Oponé Diabel i Su Trampanan

1, 2. Pa ken okashon di boutismo ta motibu di goso?

BO TIN hopi aña ta sirbi Yehova? Wèl, kasi sigur bo a tende masha hopi diskurso di boutismo na nos asamblea- i kongresonan. Pero maske bo tabata presente na hopi di e okashonnan ei, tòg kada biaha bo ta sinti bo konmoví ora bo mira e kandidatonan di boutismo, sintá den promé rei di e sala, lanta para pa hasi nan deklarashon públiko. I ora nan sali for di awa, e emoshon di e okashon ei sa resultá den un tremendo aplouso di parti di esnan presente. Kisas bo wowo ta asta yena ku awa ora bo mira ku un biaha mas un bunita grupo di persona a skohe e banda di Yehova. Ki un alegria nos ta sinti na momentonan asina!

² Por lo general, nos ta mira boutismo un par di biaha pa aña den nos área, pero e angelnan tin e privilegio di presensiá esei hopi mas biaha. Bo ta imaginá kuantu “goso [nan ta sinti] den shelu” ora ku tur siman nan ta mira míles di persona bira parti di e organisashon di Yehova riba tera? (Lukas 15:7, 10) Sin duda, e angelnan ta keda masha kontentu di mira e oumento akí!—Ageo 2:7.

 3. Dikon Satanas “ta kana rònt manera un leon ku ta grita,” i kiko e ke logra?

³ Pero no ta tur kriatura invisibel ta keda kontentu ora nan mira e okashonnan di boutismo ei. Satanas i e demoñonan ta furioso ku míles di hende ta bira lomba pa e mundu pèrvèrso akí. Dikon? Pasobra Satanas a laga sa na boka grandi ku hende no ta sirbi Yehova pa motibu ku di bèrdat nan stim’é i tambe ku ningun di nan lo keda fiel bou di prueba pisá. (Yòb 2:4, 5) P’esei, ora un hende disidí di dediká su bida na Yehova, e ta demostrá ku Satanas ta un mentiroso i ta dal e un bòftá den su kara, na moda di papia. Tur siman, Diabel ta haña míles di bòftá. Nada straño ku e “ta kana rònt manera un leon ku ta grita, buskando ken e por habraká [spiritualmente].” (1 Pedro 5:8) E “leon” akí ta hasi tur loke ta posibel pa daña òf asta kibra nos relashon ku Dios.—Salmo 7:1, 2; 2 Timoteo 3:12.

4, 5. (a) Yehova a limitá Satanas su influensia den kua dos manera importante? (b) Un kristian berdadero por ta sigur di kiko?

⁴ Pa brabu ku e “leon ku ta grita” ei ta, nos no tin nodi di laga miedu poderá di nos. Dikon? Pasobra Yehova a limitá su influensia den dos manera importante. Di promé, Satanas lo no por kaba nunka ku henter e pueblo di Dios. Anto e sa esei, pasobra Yehova a profetisá ku “un multitut grandi” di kristian berdadero lo sobrebibí e binidero “tribulashon grandi.” (Revelashon 7:9, 14) I loke Yehova profetisá semper ta kumpli!

⁵ Di dos, Satanas no por “habraká” ningun hende ku keda serka di Dios. Nos por dedusí esaki for di un bèrdat fundamental ku e fiel profeta Azarias a ekspresá ora el a bisa Rei Asa: “[Yehova] ta ku boso, miéntras boso ta kunÉ.” (2 Krónikanan 15:2, BPK; 1 Korintionan 10:13) Den Beibel tin un kantidat di ehèmpel di sirbidó di Dios ku no a kai pa motibu di e atakenan di Satanas. (Hebreonan 11:4-40) Pues, un kristian ku awe ta keda serka di Dios lo por oponé Diabel i asta vens’é. Esei ta loke e Palabra di Dios ta sigurá nos: “Oponé Diabel, i lo e hui for di boso.”—Santiago 4:7.

 6. Kon Satanas ta lucha kontra kristiannan individual?

⁶ Satanas no por gana e guera, na moda di papia, pero sí e por vense personanan individual ku no keda alerta. Kon asina? Satanas sa ku si e logra debilitá nos relashon ku Yehova, e tin chèns di “habraká” nos. P’esei e ta ataká nos na un manera intenso, personal i tramposo. Laga nos ban analisá e tres táktikanan akí.

 7. Dikon Satanas ta lansa atake intenso kontra e pueblo di Yehova?

⁷ Atake intenso. Apòstel Pablo a deklará ku “henter mundu ta den poder di e Malbado.” (1 Huan 5:19) Den e palabranan ei nos ta haña un spièrtamentu pa tur kristian. Komo ku Satanas a “habraká” henter e mundu malbado akí kaba, e por konsentrá awor riba esnan ku semper a skapa di su gara, esta, e pueblo di Yehova, i intensifiká su atake kontra nan. (Mikéas 4:1; Huan 15:19; Revelashon 12:12, 17) E ta hopi rabiá, pasobra e sa ku a ked’é masha poko tempu, i p’esei e ta pone mas preshon. Awe nos ta enfrentá su último intentonan, esnan di mas feros, pa kaba ku nos relashon ku Dios. Pues, awor mas ku nunka nos mester ‘komprondé den ki tempu’ nos ta biba pa nos por sa kiko nos mester hasi.—1 Krónikanan 12:32.

 8. Kiko apòstel Pablo tabata ke men ora el a bisa ku nos tin un “lucha” kontra e spiritunan malbado?

⁸ Lucha na nivel personal. Apòstel Pablo a spièrta e kristiannan: “Nos lucha [ta] kontra forsanan spiritual di maldat den lugánan selestial.” (Efesionan 6:12) E palabra griego tradusí komo “lucha” ta duna e idea di un kombate di distansia kòrtiku, un pelea man na man. E echo ku Pablo a usa e palabra ei ta enfatisá ku kada un di nos tin un lucha personal kontra e spiritunan malbado, sea ku nos ta biba den un pais kaminda hende ta kere den spiritu malbado òf nò. Nos no mester lubidá nunka ku e dia ku nos a dediká nos bida na Yehova ta komo si fuera nos a subi un rin di lucha libre. Di manera ku tur kristian, en todo kaso desde nan boutismo, ta den un pelea. No ta nada straño anto ku tres biaha Pablo a urgi e kristiannan na Efeso pa “para firme”!—Efesionan 6:11, 13, 14.

 9. (a) Dikon Satanas i su demoñonan ta usa vários ‘trampa’? (b) Dikon Satanas ta purba kontaminá nos manera di pensa, i kon nos por resistí su esfuerso? (Wak e kuadro “Tene Kuidou ku e Trampanan di Satanas!”) (c) Ki trampa di Diabel nos lo bai analisá awor?

⁹ Táktikanan tramposo. Pablo a animá kristiannan pa para firme kontra e “trampanan” di Satanas. (Efesionan 6:11) Dikon Pablo a menshoná ‘trampa’ na plural? Pasobra Diabel i su demoñonan no ta usa ún táktika so pa gaña nos, sino vários trampa. Anto nan ta hasi esei pa un motibu. Nan a ripará ku algun kristian ku a logra para firme kontra un prueba, despues ta kai pa un otro tipo di prueba. P’esei nan ta opservá e komportashon di kada un di nos pa haña sa kiko ta nos debilidat. Despues nan ta probechá di kualke debilidat ku nos por tin pa daña nos relashon ku Dios. Afortunadamente, nos por rekonosé hopi di e táktikanan di Diabel pasobra Beibel ta informá nos di nan. (2 Korintionan 2:11) Mas promé den e buki akí, nos a analisá kaba algun di e trampanan ei, entre otro, materialismo, mal asosiashon i inmoralidat seksual. Laga nos ban wak awor un otro trampa di Satanas: bruheria òf spiritismo.

10. (a) Kiko bruheria ta? (b) Kon Yehova ta mira bruheria, i kon abo ta mir’é?

¹⁰ Bruheria, òf spiritismo, ta enserá adivinashon (miramentu di destino), magia, plegamentu di hende, montamentu òf komunikashon ku e mortonan, uso di amuleto òf kontra, buskamentu di señal den soño i astrologia. Hende ku ta hasi e kosnan ei ta praktiká demonismo, pasobra nan ta drenta den kontakto direkto ku spiritu malbado. Manera nos sa bon, Yehova ta odia bruheria i ta konsider’é “un abominashon.” (Deuteronomio 18:10-12; Revelashon 21:8) Komo ku nos tambe mester “odia loke ta malu,” hamas nos lo hinka den nos kabes pa trata di asosiá ku e demoñonan. (Romanonan 12:9) Esei lo ta un akto repugnante di traishon kontra nos Tata selestial, Yehova!

11. Dikon pa Satanas lo ta un gran viktoria si e por tenta nos pa partisipá den bruheria? Ilustrá esei.

¹¹ Metementu den bruheria ta un traishon grave kontra Yehova. Ta p’esei Satanas ta hasi todo por todo pa pone algun di nos partisipá den dje. Kada biaha ku e pone un kristian akudí na demonismo, e ta logra un gran viktoria. Den ki sentido? Pa ilustrá esei, pensa riba un sòldá. Si e laga e enemigu konvens’é pa traishoná su ehérsito i djòin esun di e enemigu, su komandante nobo lo keda masha kontentu. Kisas lo e asta pensa di kana prònk ku e traidor manera un trofeo, pa asina insultá e komandante anterior di e sòldá. Meskos lo ta e kaso si un kristian disidí di praktiká bruheria. Konsientemente e ta skohe pa bandoná Yehova i pone su mes direktamente bou di mando di Satanas. Imaginá bo kon kontentu Satanas lo keda si e por prònk kuné manera un trofeo di guera! Nos lo ke dun’é e gustu ei? Apsolutamente ku nò! Nos no ta traidor.

12. Ki táktika Satanas ta usa pa influensiá nos punto di bista di bruheria?

¹² Tanten ku nos ta odia bruheria, Satanas lo no tin éksito serka nos. E sa esaki, i p’esei e ke kambia nos manera di pensa. Kon? E ta buska manera pa konfundí kristiannan te na e punto ku algun ta kuminsá pensa ku ‘loke ta malu, ta bon, i loke ta bon, ta malu.’ (Isaías 5:20) Pa logra esei e ta utilisá un di su táktikanan ku a resultá masha efektivo: usa pregunta ku ta sembra duda.

13. Duna algun ehèmpel di e manera ku Satanas a usa pregunta pa sembra duda?

¹³ Wak algun ehèmpel di e manera ku el a usa e táktika ei den pasado. Den hòfi di Edén, el a puntra Eva: “Di bèrdat Dios a bisa: ‘Bo no mag kome di ningun palu di e hòfi’?” Den tempu di Yòb, durante un reunion di e angelnan den shelu, Satanas a puntra: “Ta pòrnada Yòb ta teme Dios?” I na komienso di Hesus su sirbishi riba tera, Satanas a reta Kristu, bisando: “Si bo ta yu di Dios, bisa e piedranan akí bira pan.” Figurá bo, den kaso di Hesus, Satanas tabatin e tribilidat di hasi bofon di e palabranan ku Yehova mes a papia un seis siman promé: “Esaki ta mi Yu stimá, esun ku tin mi aprobashon.”—Génesis 3:1; Yòb 1:9; Mateo 3:17; 4:3.

14. (a) Kon Satanas ta usa e táktika di sembra duda tokante bruheria? (b) Kiko nos lo bai analisá awor?

¹⁴ Awe Diabel ta usa e mesun táktika ei den un intento pa krea duda tokante bruheria. Lamentablemente, el a logra sembra duda den mente di algun kristian, i nan a kuminsá kuestioná si di bèrdat sierto forma di bruheria òf spiritismo ta dje malu ei. Bon mirá, nan ta puntra nan mes: ‘Di bèrdat ta asina?’ (2 Korintionan 11:3) Kon nos por yuda e rumannan ei korigí nan punto di bista? Kon nos por hasi sigur ku e táktika ei di Satanas no ta influensiá nos? Pa kontestá e preguntanan ei, ban analisá dos área di bida ku Satanas a kontaminá na un manera astuto ku rasgonan di bruheria: entretenimentu i asuntu di salú.

15. (a) Kon hopi hende den e mundu oksidental ta mira bruheria? (b) Kon mundu su punto di bista di bruheria a influensiá algun kristian?

¹⁵ Mas i mas, nos por nota ku hende den e mundu oksidental no ta tuma bruheria, magia i otro formanan di spiritismo na serio. Un kantidat kresiente di pelíkula, buki, programa di televishon i wega di kòmpiuter ta presentá práktikanan demoniako komo si fuera nan ta algu prèt, ingenioso i inofensivo. Algun pelíkula i buki ku ta enfoká riba bruheria a bira asina popular ku nan tin ‘fan club.’ Ta bisto ku e demoñonan a logra konvensé e públiko ku bruheria no ta dje peligroso ei. Akaso e aktitut akí a influensiá algun kristian? Sí. Kon asina? Un ehèmpel típiko di esaki ta loke un ruman a bisa despues di a wak un pelíkula tokante bruheria: “Sí, mi a wak e pelíkula, pero esei no ke men ku mi a praktiká bruheria.” Dikon e forma di rasoná ei ta peligroso?

16. Dikon ta peligroso pa skohe entretenimentu ku ta enfoká riba práktikanan di bruheria?

¹⁶ Ta bèrdat ku tin un diferensia entre praktiká bruheria i sinta wak e, pero esei no ke men ku no tin ningun peliger den sinta wak e. Dikon nò? Wèl, pensa riba esaki: E Palabra di Dios ta indiká ku ni Satanas ni su demoñonan no por lesa nos mente.a Pues, manera nos a mira anteriormente, pa e spiritunan malbado haña sa kiko nos ta pensa i kiko ta debilitá nos relashon ku Dios, nan mester vigilá tur loke nos ta hasi, inkluso ki tipo di entretenimentu nos ta skohe. P’esei, ora un persona su komportashon ta mustra ku e ta gusta pelíkula òf buki tokante medium, hèks, hende poseí pa demoño i kosnan por estilo, e ta mandando un mensahe kla na e demoñonan. Bon mirá, e ta laga nan sa kiko ta su debilidat! Anto e demoñonan lo por probechá di esei pa intensifiká nan ‘pelea man na man’ kontra e kristian ei te ora ku nan logra tumb’é den rin, na moda di papia. De echo, entretenimentu ku ta kontené bruheria a lanta e interes di algun kristian den spiritismo i pone nan kuminsá praktik’é.—Galationan 6:7.

17. Ki trampa astuto Satanas por usa pa probechá di hende ku ta malu?

¹⁷ Satanas ta purba di probechá no solamente di nos deseo di dibertí, sino tambe di loke nos mester den asuntu di salú. Por ehèmpel, un kristian ku ta malu lo por bira deprimí si e mira ku ningun tratamentu no ta yud’é. (Marko 5:25, 26) Kon Satanas i e demoñonan por probechá di su desanimashon? Nan sa masha bon ku e Palabra di Dios ta spièrta nos pa no bai buska “yudansa di esnan ku ta hasi inikidat,” òf, “loke ta perhudisial.” (Isaías 31:2; NW) Pero pa pone un kristian pasa por haltu di e spièrtamentu ei, e demoñonan kisas ta tent’é pa, den su desesperashon, e aseptá un tratamentu ku ta kontené elementonan di spiritismo. Si e kristian kai den e trampa ei, esei sin duda lo daña su relashon ku Dios. Den ki sentido?

18. Ki tipo di tratamentu kristiannan ta rechasá, i dikon?

¹⁸ Yehova a spièrta e israelitanan ku a rekurí na “inikidat” òf poder sobrenatural pa yudansa: “Ora boso habri boso mannan den orashon, lo mi skonde mi wowonan pa boso; sí, maske boso hasi hopi orashon, lo mi no skucha.”b (Isaías 1:13, 15) Klaru ku nos lo no ke hasi nada ku ta pone Yehova sera su orea pa nos orashonnan i kita e sosten ku e ta duna nos, i foral ora nos ta malu. (Salmo 41:3) Pues, kiko si tin indikashon ku sierto tratamentu òf sistema di diagnostiká malesa ta kontené elemento di spiritismo? Komo kristian berdadero, nos ta rechasá nan redondamente.c (Mateo 6:13) Asina nos por ta sigur ku nos lo keda ku e sosten di Yehova.—Wak e kuadro “E Ta Konektá ku Bruheria?”

19. (a) Den ki trampa di Diabel hopi hende a kai? (b) Ki tipo di storia kristiannan berdadero mester evitá?

¹⁹ Miéntras ku hende den paisnan oksidental ta minimisá e peliger di e poder di Satanas, den otro partinan di mundu ta sosodé nèt lo kontrario. Na e lugánan ei, hopi hende a kai den e trampa di kere ku Diabel ta hopi mas poderoso di loke e ta realmente. Tin hende ta biba konstantemente ku miedu di demoño; ora nan ta kome, traha i drumi. Tin un kantidat di storia tokante aktonan poderoso di demoño, i hopi bes hende ta gusta konta nan pasobra esnan ku ta skucha nan ta keda fasiná. Akaso sirbidónan di Dios mester presta atenshon na e storianan ei òf yuda plama nan? Nò, i pa dos motibu importante.

20. Kon un persona por ta hasiendo propaganda pa Satanas, kisas sin ku e ta ripará?

²⁰ E promé motibu ta ku ora nos ta konta storia tokante hazaña di e demoñonan, nos ta promové e interesnan di Satanas. Kon asina? Wèl, aunke e Palabra di Dios ta rekonosé ku Satanas tin e kapasidat di hasi obra poderoso, e ta spièrta tambe ku e ta usa “señal i milager engañoso.” (2 Tesalonisensenan 2:9, 10) Siendo ku e ta e gañadó di marka mayor, e sa kon pa manipulá mente di hende ku ta ser atraí na bruheria i kon pa laga nan kere kosnan ku no ta bèrdat. Hende asina kisas ta ègt kere ku nan a mira i tende sierto kos, i podisé nan ta konta nan eksperensianan komo echo real. Nan storianan ta sigui pasa di un boka pa otro i ku tempu ta bira mas eksagerá. Kiko si un kristian mester plama e tipo di storianan ei? Bon mirá, e ta kolaborando ku Diabel, “e tata di mentira,” ya ku ta propaganda e ta hasi p’e!—Huan 8:44; 2 Timoteo 2:16.

21. Kiko mester ta e tema prinsipal di nos kòmbersashonnan?

²¹ Asta si un kristian di bèrdat a yega di eksperensiá atake di demoño, tin un di dos motibu pakiko lo e no ke entretené e rumannan kada bes ku e tipo di relatonan ei. Kua esei ta? Wèl, nos ke enfoká riba Kristu, no riba Satanas. Beibel ta urgi nos pa “fiha nos bista riba Hesus, e Representante Prinsipal di nos fe i Esun ku ta hiba esaki na perfekshon.” (Hebreonan 12:2) Ta bon pa tuma nota ku tempu Hesus tabata riba tera e no a entretené su disipelnan ku kuenta di spiritu, aunke sin duda e por a konta nan presis kiko Satanas por i no por hasi. Hesus a konsentrá mas bien riba e mensahe di Reino. P’esei, meskos ku Hesus i e apòstelnan, nos ke kòmbersá prinsipalmente tokante kosnan edifikante, manera “e obranan magnífiko di Dios.”—Echonan 2:11; Lukas 8:1; Romanonan 1:11, 12.

22. Kon nos por sigui kontribuí na “goso den shelu”?

²² Manera nos a mira, Satanas ke kibra nos relashon ku Yehova, i p’esei e ta usa vários trampa, entre nan, bruheria. Pero si nos ta odia loke ta malu i ta pega na loke ta bon, nos lo no duna Diabel chèns di debilitá nos determinashon di rechasá tur forma di bruheria. (Efesionan 4:27) Imaginá bo e gran ‘goso ku lo tin den shelu’ si nos keda “para firme kontra e trampanan di Diabel” te ora e ser destruí!—Efesionan 6:11.