E Dia Cu Ta ‘Kima Manera Un Fornu’

“Mira! e dia ta biniendo cu ta kimando manera e fornu.” —MALAKIAS 4:1.

 1. Ki preguntanan ta lanta en coneccion cu Malakías 4:1?

DURANTE e último dianan aki, felis ta esnan kende nan nomber Jehova ta scoge pa skirbi den su buki di recuerdo. Pero kico di esnan cu no ta cualificá p’e privilegio ei? Sea cu nan ta gobernante of simplemente hende comun, con lo para cu nan si nan trata e proclamadornan dje Reino di Dios i nan mensahe cu desprecio? Malakías ta papia di un dia di regla cuenta. Na capítulo 4, versículo 1, nos ta lesa: “ ‘Pasobra, mira! e dia ta biniendo cu ta kimando manera e fornu, i tur esnan presuntuoso i esnan haciendo maldad mester bira manera yerba secu. I e dia cu ta biniendo siguramente lo devorá nan,’ Jehova di ehércitonan a bisa, ‘di manera cu lo e no laga pa nan ni rais ni rama.’ ”

 2. Ki descripcion gráfico di Jehova su huicio Ezekiel ta duna?

² Otro profetanan tambe ta compará Jehova su husgamentu dje nacionnan cu e calor ardiente di un fornu. Ki aptamente Ezekiel 22:19-22 ta aplicá na e husgamentu di Dios dje sectanan di cristiandad apóstata! E ta bisa: “Esaki ta loke e Señor Soberano Jehova a bisa, ‘Pa motibu cu boso tur a bira manera hopi basura impuru, p’esei aki mi ta colectando boso huntu . . . Mescos cu ora di colectá plata i coper i heru i chumbu [lood] i ‘tin’ meimei di un fornu, afin di supla riba dje cu candela pa pon’é dirti, asina lo mi colectá nan huntu den mi rabia i den mi furia, i lo mi supla i pone boso dirti. I lo mi trece boso huntu i supla riba boso cu e candela di mi furia, i boso mester dirti meimei di dje. Mescos cu e dirtimentu di plata meimei di un fornu, asina boso lo ser dirtí meimei di dje; i boso lo tin cu sa cu ami mes, Jehova, a drama mi rabia riba boso.’ ”

 3, 4. (a) Ki pretension hipócrita e clero a haci? (b) Kico ta e registro baho di religion?

³ Un ilustracion poderoso en berdad! E clero cu a trata di keda sin usa Jehova su nomber, asta blasfemando e nomber santu ei, lo tin cu enfrentá e dia ei di duna cuenta. Presuntuosamente, nan ta afirmá cu nan i nan aliadonan político lo establecé e Reino di Dios riba tera of por lo ménos haci e tera un lugá apropiado p’e Reino.

⁴ Cristiandad apóstata a uni cu gobernantenan político den bringa gueranan teribel. Historia ta registrá e Crusadanan di Edad Media, e combertimentu forsá dje Inkisicion Spañó, e Guera [Religioso] di Trinta Aña cu a destruí Europa den siglo 17 i e Guera Civil Spañó di añanan 30, cu a ser bringá pa salbaguardiá e posicion di catolicismo na Spaña. E mayor dramamentu di sanger a bini cu e dos gueranan mundial di nos siglo, ora católico i protestant a enbolbé nan mes den un ‘free-for-all,’ matando pa loco nan mes creyentenan i di otro religionnan. Mas recientemente, tabatin bataya mortífero entre católico i protestant na Irlanda, entre faccionnan religioso na India i entre gruponan religioso di ex-Yugoslavia. E páginanan di historia religioso tambe ta manchá cu sanger debí n’e martirio di miles di Testigo fiel di Jehova.—Revelacion 6:9, 10.

 5. Ki huicio ta spera religion falsu?

⁵ Nos por apreciá mesora e husticia di Jehova su binidero ehecucion di Babilonia e Grandi, e imperio mundial di religion falsu, huntu cu su apoyadornan. E ehecucion aki ta ser describí na Revelacion 18:21, 24: “Un angel fuerte a hisa un piedra manera un piedra grandi di molina i a tir’é na laman, bisando: “Asina, cu un tiru lihé Babilonia e gran stad lo ser tirá abou, i lo e no ser hañá nunca mas. Sí, den dje a ser hañá e sanger di profetanan i di santunan i di tur esnan cu a ser matá riba tera.’ ”

 6. (a) Ken mester bira manera yerba secu, i pakico? (b) Ki siguransa tin pa esnan cu ta teme Jehova?

⁶ Cu tempu, tur enemigu di husticia, i nan apoyadornan, “mester bira manera yerba secu.” E dia di Jehova lo kima meimei di nan manera un fornu. “Lo e no laga ni rais ni rama na nan.” Den e dia di duna cuenta ei, yu chikitu, of rama, lo ser tratá conforme cu husticia segun Jehova su balotacion di nan raisnan, nan mayornan, kendenan tin e supervision riba e yunan aki. Mayornan malbado lo no tin desendiente pa continuá cu nan camindanan malbado. Pero esnan cu ta ehercé fe den Dios su promesanan di Reino lo no ser sagudí. P’esei Hebreonan 12:28, 29 ta spierta: “Laga nos sigui tene bondad inmerecí, mediante cua nos por rindi aceptablemente na Dios sirbishi sagrado cu temor piadoso i reverencia. Pasobra nos Dios ta tambe un candela consumidor.”

Jehova Ta un Dios Cruel?

 7. Con Jehova su amor ta relacioná cu su huicio?

⁷ Esaki ta nificá cu Jehova ta un Dios cruel i vengativo? Absolutamente cu no! Na 1 Juan 4:8, e apostel ta declará un berdad fundamental: “Dios ta amor.” Anto, na versículo 16 e ta añadí énfasis, bisando: “Dios ta amor, i ken cu ta permanecé den amor ta permanecé den union cu Dios i Dios ta permanecé den union cuné.” Ta debí na su amor pa humanidad cu Jehova ta proponé pa limpia e tera aki di tur maldad. Nos Dios amoroso i misericordioso, ta declará: “Mes sigur cu mi ta na bida, . . . mi tin deleite, no den e morto di e malbado, sino cu un persona malbado ta bolbe bek for di su caminda i realmente ta sigui biba. Bolbe bek, bolbe bek for di boso mal camindanan, pues pakico boso tin cu muri?”—Ezekiel 33:11.

 8. Con Juan a enfatisá amor, i tog a presentá su mes tambe como un Yu di Donder?

⁸ Juan ta referí na a·gaʹpe, amor basá riba principio, hopi mas tantu biaha cu e otro tres escritornan di Evangelio huntu, tog na Marco 3:17, Juan mes ta ser describí como un ‘Yu di Donder.’ Tabata mediante inspiracion di Jehova cu e Yu di Donder aki a skirbi e mensahenan apocalíptico dje último buki di Bijbel, Revelacion, cua ta describí Jehova como e Dios cu ta ehecutá husticia. E buki aki ta yen di expresion relacioná cu huicio, manera “e baki grandi di pers biña dje rabia di Dios,” “e siete conchinan dje rabia di Dios,” i “e furia di Dios e Todopoderoso.”—Revelacion 14:19; 16:1; 19:15.

 9. Ki expresionnan Jesus a haci riba Jehova su huicionan, i con su profecianan a ser cumplí?

⁹ Nos Señor Jesucristo, kende ta “e imágen dje Dios invisibel,” cu curashi a declará e huicionan di Jehova miéntras e tabata aki riba tera. (Colosensenan 1:15) Por ehempel, tin e siete ainan di Mateo capítulo 23 cu el a proclamá francamente contra e hipócritanan religioso di su dia. El a concluí e huicio di condenacion ei cu e palabranan aki: “Jerusalem, Jerusalem, matador dje profetanan i piedrador di esnan mandá cerca dje,—cuantu biaha mi kier a hala bo yunan huntu, manera un galiña ta hala su puitunan huntu bou di su alanan! Pero boso no tabata kier. Mira! Boso cas ta ser bandoná pa boso.” Trint’i siete aña despues, huicio a ser ehecutá dor dje ehército romano bou di General Tito. Esei tabata un dia spantoso, profético di loke lo resultá di ta e dia mas inspirador di temor den tur experencia humano—Jehova su dia, cu pronto lo dal aden.

“E Solo” Ta Briya

10. Con “e solo di husticia” ta trece goso n’e pueblo di Dios?

¹⁰ Jehova ta duna di conocé cu lo tin sobrebibiente di su dia. E ta referí na esakinan na Malakías 4:2, bisando: “Na boso cu ta den temor di mi nomber e solo di husticia siguramente lo briya, cu curacion den su alanan.” E solo di husticia ei no ta ningun otro sino Jesucristo mes. E ta e ‘lus spiritual di mundu.’ (Juan 8:12) Con e ta briya? E ta sali cu curacion den su alanan—promé, curacion spiritual, locual nos por experenciá asta awe i despues, den e binidero mundu nobo, curacion físico di hende for di tur nacion. (Mateo 4:23; Revelacion 22:1, 2) Figurativamente, manera Malakías a bisa, esnan curá lo “sali bai i coba e tera cu nan pata manera bisénan gordá” cu a caba di ser lagá liber for di stal. Ki un goso lo ser experenciá tambe dor di esnan resucitá cu ta ser lantá cu e prospecto di alcansá perfeccion humano!

11, 12. (a) Ki resultado final ta spera e malbadonan? (b) Con e pueblo di Dios ta “trapa esnan malbado”?

¹¹ Sin embargo, ki tal dje malbadonan? Na Malakías 4:3, nos ta lesa: “ ‘Boso siguramente lo trapa esnan malbado, pasobra nan lo bira manera puiru bou di boso plant’i pia riba e dia cu mi ta bai actua,’ Jehova di ehércitonan a bisa.” Miéntras e ta protehá esnan cu ta stim’é, nos Dios-Guerero lo a bari e tera limpi’é dje enemigunan tiránico ei, eliminando nan. Satanas i su demoñonan lo a ser contené.—Salmo 145:20; Revelacion 20:1-3.

¹² E pueblo di Dios no ta participá den destruccion dje malbadonan. Con, anto, nan ta “trapa esnan malbado”? Nan ta haci esaki figurativamente dor di participá den un gran celebracion di victoria. Exodo 15:1-21 ta describí un celebracion asina. El a sigui despues dje destruccion di Fárao i su ehércitonan den Laman Corá. Na cumplimentu di Isaías 25:3-9, despues dje eliminacion di “esnan tiránico” mester sigui un bankete di victoria relacioná cu e promesa di Dios: “Lo e realmente traga morto pa semper, i e Señor Soberano Jehova siguramente lo limpia e lágrimanan di tur cara. I e reproche di su pueblo lo e kita for di tur e tera, pasobra Jehova mes a papi’é. I riba e dia ei un hende siguramente lo bisa: ‘Mira! Esaki ta nos Dios. . . . Esaki ta Jehova. Nos a spera den dje. Laga nos ser gososo i alegrá den e salbacion pa medio di dje.’ ” Tin goso den e salbacion aki, no vengansa of alegria riba pena di otronan, sino exaltacion mirando Jehova su nomber ser santificá i e tera limpiá pa habitacion pacífico dor di un humanidad uní.

Un Gran Programa Educacional

13. Ki educacion lo tuma lugá den e “tera nobo”?

¹³ Na Malakías 4:4, e hudiunan a ser spiertá pa “corda . . . e ley di Moises.” Asina, awe nos mester sigui “e ley di Cristo,” manera Galationan 6:2 ta mencioná. Sobrebibientenan di Armagedon sin duda lo haña mas instruccion basá riba e ley di Cristo aki, i e instruccionnan aki posiblemente lo ser skirbí den “e rolnan” di Revelacion 20:12 cu lo ser habrí n’e tempu dje resureccion. Ki un dia grandi esei lo ta segun cu e mortonan resucitá ta ser educá pa sigui e estilo di bida dje “tera nobo”!—Revelacion 21:1.

14, 15. (a) Con e Elías di tempu moderno ta ser identificá? (b) Ki responsabilidad e clase di Elías ta cumpli cuné?

¹⁴ Esei lo ta un extension dje trabou educacional cu Jehova a referí na dje, manera ta skirbí na Malakías 4:5: “Mira! Mi ta manda pa boso Elías e profeta promé cu e binimentu di Jehova su dia grandi i inspirador di temor.” Ken e Elías di tempu moderno ei ta? Manera Mateo 16:27, 28 ta mustra, refiriendo na su “binimentu den su reino” Jesus a bisa: “E Yu di hende ta destiná pa bini den e gloria di su Tata cu su angelnan, anto e ora ei lo e recompensá cada un segun su comportacion.” Seis dia despues, riba un ceru cu Pedro, Santiago i Juan, “el a ser transfigurá dilanti nan, i su cara a briya manera solo, i su bistí exterior a bira briyante manera lus.” E tabata su so den e vision aki? No, pasobra “mira! a aparecé na nan Moises i Elías, combersando cuné.”—Mateo 17:2, 3.

¹⁵ Kico esaki lo por a nificá? El a señalá na Jesus como e Moises Mayor profetisá n’e tempu di su binimentu pa huicio. (Deuteronomio 18:18, 19; Echonan 3:19-23) Lo el a ser relacioná n’e tempu ei cu un Elías di tempu moderno afin di cumpli cu un trabou vital, esun di predicá e bon nobo aki dje Reino den tur e tera promé cu Jehova su dia grandi i inspirador di temor dal aden. Describiendo e trabou dje “Elías” aki, Malakías 4:6 ta declará: “E mester bolbe e curason di tatanan bek pa nan yunan, i e curason di yunan bek pa nan tatanan; pa mi no bini i realmente heridá e tera dedicand’e completamente na destruccion.” Pues “Elías” ta ser identificá como e clase di esclabo fiel i discreto di cristiannan ungí riba tera, na ken e Doño, Jesus, a confia tur Su pertenencianan. Esaki ta incluí percuracion dje cas di fe cu ‘cuminda spiritual necesario na su debido tempu.’—Mateo 24:45, 46.

16. Ki resultadonan felis e trabou dje clase di Elías a producí?

¹⁶ Mundialmente awe, nos por mira e resultadonan felis dje programa di alimentacion ei. E revista Toren di Vigilancia, cu un imprenta di 16.100.000 copia di cada edicion na 120 idioma, di cua 97 ta ser publicá simultáneamente, ta inundando e tera cu “e bon nobo aki dje reino.” (Mateo 24:14) Otro publicacionnan na hopi idioma ta ser usá den vários faceta dje trabou di predicá i di siña di Testigonan di Jehova. E clase di Elías, e esclabo fiel i discreto, ta alerto pa percurá abundantemente pa tur “esnan conciente di nan necesidad spiritual.” (Mateo 5:3) Ademas, esnan cu ta aceptá e speransa di Reino aki i actua di acuerdo cuné ta enlasá den un maraviyoso unidad mundial. Esei ta incluí e multitud grandi “for di tur nacion i tribu i pueblo i lenga.” (Revelacion 7:9) Ora e trabou aki a ser cumplí te n’e grado cu Jehova ta rekerí, anto e fin lo bini den su dia grandi i inspirador di temor.

17. Na ki tempu Jehova su dia inspirador di temor lo dal aden?

¹⁷ Na ki tempu exactamente e dia inspirador di temor ei lo dal aden? Apostel Pablo ta contestá: “E dia di Jehova ta bini exactamente manera un ladron den anochi. Ki ora cu nan ta bisando [talbes na un manera único]: ‘Pas i siguridad!’ anto destruccion di ripiente lo bini riba nan instantáneamente mescos cu dolor di angustia riba un muher na estado; i nan lo no scapa di ningun manera.”—1 Tesalonicensenan 5:2, 3.

18, 19. (a) Con “pas i siguridad” ta ser declará? (b) Na ki tempu Jehova su pueblo lo haña alivio?

¹⁸ Ken ta “nan” den e profecia aki? Nan ta e lidernan político cu ta pretendé cu nan por edificá un ordu nobo uní for dje elementonan fragmentá dje mundu violento aki. Nan productonan imponente, e Liga di Nacionnan i Nacionnan Uní, a fracasá den esaki. Manera Jehova su profeta a pronosticá, awor nan ta asta “bisando, ‘Tin pas! Tin pas!’ miéntras cu no tin pas.”—Jeremías 6:14: 8:11; 14:13-16.

¹⁹ Miéntras tantu, Jehova su pueblo ta wanta e presionnan i persecucionnan dje mundu sin dios aki. Pero pronto, manera 2 Tesalonicensenan 1:7, 8 ta declará, nan lo haña alivio “n’e revelacion dje Señor Jesus for di cielu cu su angelnan poderoso den un vlam di candela, ora e trece vengansa riba esnan cu no conocé Dios i esnan cu no ta obedecé e bon nobo di nos Señor Jesus.”

20. (a) Kico Sofonías i Habacuc ta profetisá tocante e dia cu ta ‘kima manera un fornu’? (b) Ki conseho i animacion e profecianan aki ta duna?

²⁰ Ki pronto esei lo ta? Hopi di nos a bin ta spera pa un tempu largu. Miéntras tantu, gran cantidad dje mansunan cu lo sobrebibí ta contestando e yamada hañá na Sofonías 2:2, 3: “Busca Jehova . . . Busca husticia, busca mansedumbre. Probablemente boso lo ser scondí den e dia di rabia di Jehova.” Anto, Sofonías 3:8 ta contené e exhortacion: “ ‘P’esei mantené boso den expectativa di mi,’ ta e expresion di Jehova, ‘te n’e dia di mi lantamentu n’e botin, pasobra mi decision hudicial ta pa reuní nacionnan, pa mi trece reinonan huntu, pa mi por drama riba nan mi denunciacion, tur mi rabia ardiente; pasobra pa medio dje candela di mi celo tur e tera lo ser devorá.’ ” E fin ta cerca! Jehova sa e dia i e ora ei i lo e no cambia su orario. Laga nos wanta cu pacenshi. “Pasobra e vision ta p’e tempu señalá ainda, i e ta sigui ansha te n’e fin, i lo e no papia un mentira. Asta si e tarda, keda den expectativa di dje; pasobra lo e ser cumplí sin falta. Lo e no yega lat.” (Habacuc 2:3) Jehova su dia inspirador di temor ta pura yega cada bes mas cerca. Corda, e dia ei lo no ta lat!

Den Forma di Repaso:

◻ Kico lo para di gobernantenan i hende comun den Jehova su dia inspirador di temor?

◻ Ki clase di Dios Jehova ta?

◻ Ki sorto di educacion ta ser describí p’e pueblo di Dios?

◻ Con e profetanan di Dios ta exhortá nos en bista dje cercania dje fin?

[Plachi na página 21]

Durante e Inkisicion Spañó hopi hende a ser forsá pa combertí na catolicismo

[Credit line]

The Complete Encyclopedia of Illustration/J. G. Heck