Con Bo Por Manehá un Cas?

 1. Pakico e maneho di un cas por ta asina difícil awe?

“E ESENA dje mundu aki ta cambiando.” (1 Corintionan 7:31) E palabranan ei a ser skirbí mas cu 1.900 aña pasá, i ki cierto nan ta awe! Cosnan ta cambiando, specialmente relacioná cu bida di famia. Loke tabata ser considerá como normal of tradicional 40 of 50 aña pasá, hopi bes no ta aceptabel awe. Pa motibu di esaki, manehando un cas exitosamente por presentá desafionan enorme. No obstante, si presta atencion na consehonan dje Scritura, bo por enfrentá e desafionan ei.

 2. Ki circunstancianan económico ta causa tension den un famia?

² Awe hopi hende no ta satisfecho mas cu un bida simpel i dedicá na famia. Segun cu e mundu di comercio ta producí mas i mas productonan i ta usa su medionan di propaganda pa trata na seducí e público, miyones di tata i mama ta dedicá hopi ora na trabou pa asina nan por cumpra e productonan aki. Miyones di otronan ta hiba un lucha diario djis pa pone poco cuminda riba mesa. Nan tin cu dedicá hopi mas tantu tempu na trabou cu ántes tabata e caso, kisas manteniendo dos trabou, simplemente pa paga pa nan necesidadnan. Sin embargo, otronan lo ta contentu pa haña un trabou, ya cu desempleo ta un problema general. Sí, bida no ta semper fácil pa e famia moderno, pero principionan bíblico por yuda famianan pa haci lo mihó cu nan por di acuerdo cu nan circunstancianan.

 3. Ki principio apostel Pablo a splica, i con aplicand’é por yuda un persona ser exitoso den manehá un cas?

³ Apostel Pablo a experenciá presionnan económico. Tratando cu nan, el a siña un les balioso, locual e ta splica den su carta na su amigu Timoteo. Pablo ta skirbi: “Nos no a trece nada na mundu, ni tampoco nos no por hiba nada cu nos. Pues, teniendo cuminda, paña i dak, nos lo keda contentu cu esakinan.” (1 Timoteo 6:7, 8) Ta cierto cu un famia mester di mas cu solamente cuminda i paña. Tambe e mester di un caminda di biba. E yunan mester di un educacion. I tin cuentanan di dokter i otro gastunan. No obstante, e principio di Pablo su palabranan ta aplicá. Si nos ta contentu pa satisfacé nos necesidadnan mas bien cu complacé nos deseonan, bida lo ta mas fácil.

4, 5. Con pensa adelantá i planeamentu por yuda den maneho di cas?

⁴ Un otro principio útil ta ser hañá den un di Jesus su ilustracionnan. El a bisa: “Cua di boso cu kier traha un toren no ta sinta promé i calculá e gastunan, pa wak si e tin suficiente pa complet’é?” (Lucas 14:28) Jesus ta papiando aki di pensa adelantá, planeando di antemano. Nos a mira den un capítulo anterior con esaki ta yuda ora un pareha hóben ta pensando pa casa. I despues dje matrimonio, e ta útil tambe pa manehá un cas. Pensa adelantá den e área aki ta enbolbé tin un presupuesto, planea adelantá pa haci e uso di mas sabí di recursonan disponibel. Den e manera aki un famia por controlá e gastunan, poniendo placa un banda pa dedicá na cosnan esencial di tur dia of tur siman, i no bibando fuera di su medionan di entrada.

⁵ Den algun pais, tal trahamentu di presupuesto lo por nificá cu mester resistí e impulso di fia na interesnan haltu pa haci compranan innecesario. Den otro paisnan, esei lo por nificá mantené un control estricto riba e uso di tarheta di crédito. (Proverbionan 22:7) Esei lo por nificá tambe resistí e impulso pa cumpra di ripiente, sin considerá e necesidad i consecuencianan. Ademas, un presupuesto lo haci cla cu gastando placa egoistamente den wega di placa, humamentu di tabaco i bebementu di mas ta perhudicá e famia su situacion económico, como tambe ta bai contra principionan bíblico.—Proverbionan 23:20, 21, 29-35; Romanonan 6:19; Efesionan 5:3-5.

 6. Cua berdadnan bíblico ta yuda esnan cu mester biba den pobresa?

⁶ Sin embargo, kico di esnan cu ta obligá di biba den pobresa? Pa cuminsá, nan por ser consolá sabiendo cu e problema mundial aki ta solamente temporal. Den e mundu nobo cu ta acercando rápidamente, Jehova lo eliminá pobresa huntu cu tur otro maldad cu ta causa miseria pa humanidad. (Salmo 72:1, 12-16) Miéntras tantu, cristiannan berdadero, asta si nan ta hopi pober, no ta sinti nan completamente desesperá, pasobra nan tin fe den Jehova su promesa: “Di ningun manera lo mi bandoná bo ni di ningun manera desampará bo.” P’esei, un creyente por bisa cu confiansa: “Jehova ta mi yudante; lo mi no tene miedu.” (Hebreonan 13:5, 6) Den e dianan difícil aki, Jehova a sostené su adoradornan den hopi manera ora nan ta biba di acuerdo cu su principionan i ta pone Dios su Reino na promé lugá den nan bida. (Mateo 6:33) Un gran cantidad di nan por testificá, bisando, cu e palabranan di apostel Pablo: “Den tur cos i den tur circunstancia mi a siña e secreto tantu di keda saciá como di tin hamber, tantu di tin un abundancia como di padecé necesidad. Mi tin forsa pa tur cos pa medio di esun cu ta duná mi poder.”—Filipensenan 4:12, 13.

 7. Ki palabranan di Jesus, si nan ser aplicá, lo yuda den un maneho exitoso di un cas?

⁷ Cerca e fin di su ministerio terenal, Jesus a bisa: “Bo mester stima bo próhimo mescos cu bo mes.” (Mateo 22:39) Aplicando e conseho aki den famia ta yuda enormemente den maneho di cas. Al fin i al cabo, ken ta nos próhimo mas yegá, mas stimá si no ta esnan cu ta compartí e cas di famia—esposo i esposanan, mayornan i yunan? Con miembronan di famia por mustra amor na otro?

 8. Con amor por ser expresá den e famia?

⁸ Un manera ta pa cada miembro di famia haci un parti razonabel di tareanan di cas. Pues, mester siña yunan pa warda cosnan despues di usa nan, sea ta paña of co’i hunga. Kisas ta tuma tempu i esfuerso pa drecha e cama tur mainta, pero esei ta un gran yudansa den e maneho dje cas. Naturalmente, algun desordu chikitu i temporal ta inevitabel, pero tur por traha huntu pa mantené e cas razonablemente na ordu, como tambe yuda limpia despues di comementu. Flohera, complacencia propio, i un spiritu di disgustu i mala gana tin un efecto negativo riba tur hende. (Proverbionan 26:14-16) Di otro un banda, un spiritu alegre i dispuesto ta promové un bida di famia felis. “Dios ta stima un dunador alegre.”—2 Corintionan 9:7.

9, 10. (a) Cua carga hopi bes ta riba e ama di cas, i con esaki por ser suavisá? (b) Ki punto di bista balansá di trabou di cas ta ser sugerí?

⁹ Amor i consideracion lo yuda prevení un situacion cu ta un problema serio den algun cas. Mamanan tabata tradicionalmente e sosten principal di bida di cas. Nan a cuida e yunan, a limpia cas, a laba paña dje famia, i a cumpra i cushiná e cuminda. Den algun pais, hende muher, tambe a custumbrá traha den cunucu, bende loke a producí na plasa, of a contribuí den otro maneranan n’e presupuesto di e famia. Asta caminda esaki no tabata e custumber anteriormente, necesidad a obligá miyones di muhernan casá pa busca trabou pafó di cas. Un esposa i mama cu ta traha duru den e diferente áreanan aki ta merecé encomendacion. Manera e “esposa capas” describí den Bijbel, e ta masha diligente. “E no ta come e pan di flohera.” (Proverbionan 31:10, 27) Sin embargo, esaki no ta nificá, cu un muher ta e único cu por traha na cas. Despues cu un esposo i esposa tur dos a traha henter dia pafó di cas, acaso e esposa so mester haci tur e trabou di cas miéntras cu e esposo i e resto dje famia ta sosegá? Siguramente cu no. (Compará cu 2 Corintionan 8:13, 14.) Pues, por ehempel, si e mama ta bai prepará un cuminda, lo e ta gradicidu si otro miembronan di famia yuda cu e preparacion dor di drecha e mesa, haci parti dje cómpras, of limpia un poco pafó di cas. Sí, tur por compartí e responsabilidad.—Compará cu Galationan 6:2.

¹⁰ Algun kisas ta bisa: “Caminda mi ta biba no ta e tarea di un homber pa haci tal cosnan.” Esei por ta cierto, pero lo no ta bon pa considerá e asuntu aki un poco? Ora Jehova Dios a originá e famia, e no a manda cu cierto trabou mester a ser hací solamente dor di hende muher. Na un ocasion, ora e fiel homber Abraham a haña bishita di mensaheronan special for di Jehova, e personalmente a participá den e preparacion i sirbimentu di cuminda n’e bishitantenan. (Génesis 18:1-8) Bijbel ta consehá: “Esposonan mester stima nan esposa mescos cu nan mes curpa.” (Efesionan 5:28) Si, na final dje dia, e esposo ta cansá i kier descansá, no ta probabel cu e esposa ta sinti mescos, kisas mas ainda? (1 Pedro 3:7) Anto, lo no ta apropiado i amoroso p’e esposo yuda na cas?—Filipensenan 2:3, 4.

11. Den ki manera Jesus a pone un ehempel excelente pa cada miembro di cas?

¹¹ Jesus ta e mihó ehempel di un persona cu a agradá Dios i a trece felicidad na su asociadonan. Aunke e nunca a casa, Jesus ta un bon ehempel pa esposonan, i tambe pa esposanan i yunan. El a bisa di su mes: “E Yu di hende a bini, no pa ser sirbí, sino pa sirbi,” esta, pa sirbi otronan. (Mateo 20:28) Ki agradabel ta e famianan den cua tur miembro ta cultivá un actitud asina!

12. Kico Jehova ta rekerí di esnan cu ta sirbié?

¹² Un otro principio bíblico cu por yuda den maneho di un cas ta ser hañá na 2 Corintionan 7:1. Ei nos ta lesa: “Laga nos limpia nos mes di tur sushedad di carni i spiritu.” Esnan cu ta obedecé e palabranan inspirá aki ta aceptabel pa Jehova, kende ta rekerí “adoracion cu ta limpi i sin mancha.” (Santiago 1:27) I nan cas ta ricibí beneficionan conectá cu esei.

13. Pakico limpiesa ta importante den e maneho di cas?

¹³ Por ehempel, Bijbel ta sigurá nos cu e dia lo yega ora malesa i enfermedad lo no t’ei mas. N’e tempu ei, “ningun habitante lo bisa: ‘Mi ta malu.’” (Isaías 33:24; Revelacion 21:4, 5) Sin embargo, te cu e tempu ei, tur famia mester atendé cu malesa de bes en cuando. Asta Pablo i Timoteo a bira malu. (Galationan 4:13; 1 Timoteo 5:23) Sin embargo, expertonan médico ta bisa cu hopi enfermedad por ser prevení. Famianan prudente ta scapa for di algun malesa cu por ser prevení si nan evitá impuresa carnal i spiritual. Laga nos considerá den ki manera.—Compará cu Proverbionan 22:3.

14. Den ki manera limpiesa moral por protehá un famia di enfermedad?

¹⁴ Limpiesa spiritual ta incluí limpiesa moral. Manera ta bon conocí, Bijbel ta promové normanan moral haltu i ta condená cualkier sorto di intimidad sexual pafó di matrimonio. “Ni fornicador, . . . ni adúltero, ni homber mantené pa propósito contra natural, ni homber cu ta drumi cu homber . . . lo heredá e Reino di Dios.” (1 Corintionan 6:9, 10) Observando e normanan estricto aki ta masha importante pa cristiannan cu ta biba den e mundu degenerá djawe. Haciendo esei ta agradá Dios i tambe ta yuda protehá e famia for di malesanan transmití sexualmente manera AIDS, sífilis, gonorea i clamidia.—Proverbionan 7:10-23.

15. Duna un ehempel di falta di limpiesa físico cu por causa enfermedad innecesario.

¹⁵ ‘Limpiando bo mes di tur sushedad di carni’ ta yuda pa protehá e famia for di otro enfermedadnan. Hopi malesa ta ser causá dor di un falta di limpiesa físico. E mihó ehempel ta e hábito di humamentu. Humamentu no solamente ta susha e pulmonnan, pañanan i e aire mes sino tambe e ta haci hende malu. Miyones di hende ta muri tur aña pasobra nan a huma tabaco. Pensa riba dje; tur aña miyones di hende lo no a bira malu i muri prematuramente si nan a evitá e “sushedad di carni” ei!

16, 17. (a) Cua ley duná dor di Jehova a protehá e israelitanan di cierto enfermedadnan? (b) Con e principio tras di Deuteronomio 23:12, 13 por ser aplicá den tur cas?

¹⁶ Considerá un otro ehempel. Rond di 3.500 aña pasá, Dios a duna e nacion di Israel su Ley afin di organisá nan adoracion i, te na cierto grado, nan bida di tur dia. E Ley ei a yuda pa protehá e nacion di malesa dor di establecé algun regla básico di higiena. Un ley asina tabatin di ber cu deshací di sushi humano, locual mester a ser bon derá pafó dje campamentu pa asina e área caminda hende tabata biba no ser contaminá. (Deuteronomio 23:12, 13) E ley antiguo ei te ainda ta bon conseho. Asta awe hende ta bira malu i muri pa motibu cu nan no ta siguié.a

¹⁷ Na armonia cu e principio tras dje ley israelita ei, e área di baño i w.c. dje famia—sea paden of pafó dje bibienda—mester ser mantené limpi i desinfectá. Si e área di w.c. no ser mantené limpi i tapá, muskitanan lo acumulá einan i plama microbionan na otro áreanan dje cas—i riba e cuminda cu nos ta come! Ademas, muchanan i adultonan mester laba nan man despues di bishitá e área di w.c. Di otro manera, nan ta trece microbionan bek huntu cu nan riba nan cueru. Segun un dokter frances, labamentu di man “te ainda ta un dje mihó garantianan pa e prevencion di cierto infeccionnan digestivo, respiratorio, of di cueru.”

18, 19. Ki sugerencianan ta ser duná pa mantené un cas limpi asta den un becindario pober?

¹⁸ Ta cierto cu, limpiesa ta un desafio den un becindario pober. Un persona cu ta familiarisá cu localidadnan asina a splica: “E clima extremadamente cayente ta haci e trabou di limpiesa dobel pisá. Bientu duru di stof ta cubri tur nachi di cas cu puiru maron fini. . . . Poblacionnan cu ta crece rápidamente den stadnan, como tambe den algun área di cunucu, tambe ta crea peliger pa salú. Beerputnan habrí, monton di basura cu nan no ta ser recogé, w.c.-nan público sushi, djaka, kakalaka i muskitanan cu ta carga malesa a bira un bista normal.”

¹⁹ Manteniendo limpiesa bou dje circunstancianan aki ta difícil. Tog, ta bale la pena e esfuerso. Habon i awa i un tiki trabou extra ta mas barata cu remedi i cuentanan di hospital. Si bo ta biba den un ambiente asina, te con leu cu ta posibel, mantené bo propio cas i cura limpi i liber di sushi di animal. Si e caminda pa yega bo cas tin tendencia di bira lodo durante periodonan di awaceru, lo bo por basha greis of pone piedra pa yuda tene e lodo pafó di cas? Si sapatu of sandalia ta ser usá, esakinan por ser kitá promé cu esun cu tin nan bistí drenta cas? Tambe, bo tin cu mantené bo suministro di awa liber di contaminacion. Ta ser calculá cu por lo ménos dos miyon morto pa aña ta debí na malesanan asociá cu awa sushi i higiena deficiente.

20. Si e cas mester ta limpi, ken mester compartí e responsabilidad?

²⁰ Un cas limpi ta dependé di tur hende—mama, tata, yunan i bishitantenan. Un mama di ocho yu na Kenya a bisa: “Tur hende a siña haci nan parti.” Un cas limpi i na ordu ta reflehá bon riba henter e famia. Un proverbio spañó ta declará: “No tin ningun conflicto entre pobresa i limpiesa.” Sea cu un persona ta biba den un mansion, un apartamento, un cas humilde, of un casita, limpiesa ta un clave pa un famia mas salú.

21. Na armonia cu Proverbionan 31:28, kico lo yuda trece felicidad den un cas?

²¹ Ora di considerá e esposa capas, e buki di Proverbionan ta bisa: “Su yunan a lanta i a procedé di declar’é felis; su doño ta lanta i ta elogi’é.” (Proverbionan 31:28) Na ki tempu tabata e último biaha cu bo a encomendá un miembro di bo famia? En realidad, nos ta manera matanan den tempu di primavera cu ta cla pa florecé ora nan ricibí un poco calor i awa. Den nos caso, nos mester dje calor di encomendacion. Ta bon pa un esposa sa cu su esposo ta apreciá su trabou duru i cuido amoroso i cu e no ta consider’é como algu di mes. (Proverbionan 15:23; 25:11) I ta un placer ora un esposa ta encomendá su esposo pa su trabou duru pafó i paden di cas. Yunan tambe ta florecé ora nan mayornan ta elogiá nan pa nan esfuersonan na cas, na scol of den e congregacion cristian. I cuantu un poco gratitud ta logra! Kico ta costa pa bisa: “Danki”? Masha tiki, pero e resultado p’e estado di ánimo dje famia por ta grandi.

22. Kico ta necesario pa un cas ta “firmemente establecí,” i con esaki por ser lográ?

²² Pa hopi motibu, e maneho di un cas no ta fácil. Tog, e por ser hací cu éxito. Un proverbio bíblico ta bisa: “Mediante sabiduria un cas lo ser edificá, i mediante perspicacia lo e resultá di ta firmemente establecí.” (Proverbionan 24:3) Sabiduria i dicernimentu por ser adkerí si henter e famia haci esfuerso pa siña e boluntad di Dios i aplik’é den nan bida. Un famia felis siguramente ta bal e esfuerso!