“Kana den Amor”

1-3. Ora nos imitá Yehova dor di mustra amor, kiko nos ta eksperensiá?

“TA MAS bendishoná pa duna ku pa risibí.” (Echonan 20:35) E palabranan aki di Hesus ta hala atenshon na un bèrdat importante: Amor inegoista ta un rekompensa riba su mes. Ounke nos ta haña hopi felisidat ora nos risibí amor, tin asta mas felisidat den duna òf demostrá amor na otronan.

² Niun hende no por komprondé esei mihó ku nos Tata selestial. Manera nos a mira kaba den e kapítulonan anterior di e sekshon aki, Yehova ta e ehèmpel máksimo di amor. Niun otro persona a yega di demostrá amor na un manera mas grandi, ni durante un periodo di tempu mas largu kuné. Pues, akaso mester straña nos ku Yehova ta ser yamá “e Dios felis”?—1 Timoteo 1:11, NW.

³ Nos Dios amoroso kier pa nos purba ta manera e, prinsipalmente den loke ta toka mustra amor. Efesionan 5:1 i 2 ta bisa nos: “Sea imitadónan di Dios, manera yunan stimá; i kana den amor.” Ora nos imitá Yehova dor di mustra amor manera e, nos ta eksperensiá e felisidat mayor ku dunamentu ta produsí. Ademas, nos ta sinti e satisfakshon di sa ku nos ta agradando Yehova, pasobra su Palabra ta animá nos fuertemente pa “stima otro.” (Romanonan 13:8) Pero tin mas motibu pa nos “kana den amor.”

4, 5. Dikon ta importante pa nos mustra amor apnegá na nos kompañeronan kreyente?

⁴ Dikon ta importante pa nos mustra amor na nos kompañeronan kreyente? Den poko palabra, pasobra amor ta esensia di kristianismo berdadero. Sin amor nos no por tin un relashon fuerte ku nos rumannan kristian, i, asta mas importante ainda, nos lo no nifiká apsolutamente nada den Yehova su bista. Wak kon e Palabra di Dios ta resaltá e bèrdatnan aki.

⁵ Riba Hesus su último anochi di bida na tera, el a bisa su siguidónan: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.” (Juan 13:34, 35) Ku e palabranan, “meskos ku ami a stima boso,” Hesus a ordená nos pa mustra amor meskos kuné. Na Kapítulo 29 nos a mira ku Hesus a pone un ehèmpel maestral di amor apnegá, dor di duna mas importansia na nesesidat i interes di otro hende ku na esnan di su mes. Nos tambe mester mustra amor sin egoismo, i nos mester hasié na un manera asina bisto, ku asta hende ku no ta forma parti di e kongregashon kristian por mir’é. Asina mes: amor apnegá entre rumannan ta e karakterístika ku ta identifiká nos komo berdadero siguidónan di Kristu.

6, 7. (a) Kon nos sa ku Yehova su Palabra ta duna hopi importansia na mustramentu di amor? (b) Pablo su palabranan registrá na 1 Korintionan 13:4-8 ta enfoká riba ki aspekto di amor?

⁶ Kiko ta pasa si nos falta amor? Apòstel Pablo a bisa: “[Si] mi no tin amor, mi a bira manera un gòng ku ta zona òf un simbal ku ta resoná.” (1 Korintionan 13:1) Un simbal ta produsí un zonidu fastioso ora dal riba dje. Kiko di un gòng? Un tradukshon ta usa e ekspreshon “un gòng ku ta hasi bochincha.” Esta apropiá e ilustrashonnan aki ta! Un hende sin amor ta manera un instrumento musikal ku ta saka un zonidu duru i iritante, ku ta kore ku hende en bes di atraé nan. Kon un hende asina por disfrutá di un relashon será ku otro hende? Tambe Pablo a bisa: “Si mi tin tur fe pa kita serunan di nan lugá, ma mi no tin amor, mi no ta nada.” (1 Korintionan 13:2) Imaginá bo, un hende sin amor ta “un don nadie ku no ta sirbi pa nada,” ni maske kuantu obra e efektuá! (The Amplified Bible) No ta keda bisto ku Yehova su Palabra ta duna hopi importansia na mustramentu di amor?

⁷ Pero kon nos por demostrá e kualidat aki den nos trato ku otro hende? Pa por kontestá esei, laga nos analisá loke Pablo a bisa na 1 Korintionan 13:4-8. Den e versíkulonan aki, e énfasis no ta riba e amor di Dios pa nos ni nos amor pa Dios. Mas bien Pablo ta enfoká aki riba kon nos mester demostrá amor na otro. El a deskribí sierto kosnan ku amor ta, i algun otro ku e no ta.

 8. Kon pasenshi por yuda nos den nos trato ku otronan?

⁸ “Amor tin pasenshi.” Pasenshi ta enserá ku nos ta soportá otro. (Kolosensenan 3:13) Esei ta nesesario? Ya ku nos ta kriaturanan imperfekto ku ta sirbiendo skouder ku skouder, ta kompletamente realístiko pa spera ku de bes en kuando nos rumannan kristian ta pone nos kunsumí, i visevèrsa. Pero pasenshi i toleransia por yuda nos soportá ora nos trapa otro su ded’i pia den nos trato di tur dia—sin ku e pas di e kongregashon mester sufri.

 9. Den ki maneranan nos por mustra bondat na hende?

⁹ “Amor ta kariñoso [òf, “bondadoso,” NW].” Bondat ta ser ekspresá dor di yuda hende i dor di papia ku nan ku konsiderashon. Amor ta motivá nos pa buska manera pa mustra bondat, prinsipalmente na hende den mas nesesidat. Por ehèmpel, kisas un ruman spiritual di edat ta solitario i tin mester di un bishita di animashon. Kisas un mama soltero, òf un ruman muhé den un famia kaminda no ta tur hende ta kompartí e mesun fe, tin mester di yudansa. Un persona enfermo òf ku ta pasando den un mal momentu por tin mester pa un amigu leal bis’é un par di palabra di konsuelo. (Proverbionan 12:25; 17:17) Ora nos tuma inisiativa pa mustra bondat na maneranan asina, nos ta demostrá ku nos amor ta berdadero.—2 Korintionan 8:8.

10. Kon amor ta yuda nos apoyá i papia e bèrdat asta ora no ta fásil?

¹⁰ “Amor . . . ta regosihá den e bèrdat.” Un otro tradukshon ta bisa: “Amor . . . ta tuma parti pa e bèrdat gososamente.” Amor ta motivá nos pa “papia bèrdat un ku otro.” (Zakarias 8:16) Por ehèmpel, si un ser stimá di nos a kai den piká serio, nos amor tantu pa Yehova komo pa esun ku a kometé e eror lo yuda nos aktua na armonia ku Dios su normanan, en bes di gaña tokante e malecho. Ta sierto sí ku tin bes ta duru pa nos enfrentá e bèrdat. Pero ya ku nos tin interes di nos stimá na pechu, nos kier pa e haña e disiplina amoroso di Dios i reakshoná faborablemente na dje. (Proverbionan 3:11, 12) Ademas, komo kristiannan amoroso, nos kier “komportá nos mes den tur kos na un manera onorabel [“onesto,” NW].”—Hebreonan 13:18.

11. Ya ku amor ‘ta tapa tur kos,’ kiko nos mester purba hasi tokante e defisiensianan di nos kompañeronan kreyente?

¹¹ ‘Amor ta tapa tur kos.’ Promé Pedro 4:8 ta bisa: “Amor ta kubri un multitut di piká.” Sí, un kristian ku ta laga amor gui’é lo no ta ansioso pa saka na kla tur imperfekshon i defisiensia di su rumannan kristian. Den hopi kaso, e eror- i fayonan di nos kompañeronan kreyente ta relativamente chikitu, di manera ku nos por usa e mantel di amor pa tapa nan kuné.—Proverbionan 10:12; 17:9.

12. Kon apòstel Pablo a mustra ku e tabata konfia Filemon, i kiko nos por siña for di Pablo su ehèmpel?

¹² ‘Amor ta kere tur kos.’ E tradukshon di Moffatt ta bisa aki ku amor “ta semper kla pa konfia.” Nos no ta sospechá nos kompañeronan kreyente sin bon motibu ni duda den nan intenshonnan konstantemente. Amor ta yuda nos “konfia” nos rumannan.a Nos por haña un ehèmpel di esaki den Pablo su karta na Filemon. Pablo a skirbi Filemon pa anim’é p’e risibí Onésimo ku bondat. Onésimo tabata un esklabo di dje ku a hui. El a bira un kristian, i awor e kier a bolbe serka Filemon. Na lugá di purba fòrsa Filemon, Pablo a apelá na dje a base di amor. El a mustra konfiansa ku Filemon lo aktua na e manera korekto, bisando: “Teniendo konfiansa den bo obedensia, mi ta skirbi bo, komo ku mi sa ku lo bo hasi asta mas ku loke mi ta bisa.” (Versíkulo 21) Ora amor motivá nos pa ekspresá nos mes ku konfiansa asina tokante nos rumannan, esei mes ta un motivashon pa nan mustra nan mihó kara.

13. Kon nos por mustra ku nos ta spera ku kos lo bai bon pa nos rumannan?

¹³ ‘Amor ta spera tur kos.’ Meskos ku amor tin konfiansa, e tin bon speransa tambe. Nos amor ta motivá nos pa spera ku kos lo bai bon pa nos rumannan. Por ehèmpel, si un ruman “dal un paso robes promé ku e realisá,” nos lo spera pa e reakshoná bon na e esfuersonan amoroso hasí pa yud’é mehorá. (Galationan 6:1, NW) Ademas nos ta keda karga speransa ku esnan ku ta suak den fe lo rekuperá. Nos ta karga pasenshi ku hende asina, hasiendo loke nos por pa yuda nan bira fuerte den fe. (Romanonan 15:1; 1 Tesalonisensenan 5:14) Asta si un hende ku nos ta stima tuma un mal rumbo, nos no ta pèrdè speransa ku un dia e lo bolbe na su sano huisio i bini bèk na Yehova meskos ku e yu pèrdí di e ilustrashon di Hesus.—Lukas 15:17, 18.

14. Den ki manera nos perseveransia por ser poní na prueba den e kongregashon, i kon amor por yuda nos reakshoná n’e manera korekto?

¹⁴ ‘Amor ta soportá tur kos.’ Dor di soportá ku perseveransia nos por keda firme apesar di desapunte i difikultat grandi. I no ta di pafó di e kongregashon so pruebanan di perseveransia ta bini: tin bes nan ta bini di paden tambe. Debí na imperfekshon, tin bes ku nos rumannan ta laga nos na kaya. Un komentario mal pensá por hasi nos tristu. (Proverbionan 12:18) Kisas tin un asuntu den e kongregashon ku no a ser tratá n’e manera korekto na nos opinion. Òf e kondukta di un ruman respetá por molestiá nos i pone nos pensa: ‘Kon por ta ku un kristian ta aktua asina?’ Ora nos enfrentá situashonnan asina, kiko nos lo hasi? Hala for di e kongregashon i stòp di sirbi Yehova? No si nos tin amor! Sí, amor ta yuda nos pa e fayonan di un ruman no siega nos di manera ku ya nos no por mira nada bon mas den dje, òf asta den henter e kongregashon. Amor ta permití nos keda fiel na Dios i apoyá e kongregashon apesar di loke otro hende imperfekto bisa òf hasi.—Salmo 119:165.

15. Kiko ta yalusí inkorekto, i kon amor ta yuda nos evitá e emoshon destruktivo ei?

¹⁵ ‘Amor no ta yalurs.’ Yalusí inkorekto por pone nos kuminsá sinti envidia debí na loke otro hende tin—nan pertinensianan, nan bendishonnan òf nan abilidatnan. E tipo di yalusí ei ta un emoshon egoista i destruktivo, i si nos no kontrol’é, e por afektá e pas di e kongregashon. Kiko lo yuda nos resistí e “tendensia envidioso” ei? (Santiago 4:5, NW) Den un solo palabra, amor. E kualidat presioso aki por yuda nos alegrá ku esnan ku ta parse di tin sierto bentahanan den bida ku nos mes no tin. (Romanonan 12:15) Amor ta yuda nos pa no kunsumí ora un hende risibí elogio pa un abilidat eksepshonal ku e tin, òf debí na un gran logro.

16. Si nos ta stima nos rumannan di bèrdat, pakiko nos lo evitá di gaba tokante loke nos ta hasiendo den Yehova su sirbishi?

¹⁶ “Amor no ta gaba, i no ta arogante.” Amor ta pone ku nos no ta bai gaba ku nos talento- i logronan. Ki nodi tin pa nos kana gaba konstantemente tokante nos logronan den sirbishi òf nos privilegionan den e kongregashon? Si nos gaba asina, esei por desanimá otronan i pone nan sinti nan mes inferior na komparashon ku nos. Amor ta pone ku nos no ta gaba tokante loke Dios ta permití nos hasi den su ministerio. (1 Korintionan 3:5-9) Kon ku bai bin, amor “no ta arogante,” òf, manera The New Testament in Modern English ta bisa, e no “tin idea.” Amor ta pone ku nos no ta haña un punto di bista muchu halsá tokante nos mes.—Romanonan 12:3.

17. Kon amor ta motivá nos pa mustra konsiderashon pa otro hende, i pues, ki sorto di kondukta nos lo evitá?

¹⁷ “Amor . . . no ta komportá su mes indesente.” Un hende ku aktua indesente ta komportá su mes na un manera ku no ta pas i ku ta ofendé otronan. E manera di trata ei no ta amoroso, pasobra e ta mustra un falta total di interes pa sintimentu i bienestar di otronan. Na kontraste, amor ta pone nos aktua ku grasia i mustra konsiderashon ku otro. Amor ta promové bon manera, kondukta ku Dios ta aprobá i rèspèt pa nos kompañeronan kreyente. Pues, amor lo no permití nos partisipá den “kondukta bergonsoso”—i de echo, ni aktua na un manera ku lo shòk òf ofendé nos rumannan kristian.—Efesionan 5:3, 4, NW.

18. Dikon un hende ku amor no ta eksigí pa tur kos bai manera e kier?

¹⁸ “Amor . . . no ta buska su propio interes.” Aki e Revised Standard Version ta bisa: “Amor no ke pa tur kos bai manera e kier.” Un hende ku amor no ta eksigí pa tur kos bai manera e kier, komo si fuera semper su opinion ta esun korekto. E no ta manipulá otro hende dor di usa su kapasidat di persuadí pa dominá hende ku tin un otro punto di bista. Un aktitut kabesura asina ta revelá un sierto grado di orguyo, i Beibel ta bisa: “Orguyo ta bin promé ku destrukshon.” (Proverbionan 16:18) Si nos ta stima nos rumannan di bèrdat, nos lo respetá nan punto di bista, i te kaminda ta posibel nos lo mustra ku nos ta dispuesto di sede. Un aktitut asina ta kuadra ku e palabranan aki di Pablo: “No laga niun hende buska su mes interes, sino esun di su próhimo.”—1 Korintionan 10:24.

19. Kon amor ta yuda nos reakshoná bon ora hende ofendé nos?

¹⁹ “Amor . . . no ta wòrdu provoká, e no ta warda renkor.” Amor no ta birá provoká fásil dor di loke otro hende bisa òf hasi. Klaru ku nos lo por kunsumí si un hende ofendé nos. Pero asta si nos rabia pa un motibu válido, amor lo no laga nos keda rabiá. (Efesionan 4:26, 27) Nos lo no tene un lista di e biahanan ku hende a bisa òf hasi kos ku a ofendé nos, manera un ‘boekhouder’ ta tene kuenta den buki pa nada no ser lubidá. En bes di esei, amor ta motivá nos pa imitá nos Dios amoroso. Manera nos a mira den Kapítulo 26, Yehova ta pordoná ora tin base. I ora e pordoná nos, e ta lubidá, esta, e no ta usa e pikánan ei kontra nos despues. Nos no ta kontentu ku Yehova no ta keda karga renkor?

20. Kon nos mester reakshoná si un kompañero kreyente kai den malecho i sufri e konsekuensianan?

²⁰ “Amor . . . no ta regosihá den inhustisia.” Aki The New English Bible ta bisa: “Amor . . . no ta disfrutá di otro hende su piká.” E tradukshon di Moffatt ta bisa: “Nunka amor no ta gosa ora un otro hende kometé un fayo.” Amor no ta sinti niun plaser den inhustisia, pues, nos no ta minimisá seriedat di ningun forma di inmoralidat. I kon nos ta reakshoná si un kompañero kreyente kai den piká i sufri e konsekuensianan? Amor lo no permití nos gosa i komo si fuera bisa: ‘Drechi! Bon p’e!’ (Proverbionan 17:5) Pero si un ruman ku a faya ta dal paso konkreto pa rekuperá di su kaida spiritual, e ora ei sí nos ta gosa.

21-23. (a) Kiko Pablo tabata kier men ora el a bisa ku “amor nunka no ta faya”? (b) Kiko nos ta bai trata den e último kapítulo?

²¹ “Amor nunka no ta faya.” Kiko Pablo tabata kier men ku e palabranan aki? Den e konteksto ei e tabata papiando di e donnan di spiritu ku tabatin entre e promé kristiannan. E donnan ei a sirbi komo señal di ku Dios su aprobashon tabata riba e kongregashon resien formá. Sin embargo, no ta tur kristian por a hasi kurashon, profetisá ni papia den lenga. Pero esei no tabata un problema; e donnan milagroso ei lo a kaba tòg un dia. Sin embargo, tabatin algu ku sí lo permanesé, algu ku tur kristian por desaroyá, algu mas ekselente i permanente ku kualkier don milagroso. De echo, Pablo a yam’é “un kaminda mas ekselente ainda.” (1 Korintionan 12:31) Kiko e “kaminda mas ekselente” aki tabata anto? E kaminda di amor.

²² Sí, e amor kristian ku Pablo a deskribí ‘no ta faya nunka,’ esta, nunka lo e no yega na su fin. Te dia djawe, amor apnegá di ruman ta sigui identifiká siguidónan berdadero di Hesus. Akaso nos no ta mira evidensia di e amor ei den kongregashonnan di adoradónan di Yehova rònt mundu? E amor ei lo dura pa semper, pasobra Yehova ta primintí su sirbidónan fiel bida eterno. (Salmo 37:9-11, 29) Laga nos sigui hasi nos bèst pa “kana den amor.” Asina nos lo eksperimentá e felisidat mayor ku duna ta produsí. I mas ainda, nos lo por sigui biba—i stima—pa henter eternidat, meskos ku nos Dios amoroso Yehova.

²³ Den e último kapítulo aki di e sekshon tokante amor, nos a trata kon nos por mustra amor pa otro. Pero ya ku nos ta benefisiá di Yehova su amor na asina tantu diferente manera—i no di su amor so, sino tambe di su poder, hustisia i sabiduria—ta na su lugá pa nos puntra nos mes: ‘Kon mi por mustra Yehova ku mi ta stim’é di bèrdat?’ Den nos último kapítulo nos lo trata e pregunta aki.