Rikesa Por Haci Bo Felis?

Rey Sálomon tabata conocé e balor di placa. El a skirbi: “Pan ta pa e harimentu dje trahadónan, i biña mes ta alegrá bida; pero placa ta loke tin bon acohida den tur cos.” (Eclesiástes 10:19) Come cu amigunan por ta masha agradabel, pero pa bo obtené pan of biña, bo mester di placa. Ya cu placa ta e medio cu cua bo ta obtené cos material, e “tin bon acohida den tur cos.”

AUNKE Sálomon tabata increiblemente ricu, e tabata sa cu rikesa tin su limitacionnan. El a reconocé cu un moda di biba materialista no ta habri e porta pa felicidad. El a skirbi: “Un simpel stimadó di plata lo no ta satisfecho cu plata, ni ningun stimadó di rikesa cu entrada.”—Eclesiástes 5:10.

Suponé cu un persona ricu ta obtené asta mas rikesa. Sálomon ta bisa: “Ora cos bon bira hopi, esnan cu ta come nan sigur lo bira hopi.” (Eclesiástes 5:11) Segun cu un persona su “cos bon,” of posesionnan aumentá, mas hende ta necesario pa cuida nan. Mester paga drechadó, cuidadó, criá, guardia di siguridad i otronan pa nan servicionan. En buelta, esaki ta rekerí asta mas placa.

Un situacion asina tin un efecto directo riba un persona su felicidad. E historiadó griego Jenofonte, cu a biba den siglo cuater P.E.C., a skirbi e comentarionan di un homber pober cu a bira ricu:

“Wel, bo ta suponé eigenlijk . . . cu mas mi tin, mas felis mi ta biba?” El a sigui: “Bo no ta conciente cu come, bebe i drumi no ta duná mi niun tiki mas placer awor compará cu tempu mi tabata pober. Mi único ganashi for di asina tantu posicion ta cu mi ta obligá di soru pa mas, di distribuí mas na otronan i mi tin e molester di cuida mas di loke mi tabata acustumbrá. Pasobra awor aki hopi criá ta dependé di mi pa cuminda, hopi pa bebida, i hopi pa paña, miéntras cu algun mester di dokter; i un criá ta bini cerca mi cu un cuenta tocante carné cu lobonan a atacá, of di bue cu a cai muri den un abismo, of pa bisa cu un enfermedad a plama den e bacanan. I p’esei ta parcé mi . . . como si fuera mi tin mas molester awor dor di poseé hopi cu mi tabatin dor di poseé tiki.”

Un otro motibu pakico hende ta core tras di asta mas rikesa ta pasobra loke Jesucristo a yama “e poder engañoso di rikesa” ta seducí nan. (Mateo 13:22) Nan ta ser engañá pasobra den e rikesanan aki cu nan ta busca cu asina tantu fervor, nunca nan ta haña e satisfaccion of felicidad cu nan a spera di haña. Nan ta razoná cu loke poco rikesa no por haci, mas rikesa sí lo por haci. P’esei nan tin un lucha constante pa mas.

Amor pa Placa No Ta Hiba na Felicidad

E preocupacion cu un homber ricu tin pa cu su posesionnan por strob’é di disfrutá di un sosiegu trankil anochi. Sálomon ta skirbi: “Dushi ta e soño di esun cu ta rindi sirbishi, sea ta poco of hopi loke e ta come; pero e abundancia cu ta pertenecé na e ricu no ta permitié drumi.”—Eclesiástes 5:12.

Ora un hende bira demasiado preocupá tocante e posibel pérdida di su rikesa, mas ta enbolbí cu solamente falta di soño. Den Sálomon su descripcion di hende pichiri, e ta skirbi: “Tur su dianan e ta come den scuridad mes, cu bastante iritacion, cu enfermedad di su parti i causa pa indignacion.” (Eclesiástes 5:17) En bes di haña felicidad den su rikesa, e ta come cu “iritacion,” como si fuera e ta cudishá asta e placa cu e tin cu gasta na cuminda. Un actitud mental enfermo asina por afectá un hende su salú. Na su turno, problema cu salú ta aumentá e ansiedad dje persona pichiri, ya cu e ta strob’é di acumulá mas rikesa.

Tal bes esaki ta poné bo corda loke apostel Pablo a skirbi: “Esnan cu ta determiná di bira ricu ta cai den tentacion i un trampa i hopi deseo insensato i perhudicial, cu ta tira hende den destruccion i ruina. Pasobra amor pa placa ta rais di tur sorto di cos perhudicial, i percurando pa realisá e amor aki algun . . . a hinca nan mes tur caminda cu hopi dolor.” (1 Timoteo 6:9, 10) Den e corementu tras di placa, hende ta estafá, gaña, horta, prostituí nan mes i asta cometé asesinato. E resultado ta un persona hincá cu dolor emocional, físico i spiritual dor cu el a purba bira ricu. Esaki ta zona manera e caminda pa felicidad? Apénas!

Kedando Contentu cu Loke Nos Tin

Sálomon tabatin mas pa bisa tocante un punto di bista balansá di rikesa. El a skirbi: “Manera un hende a sali for di barica di su mama, sunú lo e bolbe bai, manera el a bini; i e no por hiba absolutamente nada pa su trabou duru, cu e por hiba cu su man. Mira! E mihó cos cu ami mes a mira, cu ta bunita, ta pa un hende come i bebe i mira e bon pa tur su trabou duru cu cua e ta traha duru bou di solo pa e cantidad di dianan di su bida cu e Dios berdadero a dun’é, pasobra esei ta su porcion.”—Eclesiástes 5:15, 18.

E palabranan aki ta mustra cu felicidad no ta sinta den purba acumulá rikesa pa un tempu ora tal bes nos lo no ta ni na bida. Ta muchu mas mihó pa keda satisfecho i pa alegrá den e resultadonan di nos trabou duru. Apostel Pablo a expresá un pensamentu similar den su carta inspirá na Timoteo, bisando: “Nos no a trece nada na mundu, ni tampoco nos no por hiba nada cu nos. Pues, teniendo cuminda, paña i dak, nos lo keda contentu cu esakinan.”—1 Timoteo 6:7, 8; compará cu Lucas 12:16-21.

E Clave pa Felicidad

Sálomon tabata poseé un abundancia di tantu rikesa como sabiduria piadoso. Pero el a conectá felicidad cu sabiduria, no cu placa. El a bisa: “Felis ta e homber cu a haña sabiduria, i e homber cu ta obtené dicernimentu, pasobra teniend’e como ganashi ta mihó cu teniendo plata como ganashi i teniend’e como producto, mas cu oro mes. E ta mas precioso cu coral, i tur bo otro deleitenan no por ser igualá cuné. Largura di dianan ta den su man drechi; den su man robes tin rikesa i gloria. Su camindanan ta camindanan agradabel, i tur su bereanan ta pas. E ta un palu di bida pa esnan cu ta gar’é, i esnan cu ta teniend’e firmemente gará mester ser yamá felis.”—Proverbionan 3:13-18.

Pakico sabiduria ta superior na posesion material? Sálomon a skirbi: “Sabiduria ta pa un proteccion mescos cu placa ta pa un proteccion; pero e bentaha di conocimentu ta cu sabiduria mes ta conserbá su doñonan bibu.” (Eclesiástes 7:12) Aunke placa ta duna un midí di proteccion i ta permití su doño cumpra loke e tin mester, sabiduria por protehá un persona di tuma riesgonan cu lo por pone su bida na peliger. Berdadero sabiduria no solamente por salba un persona for di un morto prematuro sino, siendo cu e ta basá riba un temor corecto di Dios, lo e hib’é na gana bida eterno.

Pakico sabiduria piadoso ta hiba na felicidad? Pasobra berdadero felicidad ta bini solamente for di Jehova Dios. Experencia ta proba cu hende por gana berdadero felicidad dor di obedecé e Haltísimo. Felicidad duradero ta dependé di un posicion aprobá dilanti Dios. (Mateo 5:3-10) Dor di aplicá loke nos ta siña for di studia Bijbel, nos lo cultivá “e sabiduria di ariba.” (Santiago 3:17) Lo e duna nos felicidad cu rikesa hamas por trece.

[Plachinan na página 4, 5]

Rey Sálomon tabata sa kico ta haci un hende felis. Abo sa?