Di Regreso na Paradijs

EN BISTA dje anhelo di hende pa Paradijs i e intentonan, tantu chikitu como grandi, pa recre’é, lo bo pensa cu pa awor aki e tera lo tabata un berdadero paradijs caba. Pero no ta asina.

En bes di esei, hende a duna prioridad na golosidad, cu hopi bes ta goberná a costo dje medio ambiente i su diversidad di cosnan bibiente. Keriendo cu rikesa material lo prevalecé, hopi hende a perde tur speransa cu e tera aki un dia lo ser transformá den un paradijs edénico. Mas bien, nan ta mira bida despues di morto den shelu como nan único speransa pa Paradijs. E punto di bista aki ta implicá, na promé lugá, cu nos anhelo humano pa Eden lo ser frustrá pa semper i, na di dos lugá, cu Dios a entregá e planeta aki na bobedad i golosidad humano. Esei ta asina? Kico exactamente futuro ta encerá? I na unda e futuro ei lo ta?

Paradijs—Den Shelu of Riba Tera?

Casi 2.000 aña pasá, papiando cu un ladron repentí clabá na staca banda di dje, Jesucristo a bisa: “Lo bo ta cu mi den Paradijs.” (Lucas 23:43) Acaso Jesus tabata kier men cu e ladron lo a bai shelu cuné? No.

E malechor lo no tabatin un idea asina mes. Di con no? Pasobra probablemente e tabata conocé pasashinan den e Scritura Hebreo, cu a existí den su dia, manera e promé parti di Salmo 37:29: “E hustunan mes lo poseé e tera.” Jesus a siña e mésun berdad ei, declarando: “Felis ta esnan di genio suave, ya cu nan lo heredá e tera.” (Mateo 5:5) E texto aki ta na armonia cu loke comunmente ta ser yamá e Oracion di Nos Tata, cual ta bisa: “Laga bo boluntad sosodé, mescos cu den shelu, tambe riba tera.”—Mateo 6:9, 10.

Bijbel ta siña cu Dios a crea e tera, no shelu, como e hogar pa e famia humano. Su Palabra ta declará cu e “no a crea [e tera] simplemente pa nada” sino “a form’é asta pa e ser habitá.” (Isaías 45:18) Pa cuantu tempu? “El a funda e tera riba su lugánan establecí; lo no lagu’e tambaleá te na tempu indefiní, ni pa semper.” (Salmo 104:5) Sí, “e tera ta permanecé asta pa tempu indefiní.”—Eclesiástes 1:4.

Ta Dios su propósito pa e gran mayoria di esnan cu ta sirbié haci e tera aki nan hogar pa semper. Tuma nota con e Palabra di Dios, e Bijbel, ta comentá riba esaki. Salmo 37:11 ta profetisá: “E mansunan mes lo poseé e tera, i nan berdaderamente lo haña nan deleite exkisito den e abundancia di pas.” Pa cuantu tempu? Salmo 37:29 ta bisa: “E hustunan mes lo poseé e tera, i nan lo biba pa semper riba dje.” N’e tempu ei e siguiente texto lo ser realisá: “Bo [Dios] ta habri bo man i ta satisfacé e deseo di tur cos bibiente,” esta, e deseo cu ta na armonia cu Dios su boluntad.—Salmo 145:16.

Kico di esnan cu no tin ningun deseo pa haci Dios su boluntad? Proverbionan 2:21, 22 ta bisa: “E rectonan ta esnan cu lo biba riba e tera, i esnan sin culpa ta esnan cu lo keda riba dje. En cuanto e malbadonan, nan lo ser cortá for dje tera mes; i en cuanto esnan traicionero, nan lo ser rancá for di dje.”

Paradijs Restorá

Pronto awor, Dios lo ehecutá su huicio contra e mundu malbado aki. (Mateo 24:3-14; 2 Timoteo 3:1-5, 13) Pero Dios lo preservá “un multitud grandi” di hende atrabes dje binidero destruccion pa drenta un mundu nobo cu e lo traha.—Revelacion 7:9-17.

E ora ei, Dios lo dirigí e tarea gososo cu su súbditonan humano lo tin di transformá henter e tera den un hogar paradísico pa humanidad. Bijbel ta primintí: “E desierto i e region sin awa lo hubilá, i e yanura di desierto lo ta gososo i lo florecé manera asafran. . . . Pasobra den e desierto awa lo brota, i riunan den e yanura di desierto.”—Isaías 35:1, 6.

Den e Paradijs ei cu lo sigui expandé, lo no tin hamber mas, ni pobresa, ni barionan pober, ni hende sin cas ni áreanan pestá cu crímen. “Lo yega di tin grano na abundancia riba e tera.” (Salmo 72:16) “E palu dje campo mester duna su fruta, i e tera mes lo duna su producto.” (Ezekiel 34:27) “Nan siguramente lo construí casnan i ocupá nan; i nan siguramente lo planta hofi di wijndruif i come nan fruta. Nan lo no traha cas i otro hende biba aden; nan lo no planta i otro hende come.” (Isaías 65:21, 22) “Nan realmente lo sinta, cada un bou di su palu di wijndruif i bou di su palu di figu, i lo no tin ningun hende cu ta haci nan tembla.”—Mikéas 4:4.

Pakico Algun Ta Bai Shelu

Mayoria hende probablemente lo admití cu nan tin un anhelo pa un paradijs terenal. Esei ta natural, ya cu Dios nunca a implantá den nan un anhelo pa bai shelu; nan no por ni imaginá nan con bida ta den shelu. Por ehempel, den un combersacion cu su pastor dje Iglesia di Inglatera, Pat, aunke e tabata un miembro deboto di misa, a bisa: “Nunca mi tabatin ningun pensamentu tocante bai shelu. Ami no kier bai, i ademas, kico lo mi bai haci einan?”—Compará cu Salmo 115:16.

Ta cierto cu Bijbel ta siña cu un cantidad limitá di hende, 144.000, lo bai shelu. (Revelacion 14:1, 4) Tambe e ta splica pakico: “Bo a haci nan ser un reino i sacerdotenan pa nos Dios, i nan tin cu reina como rey riba tera.” (Revelacion 5:9, 10) Huntu cu nan Rey, Jesucristo, e personanan aki ta forma e “reino,” e tera su gobiernu celestial nobo, pa cua cristiannan ta pidi den oracion. E gobiernu aki lo supervisá e rehabilitacion total dje tera i di humanidad.—Daniel 2:44; 2 Pedro 3:13.

Sin embargo, ya cu e deseo pa biba den shelu, di naturalesa, no ta presente den hende, un operacion único di Dios su spiritu “ta duna testimonio” cu e 144.000 pa nan sinti e “yamada . . . pa bai ariba” special aki. (Romanonan 8:16, 17; Filipensenan 3:14) Pero ta obvio cu un operacion asina mediante spiritu santu no ta necesario pa humanidad en general, pasobra nan hogar eterno lo ta riba un tera paradísico.

Un Paradijs Spiritual Ta Prepará e Caminda

Con un hende ta cualificá pa bida eterno den Paradijs riba tera? “Esaki ta nificá bida eterno,” Jesus a bisa, “cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Haciendo un coneccion entre relacionnan humano pacífico i un conocimentu di Dios, Isaías 11:9 ta declará: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.”—Compará cu Isaías 48:18.

E conocimentu aki, naturalmente, no ta djis conocimentu intelectual. E ta influenciá bo personalidad i ta cultivá cualidadnan piadoso, manera “amor, goso, pas, gran pacenshi, amabilidad, bondad, fe, suavedad, dominio propio.” (Galationan 5:22, 23) Testigonan di Jehova ta haci esfuerso pa cultivá e cualidadnan aki, i dje manera ei, asta awor, nan ta bendicioná cu un paradijs spiritual saludabel.—Isaías 65:13, 14.

Ki un contraste nan condicion spiritual ta cu esun dje mundu, cu ta lansa su mes den mas i mas maldad i corupcion! Sin embargo, pronto Dios lo destruí e mundu malbado aki. Miéntras tantu, Testigonan di Jehova ta invitá bo pa bishitá—sí, pa inspectá—e paradijs spiritual cu nan ta disfrutá di dje. Mira pa bo mes cu asta awor aki Jesus, e Rey celestial invisibel, ta dirigiendo futuro habitantenan dje mundu nobo ei silenciosamente via e caminda smal pa e Paradijs terenal i bida eterno!—Mateo 7:13, 14; Revelacion 7:17; 21:3, 4.

[Plachi na página 8, 9]

Sobrebibientenan dje mundu aki su fin lo disfrutá di tuma parti den transformá e tera den un paradijs