Nan A Haña e Mesias!

“Nos a haña e Mesias.”​—JUAN 1:41.

 1. Kiko a sosodé promé ku Andres a bisa: “Nos a haña e Mesias”?

JUAN BOUTISTA tabata huntu ku dos di su disipelnan, Andres i Juan. I ora Hesus tabata kana bini serka nan, Juan Boutista a bisa: “Ata e Lamchi di Dios!” Mesora Andres i e otro disipel a sigui Hesus i nan a keda huntu kuné e dia ei. Despues, Andres a bai buska su ruman Simon Pedro, i ora el a hañ’é, el a bis’é: “Nos a haña e Mesias.” I Andres a hiba Pedro serka Hesus.​—Juan 1:​35-41.

 2. Kon nos lo benefisiá segun ku nos ta studia algun profesia mas tokante e Mesias?

² Atraves di tempu, Andres, Pedro i otronan lo a studia e Skritura kuidadosamente i, komo resultado di esei, nan lo a bisa ku konvikshon ku Hesus ta e Mesias primintí. Awor nos lo trata algun profesia mas ku ta mustra ken e Mesias ta. Esei lo fortalesé nos fe den Beibel i den esun ku Yehova a skohe pa bira e Mesias.

“Ata Bo Rei Ta Bini”

 3. Ki profesianan a kumpli ora Hesus a drenta Yerusalèm?

³ E Mesias lo a drenta Yerusalèm manera un rei. Zakarias su profesia ta bisa: “Regosihá grandemente, o yu muhé di Sion! Grita ku húbilo, o yu muhé di Yerusalèm! Ata bo rei ta bini serka bo; e ta hustu i ta trese salbashon, humilde i sintá riba un buriku, riba un buriku yòn, yu di un buriku muhé.” (Zak. 9:9) Un salmista a skirbi: “Bendishoná ta esun ku ta bini den e nòmber di [Yehova].” (Sal. 118:26) Segun ku Hesus tabata drenta Yerusalèm, un multitut di hende a grita e palabranan ei di alegria i asina a kumpli ku profesia. No ta Hesus a influensiá nan pa hasi esei. Segun ku bo ta lesa e relato, purba visualisá e esena i skucha e stèmnan di e hendenan ku tabata grita di alegria.​—Lesa Mateo 21:​4-9.

 4. Kon Salmo 118:​22 i 23 a kumpli?

⁴ Apesar ku hopi hende a rechasá Hesus komo e Mesias, e ta presioso den bista di Dios. Manera a ser profetisá, hende a “despresiá” Hesus i nan a ‘konsider’é sin balor.’ (Isa. 53:3, BPK; Mar. 9:12) No opstante, Beibel ta bisa: “E piedra ku e trahadónan a rechasá a bira e piedra-di-skina prinsipal. Esaki ta loke SEÑOR a hasi.” (Sal. 118:​22, 23) Hesus a hala atenshon na e profesia akí ora e tabata papia ku su enemigunan religioso. Apòstel Pedro a bisa ku esaki a haña su kumplimentu den Kristu. (Mar. 12:​10, 11; Echo. 4:​8-11) Sí, Hesus a bira e “piedra-di-skina” di e kongregashon kristian. Hende sin fe a rechasá Hesus komo e Mesias, pero ta e ta esun “skohí i presioso den bista di Dios.”​—1 Ped. 2:​4-6.

Un Disipel A Traishon’é i Otronan A Bandon’é

5, 6. (a) Segun e profesianan, kon e Mesias lo a ser traishoná? (b) Kon e profesianan akí a kumpli?

⁵ Segun un profesia bíbliko, un supuesto amigu lo a traishoná e Mesias. David a profetisá: “Mi amigu íntimo, den ken mi a konfia, kende a kome mi pan, a lanta su hilchi kontra mi.” (Sal. 41:9) Den tempu bíbliko, ora hende tabata kome pan huntu, esei a indiká ku nan tabata amigu di otro. (Gén. 31:54) Pues, e echo ku Hudas Iskariot a traishoná Hesus tabata algu masha teribel. Hesus a papia di dje ora el a bisa su apòstelnan: “Mi no ta papia di boso tur. Mi konosé esnan ku mi a skohe; ma ta pa e Skritura wòrdu kumplí: ‘Esun ku ta kome mi pan a lanta su hilchi kontra mi.’”​—Juan 13:18.

⁶ Esun ku lo a traishoná e Mesias lo a risibí 30 pida di plata, esta, e preis pa un esklabo! Mateo a bisa ku Hudas a traishoná Hesus pa solamente 30 pida di plata i ku di e manera ei e profesia di Zakarias 11:​12 i 13 a kumpli. Pero dikon Mateo a bisa ku esei a ser profetisá “dor di profeta Jeremias” siendo ku e profesia ta den e buki di Zakarias? Probablemente den tempu di Mateo, Jeremias tabata e promé buki den e kolekshon di buki bíbliko ku a ser yamá “e Profetanan.” E buki di Zakarias tambe tabata forma parti di e kolekshon ei. Pues, ora Mateo a menshoná “Jeremias,” e tabata referí na henter e parti di Skritura ku a karga nòmber di e promé buki, esta Jeremias. (Kompará ku Lukas 24:44.) Hudas nunka no a usa e 30 pidanan di plata; el a tira e plaka den tèmpel i a bai “horka su kurpa.”​—Mat. 26:​14-16; 27:​3-10.

 7. Kon Zakarias 13:7 a kumpli?

⁷ E disipelnan di e Mesias lo a bandon’é. Zakarias a bisa: “Dal e wardadó mata pa e karnénan wòrdu plamá.” (Zak. 13:7) Riba 14 di nisan di aña 33 di nos era, Hesus a bisa su disipelnan: “Awe nochi boso tur lo trompeká pa mi motibu, pasobra ta pará skirbí: ‘Lo mi dal e wardadó mata, i e karnénan di e tou lo wòrdu plamá.’” I esei ta eksaktamente loke a sosodé, pasobra Mateo a bisa ku ‘tur e disipelnan a bandoná Hesus i a hui bai.’​—Mat. 26:​31, 56.

Hende Lo A Akus’é i Gòlpi’é

 8. Kon Isaias 53:8 a kumpli?

⁸ Hende lo a hiba e Mesias dilanti di korte i konden’é na morto. (Lesa Isaias 53:8.) Mainta trempan riba 14 di nisan, tur e miembronan di Sanedrin a reuní. Nan a mara Hesus i a hib’é pa Gobernador Ponsio Pilato. Pilato a interogá Hesus i a konkluí ku Hesus no a hasi nada malu. Pero ora Pilato a puntra e multitut si nan kier a laga Hesus bai, nan a grita: “Klab’é na staka!” (NW) Nan a pidi pa pone e kriminal Barabas den libertat en bes di Hesus. Pilato kier a komplasé e multitut i p’esei el a laga Barabas bai. Despues, el a laga suta Hesus ku zuip i a entreg’é pa nan klab’é na staka.​—Mar. 15:​1-15.

 9. Kon e profesia di Salmo 35:11 a kumpli den kaso di Hesus?

⁹ Nan lo a duna testimonio falsu kontra e Mesias. E salmista David a bisa: “Testigunan malisioso ta lanta; nan ta puntra mi tokante di kosnan ku mi no sa.” (Sal. 35:11) I eksaktamente manera e profesia akí a bisa, “e saserdotenan prinsipal i henter e Konsilio [Sanedrin] tabata purba haña testimonio falsu kontra Hesus, pa nan por a laga mat’é.” (Mat. 26:59) Sí, “hopi hende tabata duna testimonio falsu kontra dje, ma nan testimonio no tabata kuadra ku otro.” (Mar. 14:56) E enemigunan furioso di Hesus no a wòri ku e hendenan su testimonio tabata falsu; e úniko kos ku nan tabata ke ta mira Hesus morto.

10. Splika kon Isaias 53:7 a kumpli.

¹⁰ E Mesias lo no a kontestá esnan ku a akus’é. Isaias a profetisá: “E tabata oprimí i e tabata afligí, tòg e no a habri su boka; manera un lamchi ku ta wòrdu hibá pa mata, i manera un karné ta ketu dilanti di su peladónan, asina e no a habri su boka.” (Isa. 53:7) Ora “ku e saserdotenan prinsipal i e ansianonan tabata [akusá Hesus], e no tabata kontestá nada.” Pilato a puntr’é: “Bo no ta tende kuantu kos nan ta testifiká kontra bo?” Pero Hesus “no tabata kontest’é riba ningun akusashon, asina ku e gobernador a keda masha strañá.” (Mat. 27:​12-14) Hesus no a insultá su enemigunan.​—Rom. 12:​17-21; 1 Ped. 2:23.

11. Kon Isaias 50:6 i Mikeas 5:1 a kumpli?

¹¹ Isaias a profetisá ku nan lo a gòlpia e Mesias. E profesia ta bisa: “Mi a entregá mi lomba na esnan ku ta gòlpia mi, i mi band’i kara na esnan ku ta ranka mi barba kit’afó; mi no a skonde mi kara pa humiashon i skupimentu.” (Isa. 50:6) I Mikeas a profetisá: “Ku un bara nan lo dal e hues di Israel na su band’i kara.” (Mik. 5:1) Marko a konfirmá ku e profesianan akí a kumpli, bisando: “Algun di nan a kuminsá skupi riba [Hesus], i tapa su kara, i dal e ku moketa, i bis’é: ‘Profetisá!’ I e ofisialnan a bòft’é den su kara.” Marko a bisa tambe ku sòldánan “a sigui dal e riba su kabes ku un richi, skupi riba dje, i nan tabata kai na rudia i bùig su dilanti [pa hasi bofon di dje].” (Mar. 14:65; 15:19) Ta klaru ku e hendenan no tabatin ningun motibu pa trata Hesus di e forma ei.

El A Keda Fiel te na Morto

12. Kon Salmo 22:16 i Isaias 53:12 a kumpli?

¹² E Mesias lo a muri na un staka. David a bisa: “Un trupa di hasidónan di maldat ta tur rònt di mi; nan a traspasá mi mannan i mi pianan.” (Sal. 22:16) Den un relato bíbliko bon konosí, e eskritor Marko a mustra kon e profesia akí a kumpli; el a bisa ku tabata nueb’or di mainta ora nan a klaba Hesus na staka. (Mar. 15:25) Un otro profesia ta bisa ku e Mesias lo a muri huntu ku pekadó. Isaias a bisa: “El a drama su bida te na morto, i a wòrdu kontá huntu ku e transgresornan.” (Isa. 53:12) E profesia akí a kumpli ora “dos ladron a wòrdu [klabá na staka] huntu [ku Hesus], un na man drechi i un na man robes.”​—Mat. 27:38.

13. Kon Salmo 22:​7 i 8 a kumpli den kaso di Hesus?

¹³ David a profetisá ku hende lo a insultá e Mesias. (Lesa Salmo 22:​7 i 8.) Hende a insultá Hesus na momento ku e tabata riba staka, pasobra Mateo a bisa ku “esnan ku tabata pasa, tabata blasfem’é i sagudí kabes, bisando: ‘Abo ku ta bai destruí e tèmpel i lant’é bèk den tres dia, salba bo mes! Si bo ta e Yu di Dios, baha for di e [staka] ei.’” E saserdotenan prinsipal, e eskribanan i e ansianonan tambe a hasi bofon di dje i a bisa: “El a salba otronan; e no por salba su mes. E ta Rei di Israel; lag’é baha for di e [staka] awor, i nos lo kere den dje. E ta konfia den Dios; laga Dios libr’é awor, si e tin goso den dje; pasobra el a bisa: ‘Ami ta e Yu di Dios.’” (Mat. 27:​39-43) Hesus a soportá tur e insultonan akí, kedando trankil i sin bisa nada malu. Esta un bon ehèmpel pa nos!

14, 15. Kon e profesianan di Salmo 22:18 i 69:21 a kumpli?

¹⁴ Nan lo a tira lòt riba e pañanan di e Mesias. David a bisa: “Nan ta parti mi pañanan entre nan, i nan ta tira lòt riba mi bistí.” (Sal. 22:18) Esei ta presis loke a sosodé, pasobra Beibel ta bisa ku “despues ku [e sòldánan romano a klaba Hesus na staka], nan a parti su pañanan entre nan dor di tira lòt.”​—Mat. 27:35; lesa Juan 19:24.

¹⁵ Nan lo a duna e Mesias binager i un supstansia marga pa bebe. Un profesia ta bisa: “Den mi kuminda nan a bruha venenu, pa mi set nan a duna mi binager.” (Sal. 69:21, BPK) Mateo ta bisa nos: “Nan a duna Hesus biña bruhá ku un supstansha marga bebe, ma ora El a purb’é, e no ker a beb’é.” Despues, “un di nan a kore bai kohe un spòns, dòp e den biña zür barata, pon’é na un pida palu i a duna Hesus bebe.”​—Mat. 27:​34, 48, BPK.

16. Splika kon e profesia na Salmo 22:1 a kumpli.

¹⁶ Lo a parse ku Dios a bandoná e Mesias. (Lesa Salmo 22:1.) Na armonia ku e profesia akí, “tres or di atardi Hesus a sklama na bos haltu: ‘Eloi, Eloi, lama sabaktani?’ ku tradusí ta nifiká: ‘Mi Dios, mi Dios, pakiko bo a bandoná mi?’” (Mar. 15:34) Hesus no a ekspresá e palabranan ei pa motibu ku el a pèrdè fe den su Tata selestial. E tabata sa ku Dios lo no a proteh’é for di su enemigunan na ora di su morto. Esaki tabata un oportunidat pa Hesus demostrá ku lo el a keda leal na Dios bou di tur sirkunstansia. Ora Hesus a bisa, “Mi Dios, mi Dios, pakiko bo a bandoná mi?” e profesia na Salmo 22:1 a kumpli.

17. Kon Zakarias 12:10 i Salmo 34:20 a kumpli?

¹⁷ Nan lo a hinka e Mesias, pero nan lo no a kibra su wesunan. E habitantenan di Yerusalèm lo a “mira . . . Esun ku nan a traspasá.” (Zak. 12:10) Salmo 34:20 ta bisa: “[Dios] ta kuida tur su wesunan; ningun di nan no ta wòrdu kibrá.” Apòstel Juan a konfirmá ku e profesianan akí a kumpli, bisando: “Un di e sòldánan a traspasá [Hesus] su kustia ku un lansa i mesora a sali sanger i awa. I esun ku a mira [esta Juan] a duna testimonio, i su testimonio ta berdadero . . . E kosnan akí a sosodé pa e Skritura por wòrdu kumplí: ‘Ni ún wesu di dje lo no wòrdu kibrá.’ I un otro skritura ta bisa: ‘Nan lo mira riba Esun ku nan a traspasá.’”​—Juan 19:​33-37.

18. Kon bin nan a dera Hesus huntu ku hende riku?

¹⁸ Nan lo a dera e Mesias huntu ku hende riku. (Lesa Isaias 53:​5, 8 i 9.) Atardi lat riba 14 di nisan, “un hòmber riku for di Arimatea ku yama Hosé” a pidi Pilato si e por a haña e kurpa di Hesus. Pilato a bai di akuerdo kuné. E relato di Mateo ta sigui bisa: “Hosé a tuma e kurpa i a lor’é den un pida tela di lino limpi, i a pon’é den su tumba nobo ku el a koba den un baranka; i el a lora un piedra grandi pone na entrada di e tumba, i a bai.”​—Mat. 27:​57-60.

Onra e Mesias, Nos Rei!

19. Kon e profesia na Salmo 16:10 a kumpli?

¹⁹ Yehova lo a resusitá e Mesias. David a bisa: “Lo bo no laga mi alma den Seol.” (Sal. 16:10, NW) Riba 16 di nisan, algun hende muhé a bai na e graf di Hesus. Imaginá bo kon sorprendí nan a keda ora nan a mira un angel sintá den e graf. E angel a bisa e muhénan: “No tene miedu. Boso ta buska Hesus di Názarèt, kende a wòrdu [klaba na staka]. El a resusitá; e no t’aki; mira e lugá kaminda nan a pon’é.” (Mar. 16:6) Despues, riba e dia di Pentekòste di aña 33 di nos era, apòstel Pedro a bisa un multitut na Yerusalèm: “[David] a mira padilanti i a papia di e resurekshon di e Kristu, ku e no a wòrdu lagá den Hades, ni su karni no a mira korupshon.” (Echo. 2:​29-31) Sí, Dios no a laga e kurpa di su Yu stimá putri. Ademas, Yehova a hasi un kos masha maravioso: El a resusitá Hesus pa e biba den shelu.​—1 Ped. 3:18.

20. Kiko a ser profetisá tokante e gobernashon di e Mesias?

²⁰ Dios lo a anunsiá ku Hesus ta su Yu. (Lesa Salmo 2:7; Mateo 3:17.) Ora Hesus a drenta Yerusalèm, un multitut di hende a onr’é i aklamá su Reino. Awe, nos tambe ta onra Hesus; ku goso nos ta papia tokante Hesus i su Reino. (Mar. 11:​7-10) Pronto Kristu lo “sali . . . pa kousa di bèrdat, humildat i hustisia” i lo e destruí su enemigunan. (Sal. 2:​8, 9; 45:​1-6) E ora ei lo e goberná henter e mundu i pas i prosperidat lo reina tur kaminda. (Sal. 72:​1, 3, 12, 16; Isa. 9:​6, 7) Yehova su Yu stimá, Hesukristu, ya kaba ta reina den shelu. Ta un gran onor di por ta Testigu di Yehova i pa konta otro hende tokante e bèrdatnan akí!

Kon Lo Bo Kontestá?

• Kon Hesus a ser traishoná i bandoná?

• Kon e profesianan tokante Hesus su morto a kumpli?

• Dikon bo ta sigur ku Hesus ta e Mesias primintí?

[Plachi na página 15]

Ki profesianan a kumpli ora Hesus a drenta Yerusalèm komo rei?

[Plachi na página 17]

Hesus a muri pa nos pikánan, pero awor e ta reina den shelu