Haci Declaracion Público pa Salbacion

“Tur cu inbocá e nomber di Jehova lo ser salbá.”—ROMANONAN 10:13.

 1. Atrabes di historia, ki spiertamentunan a ser proclamá?

HISTORIA bíblico ta describí vários “dia di Jehova.” E Diluvio di dia di Noe, e anikilacion di Sódoma i Gomora, i e destruccion di Jerusalem na 607 P.E.C. i 70 E.C. tabata dianan grandi i inspirador di temor di Jehova. Nan tabata dianan pa ehecutá huicio contra esnan cu a rebelá contra Jehova. (Malakías 4:5; Lucas 21:22) Durante e dianan ei, hopi hende a perecé pa motibu di nan maldad. Pero algun a sobrebibí. Jehova a percurá pa duna spiertamentu, avisando e malbadonan dje cataclismo inminente i dunando esnan di curason onrado un oportunidad pa haña salbacion.

 2, 3. (a) Ki spiertamentu profético a ser citá na Pentecoste? (b) Desde Pentecoste 33 E.C., kico inbocá e nomber di Jehova a rekerí?

² E destruccion di Jerusalem na 70 E.C. ta un ehempel sobresaliente di esaki. Profetisando dje suceso ei casi 900 aña delantá, profeta Joël a skirbi: “Lo mi duna indicacionnan profético den shelu i riba tera, sanger i candela i pilarnan di huma. Solo mes lo cambia den scuridad, i luna den sanger, promé cu e binimentu dje dia di Jehova, grandi i inspirador di temor.” Con un hende por a sobrebibí un tempu asina spantoso? Joël a skirbi bou di inspiracion: “Tin cu sosodé cu tur cu inbocá e nomber di Jehova lo scapa a salbo; pasobra den Ceru di Síon i den Jerusalem lo resultá di tin esnan cu a scapa, manera Jehova a bisa, i entre e sobrebibientenan, cu Jehova ta yama.”—Joël 2:30-32.

³ Na Pentecoste 33 E.C., apostel Pedro a dirigí su mes na un multitud di hudiu i prosélito den Jerusalem i a cita Joël su profecia, mustrando cu su oyentenan por a spera un cumplimentu den nan tempu: “Lo mi duna indicacionnan profético den shelu ariba i señalnan riba tera abou, sanger i candela i neblina di huma; solo lo ser combertí den scuridad i luna den sanger promé cu Jehova su dia grandi i ilustre yega. I tur cu inbocá e nomber di Jehova lo ser salbá.” (Echonan 2:16-21) Tur e multitudnan cu a scucha Pedro tabata bou dje Ley di Moises, i p’esei nan tabata conocé e nomber di Jehova. Pedro a splica cu dje momento ei padilanti inbocá e nomber di Jehova lo a encerá algu mas. Esaki a incluí principalmente ser bautisá den e nomber di Jesus, esun cu a ser matá i despues resucitá pa bida celestial inmortal.—Echonan 2:37, 38.

 4. Ki mensahe cristiannan a declará na tur parti?

⁴ For di Pentecoste padilanti, cristiannan a plama e noticia tocante e Jesus resucitá. (1 Corintionan 1:23) Nan a duna di conocé cu sernan humano lo por a ser adoptá como yunan spiritual di Jehova Dios i bira parti di un ‘Israel nobo di Dios,’ un nacion spiritual cu lo a ‘declará na tur parti e excelencianan di Jehova.’ (Galationan 6:16; 1 Pedro 2:9) Esnan cu a permanecé fiel te na morto lo a heredá bida celestial inmortal como co-heredero cu Jesus den su Reino celestial. (Mateo 24:13; Romanonan 8:15, 16; 1 Corintionan 15:50-54) Ademas, e cristiannan aki mester a proclamá e binida di Jehova su dia grandi i inspirador di temor. Nan tabatin cu spierta e mundu hudiu cu lo el a experenciá un tribulacion cu lo a surpasá cualkier cos cu a bini riba Jerusalem i e pueblo hudiu te cu e tempu ei. Sin embargo, lo tabatin sobrebibiente. Ken? Esnan cu a inbocá e nomber di Jehova.

“Den e Ultimo Dianan”

 5. Ki profecianan a haña cumplimentu awe?

⁵ Den hopi manera, e condicionnan dje tempunan ei a prefigurá loke nos ta mira awe. Desde 1914, humanidad ta bibando den un periodo di tempu special cu Bijbel ta yama “e tempu di fin,” “e conclusion dje sistema di cosnan,” i “e último dianan.” (Daniel 12:1, 4; Mateo 24:3-8; 2 Timoteo 3:1-5, 13) Den nos siglo, gueranan cruel, violencia desenfrená, i e ruinamentu di sociedad i e medio ambiente a percurá un cumplimentu remarcabel di profecia bíblico. Esakinan tur ta parti dje señal cu Jesus a profetisá di dje, indicando cu humanidad ta cerca di experenciá Jehova su dia final, decisivo i inspirador di temor. Esaki ta culminá den e bataya di Armagedon, e clímax di un “tribulacion grandi tal como no a sosodé desde principio di mundu te awor, no, ni lo no sosodé atrobe.”—Mateo 24:21; Revelacion 16:16.

 6. (a) Con Jehova ta actuando pa salba e mansunan? (b) Unda nos ta haña Pablo su conseho riba con pa sobrebibí?

⁶ Segun cu e dia di destruccion ta yega cada bes mas cerca, Jehova ta actuando p’e salbacion di hende mansu. Durante e “tempu di fin” aki, el a reuní e último miembronan di e Israel spiritual di Dios i a dirigí e atencion di su sirbidónan terenal, for di añanan ’30 padilanti, na recogé “un multitud grandi, cu ningun hende por . . . conta, for di tur nacion i tribu i pueblo i lenga.” Como grupo, esakinan ta “sali for dje tribulacion grandi” cu bida. (Revelacion 7:9, 14) Pero con cada persona individual por sigurá su sobrebibencia? Apostel Pablo ta contestá e pregunta ei. Den Romanonan capítulo 10, e ta duna conseho excelente pa sobrebibencia—conseho cu a aplicá den su tempu i cu ta aplicá atrobe den nos tempu.

Un Oracion pa Salbacion

 7. (a) Ki speransa Romanonan 10:1, 2 ta resaltá? (b) Pakico Jehova por laga un “bon nobo” ser proclamá mas extensamente awor?

⁷ Ora Pablo a skirbi e buki di Romanonan, ya Jehova a rechasá Israel caba como nacion. Tog, e apostel a afirmá: “E bon boluntad di mi curason i mi súplica na Dios pa nan ta, en berdad, pa nan salbacion.” Su speransa tabata pa hudiunan individual por a gana conocimentu exacto dje boluntad di Dios, cu lo a hiba na nan salbacion. (Romanonan 10:1, 2) Ademas, Jehova lo a deseá salbacion pa esnan den henter e mundu di humanidad cu ta ehercé fe, manera Juan 3:16 ta indicá: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” E sacrificio di rescate di Jesus a habri caminda p’e magnífico salbacion ei. Mescos cu den e dia di Noe i otro dianan di huicio cu a sigui, Jehova a laga “bon nobo” ser proclamá, señalando n’e caminda di salbacion.—Marco 13:10, 19, 20.

 8. Imitando Pablo su patronchi, na ken cristiannan berdadero ta extendé bon boluntad awe, i den ki manera?

⁸ Mustrando su mes bon boluntad pa cu tantu hudiu como gentil, Pablo a predicá na tur oportunidad. E “tabata convencé hudiunan i griegonan.” El a bisa e ancianonan di Efeso: “Mi no a nenga di bisa boso ningun dje cosnan cu tabata probechoso ni di siña boso públicamente i di cas pa cas. Sino mi a duna testimonio cabalmente tantu na hudiu como na griego tocante repentimentu pa cu Dios i fe den nos Señor Jesus.” (Echonan 18:4; 20:20, 21) Di igual manera, Testigonan di Jehova awe ta dedicá nan mes den e trabou di predicacion, no solamente na hende di cristiandad, sino na tur pueblo, asta te na “e parti mas lehano dje tera.”—Echonan 1:8; 18:5.

Confesando “e ‘Palabra’ di Fe”

 9. (a) Ki clase di fe Romanonan 10:8, 9 ta animá nos pa tin? (b) Na ki tempu i con nos mester haci confesion di nos fe?

⁹ Salbacion ta rekerí un fe duradero. Citando Deuteronomio 30:14, Pablo a declará: “‘E palabra ta cerca bo, den bo mes boca i den bo mes curason’; esta, e ‘palabra’ di fe, cu nos ta predicá.” (Romanonan 10:8) Segun cu nos ta predicá e “‘palabra’ di fe” ei, e ta ancra mas i mas profundamente den nos curason. Esei tabata e caso cu Pablo, i su siguiente palabranan por fortalecé nos determinacion pa ta mescos cuné den compartí e fe ei cu otronan: “Si bo ta declará públicamente e ‘palabra ei den bo mes boca,’ cu Jesus ta Señor, i ta ehercé fe den bo curason cu Dios a lant’é for di morto, lo bo ser salbá.” (Romanonan 10:9) Nos no mester haci e confesion aki solamente dilanti otronan n’e ora di bautismo, sino e mester ta un declaracion continuo, un testimonio público celoso tocante tur e magnífico facetanan dje berdad. E berdad ei ta enfocá riba e nomber precioso di Señor Soberano Jehova; riba nos Rey Mesiánico i Rescatador, Señor Jesucristo; i riba e magnífico promesanan di Reino.

10. Na armonia cu Romanonan 10:10, 11, con nos tin cu manehá e “‘palabra’ di fe” aki?

¹⁰ No tin salbacion pa ningun hende cu no ta aceptá i aplicá e “‘palabra’ di fe” aki, manera e apostel ta sigui declará: “Cu curason hende ta ehercé fe pa husticia, pero cu boca hende ta haci declaracion público pa salbacion. Pasobra e Scritura ta bisa: ‘Ningun cu pone su fe den dje lo keda desapuntá.’” (Romanonan 10:10, 11) Nos tin cu gana conocimentu exacto dje “‘palabra’ di fe” aki i sigui nutri nos curason cuné di manera cu nos ta ser motivá pa papia tocante dje cu otronan. Jesus mes ta recordá nos: “Ken cu tin bergwensa di mi i di mi palabranan den e generacion adúltero i pecaminoso aki, e Yu di hende tambe lo tin bergwensa di dje ora e yega den e gloria di su Tata cu e angelnan santu.”—Marco 8:38.

11. Con extenso e bon nobo mester ser proclamá, i pakico?

¹¹ Manera profeta Daniel a predicí, den e tempu di fin aki, hende ta mira “esnan cu tin perspicacia” briya “manera e resplandor dje expansion,” segun cu e testimonio di Reino ta plama te na e extremidad dje tera. Nan “ta trece e hopi hendenan na husticia,” i e berdadero conocimentu en berdad a bira abundante, pasobra Jehova ta tirando lus cada bes mas briyante riba e profecianan relacioná cu e tempu di fin aki. (Daniel 12:3, 4) Aki tin un mensahe di salbacion cu ta vital p’e sobrebibencia di tur esnan cu ta stima berdad i husticia.

12. Con Romanonan 10:12 ta cuadra cu e comision dje angel describí na Revelacion 14:6?

¹² Apostel Pablo ta continuá: “No tin distincion entre hudiu ni griego, pasobra tin e mésun Señor riba tur, kende ta ricu pa cu tur esnan cu ta inbok’é.” (Romanonan 10:12) E “bon nobo” tin cu ser predicá awe riba un escala mundial asta mas amplio—na tur pueblo, te na e extremidad mes dje tera. E angel di Revelacion 14:6 ta sigui bula meimei di shelu, encargando nos cu e “bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo.” Con esaki lo beneficiá esnan cu ta reaccioná faborablemente?

Inbocando e Nomber di Jehova

13. (a) Kico ta nos texto di aña pa 1998? (b) Pakico e texto di aña aki ta masha apropiado awe?

¹³ Citando Joël 2:32, Pablo ta declará: “Tur cu inbocá e nomber di Jehova lo ser salbá.” (Romanonan 10:13) Ta ki apropiado cu e palabranan ei a ser scogé como e texto di aña di Testigonan di Jehova pa 1998! Nunca promé tabata mas importante pa move bai padilanti cu confiansa den Jehova, haciendo su nomber i e propósitonan magnífico pa cua e ta para, conocí! Mescos cu den e promé siglo, asina den e último dianan dje actual sistema corupto di cosnan, e gritu resonante ta sali: “Salba boso mes for dje generacion perverso aki.” (Echonan 2:40) Esei ta un invitacion manera un zonido di trompet pa tur hende temeroso di Dios rond mundu pa nan inbocá Jehova pa otorgá salbacion na nan i tambe na esnan cu ta scucha na nan declaracion público dje bon nobo.—1 Timoteo 4:16.

14. Cua Baranca nos tin cu inbocá pa salbacion?

¹⁴ Kico lo sosodé ora e gran dia di Jehova dal aden riba e tera aki? Mayoria hende lo no acudí na Jehova pa salbacion. Humanidad en general lo “sigui bisa e cerunan i e barancanan: ‘Cai riba nos i sconde nos for dje cara di Esun sintá riba e trono i for dje rabia dje Lamchi.’” (Revelacion 6:15, 16) Nan speransa lo ta den e organisacionnan i institucionnan parecido na ceru dje sistema di cosnan aki. Sin embargo, cuantu mas mihó lo no ta si nan a confia den e Baranca mas grandi cu tur, Jehova Dios! (Deuteronomio 32:3, 4) Di dje Rey David a bisa: “Jehova ta mi baranca i mi fortalesa i e Percurador di escape pa mi.” Jehova ta “nos Baranca di salbacion.” (Salmo 18:2; 95:1) Su nomber ta “un toren fuerte,” e único “toren” suficiente fuerte pa protehá nos durante e crísis binidero. (Proverbionan 18:10) P’esei, ta vital pa mas tantu hende posibel dje casi seis mil miyon hende na bida awe ser siñá pa inbocá e nomber di Jehova den fieldad i sinceridad.

15. Kico Romanonan 10:14 ta indicá pa loke ta trata fe?

¹⁵ Apropiadamente, apostel Pablo ta sigui puntra: “Con nan lo inbocá esun den ken nan no a pone fe?” (Romanonan 10:14) Tin multitud di hende cu ainda nos por yuda haci “e ‘palabra’ di fe” di nan mes, pa nan por inbocá Jehova pa salbacion. Fe ta vital. Pablo ta declará den un otro carta: “Sin fe ta imposibel pa agradá [Dios] bon, pasobra esun cu ta acudí na Dios mester kere cu e ta existí i cu e ta bira recompensador di esnan cu ta busk’é cu empeño.” (Hebreonan 11:6) Pero con miyones di hende mas lo bin pone fe den Dios? Den e carta n’e romanonan, Pablo ta puntra: “Con, en buelta, nan lo pone fe den esun di ken nan no a tende?” (Romanonan 10:14) Jehova ta percurá e medionan pa nan tende? Sigur cu sí! Scucha e siguiente palabranan di Pablo: “Con, en buelta, nan lo tende sin un hende pa predicá?”

16. Den e areglo divino, pakico predicadónan ta esencial?

¹⁶ For di Pablo su argumento ta mas cla cu di dia cu tin mester di predicadó. Jesus a indicá cu esei lo ta e caso, siguiendo “te n’e conclusion dje sistema di cosnan.” (Mateo 24:14; 28:18-20) E trabou di predicá ta un parti esencial dje areglo divino pa yuda hende inbocá e nomber di Jehova pa por ser salbá. Asta den cristiandad e mayoria no ta haci nada pa onra e nomber precioso di Dios. Hopi hende totalmente despistá a confundí Jehova cu dos otro identidad den un doctrina inexplicabel di Trinidad. Tambe, hopi ta cai den e categoria di personanan di cua Salmo 14:1 i 53:1 ta papia di dje: “Esun bobo a bisa den su curason: ‘No tin Jehova.’” Nan tin cu sa cu Jehova ta e Dios bibu, i nan tin cu comprendé tur loke su nomber ta nificá pa nan por ser salbá den e binidero tribulacion grandi.

E ‘Pianan Bunita’ dje Predicadónan

17. (a) Pakico ta apropiado pa Pablo cita un profecia di restoracion? (b) Kico ta nificá tin ‘pianan bunita’?

¹⁷ Apostel Pablo tin un pregunta vital mas: “Con, en buelta nan lo predicá a ménos cu nan a ser mandá? Net manera ta pará skirbí: ‘Ki bunita ta e pianan di esnan cu ta declará bon nobo di bon cosnan!’” (Romanonan 10:15) Aki Pablo ta cita Isaías 52:7, cu ta parti di un profecia di restoracion cu a aplicá desde 1919. Awe, un biaha mas, Jehova ta manda “esun cu ta trece bon nobo, esun cu ta publicá pas, esun cu ta trece bon nobo di algu mihó, esun cu ta publicá salbacion.” Obedientemente, e “vigilantenan“ ungí di Dios i nan compañeronan ta sigui sclama gososamente. (Isaías 52:7, 8) E pianan di esnan cu ta publicá salbacion awe kisas por cansa, asta susha na stof, segun cu nan ta cana di cas pa cas, pero cuantu nan cara ta briya di goso! Nan sa cu ta Jehova a comisioná nan pa proclamá bon nobo di pas i pa consolá esnan na luto, yudando esakinan inbocá e nomber di Jehova cu mira riba salbacion.

18. Kico Romanonan 10:16-18 ta bisa pa loke ta e resultado final di zonamentu dje bon nobo?

¹⁸ Sea hende ta “pone fe den loke nan a tende” of nan ta scoge pa desobedec’é, Pablo su palabranan ta zona cierto: “Nan no a keda sin tende, no ta berdad? Pues, en berdad, ‘nan zonido a sali den tur e tera, i nan declaracionnan te n’e extremidadnan dje tera habitá.’” (Romanonan 10:16-18) Mescos cu “shelunan ta declarando e gloria di Dios,” manera su obranan di creacion ta manifestá, asina su Testigonan riba tera tin cu proclamá “e aña di bon boluntad di parti di Jehova i e dia di vengansa di parti di nos Dios . . . pa consolá tur esnan cu ta di luto.”—Salmo 19:1-4; Isaías 61:2.

19. Kico lo ta e resultado pa esnan cu ta “inbocá e nomber di Jehova” awe?

¹⁹ Jehova su dia grandi i inspirador di temor ta acercando mas i mas cerca. “Ai dje dia; pasobra e dia di Jehova ta cerca i lo e bini manera un plundermentu violento for dje Todopoderoso!” (Joël 1:15; 2:31) Nos ta pidi den oracion pa multitud di hende mas respondé mas pronto posibel n’e bon nobo, i basha bini n’e organisacion di Jehova. (Isaías 60:8; Habacuc 2:3) Corda cu e otro dianan di Jehova a trece destruccion riba hende malbado—den dia di Noe, den dia di Lot, i den e dianan di Israel i Huda apóstata. Nos ta pará actualmente na drempel dje tribulacion mas grandi cu tur, ora Jehova su tempestad di bientu bari maldad for di e cara dje tera aki, habriendo caminda pa un paradijs di pas eterno. Abo lo ta un di esnan cu ta “inbocá e nomber di Jehova” den fieldad? Si ta asina, alegrá! Dios mes ta primintí bo cu lo bo ser salbá.—Romanonan 10:13.

Con Lo Bo Contestá?

◻ Ki cosnan nobo a ser proclamá despues di Pentecoste 33 E.C.?

◻ Den ki manera cristiannan mester presta atencion na “e ‘palabra’ di fe”?

◻ Kico ta nificá “inbocá e nomber di Jehova”?

◻ Den ki sentido mensaheronan di Reino tin ‘pianan bunita’?

[Plachinan na página 18]

E pueblo di Dios ta declarando su excelencianan na Puerto Rico, Senegal, Perú, Papua Nueva Guinea—sí, rond mundu