Bo Ta Pordona Manera Jehova Ta Pordona?

“Si boso pordoná hende nan ofensanan, boso Tata celestial tambe lo pordoná boso; miéntras cu si boso no pordoná hende nan ofensanan, boso Tata lo no pordoná boso ofensanan tampoco.”​—⁠MATEO 6:​14, 15.

“JEHOVA ta misericordioso i compasivo, tardá pa rabia i abundante den bondad amoroso. Lo e no sigui señalá falta pa semper, ni carga rencor pa tempu indefiní. E no a haci cu nos ni conforme cu nos picánan; ni conforme cu nos erornan e no a trece riba nos loke nos merecé. Pasobra mescos cu cielu ta mas haltu cu tera, su bondad amoroso ta superior pa cu esnan cu ta tem’é. Mes leu cu salimentu di solo ta for di bahamentu di solo, asina leu for di nos el a pone nos delitunan. Manera un tata ta mustra misericordia na su yunan, Jehova a mustra misericordia na esnan cu ta tem’é. Pasobra e mes conocé bon e formacion di nos, cordando cu nos ta stof.”​—⁠Salmo 103:​8-14.

² Concibí den picá i parí cu eror, cu imperfeccion heredá semper purbando pa hiba nos como catibu na ley di picá, desesperadamente nos tin mester di un Dios cu ‘ta corda cu nos ta trahá di stof.’ Tres cien aña despues cu David a describí Jehova di un manera asina bunita den Salmo 103, un otro escritor di Bijbel, Miqueas, a elogiá e mésun Dios aki den casi e mésun manera pa su pordonamentu compasivo di picá cu nos a yega di cometé: “Cua dios por ser compará cu bo: kitando falta, pordonando crímen, no cargando rabia pa semper sino deleitando den mustra misericordia? Un biaha mas tene piedad di nos, trapa nos faltanan, tira tur nos picánan den fondo di laman.”​—⁠Miqueas 7:​18, 19, The Jerusalem Bible.

³ Den e Scritura Griego, e palabra pa “pordoná” kier men “laga bai.” Nota cu David i Miqueas, citá ariba, ta transmití e mésun nificacion den palabranan atractivo i descriptivo. Pa nos comprendé plenamente e grado asombroso di Jehova su misericordia, laga nos repasá algun dje hopi ehempelnan di dje den accion. Esun promé ta mustra cu Jehova su mente por cambia di destruccion pa pordon.

Moises Ta Intermediá ​—⁠Jehova Ta Scucha

⁴ Jehova a saca e nacion di Israel sano i salbo for di Egipto i a trece nan cerca dje tera cu el a primintí nan como patria, pero nan a nenga di sigui padilanti, teniendo miedu di un par di hende den Cánan. Despues cu nan a mira Jehova libra nan for di Egipto mediante dies plaga destructivo, habri un caminda di escape dor di Laman Corá, destruí e ehército egipcio cu a purba sigui nan, inaugurá cu nan na Ceru di Sínai e pacto di Ley cu a haci nan Jehova su nacion scogí, i milagrosamente a suministrá mana diariamente for di cielu pa sostené nan, nan tabatin miedu di drenta e Tera Primintí debí na algun cananeo tamaño di gigante!​—⁠Número 14:​1-4.

⁵ Moises i Aron a keda babucá p’e miedu di hende cu e pueblo tabatin. Hosué i Caleb, dos spion fiel, a purba lanta e ánimo di Israel: ‘E tera ta masha masha bon, un tera cu ta producí lechi i miel. No teme e hendenan; Jehova ta cu nos!’ En bes di a ser animá dor dje palabranan ei, e pueblo spantá i rebelde a purba piedra Hosué i Caleb.​—⁠Número 14:​5-10.

⁶ Jehova a rabia! “Finalmente Jehova a bisa Moises: ‘Pa cuantu tempu mas e pueblo aki lo tratá mi sin respet, i pa cuantu tempu mas nan lo no pone fe den mi pa tur e señalnan cu mi a efectuá meimei di nan? Lagá mi heridá nan cu pest i expulsá nan, i lagá mi haci di bo un nacion mas grandi i mas poderoso cu nan.’ Pero Moises a bisa Jehova: ‘E ora ei e egipcionan siguramente lo tende cu abo mediante bo poder a saca e pueblo aki for di meimei di nan. I nan siguramente lo cont’é n’e habitantenan dje tera aki. . . . Si bo causa morto n’e pueblo aki como un solo homber, e ora ei e nacionnan cu a tende di bo fama siguramente lo bisa esaki, “Debí cu Jehova no por a introducí e pueblo aki den e tera tocante cua el a hura na nan, el a pasa na mata nan den e desierto.” ’ ”​—⁠Número 14:​11-16.

⁷ Moises a roga pa pordon, pa causa di Jehova su nomber: “ ‘Pordoná, por fabor, e eror dje pueblo aki conforme e grandesa di bo bondad amoroso, i net manera bo a pordoná e pueblo aki desde Egipto en adelante te awor.’ Anto Jehova a bisa: ‘Di berdad mi ta pordoná conforme bo palabra.’ ”​—⁠Número 14:​19, 20.

Idolatria di Manases i Adulterio di David

⁸ Un ehempel sobresaliente di Jehova su pordon ta e caso di Manases, yu dje bon rey Ezekías. Manases tabatin 12 aña di edad ora el a cuminsá reina den Jerusalem. El a edificá e lugánan haltu, a establecé altar p’e diosnan di Baal, a traha columna sagrado, a buig p’e streanan di cielu, a practicá magia i bruheria, a busca medium spiritista i adivinadornan, a pone un imágen grabá den e tempel di Jehova i a haci su propio yunan pasa dor dje candela den e Vaye di Hinom. “El a haci na un gran escala loke tabata malu den bista di Jehova” i “a sigui seducí Huda i e habitantenan di Jerusalem pa haci pió cu e nacionnan cu Jehova a eliminá for di dilanti e yunan di Israel.”​—⁠2 Crónica 33:​1-9.

⁹ Finalmente, Jehova a trece e asirionan contra Huda, i nan a capturá Manases i a hib’é Babilonia. “I tan pronto cu esaki a caus’é angustia, el a suavisá e cara di Jehova su Dios i a sigui humiyá su mes mashá pa causa dje Dios di su antepasadonan. I el [Manases] a sigui resa na Dje, di manera cu El a laga su mes ser rogá dor di dje i El a tende su peticion pa fabor i a restor’é na Jerusalem na su gobernacion real.” (2 Crónica 33:​11-13) E ora ei Manases a kita e diosnan, ídolonan i altarnan stranhero i a laga tira nan pafó dje stad. El a cuminsá ofrecé sacrificio rib’e altar di Jehova i dirigí Huda pa sirbi e Dios berdadero. Esaki tabata un demostracion asombroso di Jehova su boluntad pa pordoná ora humildad, oracion i accion corectivo producí fruta cu ta cuadra cu repentimentu!​—⁠2 Crónica 33:​15, 16.

¹⁰ Rey David su picá di adulterio cu e esposa di Urías e hitita ta bon conocí. E no solamente a cometé adulterio cuné sino tambe a fabricá un plan cuidadoso pa tapa esei ora Batseba a sali na estado. E rey a duna Urías permit p’e bandoná e guera, sperando p’e bai su cas i tene relacion cu su esposa. Pero, debí na respet pa su co-soldatnan n’e frente di bataya, Urías a nenga di haci esei. E ora ei David a invit’é pa come i a haci’é burachi, pero ainda Urías no a bai cerca su casá. E ora ei David a manda un mensahe na su general pa pone Urías den e centro dje bataya, pa Urías por ser matá, locual a sosodé.​—⁠2 Samuel 11:​2-25.

¹¹ Jehova a manda su profeta Natan cerca David pa revelá e picá dje rey. “Awor David a bisa Natan: ‘Mi a peca contra Jehova.’ Riba esaki Natan a bisa David: ‘Jehova, na su turno, ta laga bo picá pasa. Lo bo no muri.’ ” (2 Samuel 12:13) David a sinti su mes masha culpabel di su picá i a expresá su repentimentu den un oracion sincero na Jehova: “Pasobra bo no tin deleite den sacrificio​—⁠di otro manera lo mi a duna esei; den ofrenda kimá completo bo no ta haña placer. E sacrificionan na Dios ta un spiritu kibrá; un curason kibrá i aplastá, O Dios, lo bo no despreciá.” (Salmo 51:​16, 17) Jehova no a despreciá David su oracion ofrecí for di un curason kibrá. Sin embargo, David a sufri di castigu pisá, na armonia cu Jehova su declaracion tocante pordon na Éxodo 34:​6, 7: “Di ningun manera lo e duna dispensacion di castigu.”

Sálomon Su Dedicacion dje Tempel

¹² Ora Sálomon a completá e construccion dje tempel di Jehova, el a bisa den su oracion di dedicacion: “Bo tin cu scucha n’e súplicanan di bo sirbidor i di bo pueblo Israel ora nan ta resa den direccion dje lugá aki, pa bo mes por tende for dje lugá di bo habitacion, for di cielu; i bo tin cu tende i pordoná.” Jehova a respondé: “Ora mi cera cielu pa awaceru no cai i ora mi manda e dalakochinan (tirakochinan) come e tera i si mi manda un pest entre mi pueblo, i mi pueblo riba cua mi nomber a ser yamá humiyá su mes i resa i busca mi cara i bolbe for di nan mal camindanan, anto ami mes lo tende desde cielu i lo pordoná nan picá, i lo mi sana nan tera.”​—⁠2 Crónica 6:21; 7:​13, 14.

¹³ Ora Jehova ta considerá bo, e ta aceptá bo pa loke bo ta awor, no loke bo tabata. Lo ta manera Ezekiel 33:​13-16 ta bisa: “Ora mi bisa n’e hustu: ‘Lo bo sigui biba positivamente,’ i e mes realmente confia den su propio husticia i haci inhusticia, ningun di su propio obranan hustu lo ser recordá, sino cu pa su inhusticia cu el a haci​—⁠pa esaki lo e muri. I ora mi bisa n’e malbado: ‘Lo bo muri positivamente,’ i e realmente bolbe for di su picá i efectuá rectitud i husticia, i e malbado debolbé e cos mes tumá como fiansa, ta paga bek e cosnan mes hortá, i realmente ta cana den e statutonan mes di bida dor di no haci inhusticia, lo e sigui biba positivamente. Lo e no muri. Ningun di su picánan cu cua el a peca lo ser recordá contra dje. Rectitud i husticia ta loke el a efectuá. Lo e sigui biba positivamente.”

¹⁴ E pordon cu Jehova Dios ta extendé na nos tin un rasgo distintivo, unu cu ta difícil pa criaturanan humano incluí den e pordon cu nan ta ofrecé na otro​—⁠Jehova ta pordoná i lubidá. Algun hende lo bisa, ‘Mi por pordoná loke bo a haci, pero mi no por (of no kier) lubid’é.’ Na contraste, nota loke Jehova ta bisa cu lo e haci: “Lo mi pordoná nan eror, i nan picá lo mi no corda mas.”​—⁠Jeremías 31:34.

¹⁵ Jehova ta pordonando su adoradornan riba tera pa miles di aña caba. E ta pordonando picá cu nan ta conciente cu nan ta cometé i tambe hopi cu nan no ta conciente di dje. Su provision di misericordia, gran pacenshi i pordon ta sin fin. Isaías 55:7 ta bisa: “Laga e homber malbado bandoná su caminda, i e homber perhudicial su pensamentunan; i lagu’é regresá na Jehova, kende lo tene misericordia cuné, i na nos Dios, pasobra lo e pordoná den un gran manera.”

Pordon den e Scritura Griego Cristian

¹⁶ E relatonan di Dios su pordon ta saturá e registro den e Scritura Griego Cristian. Jesus ta papia di dje hopi biaha, mustrando cu e ta na armonia cu Jehova su pensamentu riba e asuntu. Jesus su pensamentu ta bini for di Jehova, e ta reflehá Jehova, e ta e representacion exacto di Jehova su ser mes; mira Jesus ta mescos cu mira Jehova.​—⁠Juan 12:​45-50; 14:9; Hebreo 1:⁠3.

¹⁷ Cu Jehova ta pordoná den un gran manera ta ser indicá den un di Jesus su ilustracionnan, esun di un rey cu ta pordoná un esclabo un debe di 10.000 talento (rond di NAƒ60.000.000.). Pero ora e esclabo ei no a pordoná un co-esclabo un debe di cien denario (rond di NAƒ110.), e rey a bira furioso. “ ‘Esclabo malbado, mi a cancelá tur e debe aya pa bo, ora bo a suplicá mi. Abo, na bo turno, bo no tabatin deber di tene misericordia cu bo co-esclabo, mescos cu ami tambe a tene misericordia cu bo?’ Cu esei, su doño provocá na rabia, a entregu’é n’e carceleronan, te ora e paga tur loke e tabata debe.” E ora ei Jesus a haci e aplicacion: “Di igual manera tambe mi Tata celestial lo trata cu boso si boso no pordoná cada un su ruman di boso curason.”​—⁠Mateo 18:​23-35.

¹⁸ Djis promé cu Jesus a duna e ilustracion mencioná ariba, Pedro a bini cerca Jesus i a puntr’é: “Señor, cuantu biaha mi ruman por peca contra mi i mi mester pordon’é? Te na siete biaha?” Pedro a pensa cu e tabata masha generoso. Aunke e escriba i fariseonan a fiha un límite na dunamentu di pordon, Jesus a bisa Pedro: “Mi ta bisá bo, No te na siete biaha, sino te na setent’i siete biaha.” (Mateo 18:​21, 22) Apénas lo tin siete biaha riba un solo dia, manera Jesus a bisa: “Presta atencion na boso mes. Si bo ruman cometé un picá, censur’é, i si e repentí, pordon’é. Asta si e peca siete biaha pa dia contra bo i ta bolbe cerca bo siete biaha, bisando, ‘Mi ta repentí,’ bo tin cu pordon’é.” (Lucas 17:​3, 4) Ora Jehova ta pordoná, e no ta tene registro di nos picánan​—⁠felismente pa nos.

¹⁹ Si nos tin e humildad pa repentí i confesá nos picánan, Jehova ta dispuesto pa actua faborablemente pa cu nos: “Si nos ta confesá nos picánan, e ta fiel i hustu p’e pordoná nos nos picánan i haci nos limpi di tur inhusticia.”​—⁠1 Juan 1:⁠9.

²⁰ E siguidor di Jesus, Esteban, den un spiritu notabel di extendé pordon, a grita e súplica aki ora un multitud furioso tabata piedr’é: “ ‘Señor Jesus, ricibí mi spiritu.’ Anto, doblando su rudia, el a grita cu un bos fuerte: ‘Jehova, no acusá nan dje picá aki.’ I despues di a bisa esaki el a bai drumi den morto.” Echo 7:​59, 60.

²¹ Jesus a establecé un ehempel asta mas sobresaliente di ser dispuesto pa pordoná. Su enemigunan a arest’é, a husgu’é ilegalmente, a conden’é, a haci mofa di dje, a scupi’é, a sut’é cu un zwiep cu hopi faha na dje, cu probablemente tabatin pidanan di wesu i metal hincá den nan, i finalmente a lagu’é clabá na un staca pa oranan largu. E romanonan tabata enbolbí den hopi di esaki. Sin embargo, ora Jesus tabata muriendo riba e staca di tormento ei, el a bisa na su Tata celestial dje soldatnan cu a clab’é na staca: “Tata, pordoná nan, pasobra nan no sa kico nan ta haciendo.”​—⁠Lucas 23:34.

²² Den su Sermon riba Ceru, Jesus a bisa: “Sigui stima boso enemigunan i resa pa esnan cu ta persiguí boso.” Na fin di su ministerio terenal, e mes a obedecé e principio ei. Esei ta demasiado exigente pa nos, cu ta lucha cu e debilidad di nos carni pecaminoso? Por lo ménos nos mester purba pone na práctica e palabranan cu Jesus a siña su siguidornan despues cu el a duna nan e oracion modelo: “Si boso pordoná hende nan ofensanan, boso Tata celestial tambe lo pordoná boso; miéntras cu si boso no pordoná hende nan ofensanan, boso Tata lo no pordoná boso ofensanan tampoco.” (Mateo 5:44; 6:​14, 15) Si nos ta pordoná manera Jehova ta pordoná, nos lo pordoná i lubidá.

[Study Questions]

1, 2. Ki clase di Dios nos tin mester, i pakico?

3. Kico kier men pordoná?

4. Despues di cua demostracionnan di Jehova su poder e israelitanan ainda tabatin miedu di drenta e Tera Primintí?

5. Con e dos fiel spionnan a purba lanta e ánimo di Israel?

6, 7. (a) Kico Jehova a dicidí di haci ora Israel a resistí pa marcha drenta e Tera Primintí? (b) Pakico Moises a oponé Jehova su sentencia riba Israel, i cu ki resultado?

8. Ki clase di registro Rey Manases di Huda a traha?

9. Con Jehova su cara a ser suavisá pa cu Manases, i cu ki resultado?

10. Con David a purba tapa su picá cu esposa di Urías?

11. Con David a ser trecí na repentimentu di su picá, pero kico el a sufri?

12. Kico Sálomon a pidi n’e tempu di dedicacion dje tempel, i con Jehova a respondé?

13. Kico Ezekiel 33:​13-16 ta mustra en cuanto Jehova su consideracion di un persona?

14. Kico ta característico di Jehova su pordonamentu?

15. Ki registro di pordonamentu Jehova tin?

16. Pakico nos por bisa cu Jesus su práctica di pordoná ta na armonia cu esun di Jehova?

17. Con Jesus a ilustrá Jehova su pordonamentu “den un gran manera”?

18. Con Pedro su punto di bista di pordoná tabata compará cu esun di Jesus?

19. Kico nos mester haci pa obtené Jehova su pordon?

20. Con Esteban a mustra cu e tabata dispuesto pa pordoná picá?

21. Pakico e echo cu Jesus tabata dispuesto pa pordoná e soldatnan romano tabata asina sobresaliente?

22. Cua palabranan for dje Sermon riba Ceru nos mester purba pone na práctica?

[Caption on page 24]

Natan a yuda David mira e necesidad di Dios su pordon

[Caption on page 26]

Bo Ta Corda?

◻ Con Jehova ta trata cu nos picánan, i pakico?

◻ Pakico Manases a ser restorá na su gobernacion real?

◻ Ki rasgo distintivo di Jehova su pordon ta un desafio pa hende imitá?

◻ Con e echo cu Jesus tabata dispuesto pa pordoná tabata asina sobresaliente?