki?

¹⁰ Wak bo mes por ehempel. Promé cu bo a bin den contacto cu Testigonan di Jehova, bo a lesa Bijbel regularmente? Si bo a haci esei, cuantu comprendimentu bo tabatin? Por ehempel, awor bo sa e berdad tocante e condicion dje mortonan. Probablemente bo por referí un persona interesá den e asuntu na textonan relevante den Génesis capítulo 2, Eclesiástes capítulo 9 i Ezekiel capítulo 18, i tambe na hopi otro pasashi. Sí, probablemente bo ta comprendé loke Bijbel ta siña riba hopi tópico of asuntu. Bisá senciyamente, Bijbel ta razonabel i lógico pa bo, i bo por splica gran parti di dje na otronan, manera indudablemente bo a haci caba.

¹¹ Sin embargo, nos cada un lo haci bon di puntra, ‘Con mi a siña tur loke mi sa di e berdad di Bijbel? Promé cu mi a studia cu Jehova su pueblo, mi a localisá tur e textonan bíblico mencioná awor ei? Mi a comprendé nan nificacion i a yega n’e conclusionnan corecto en cuanto nan nificacion?’ E contesta franco riba e preguntanan aki ta probablemente no. Ningun hende mester sinti nan ofendí cu un declaracion asina, pero nos por bisa cu básicamente bo tabata ciegu pa cu e textonan aki i nan nificacion. No ta berdad? Nan tabata den Bijbel, pero bo no por a mira nan of capta nan nificacion. Di ki manera, anto, bo wowo a ser habrí spiritualmente? Esei tabata mediante loke Jehova a haci den cumplimentu di Isaías 35:5 riba e resto ungí. En buelta, bo wowo a ser habrí. Bo no ta den scuridad spiritual mas. Bo por mira.—Compará cu Revelacion 3:17, 18.

12. (a) Pakico nos por bisa cu esaki no ta e tempu pa sanacion físico milagroso? (b) Con e caso di Ruman F. W. Franz a ilustrá e manera cu Isaías 35:5 ta ser cumplí den nos tempu?

¹² Studiantenan diligente di Bijbel i di Dios su tratonan durante e siglonan sa cu esaki no ta e periodo den historia pa milagernan físico di sanacion. (1 Corintionan 13:8-10) Pues nos no ta spera pa Jesucristo habri wowo ciegu pa proba cu e ta e Mesías, Profeta di Dios. (Juan 9:1-7, 30-33) Tampoco e ta permitiendo tur e surdunan tende atrobe. Segun cu Frederick W. Franz, un dje ungínan i e tempu ei presidente dje Sociedad Watch Tower, tabata acercando 100 aña di edad, e tabata casi completamente ciegu i mester a usa un aparato pa oido. Pa algun aña e no por a mira mas pa lesa; no obstante, ken hamas lo a consider’é como ciegu of surdu den e sentido di Isaías 35:5? Su vision spiritual skerpi tabata un bendicion p’e pueblo di Dios rond mundu.

13. Ki cambio di condicion of restoracion Dios su pueblo di dia moderno a experenciá?

¹³ Of kico di bo lenga? Jehova su ungínan tal bes a ser silenciá durante nan cautiverio spiritual. Pero una bes cu Dios a cambia e condicion ei, nan lenga a cuminsá sclama di goso en cuanto loke nan tabata sa tocante Dios su Reino establecí i su promesanan pa futuro. Kisas nan a yudá bo los bo lenga tambe. Cuantu bo a papia tocante berdadnan bíblico cu otronan den pasado? Kisas na un dado momento bo a pensa, ‘Mi ta gusta e studio, pero nunca lo mi sali bai papia cu hende straño.’ Sin embargo, no ta berdad cu “lenga di esun muda” awor ta ‘sclamando di goso’?—Isaías 35:6.

14, 15. Con hopi hende a cana riba “e Caminda di Santidad” den nos tempu?

¹⁴ E hudiunan di antigwedad cu a ser librá for di Babilonia tabatin un biahe largu bek pa nan patria. Cu kico esei ta corespondé den nos tempu? Wel, wak Isaías 35:8: “Siguramente lo yega di tin un caretera ei, asta un caminda; i lo e ser yamá e Caminda di Santidad. Esun impuru lo no pasa riba dje.”

¹⁵ Desde nan liberacion for di cautiverio spiritual, e resto ungí, compañá awor dor di miyones di e otro carnénan, a sali for di Babilonia e Grandi i a subi riba un caretera figurativo, un caminda di santidad limpi cu ta hibá bo na un paradijs spiritual. Nos ta haciendo tur esfuerso pa cualificá i keda riba e Caminda di Santidad aki. Pensa riba bo mes. Bo normanan moral i e principionan cu bo ta pega na dje no ta muchu mas haltu awor cu tempu bo tabata den e mundu? Bo no ta haci mas esfuerso pa conformá bo pensamentu i conducta cu esnan di Dios?—Romanonan 8:12, 13; Efesionan 4:22-24.

16. Ki condicionnan nos por disfrutá di dje segun cu nos ta cana riba e Caminda di Santidad?

¹⁶ Segun cu bo ta sigui riba e Caminda di Santidad aki, básicamente bo ta liber di preocupacion tocante hende bestial. Ta cierto cu den mundu bo tin cu vigilá pa hende golos of yen di odio no ‘comé bo na bida’ na moda di papia. Asina tantu hende ta feros den nan manera di trata cu otro hende. Ki un contraste entre e pueblo di Dios! Ei bo ta den un ambiente protehá. Naturalmente, bo compañeronan cristian no ta perfecto; tin biaha un di nan ta cometé un eror of ta causa ofensa. Pero bo sa cu no ta e intencion di bo rumannan pa ofendé bo of devorá bo. (Salmo 57:4; Ezekiel 22:25; Lucas 20:45-47; Echonan 20:29; 2 Corintionan 11:19, 20; Galationan 5:15) Mas bien, nan ta mustra interes den bo; nan a yudá bo; nan kier sirbi Dios huntu cu bo.

17, 18. Den ki sentido un paradijs ta existí awor, i ki efecto esaki tin riba nos?

¹⁷ Pues nos por mira Isaías capítulo 35, teniendo na mente e cumplimentu actual di versículo 1 te 8. No ta keda claro cu nos a haña loke corectamente ta ser yamá un paradijs spiritual? Ta cierto cu e no ta perfecto—ainda no. Pero berdaderamente e ta un paradijs, pasobra aki, manera versículo 2 ta declará, ya caba nos por “mira e gloria di Jehova, e splendor di nos Dios.” I kico ta e resultado? Versículo 10 ta bisa: “Esnan rescatá mes dor di Jehova lo bolbe bek i siguramente lo yega na Síon cu un sclamacion gososo; i lo tin alegria te na tempu indefiní riba nan cabes. Húbilo i alegria nan lo alcansá, i tristesa i suspiro mester hui bai.” Berdaderamente, e echo cu nos a sali for di religion falsu i a aceptá adoracion puru bou di Dios su fabor ta inspirador di goso.

¹⁸ E goso conectá cu adoracion berdadero ta sigui aumentá, no ta asina? Bo ta mira esnan recien interesá haci cambio i bira firme den e berdad di Bijbel. Bo ta observá hóbennan crece i haci progreso spiritual den e congregacion. Tin bautismonan, caminda bo ta mira personanan cu bo conocé ser bautisá. Eseinan no ta motibunan pa goso, pa goso abundante awe? Sí, ta ki un goso pa otronan uni cu nos den nos libertad spiritual i condicionnan paradísico!

Un Futuro Cumplimentu Ainda!

19. Cu ki expectativa yen di speransa Isaías capítulo 35 ta yena nos?

¹⁹ Te asina leu nos a considerá Isaías capítulo 35 relacioná cu su promé cumplimentu cu e bolbementu bek dje hudiunan i relacioná cu e cumplimentu spiritual cu ta tumando lugá awe. Pero esei no ta tur cos. Tin hopi mas. E ta conectá cu e siguransa bíblico di un binidero restoracion di condicionnan paradísico literal riba tera.—Salmo 37:10, 11; Revelacion 21:4, 5.

20, 21. Pakico ta lógico i bíblico pa kere cu lo tin ainda un otro cumplimentu di Isaías capítulo 35?

²⁰ Lo no ta consistente pa Jehova percurá descripcionnan bibu di un paradijs i despues limitá e cumplimentu na cosnan spiritual. Esaki, naturalmente, no kier men cu e cumplimentu spiritual ta insignificante. Asta si un paradijs literal a ser establecí, lo e no a satisfacé nos si meimei dje paisahe bunita i animalnan pacífico nos a ser rondoná dor di hombernan spiritualmente corupto, hende cu ta actua manera bestia salbahe. (Compará cu Tito 1:12.) Sí, e condicion spiritual mester bini na promé lugá, pasobra e ta di mayor importancia.

²¹ No obstante, e binidero Paradijs no ta limitá n’e aspectonan spiritual cu nos ta disfrutá di dje awor i lo disfrutá di dje asta mas den futuro. Nos tin bon motibu pa spera un cumplimentu literal di profecianan manera Isaías capítulo 35. Pakico? Wel, den capítulo 65, Isaías a profetisá di “cielu nobo i un tera nobo.” Apostel Pedro a aplicá e texto ei ora el a describí loke ta bini despues dje dia di Jehova. (Isaías 65:17, 18; 2 Pedro 3:10-13) Pedro a indicá cu e rasgonan cu Isaías a describí realmente lo existí ora e “tera nobo” ta bira un realidad. Esei ta incluí descripcionnan cu bo ta familiarisá cuné—traha cas i biba den nan; planta cunucu di wijndruif i come e frutanan; disfrutá pa hopi tempu dje trabou di bo mannan; un lobo i un lamchi cu ta biba huntu; i ningun daño ta sosodé rond mundu. Cu otro palabra, bida largu, casnan sigur, cuminda abundante, trabou satisfaciente i pas entre bestia i entre bestia i hende.

22, 23. Ki base pa goso lo tin den e futuro cumplimentu di Isaías capítulo 35?

²² E prospecto ei no ta yená bo cu goso? Mester ta, pasobra ta asina Dios a crea nos pa biba. (Génesis 2:7-9) Pues, kico esei ta nificá pa loke ta e profecia den Isaías capítulo 35 cu nos ta considerando? Esei ta nificá cu nos tin mas motibu pa sclama di goso. E desiertonan i regionnan secu literal lo florecé, dunando nos motibu pa alegrá. Anto hende cu wowo blou of cu wowo bruin, of cualkier otro bunita color di wowo, pero cu awor ta ciegu, lo por mira. Nos compañeronan cristian cu ta surdu, of asta esnan di nos cu tin problema cu oido, lo por tende claramente. Ki un goso pa usa e abilidad ei pa tende e Palabra di Dios ser lesá i splicá, i tambe pa scucha e zonidonan deleitabel di brisa den palunan, harí di un mucha, cantica di un para!

²³ Tambe esei lo nificá cu esnan coho, incluyendo esnan cu awor ta sufri di artrítis, lo cana rond sin dolor. Ki un alivio! Anto riunan literal lo basha dor di desierto. Nos lo mira e awa subi i tambe tend’é brota. Nos lo por cana bai ei i mishi cu e yerba berde i e matanan di papiro. Esei berdaderamente lo ta e Paradijs restorá. Ki tal dje goso pa ta cerca un leon of cualkier otro animal salbahe asina sin tin cu tene miedu? No ta necesario pa nos cuminsá describí esei, pasobra nos tur a imaginá i disfrutá dje esena ei caba.

24. Pakico bo por ta di acuerdo cu e expresion den Isaías 35:10?

²⁴ Isaías ta sigurá nos: “Esnan rescatá mes dor di Jehova lo bolbe bek i siguramente lo yega na Síon cu un sclamacion gososo; i lo tin alegria te na tempu indefiní riba nan cabes.” Pues nos por ta di acuerdo cu nos tin motibu pa sclama di goso. Goso debí na loke Jehova ta haciendo caba pa su pueblo den nos paradijs spiritual i goso debí na loke nos por spera den e Paradijs literal cu ta tras di porta. En cuanto esnan gososo—en cuanto nos—Isaías ta skirbi: “Húbilo i alegria nan lo alcansá, i tristesa i suspiro mester hui bai.”—Isaías 35:10.

Bo A Ripará?

◻ Ki segundo cumplimentu Isaías capítulo 35 tabatin?

◻ Kico ta corespondé spiritualmente cu e cambionan milagroso cu Isaías a profetisá?

◻ Con bo a participá den un cumplimentu dje profecia aki?

◻ Pakico nos por bisa cu Isaías capítulo 35 ta yena nos cu speransa pa futuro?

[Plachi na página 15]

E prizon situá den Raymond Street na Brooklyn, unda siete ruman homber prominente a ser detené den juni 1918

[Plachi na página 16]

Aunke casi completamente ciegu den su edad avansá, Ruman Franz su vision spiritual a keda skerpi

[Plachi na página 17]

Crecementu spiritual i progreso ta motibunan pa goso