Capítulo 42

Un cielo nobo i tera nobo

 1. Kico Juan a detaya ora e angel a bolbe hibé na principio dje Reino di mil aña?

E GLORIOSO vision ta sigi desaroya ora e angel a bolbe hiba Juan na principio dje Reino di mil aña. Kico el a mira? “I mi a mira un cielo nobo i tera nobo; e cielo anterior i e tera anterior a pasa caba, i lamá no ta existi mas.” (Revelacion 21:1) El a haya bista di un panorama encantadora!

 2. (a) Con e profecía di Isaías tocante e cielo nobo i tera nobo tabata cumplí ora hudío tabata restorá na aña 537 PEC? (b) Con nos sa cu lo tin un otro aplicacion dje profecía di Isaías, i con e promesa ta ser cumplí?

² Cientos di aña promé cu e dia di Juan, Jehova a bisa Isaías: “Pasobra, mira! mi ta crea cielo nobo i tera nobo; i cosnan anterior lo no ser recordá, ni nan lo no subi den e curazón.” (Isaías 65:17; 66:22) E profecía tabata cumplí pe promé bez ora fiel hudío a bolbe na Jerusalem na aña 537 PEC despues di nan destierro di 70 aña den Babilonia. Den nan restoracion, nan a forma un arreglo social limpi, “un tera nobo,” bao di un sistema gobernamental nobo, un “cielo nobo.” Sin embargo, apóstol Pedro a siñala na un otro aplicacion dje profecía, bisando: “Pero tin cielo nobo i tera nobo cu nos ta spera segun su promesa, i den eseinan husticia lo biba.” (2 Pedro 3:13) Awor Juan a mustra cu e promesa ta ser cumplí durante e dia di Señor. “E cielo anterior i e tera anterior,” dje sistema di cosnan organizá pa Satanás cu su estructura gobernamental bao di poder di Satanás i su demoño, lo pasa forbij. “Lamá” turbulento di humanidad malbado i rebelde lo no existi mas. Den su lugar lo tin “un cielo nobo i un tera nobo”—un arreglo social nobo riba tera bao di un gobierno nobo, e Reino di Dios.—Compara cu Revelacion 20:11.

 3. (a) Kico Juan a detaya, i kico ta Jerusalem Nobo? (b) Con Jerusalem Nobo ta ‘baha foi cielo’?

³ Juan a sigi: “Mi a mira també e stad santo, Jerusalem Nobo, bahando foi cielo foi Dios i prepará manera bruid dorná pa su esposo.” (Revelacion 21:2) Jerusalem Nobo ta e bruid di Cristo, componí di cristian ungí cu ta keda fiel te na morto i cu ta ser resusitá pa bira rey i sacerdote cu Jesús glorificá. (Revelacion 3:12; 20:6) Mescos cu Jerusalem terrenal a bira e asiento di gobierno den Israel di antigua, e magnífico Jerusalem Nobo i su Bruidegom ta compone e gobierno dje sistema nobo di cosnan. Esei ta e cielo nobo. E ‘bruid ta baha foi cielo,’ no literalmente, sino den e sentido di cu e ta dirigi su atencion ne tera. E bruid dje Lamchi lo ser su yudante leal den e funcion di un gobierno husto riba tur humanidad. Un bendicion en berdad pe tera nobo!

 4. Cua promesa Dios a duna cu ta similar cu e promesa cu el a duna ne nacion recién formá di Israel?

⁴ Juan a sigi bísanos: “Cu esei mi a tende un boz fuerte desde e trono bisa: ‘Mira! e tent di Dios ta cerca hende, i lo e biba cerca nan, i nan lo ser su pueblo. I Dios mes lo ta cu nan.’” (Revelacion 21:3) Ora Jehova a cera e pacto di Ley cu loke tabata e nacion nobo di Israel, el a priminti: “Lo mi siguramente pone mi tabernáculo meimei di boso, i mi alma lo no aborece boso. I lo mi berdaderamente camna meimei di boso i resulta di ser boso Dios, i boso, di boso parti, lo resulta di ser mi pueblo.” (Levítico 26:11, 12) Awor Jehova ta haci un promesa similar na hende fiel. Durante e Dia di Huicio di mil aña, nan lo bira un pueblo mashá special pe.

 5. (a) Di ki manera Dios lo biba cerca humanidad durante e Reino di mil aña? (b) Con Dios lo biba cerca hende despues dje Reino di mil aña?

⁵ Durante e Reino di mil aña, Jehova lo “biba” cerca humanidad den un arreglo temporario, cu su Yiu real, Jesucristo, como su representante. Sin embargo, na fin dje Reino di mil aña, ora Jesús ta entrega e Reino na su Tata, ningun representante of abogado real ta necesario. Jehova lo biba spiritualmente cerca “su pueblo” di manera permanente i directo. (Compara cu Juan 4:23, 24.) Ki un privilegio halto pa humanidad restorá!

6, 7. (a) Cua gran promesa Juan a revela, i ken lo disfruta di tal bendicion? (b) Ki detaye Isaías a duna di un paradijs cu ta tanto spiritual como fisical?

⁶ Juan a sigi bisa: “I lo e seca tur lágrima di nan wowo, i lo no existi morto mas, ni yoramento ni sclamamento ni dolor lo no existi mas. E cosnan anterior a pasa caba.” (Revelacion 21:4) Una bez mas nos ta corda promesa inspirá anterior. Isaías també a spera e tempo ora morto i yoramento lo no existi mas i hubileo lo reemplaza desconsuelo. (Isaías 25:8; 35:10; 51:11; 65:19) Awor Juan a confirma cu tal promesa lo haya cumplimento maraviyoso durante e Dia di Huicio di mil aña. Promé, e multitud grandi lo disfruta di tal bendicion. “E Lamchi cu ta meimei dje trono,” lo sigi pastoreánan, i “lo guíanan na fontein di awa di bida. I Dios lo seca tur lágrima di nan wowo.” (Revelacion 7:9, 17) Pero cu tempo tur esnan cu ta resusitá i cu ta eherce fe den e percuracion di Jehova lo tei hunto cu nan, disfrutando di un paradijs cu ta tanto spiritual como fisical.

⁷ Segun Isaías: “Ne tempo ei wowo di hende ciegu lo ser habrí, i orea mes di hende sordu lo ser destapá.” Sí, “ne tempo ei hende coho lo subi mescos cu biná, i lenga di hende mudo lo sclama cu gozo.” (Isaías 35:5, 6) Ne tempo ei, també, “nan siguramente lo traha cas i ocupánan; i nan siguramente lo planta hofi di wijndruif i come nan fruta. Nan lo no edifica i otro ocupá; nan lo no planta i otro come. Pasobra manera e dianan di palu, lo ta e dianan di mi pueblo; i mi escogínan lo saca mayor probecho for di obra di nan mes man.” (Isaías 65:21, 22) Di manera cu nan lo no ser sacá for di tera.

 8. Kico Jehova mes ta bisa tocante e confiabilidad dje gran promesa?

⁸ Ki bistazo magnífico ta yena nos mente ora nos ta medita riba tal promesa! Percuracion maraviyoso ta spera fiel humanidad bao dje gobernacion amoroso di cielo. Tal promesa ta mucho bon pa ser realizá? Nan ta solamente soño di un homber bieu preso riba e isla di Patmos? Jehova mes ta contesta: “I Esun sintá riba e trono a bisa: ‘Mira! mi ta traha tur cos nobo.’ També, el a bisa: ‘Skirbi, pasobra e palabra ta fiel i berdadero.’ I el a bisámi: ‘Nan a sosode! Mi ta Alfa i Omega, e principio i e fin.’”—Revelacion 21:5, 6a.

 9. Pakico nos por keda absolutamente sigur di realizacion di tal bendicion di futuro?

⁹ Ta como si Jehova mes ta firma un garantía of acto di terreno pa fiel humanidad, pa tal bendicion di futuro. Ken por tribi duda tal Notario? Sí, tal promesa di Jehova ta asina sigur cu el a papia como si nan ta cumplí caba: “Nan a sosode!” Jehova no ta “Alfa i Omega . . . , Esun cu tá i cu tabata i cu lo bini, e Todopoderoso”? (Revelacion 1:8) Sigur cu sí! E mes a declara: “Mi ta e promé i mi ta e último, i fuera di mi no tin Dios.” (Isaías 44:6) Como tal, e por inspira profecía i cumpli cu nan na tur detaye. Cuanto esei ta fortalece nos fe! P’sei el a priminti: “Mira! mi ta traha tur cos nobo”! En bez di duda si tal maraviya realmente lo sosode, siguramente nos tin cu puntra: ‘Kico mi tin cu haci personalmente pa mi hereda tal bendicion?’

“Awa” pa hende cu tin sed

10. Cua “awa” Jehova ta ofrece, i kico e ta simboliza?

¹⁰ Ta Jehova mes cu ta declara: “Na ken cu tin sed, lo mi duna dje fontein di awa di bida gratis.” (Revelacion 21:6b) Pa hende satisface nan sed, nan tin cu ser consiente di nan necesidad spiritual i keda dispuesto pa acepta e “awa” cu Jehova ta duna. (Isaías 55:1; Mateo 5:3) Cua “awa”? Jesús mes a contesta e pregunta ora el a duna testimonio ne muher cant’i poz den Samaria. Jesús a bisé: “Ken cu ta bebe dje awa cu mi ta duna di ningun manera lo haya sed hamás, sino e awa cu mi ta duna lo bira den dje un fontein di awa cu ta brota pa duna bida eterna.” Tal “fontein di awa di bida” ta bini di Dios mediante Cristo como su percuracion pa restora humanidad na bida perfecto. Mescos cu e samaritana, ki ansioso nos tin cu keda pa bebe te satisfaccion for di tal fontein! I mescos cu e samaritana, ki dispuesto nos tin cu keda pa bandona interés mundano pa probecha di oportunidad di bisa otro hende e bon nobo!—Juan 4:14, 15, 28, 29.

Esnan cu ta vence

11. Jehova ta duna cua promesa, i na ken e palabra ta aplica promé?

¹¹ Esnan cu ta bebe dje “awa” refrescante tin cu vence també, manera Jehova a sigi bisa: “Ken cu ta vence lo hereda tal cosnan, i lo mi ser su Dios i lo e ser mi yiu.” (Revelacion 21:7) E promesa ta similar cu promesa hayá den e mensahe pe siete congregacion; p’sei, e palabra tin cu aplica den e promé lugar na disípel ungí. (Revelacion 2:7, 11, 17, 26-28; 3:5, 12, 21) Rumanan spiritual di Cristo através dje siglonan a anhela e privilegio di ser parti di Jerusalem Nobo. Si nan ta vence, manera Jesús a vence, nan speranza lo ser realizá.—Juan 16:33.

12. Con e promesa di Jehova den Revelacion 21:7 lo ser cumplí en relacion cu e multitud grandi?

¹² E multitud grandi di tur nacion també ta spera cumplimento dje promesa. Nan també tin cu vence, sirbiendo Dios lealmente te cu nan ta sali for dje tribulacion grandi. Anto nan lo drenta den nan herencia terrenal, ‘e reino prepará pa nan for di fundamento di mundo.’ (Mateo 25:34) Eseinan i otro hende dje carnénan terrenal di Señor cu ta pasa e prueba na fin dje mil aña ta ser yamá “santo.” (Revelacion 20:9) Nan lo disfruta di un relacion sagrado i filial cu nan Creador, Jehova Dios, como miembro di su organizacion universal.—Isaías 66:22; Juan 20:31; Romano 8:21.

13, 14. Pa nos hereda e gran promesa di Dios, nos tin cu keda determiná di evita cua costumber, i pakico?

¹³ Cu tal prospecto magnífico na bista, ta ki importante pa Testigo di Jehova djawe keda limpi di contaminacion dje mundo di Satanás! Nos tin cu keda fuerte, cu e decision i determinacion di cu e Diabel nunca lo lástranos hunto cu hende cu Jehova mes ta detayá aki: “Pero en cuanto cobarde i hende sin fe i hende cu ta repugnante den nan sushidad i asesino i fornicador i hende cu ta practica spiritismo i idólatra i tur mentiroso, nan porcion lo ser den e tanki cu ta kima cu candela i swafel. Esei ta nifica e segundo morto.” (Revelacion 21:8) Sí, hende cu kier recibi e herencia tin cu evita costumber cu ta mancha e sistema di cosnan bieu aki. Nan ta vence kedando fiel apesar di tur presion i tentacion.—Romano 8:35-39.

¹⁴ Aunque cristiandad ta bisa cu e ta e bruid di Cristo, costumber repugnante cu Juan a menciona ta indentifiqué. P’sei, e ta baha na destruccion eterno hunto cu e resto di Babilonia e Grandi. (Revelacion 18:8, 21) Di igual manera, cualkier hende di esnan ungí of dje multitud grandi cu ta cuminza practica tal malecho, of cu ta cuminza promovénan, ta enfrenta destruccion eterno. Si nan ta persisti den tal accion, nan lo no hereda e promesa. I den e tera nobo, ken cu ta purba di introduci tal costumber lo ser destruí pronto, bahando den e segundo morto sin ningun speranza di resureccion.—Isaías 65:20.

15. Ken ta sobresali como vencedor, i Revelacion ta yega na un culminacion sublime cu cua vision?

¹⁵ Sobresaliente como vencedor ta e Lamchi, Jesucristo i su bruid di 144.000, Jerusalem Nobo. Ta ki apropiado, anto, pa Revelacion yega na un culminacion sublime cu un bista final i extraordinario di Jerusalem Nobo! Awor Juan ta duna detaye dje último vision cu el a recibi.

[Plachi na página 302]

Den e arreglo social dje tera nobo, lo tin trabao i compañerismo gozoso pa tur hende